“Ani rekyhyje. Che roipytyvõta”

JESÚS heʼivaʼekue hemimboʼekuérape: ‘Satanás oitýta kárselpe ermanokuérape pende apytégui ohasa asy hag̃ua’. Péro upe mboyve heʼi chupekuéra: ‘Ani pekyhyje umi mbaʼe pehasátavagui’. Koʼág̃a peve Satanás ñandejokose anive hag̃ua ñamombeʼu marandu porã. Upearã ojevale umi goviérnore opuʼã hag̃ua ñanderehe, haʼekuéra ñanemongyhyjese heʼívo ñanemoingetaha kárselpe jasegíramo japredika (Rev. 2:10; 12:17). Mbaʼépa ikatu jajapo ñambohovái hag̃ua kyhyjeʼỹre Satanáspe, Jesús heʼi haguéicha?

Sapyʼánte ningo jakyhyje voínte, péro Ñandejára Ñeʼẽ heʼi Jehová ñanepytyvõtaha ñambohovái porã hag̃ua opa mbaʼe. Mbaʼéichapa ojapóta upéva? Omombeʼúvo ñandéve mbaʼe ñuhãpa oiporu Satanás ha hembiguaikuéra ñanemongyhyje hag̃ua (2 Cor. 2:11). Koʼág̃a jahechamíta mbaʼéichapa Ñandejára siervokuéra ymaguare ha koʼag̃agua avei, ‘ipuʼaka umi ñuhã Satanás omoĩvare chupekuéra’ (Efe. 6:11-13, JMP).

Peteĩ rréi aña omongyhyjese chupekuéra

Síglo VIII-pe Jesús ou mboyve, oĩvaʼekue peteĩ rréi Asiriaygua iñañaitereíva hérava Senaquerib. Haʼe heta tetãma ojagarra oikóvo imbaʼerã. Ha ojeroviaitereígui ijehe ojagarrase avei umi Isrraelguápe ha pe táva Jerusalén. Upérõ rréi Ezequías iñeʼẽrendúva Jehovápe ogoverna upe táva (2 Rey. 18:1-3, 13). Satanás katu oikuaa mbaʼépa ojapose Senaquerib ha ojeaprovechase upévare oipeʼaite hag̃ua ko yvy ape árigui pe rrelihión añetegua (Gén. 3:15).

Senaquerib omondo Rabsaqué ha ambue kuimbaʼekuérape heʼi hag̃ua umi Jerusalenguápe oñentregántema hag̃ua hikuái * (2 Rey. 18:17). Rabsaqué ningo omongyhyjese umi hudíope ikatu hag̃uáicha oñemoĩ ipoguypekuéra oñorairõʼỹre hendive. Ha mbaʼépa ojapo upearã?

Iñeʼẽrendu hikuái oñemohaʼeñóramo jepe chupekuéra

Rabsaqué heʼi Ezequías rembiguaikuérape: ‘Peje Ezequíaspe ko heʼiukáva chupe Asiria ruvicha guasu: “Mbaʼe rehe piko reju rejerovia? Ahecha rejekoha Egipto rehe. Egipto niko hína peteĩ takuapi otiripámava, ha rejekóramo hese opẽta ha nde kutúta nde pópe”’ (2 Rey. 18:19, 21). Pe rréi Asiriaygua oñeʼẽreínte, Ezequías ningo ndojeruréi voi Egíptope oipytyvõ hag̃ua chupekuéra. Rabsaqué oipotánte umi hudío opensa oĩha haʼeño ha avave noipytyvõmoʼãiha chupekuéra.

Ko ñane tiémpope avei umi ndaijaʼéiva  pe rrelihión añeteguáre omongyhyjese Ñandejára siervokuérape. Ha mbaʼéichapa ojapo upéva? Omomombyry ha omohaʼeñóvo chupekuéra. Pór ehémplo peteĩ ermána ojerovia haguére Jehováre, areterei ojeguereko chupe préso ha mombyry ermanokuéragui. Mbaʼépa oipytyvõ chupe ani hag̃ua okyhyje? Haʼe heʼi: “Añemboʼe Jehovápe ha upéicha añemoag̃uive hese, chemanduʼa avei Isaías 66:2-pe heʼívare. Upépe ningo heʼi Ñandejára omaʼẽha umi ojepyʼapy ha ohasa asývare, upéva chemombarete ha chembopyʼaguapy”. Péicha avei peteĩ ermáno are oĩvaʼekue préso haʼeño heʼi: “Ahechakuaa ñaime porãramo Ñandejára ndive, ñañeñandu porã ha javyʼaha ñaiméramo jepe peteĩ lugár michĩvape ñaneañomi”. Péicha jahecha, haʼekuéra oñemoag̃ui rupi Jehová rehe ogueropuʼaka hague umi mbaʼe ohasáva (Sal. 9:9, 10). Koʼã ermáno oikuaa porã oĩramo jepe préso, ha oñemomombyrýrõ jepe chupekuéra ifamília, iñamígo ha umi ermánogui, ndaikatúi oñemomombyry chupekuéra Jehovágui (Rom. 8:35-39).

Upéicharõ, jahecha tekotevẽha jaiporupaite umi mbaʼe tembiguái jeroviaha omeʼẽva ñandéve ñañemoag̃uive hag̃ua Jehová rehe (Sant. 4:8). Upévare iporã ñañeporandu: “Ahechakuaápa Jehová oĩha che ndive? Ajapópa Iñeʼẽme heʼíva adesidíta jave umi mbaʼe michĩva jepe?” (Luc. 16:10). Ñañehaʼã meméramo ñaime porã Jehová ndive ndajarekói jakyhyje hag̃ua mbaʼevetégui. Pór ehémplo, Jeremías oñemboʼérõ guare umi hudío rérape heʼi: ‘Ndéve añemboʼe che Jára Jehová amo yvykua rugua guive. Ha upe añemboʼeha árape, reñemboja che rendápe, ha ere chéve: “Ani rekyhyje”’ (Lam. 3:55-57).

Satanás ndaikatúi ñanembotavy

Ñeʼẽkuaápe Rabsaqué ombopyʼamokõise umi hudíope heʼívo: ‘Ezequías voi piko ndoipeʼaivaʼekue Jehová kuaveʼẽmby renda umi lugár yvatégui? Jehová voi heʼíkuri chéve: “Ejupi ha ehundi ko tetã kóvape”’ (2 Rey. 18:22, 25. ÑÑB). Péicha Rabsaqué ontendekase umi hudíope Jehová nodefendemoʼãiha isiervokuérape ipochy rupi hendivekuéra. Péro ndaupeichaiete, Jehová oguerohoryeterei Ezequías ha umi hudíope omombaʼeguasu jey haguére chupe (2 Rey. 18:3-7).

Koʼág̃a rupi avei iñeʼẽkuaa umi oñemoĩva ñanderehe. Sapyʼánte oipotágui jajerovia hesekuéra heʼi ñandéve peteĩ mbaʼe añeteguáva ha upekuévo ijapuʼimi avei, ha upéicha ñanembotavyse. Pór ehémplo umi ermáno kárselpe oĩvape, mburuvichakuéra heʼi ambue ermáno oheja hague ijerovia ha haʼekuéra ojapovaʼerãha avei upéicha. Péro umi kristiáno ijerovia mbaretévape nombotavymoʼãi hikuái péicha.

Jahechamína mbaʼépa oiko peteĩ ermána rehe kárselpe segunda guerra mundial oikórõ guare. Peteĩ árape umi polisía ohechauka chupe peteĩ dokuménto heʼihápe ambue ermáno omboyke hague ijerovia. Ha pe polisía oporandúrõ guare ko ermánape ojeroviápa upe ermánore, haʼe ombohovái: “Haʼéko peteĩ kuimbaʼe imperféktonte avei”. Péicha haʼe ohechakuaa Ñandejára ojokuái hague upe ermánope ojapo aja Jehová rembipota. Péro upéi ko ermána heʼi pe polisíape: “Koʼág̃a ndojapovéivo la Biblia heʼíva, ndahaʼevéima che ermáno”. Upe ermána ojapo ko téysto heʼiháicha: ‘Aníke pejerovia mburuvichakuéra rehe ni umi yvy arigua raʼy rehe, umíva  ndaikatúi ñaneguenohẽ jejopy vaígui’ (Sal. 146:3).

Ani hag̃ua umi japu ojeʼéva omokangy ñande jerovia, jastudia meme vaʼerã Ñandejára Ñeʼẽ ha ñañehaʼãmbaite akóinte jajapo upépe heʼíva (Efe. 4:13, 14; Heb. 6:19). Ha ikatu hag̃uáicha jadesidi porã ñandejopy vai jave umi ndaijaʼéiva ñanderehe, koʼág̃ama voi káda día ñahesaʼỹijovaʼerã la Biblia ha jastudia ñaneañohápe (Heb. 4:12). Jaaprovechákena koʼág̃a jaikuaa porãve hag̃ua Jehovápe ha ñamombarete ñande jerovia. Pór ehémplo peteĩ ermánope ojegueraha préso ha heta áñore ndojehejái chupe oñeʼẽ avaveténdi. Ko ermáno heʼi: “Amokyreʼỹ enterovépe omombaʼe hag̃ua opa mbaʼe Jehová omeʼẽva ñandéve ñamombarete hag̃ua ñande jerovia. Ñande ningo ndajaikuaái mbaʼéichapa ñanepytyvõta ág̃a umi mbaʼe”. Upévare koʼág̃a ñahesaʼỹijo meme vaʼerã Ñandejára Ñeʼẽ ha umi puvlikasión omeʼẽva ñandéve pe tembiguái jeroviaha. Upéicharõmante jahasa vove peteĩ mbaʼe ijetuʼúva, Ñandejára espíritu sánto ‘ñanemomanduʼáta opa mbaʼe’ ñaikotevẽvare jagueropuʼaka hag̃ua (Juan 14:26).

Ñanemombarete ani hag̃ua jakyhyje

Rabsaqué omongyhyjese umi hudíope odesafiávo Ezequíaspe: ‘Eñemoĩmínte rréi Asiriaygua rehe, ameʼẽta ndéve dos mil kavaju ha jahecha rejuhúpa hiʼári g̃uarã. Nde ningo ndaikatumoʼãi remboguevi ni pe mburuvicha Asirio ikangyvévape jepe’ (2 Rey. 18:23, 24). Umi Asiriaygua ehérsito niko ipoderosoiterei, upévare Jehová noipytyvõiramo Ezequías ha iñirũnguérape ndaipuʼakamoʼãi voínte hesekuéra.

Koʼág̃a avei haʼete imbaretetereíva umi oñemoĩva ñanderehe, koʼýte umi goviernopegua oĩramo hendivekuéra. Upéicha oiko umi nazi tiémpope, haʼekuéra omongyhyjesevaʼekue Ñandejára siervokuérape segunda guerra mundial oikórõ guare. Peteĩ ermáno ojejagarravaʼekue upe tiémpope, heta áño oĩ préso ha peteĩ árape pe ofisiál heʼi chupe: “Rehecha piko mbaʼéichapa ojefusila ne ermánope? Mbaʼépa nemboʼe upéva?” Haʼe ombohovái chupe: “Che testigo de Jehová ha asegíta upéicha”. Upémarõ pe ofisiál heʼi jey chupe: “Upéicharõ ndeháma rejefusilatahína upéi”. Péro ko ofisiál nokumplíri pe heʼivaʼekue. Upéi pe ermáno omombeʼu mbaʼépa omombaretéraʼe chupe: “Che ajeroviaiterei Jehová rehe” (Pro. 18:10).

Upeichaite ningo añete, jajeroviáramo Jehová rehe ñande pyʼaite guive, Satanás ndaipuʼakamoʼãi ñanderehe (Efe. 6:16). Upévare jajerurevaʼerã Jehovápe omombarete hag̃ua ñande jerovia (Luc. 17:5). Ha jaaprovechákena opa mbaʼe omeʼẽva ñandéve upearã pe tembiguái jeroviaha. Tuicha ñanemokyreʼỹta jajejopy vai jave ñanemanduʼáramo Jehová heʼivaʼekuére proféta Ezequiélpe: ‘Eikuaa porãke, che amohatãta nde rova hovakuéra renondépe. Che romohatãta diamánteicha, hatãvéva ambue itágui, upévare ani rekyhyje chuguikuéra’ (Eze. 3:8, 9, ÑÑB). Ñandéve avei Jehová ñanemombaretéta ha ñanembopyʼaguasúta ñaikotevẽ jave.

Omboyke hikuái umi mbaʼe oñemoĩva henondepekuéra

Umi ndaijaʼéiva kristianokuérare oikuaa porã mbaʼépa ikatu ojapo ñanemomombyry hag̃ua Jehovágui. Pór ehémplo oiporu hikuái umi mbaʼe ñandegustáva Rabsaqué ojapo haguéicha. Haʼe heʼi umi Jerusalenguápe: ‘Asiria ruvicha guasu chembou haʼévo peẽme peñemeʼẽ hag̃ua chupe. Upéi pende reraháta peteĩ tetã ojoguávape pene retãme, oĩháme trigoty ha parralty pejapo hag̃ua pán ha víno, oĩháme olívo aséite ha eíra. Upéramo ikatúta peiko porã ha napemanomoʼãi’ (2 Rey. 18:31, 32). Oimevaʼerãko umi hénte oikóva pe táva oñemongorávape  hoʼuse asy rakaʼe pe pán aku porã ha víno pyahu.

Upéicha avei umi mburuvicha omokangyse peteĩ misionéro jerovia oikuaveʼẽvo chupe heta mbaʼe porã. Umi mburuvicha opromete pe ermánope onohẽtaha chupe pe kársel ypytũgui ha oguerahataha chupe peteĩ “óga ipiroʼy asy ha ihardín porãvape” seis mése pukukue opensa hag̃ua. Péro haʼe akóinte ojerovia mbarete ha upéicha rupi ndojapói umi mbaʼe ndogustáiva Jehovápe. Péro mbaʼépa oipytyvõ ko ermánope omboyke hag̃ua umi mburuvichakuéra oikuaveʼẽva chupe? Haʼe heʼi: “Ára ha ára ajepyʼamongetamivaʼerã Ñandejára Rréino añoite omeʼẽha ñandéve pe esperánsa iporãvéva. [...] Ajeroviaiterei umi mbaʼe aikuaávare Ñandejára Rréino ojapotaha ha upéva tuicha chemombarete. Upéicha rupínte ndaipuʼakái cherehe hikuái”.

Ha ñande, jagueroviápa umi mbaʼe Ñandejára Rréino ojapótava? Ñanemanduʼavaʼerã Abrahán, apóstol Pablo ha Jesús jepe ohasa hague heta mbaʼe ijerovia rehehápe. Péro ogueropuʼaka hikuái ogueroviágui umi mbaʼe porã Ñandejára oprometéva (Fili. 3:13, 14; Heb. 11:8-10; 12:2). Ñande avei ikatúta ñambohovái oimeraẽ mbaʼe ñamotenondéramo Ñandejára Rréino ha akóinte jajepyʼamongetáramo umi mbaʼe porã oguerútavare. Upéicha ndajahejamoʼãi Jehovápe oñekuaveʼẽramo jepe ñandéve heta mbaʼe porã (2 Cor. 4:16-18).

Jehová arakaʼeve ndohejareimoʼãi isiervokuérape

Ezequías ha uñirũnguéra akóinte ojerovia mbarete Jehováre. Upéicha rupi, Rabsaqué oñehaʼãmbaitéramo jepe nomongyhyjéi chupekuéra (2 Rey. 19:15, 19; Isa. 37:5-7). Jahechakuaa avei Jehová ombohovái hague Ezequíaspe iñemboʼe omboúvo peteĩ ánhel oipytyvõ hag̃ua chupekuéra. Upe ánhel peteĩ pyharépe ojuka 185.000 soldádo Asiriayguápe. Ha upéicha Senaquerib tuicha oñemotĩ ha itindy oho jeývo Nínivepe umi soldádo pokãmi opytáva reheve chupe (2 Rey. 19:35, 36).

Jehová arakaʼeve ndohejareíri isiervokuéra ojeroviávape hese, upéva jahechakuaa umi ermáno rembiasakuére. Haʼekuéra ogueropuʼaka heta mbaʼe ha iñeʼẽrendu Jehovápe ohasa asýramo jepe. Upévare jajeroviakuaa ñande Ru Jehová heʼívare ñandéve: ‘Che Jehová nde Jára, rojagarra nde po deréchagui ha haʼe ndéve ani rekyhyje, che roipytyvõta’ (Isa. 41:13, ÑÑB).

[Nóta]

[Komentário oĩva páhina 13-pe]

La Bíbliape jatopa treinta vése rasa Jehová ombopyʼaguapyha isiervokuérape heʼívo: “Ani rekyhyje”

[Nóta oĩva taʼanga ndive páhina 12]

Umi ndaijaʼéiva ñanderehe ñanemokangyse avei Rabsaqué ojapo haguéicha

[Nóta oĩva taʼanga ndive páhina 15]

Jehová ñane amígoramo, ñane ñeʼẽrendúta chupe oĩramo jepe oñemoĩva ñanderehe