Ñambaʼapo kyreʼỹkena Jehovápe g̃uarã

‘Akóintekena pembaʼapo kyreʼỹ Ñandejára rembiapópe.’ (1 COR. 15:58, ÑÑB)

1. Mbaʼépa Jesús heʼi hemimboʼekuérape ojapo hag̃ua?

 PE ÁÑO 30 opapotávo Jesús ojapo peteĩ viáhe Samáriape, ha opyta opytuʼu peteĩ póso mátape táva Sicar ypýpe. Upérõ heʼi hemimboʼekuérape: ‘Pejesaupína ha pemañami umi kokuére, mbaʼeichaitépa morotĩmba, umi kóga oĩma oñemonoʼõ hag̃uáicha’ (Juan 4:35, JMP). Jesús ndeʼíri chupekuéra oho hag̃ua omonoʼõ kóga, heʼi guei chupekuéra oho hag̃ua oipytyvõ umi ipyʼaporãvape oiko hag̃ua chuguikuéra hemimboʼe. Péicha heʼi chupekuéra ombaʼapo kyreʼỹ hag̃ua, pórke hetaiterei hembiaporã hikuái ha saʼipaitéma itiémpo upearã.

2, 3. a) Mbaʼérepa ikatu jaʼe koʼág̃a rupi pe kogaty morotĩmbamaha oñemonoʼõ hag̃ua? b) Mbaʼépa ñahesaʼỹijóta ko artíkulope?

² Pe Jesús heʼivaʼekue hemimboʼekuérape iñimportanteterei ñandéve g̃uarã. Koʼág̃a rupi jahecha oĩha hetaiterei ñande rapicha ipyʼaporãva. Upévare haʼete voi pe kogaty ‘morotĩmbáva, ha oĩmava oñemonoʼõ hag̃uáicha’. Ha káda áño oñemog̃uahẽ hetaitereípe pe marandu porã, ha heta oĩ ogueroviáva ha upéi ojevautisa. Ñandéve g̃uarã tuichaiterei mbaʼe ñambaʼapo Jehová poguýpe pe kóga ñemonoʼõme, peichagua tembiapo neʼĩrava ojejapo. Upévare ñañeporanduvaʼerã: “Ambaʼapo kyreʼỹpa Ñandejára rembiapópe?” (1 Cor. 15:58).

³ Jesús opredikavaʼekue tres áño imédio, ha ohekomboʼe hemimboʼekuérape ojapo hag̃ua avei upe tembiapo. Ko artíkulope ñahesaʼỹijóta mbohapy mbaʼe iñimportánteva haʼe omboʼevaʼekue. Umíva ningo tuichaiterei ñanepytyvõta jajapo porã hag̃ua pe tembiapo ohejavaʼekue ñandéve. Jahechamína umíva peteĩteĩ.

Ñaneumildevaʼerã

4. Mbaʼépa ojapo Jesús ohechauka hag̃ua hemimboʼekuérape iñumildevaʼerãha?

⁴ Ñapensamína ko mbaʼe oikovaʼekuére: Jesús remimboʼekuéra ojodiskutihína mávapa iñimportanteve ijapytepekuéra. Oiméne ojekuaa voi hovarekuéra ipochyha oñondive. Upémarõ Jesús heʼi peteĩ mitãʼípe oñemoĩ hag̃ua imbytepekuéra. Ha omañávo pe mitãre heʼi: ‘Pe oñemomirĩva ko mitãicha, péva hína pe tuichavéva rréino yvagapeguápe’ (jaleemína Mateo 18:1-4). Ko múndope ningo oñemombaʼe umi ipláta hetáva ha omanda guasúvape. Péro Jesús remimboʼekuéra oñemomirĩvaʼerã mitãicha hapichakuéra renondépe. Upéicharõmante Ñandejára ovendesi ha ojokuáita chupekuéra.

5, 6. Mbaʼérepa nañañembotuichaivaʼerã ñambaʼapo kyreʼỹ hag̃ua Jehová servísiope? Emombeʼumi peteĩ ehémplo.

⁵ Yma guaréicha avei, koʼág̃a rupi heta oĩ oñembotuichaséva ha oikóva pláta rapykuéri. Upévare saʼi itiémpo oikuaa ha oservi hag̃ua Ñandejárape (Mat. 13:22). Péro pe oservíva Jehovápe oikuaa porã noñembotuichaivaʼerãha oipotárõ pe kokue Jára ovendesi ha oguerohory chupe. Upévare haʼe vyʼapópe oñemomirĩ (Mat. 6:24; 2 Cor. 11:7; Fili. 3:8).

 ⁶ Por ehémplo, Francisco ningo peteĩ ansiáno oikóva América del Súrpe. Haʼe imitãrusúpe oheja ijestúdio universidapegua ojapo hag̃ua iprekursorádo. Haʼe heʼi: “Upéi aju amenda, ha ikatúkuri aheka che travahorã agana porã hag̃uáme. Upéva rangue che rembirekóndi roiko ikatumiháicha ha rosegi rojapo ore prekursorádo. Upéi roju ore família ha ijetuʼuvéma oréve. Péro Jehová orepytyvõ ani hag̃ua roheja ore prekursorádo. Ojapóma 30 áño rasa aservi hague de ansiáno ha heta tembiapo iñimportánteva oñemeʼẽ avei chéve ajapo hag̃ua. Upévare ni michĩmi norombyasýi roiporupaite haguére oretiémpo Jehovápe g̃uarã”.

7. Mbaʼéichapa nde reñehaʼã rejapo Romanos 12:16-pe heʼíva?

⁷ Jaikorangue jahupytyse umi mbaʼe ko múndope g̃uarã ‘iñimportánteva’, iporãvéta ñaneumílde. Upéicharõmante Ñandejára ñanderovasáta ha jahupytýta heta mbaʼe porã iservísiope (Rom. 12:16; Mat. 4:19, 20; Luc. 18:28-30).

Ñambaʼapo kyreʼỹramo Jehová ñanevendesíta

8, 9. a) Emombeʼumi pe ehémplo Jesús omoĩvaʼekue. b) Mávapepa omokyreʼỹta pe ehémplo oñeʼẽva umi mbohapy tembiguáire?

⁸ Ñaipytyvõ hag̃ua umi ipyʼaporãvape ñambaʼapo kyreʼỹvaʼerã. Ha upéva ohechauka hag̃ua iñimportanteha, Jesús oiporu peteĩ ehémplo oñeʼẽva mbohapy tembiguáire. * Upépe haʼe heʼi peteĩ óga jára oho mboyve tetã ambuépe oheja hague imbaʼerepy mbohapy hembiguáipe. Peteĩme oheja 30.000 monéda, pe segúndope 12.000 ha pe mbohapyhápe katu 6.000 monéda. Pe óga jára oho rire, umi mokõi hembiguái ombaʼapo kyreʼỹ. Haʼekuéra pyaʼe voi omombaʼapo upe pláta oñemeʼẽvaʼekue chupekuéra. Péro pe tembiguái mbohapyha katu iñateʼỹ, upévare oñotỹ upe pláta. Upéi pe óga jára ou jey ha ohepymeʼẽ umi mokõi hembiguáipe ha omoĩ ipoguypekuéra hetaiterei mbaʼe. Péro pe tembiguái ateʼỹgui katu oipeʼapa omeʼẽvaʼekue chupe ha omosẽ hógagui (Mat. 25:14-30).

⁹ Katuete ningo ñande jajoguase umi tembiguái ombaʼapo kyreʼỹvape, upéicha rupi ñambaʼapo meme Jehová servísiope. Péro oĩ avei umi ndaikatúiva ojapo heta mbaʼe. Umívape katuete omokyreʼỹta pe ehémplo oñeʼẽva umi mbohapy tembiguáire. Pór ehémplo oĩ umi ombaʼapo jejopýva omantene hag̃ua ifamília, térã ikatu oĩ umi ijedámagui ikangy ha nahesãivéimava.

10. Mbaʼépa Jehová ohechakuaa hembiguaikuérare, ha mbaʼérepa ñanemokyreʼỹ upéva?

 ¹⁰ Pe óga jára ohechakuaa hembiguaikuéra ndahaʼeiha peteĩchapa, upévare ‘káda únope omeʼẽ pe ikatuvaʼerã ojapónte’ (Mat. 25:15). Upéicha rupi pe primer tembiguái hetaitereive ogana pe segúndogui. Upéicharamo jepe pe óga jára ohechakuaa hese iguapoha pe ótroicha ha heʼi avei chupe: ‘Ajépa ndekatupyry che rembiguái chejeroviaha!’ (Mat. 25:21, 23). Ha mokõivépe ohepymeʼẽ peteĩcha. Upéicha avei Jehová pe kokue Jára, oikuaa mbaʼépa jahasa ha mbaʼépa ikatu jajapo jaservívo chupe. Haʼe ohecha ñañehaʼãmbaiteha jaservi chupe ñande pyʼaite guive, ha katuete ohepymeʼẽta ñandéve upévare (Mar. 14:3-9; jaleemína Lucas 21:1-4).

11. Emombeʼu peteĩ ehémplo ohechaukáva Jehová ovendesiha umi ombaʼapo kyreʼỹvape.

¹¹ Ñapensamína koʼág̃a Selmira rembiasakuére. Haʼe ningo peteĩ ermána oikóva Brasílpe. Iñehémplo ohechauka ñandéve jahasáramo jepe heta mbaʼe ijetuʼúva ikatuha ñambaʼapo kyreʼỹ Jehová servísiope. Haʼe omombeʼu ojapomaha 20 áño iménape ojuka hague mondaha, upérõ opyta chupe mbohapy mitãkuñaʼi omongakuaa hag̃ua. Haʼe ombaʼapo de empleáda óga ahénope, upépe un día pytã ombaʼapovaʼerã ha hiʼarive oviaha asy jepi kolektívope hetaitereígui umi hénte. Upéicharamo jepe oñemotiémpo ojapo hag̃ua iprekursorádo rregulár, upe rire omoirũ avei chupe mokõi imembykuña. Selmira omombeʼu: “Upe tiémpo guive ningo veinte tapichápema aipytyvõ oservi hag̃ua Jehovápe, ha ahayhu chupekuéra che hénte teetéicha. Koʼág̃a peve ningo haʼekuéra che amígo ha amombaʼeterei upéva, ni óro kuʼíre voi nambojojái”. Péicha jahecha mbaʼeichaitépa Jehová ovendesi Selmírape iguapaiterei haguére.

12. Mbaʼépa ikatu jajapo ñandekatupyryve hag̃ua predikasiónpe?

¹² Saʼíramo jepe ñanetiémpo ñasẽ hag̃ua japredika, ikatu ñañehaʼã ñañembokatupyryve. Upearã pe Aty Ñanemboʼéva Japredikakuaa hag̃ua, káda semána ñanemboʼe heta mbaʼe predikasionrã. Ha jajapóramo upépe ñaaprendéva, ñandekatupyryvéta japredika porãve hag̃ua opa henda rupi (2 Tim. 2:15). Péro ikatu avei ñambotapykue umi tembiapo naiñimportanteguasúiva ñasẽ hag̃ua japredika kongregasionpegua ermanokuérandi (Col. 4:5).

13. Mbaʼépa ñanepytyvõta jajapo hag̃ua opa ikatúva Jehová servísiope?

¹³ Ñamombaʼe ha jahayhúramo Jehovápe ñande pyʼaite guive, katuete ñanekyreʼỹta jajapo hag̃ua hembipota (Sal. 40:8). Pe tembiguái mbohapyha Jesús oñeʼẽ hague, okyhyje pe óga járagui ha heʼi hese ojopyetereiha hendive. Upévare ogueraha oñotỹ pe pláta ha nomombaʼapói omoganave hag̃ua ijárape. Ha ñandéve, mbaʼépa ñanepytyvõta jajapo hag̃ua opa ikatúva Jehová servísiope? Ani hag̃ua ñaneateʼỹ, koʼẽ koʼẽre ñañehaʼãvaʼerã ñañemoag̃uive Jehováre, ha ñañemotiémpo jastudia ha jajepyʼamongeta hag̃ua umi mbaʼe porã Jehová ojapóvare. Upéicharõ jahechakuaáta mbaʼeichaitépa haʼe ñanderayhu, ipasiénsia ñanderehe ha ñandeporiahuvereko (Luc. 6:45; Fili. 1:9-11).

Penderekopotĩkena

14. Mbaʼépa jajapovaʼerã ñambaʼapóramo pe kóga ñemonoʼõme?

¹⁴ Apóstol Pedro imanduʼávo Escrituras Hebreas-pe heʼívare, omombeʼu mbaʼépa Ñandejára oipota ojapo isiervokuéra. Haʼe heʼi: ‘Pejapókena opa mbaʼe marangatúpe. Ñandejára, penerenoivaʼekue imarangatu rupi. Ha Ñandejára Ñeʼẽ heʼi voi: “Penemarangatúke, pórke che chemarangatu”’ (1 Ped. 1:15, 16; Lev. 19:2; Deu. 18:13). Koʼápe heʼíva ohechauka ñambaʼapóramo pe ‘kóga ñemonoʼõme’ tekotevẽha ñanderekopotĩ ha Jehovápe añoite ñamombaʼeguasu. Upéva ñande  ikatu jajapo jahejáramo Ñandejára Ñeʼẽ ñanemopotĩ.

15. Mbaʼéichapa ikatu ñanepytyvõ Ñandejára Ñeʼẽ?

¹⁵ Ñandejára Ñeʼẽ ojogua pe y jaiporúvape ñañemopotĩ hag̃ua. Upéicha rupi apóstol Pablo heʼi umi unhidokuéra ipotĩha Ñandejára renondépe, peteĩ nóviaicha Crístope g̃uarã. Ha Jesucristo voi ‘omopotĩvaʼekue iñeʼẽ rupive ýpe omopotĩramoguáicha, imarangatu ha ipotĩ hag̃ua’ (Efe. 5:25-27). Péro Jesús heʼimavaʼekue Ñandejára Ñeʼẽ ikatuha oporomopotĩ. Ha hemimboʼekuérape katu heʼi: ‘Peẽ penepotĩma amombeʼu rupi peẽme’ Ñandejára Ñeʼẽ (Juan 15:3). Upéicharõ la Biblia heʼíva ikatu ñanepytyvõ ñanderekopotĩ ha ñamombaʼeguasu hag̃ua Jehovápe añoite. Péicha jahecha, ñaime porã hag̃ua Jehová renondépe jahejavaʼerãha Iñeʼẽ ñanemopotĩ.

16. Mbaʼépa jajapovaʼerã akóinte ñanepotĩ hag̃ua Jehová renondépe?

¹⁶ Upéicharõ, ñambaʼapo hag̃ua pe ‘kóga ñemonoʼõme’, jaheja raẽ vaʼerã tekokyʼa ha umi mbaʼe Ñandejárape ombojeguarúva. Ha akóinte jajapo hag̃ua upe tembiapo, ñamombaʼevaʼerã Jehová heʼíva ha jaiko haʼe oipotaháicha (jaleemína 1 Pedro 1:14-16). Jaikuaa ningo ñande rete ipotĩ hag̃ua tekotevẽha ñañemopotĩ pyʼỹi, upéicha avei ñanepotĩ hag̃ua Jehová renondépe akóinte jahejavaʼerã Iñeʼẽ tañanemopotĩ. Upearã jaleevaʼerã la Biblia, ndajafaltái rreunionhápe ha ñañehaʼãmbaite jajapo Ñandejára léi heʼíva. Péicha jajapóramo ñanembaretéta ani hag̃ua jajapo mbaʼe vai ha ñanemongyʼa ko múndo (Sal. 119:9; Sant. 1:21-25). Ajépa javyʼaite jaikuaávo Ñandejára Ñeʼẽ ikatuha ‘ñanemopotĩ’ umi mbaʼe vai jajapovaʼekuégui jepe (1 Cor. 6:9-11).

17. Mbaʼe konsého oĩva la Bíbliapepa ikatu ñanepytyvõ ñanepotĩ hag̃ua Ñandejára renondépe?

¹⁷ Ñandépa kyreʼỹme jahejañaína Ñandejára Ñeʼẽ omopotĩ ñande rekove? Ñapensamína koʼã mbaʼére. Mbaʼépa jajapo ojeʼe jave ñandéve ndovaleiha jaheka umi vyʼarã ivaíva? (Sal. 101:3.) Ñande voípa jajeheʼa umi ñane kompañéro de traváhore térã kolehiopeguáre? (1 Cor. 15:33.) Ñañehaʼãmbaitépa ñamboyke umi mbaʼe vai jajaposéva jepi? (Col. 3: 5.) Ñañatendépa ani hag̃ua jajeheʼa mbaʼeveichagua polítikare? Heta vése avei umi depórte rupive oñemombaʼeguasu peteĩ tetãme. Ha ñandépa ñañehaʼã ani hag̃ua jajapo upéicha? (Sant. 4:4.)

18. Mbaʼéichapa ñanepytyvõ jahejárõ Ñandejára Ñeʼẽ ñanemopotĩ?

¹⁸ Ñaneñeʼẽrendúramo koʼã konséhope katuete ñasẽ porãta. Jesús ombojojárõ guare hemimboʼekuérape parrál rakãre, heʼi: ‘Umi parrál rakã ndahiʼáiva che Ru oikytĩ, umi hiʼáva katu omopotĩ hiʼa hetave hag̃ua’ (Juan 15:2). Upéicha avei, jahejárõ Ñandejára Ñeʼẽ ñanemopotĩ, ñanepytyvõta jajapo hag̃ua hetave mbaʼe porã.

Umi mbaʼe porã jahupytýva koʼág̃ama voi ha amo gotyove

19. Mbaʼépa ohupyty Jesús remimboʼekuéra ombaʼapo kyreʼỹ haguére?

¹⁹ Pentecostésrõ guare áño 33-pe, Ñandejára omeʼẽ ijespíritu sánto Jesús remimboʼekuérape, ha omombarete chupekuéra ‘oikuaauka hag̃ua Jesucristo réra “opaite hendárupi ko yvy ape ári” (Hech. 1:8). Jesús remimboʼekuéra ombaʼapo kyreʼỹ vaʼekue pe  marandu porã oñemog̃uahẽ hag̃ua ‘oparupiete ko yvy ape ári’. Oiko chuguikuéra misionéro, superintendénte, ha ojeporavo avei chupekuéra oĩ hag̃ua pe Cuerpo Gobernántepe (Col. 1: 23). Ajéiko hetaite mbaʼe porã ohupyty hikuái, ha hetaitereípe ombovyʼa pe marandu porã rupive!

20. a) Mbaʼépa nde rehupytýma rembaʼapo kyreʼỹ haguére Jehovápe g̃uarã? b) Mbaʼépa ñande jajapovaʼerã koʼág̃a?

²⁰ Ñaneumílde, ñambaʼapo kyreʼỹ ha jajapóramo Ñandejára léi heʼíva, ikatúta jasegi ñaipytyvõ umi ipyʼaporãvape oiko hag̃ua chuguikuéra Jesús remimboʼe. Umi hénte ningo ko múndope oiko pláta ha vyʼarã rapykuérinte, ñande katu ndajaikói haʼekuéraicha jahasa asy ha ñañeñandu vai. Upéva rangue jaiko tory ha vyʼápe (Sal. 126:6). Ha iñimportantevéva katu, jaikuaa Ñandejára ndahesaraimoʼãiha pe ‘tembiapo jajapóvagui chupe g̃uarã’ (1 Cor. 15:58). Jehová pe kokue jára ohepymeʼẽta ñandéve ha jaikovéta opa ára g̃uarã ‘jajapo haguére hembipota ha jahayhúgui chupe’ (Heb. 6:10-12).

[Nóta]

Hesakã porãpa ñandéve koʼã mbaʼe?

• Mbaʼérepa ñaneumildevaʼerã ñambaʼapo kyreʼỹ hag̃ua Jehovápe g̃uarã?

• Mbaʼépa ikatu jajapo akóinte ñambaʼapo kyreʼỹ hag̃ua Jehová servísiope?

• Mbaʼérepa tekotevẽ ñanderekopotĩ ha jaiko Jehová oipotaháicha?

[Porandu ñahesaʼỹijóva]

[Nóta oĩva taʼanga ndive páhina 17]

Ñaneumílderamo ñamotenondéta Ñandejára Rréino ha ndajaikomoʼãi pláta rapykuéri