‘Elee meme Ñandejára Ñeʼẽ ha Eporohekomboʼe’

“PEẼ niko peje chéve ‘Mboʼehára’ ha ‘ore jára’, ha añeteguánte peje. Upéva niko che.” (Juan 13:13.) Jesús heʼívo péicha ohechauka hemimboʼekuérape haʼeha pe Mboʼehára Guasu. Upéi oho mboyve yvágape heʼi chupekuéra: ‘Tapeho aipóramo opa tetã rupi ha pejapo chuguikuéra che remimboʼe. Ha pemboʼe chupekuéra ojapo hag̃ua opa umi mbaʼe ahejavaʼekue peẽme’ (Mat. 28:19, 20). Tiémpo rire apóstol Pablo heʼi jey tekotevẽha ñañembokatupyry ñaporomboʼe hag̃ua Ñandejára Ñeʼẽ. Pór ehémplo Timoteo oservírõ guare ansiánoramo, Pablo oñemoñeʼẽ chupe: ‘Elee meme opavavépe Ñandejára Ñeʼẽ ha ehekomboʼe chupekuéra. Ejepyʼamongetáke koʼã mbaʼe rehe opavave ohechakuaa hag̃ua mbaʼéichapa reñakãrapuʼã’ (1 Tim. 4:13-15, BNP).

Koʼág̃a avei opárupi umi hénte ñandekuaa ñaporomboʼe rupi, tahaʼe predikasiónpe térã rreunionhápe. Péro mbaʼéichapa ikatu ñañembokatupyryve ñaporomboʼe hag̃ua? Ha mbaʼéichapa upéva ñanepytyvõta ñañakãrapuʼã hag̃ua Jehová servísiope?

Jasegíkena pe Mboʼehára Guasu ehémplo

Jesús oporomboʼe porãiterei vaʼekue ha umi hénte ijurujaipa ohendúvo chupe. Lucas omombeʼu mbaʼépa heʼi umi ohenduvaʼekue Jesúspe oñemoñeʼẽrõ guare sinagógape: “Opavave oñeʼẽ porã Jesús rehe ha oguerohory umi mbaʼe porã heʼíva” (Luc. 4:22). Jesús remimboʼekuéra opredika avei haʼe ojapo haguéicha. Upévare apóstol Pablo heʼi: ‘Peiko chéicha che añehaʼãgui aiko Cristo oiko haguéicha’ (1 Cor. 11:1, BNP). Osegi rupi Jesús ehémplo, apóstol Pablo katupyrýpe ‘oporomboʼe aty guasúpe ha ogaha rupi’ (Hech. 20:20, JMP).

Opredika umi hénte ijatyhárupi

Hechos kapítulo 17 omombeʼu Pablo oho hague Aténaspe ha upépe katupyrýpe omboʼe umi hénte ijatyhárupi. Upe távape omañahápente ohecha taʼangakuéra. Katuete upéva ombopochýneraʼe chupe, péro pyʼaguapýpe porãnte haʼe ‘oñeʼẽ pe sinagógape ha ára ha ára oñeʼẽ umi plásape oĩva ndive’ (Hech. 17:16, 17, JMP). Ajépa iporãite iñehémplo! Ñande avei pyʼỹi jatopa hénte ndojapóiva Ñandejára heʼíva, upéicha jave ñañeʼẽvaʼerã pyʼaguapýpe porãnte ha ani ñambohovái vai guasu chupekuéra. Péicha jajapóramo ikatu ñanerendu porãve hikuái ha ojei rrelihión japu poguýgui (Hech. 10:34, 35; Rev. 18:4).

Páblope ijetuʼúneraʼe opredika hag̃ua pe plása rupi, upépe ningo ijaty heta ndogueroviáiva haʼe omboʼéva, umíva apytépe oĩ umi ikatupyry ha iñarandúva. Koʼãva oñepyrũrõ guare ojodiskutise Páblondi, haʼe orrespetánte upe heʼíva hikuái. Upérõ oĩ heʼíva hese “tekove ñeʼẽngatu” (griégope heʼiséva “semílla mbyatyha”). Ha ótro katu heʼi: ‘Ojogua ningo ambue jára moherakuãhárape’ (Hech. 17:18, BNP).

Apóstol Pablo nomboguapýi ijehe umi mbaʼe vai ojeʼéva hese. Ha ojejerurérõ guare chupe oñeʼẽ hag̃ua umi mbaʼe ogueroviávare, haʼe oaprovecha opredika hag̃ua. Ojapo peteĩ diskúrso iporãiterei ha opokóva umi hénte korasõre (Hech. 17:19-22; 1 Ped. 3:15). Ñahesaʼỹijomi koʼág̃a upe diskúrso ha jahecha mbaʼéichapa ikatu ñanepytyvõ ñaporomboʼe porãve hag̃ua.

 Jahechakuaákena mbaʼépa ogusta ñande rapichápe

Pablo oñepyrũ idiskúrso heʼívo: ‘Karaikuéra Atenasgua, opaite mbaʼépe ningo ahecha pemombaʼeguasuha pende jarakuérape. Amaʼẽvo aikóvo umi mbaʼe pemombaʼeguasúvare, ajuhu peteĩ altár oĩva hese ko ñeʼẽ: “Pe Jára Ojekuaaʼỹvape”. Upe Jára peẽ pemombaʼeguasúva peikuaaʼỹ rehe, upéva rehe ningo che aju añeʼẽ peẽme’ (Hech. 17:22, 23, BNP).

Apóstol Pablo ojesarekovaʼekue umi ijerére oĩvare, péicha rupi oikuaa mbaʼe rehépa oñeʼẽta umi héntepe. Ñande avei ñañatendevaʼerã japredika jave jaikuaa hag̃ua mbaʼéichapa ikatu ñag̃uahẽ porãve ñande rapicha korasõme. Pór ehémplo ikatu ñamaña pe óga jerére, jahecha ndaipóripa hugéte térã taʼanga pe parére. Ñañehaʼãramo jahechakuaa mbaʼépa oipyʼapy térã ogusta pe óga járape jaikuaáta mbaʼe rehépa ñañeʼẽta chupekuéra (Col. 4:6).

Pablo opredikavaʼekue oporomokyreʼỹ hag̃uáicha. Péro ohechávo umi Atenasgua omombaʼeguasuha umi ñandejára guaʼúpe, Pablo omyesakã porã chupekuéra mbaʼéichapa omombaʼeguasuvaʼerã pe Ñandejára añeteguápe (1 Cor. 14:8). Ajépa iporãitéta ñande avei ñamombeʼu pe marandu porã kyreʼỹme ha oñentende porã hag̃uáicha.

Japredikáke opavavépe

Apóstol Pablo heʼive chupekuéra: ‘Ñandejára ojapovaʼekue ko múndo ha opaite mbaʼe ipype oĩva guive. Haʼe ningo yvy ha yvága Jára, ha ndoikói peteĩ óga kuimbaʼekuéra omopuʼãvaʼekuépe. Yvyporakuéra ndaikatúi oipytyvõ chupe ha Haʼe noikotevẽi mbaʼeve chuguikuéra, Haʼe voi omeʼẽ opavavépe tekove, pytuhẽ ha opa mbaʼe’ (Hech. 17:24, 25, ÑÑB).

Jahechaháicha Pablo omboʼese umi héntepe Jehová haʼeha opaite mbaʼe Apohare. Péro ndeʼíri chupekuéra derechoite, oñeʼẽnte ñepyrũrã pe ‘yvy ha yvága Jára’ rehe. Upéicha avei ñande ikatu ñaipytyvõ umi hénte ipyʼaporãvape, tahaʼe haʼéva rrelihión ha tetãygua. Haʼekuéra tekotevẽ avei oikuaa Jehová haʼeha opa mbaʼe Apohare (Sal. 36:9).

Upéi Pablo heʼive: ‘Ñandejára ojapo peteĩ kuimbaʼépente, ha chugui ou opaite tetãnguéra, heʼi chupekuéra arakaʼépa ha moõpa oikóta. Avei oheka hag̃ua Ñandejárape, sapyʼánte ojepovyvyhápe ojuhúrõ g̃uarã chupe. Añetehápe Haʼe noĩri mombyry ñandehegui’ (Hech. 17:26, 27).

Ñaporomboʼe jave ojekuaavaʼerã ñanderehe mbaʼeichagua Ñandejárapepa ñamombaʼeguasu. Jehová ningo nomboykéi avavépe, haʼe oheja kuimbaʼe ha kuña opa tetãygua ‘oheka ha ojuhu chupe’. Upévare ñande avei ñañehaʼã japredika opavave ñande rapichápe. Umi ogueroviávape Ñandejára oĩha ikatu ñaipytyvõ oiko hag̃ua chuguikuéra Ñandejára amígo ha ohupyty hag̃ua umi mbaʼe porã haʼe oprometéva (Sant. 4:8). Péro mbaʼéichapa ikatu ñaipytyvõ umi ndojeroviáivape Ñandejárare? Jajapóvo apóstol Pablo ojapo haguéicha. Jahechamína mbaʼépa haʼe heʼi umi héntepe.

Pablo heʼi: ‘Haʼe rupi ningo jaikove, jakuʼe ha jaiko. Umi ñeʼẽ yvoty ojapóva heʼimavaʼekue voi: “Ñande ningo iñemoñare”. Ñande haʼégui Ñandejára ñemoñare, anítei ñaimoʼã umi jára guaʼu kuimbaʼekuéra ojapóva órogui,  plátagui térã itágui ojoguaha ñande Apoharépe’ (Hech. 17:28, 29, ÑÑB).

Apóstol Pablo opredikárõ guare imanduʼa umi Atenasgua poetakuéra heʼivaʼekuére, ha upéicha umi hénte ohendu porãve chupe. Ñande avei koʼág̃a ñañehaʼã ñañemongeta ñande rapichakuérandi umi mbaʼe oikuaávare ñanerendu porãve hag̃ua hikuái. Peteĩ ehémplo Pablo oiporuvaʼekue ohaírõ guare umi Hebréospe ikatu gueteri ideprovécho ñandéve koʼag̃aite peve predikasiónpe: ‘Ogakuéra ningo oreko ijapohare, upe ojapovaʼekue opaite mbaʼe katu Ñandejára’ (Heb. 3:4, BNP). Ñaipytyvõramo umi héntepe ojepyʼamongeta hag̃ua Pablo heʼivaʼekuére, ikatu ohechakuaa mávapa ñande Apohare ha mbaʼeichaguápa Haʼe. Péro jahechamína avei mbaʼéichapa Pablo ojapórõ guare idiskúrso omokyreʼỹ umi héntepe okambia hag̃ua.

Ñamombeʼúke mbaʼe tiémpopepa jaiko

Apóstol Pablo heʼivaʼekue avei: ‘Ñandejára ohejavaʼekue yvyporakuéra oiko oikuaaʼỹre chupe, koʼág̃a katu heʼi opavavépe ojevy hag̃ua hembiapo vaígui. Haʼe omoĩgui peteĩ ára, ombojovake hag̃ua opa yvypórape tekojojápe peteĩ kuimbaʼe Haʼe oiporavovaʼekue rupi’ (Hech. 17:30, 31).

Ñandejára ohejávo yvyporakuéra ohasa asy omeʼẽ tiémpo enterovépe ohechauka hag̃ua mbaʼépa oreko ipyʼapýpe. Upévare tekotevẽ ñamombeʼu ñande rapichakuérape mbaʼe tiémpopepa jaiko, ha umi mbaʼe porã Ñandejára Rréino oguerútava koʼẽrõitéma (2 Tim. 3:1-5).

Mbaʼépa ojapo umi hénte ohendúvo pe marandu porã

Umi hénte ‘ohendúvo oñeʼẽha peteĩ ñemoingove jeýre, oĩ oñembohorýva hese ha ambue katu heʼi: “kóva ko mbaʼére rohendúta ambue árape”. Upérõ Pablo oheja chupekuéra, péro oĩ ohóva hendive ha ogueroviáva’ (Hech. 17:32-34, JMP).

Ñamyesakãramo la Biblia oñentende porã hag̃uáicha, oĩ pyaʼe ojedesidíva oservi Jehovápe ha ambue katu oikotevẽve tiémpo. Péro javyʼaite ningo Jehová ñandeporu haguére ñaipytyvõ hag̃ua peteĩpente jepe oikuaa hag̃ua Chupe ha Jesucrístope (Juan 6:44).

Mbaʼépa ñaaprende apóstol Páblogui?

Ñahesaʼỹijóvo apóstol Pablo ehémplo ñaaprende mbaʼéichapa ikatu ñamboʼe porãve Ñandejára Ñeʼẽ. Ha oimérõ jajapo jepi diskúrso rreunionhápe ñañehaʼãvaʼerã ñañeʼẽ haʼe ojapo haguéicha. Upéicharõ ndahasyivéta umi ou ramóvape ontende hag̃ua la Biblia omboʼéva ha ogueroviáta. Ñamyesakã porã vaʼerã pe ñamboʼeséva ha ndovaléi ñañembohory umi hénte ogueroviávare. Japredika jave avei jarrespeta ha ñamombaʼevaʼerã ñande rapichápe. Ñañeʼẽvaʼerã umi mbaʼe ogusta ha oipyʼapývare chupekuéra. Péicha jajapóta Pablo heʼivaʼekue: ‘Elee meme Ñandejára Ñeʼẽ ha ehekomboʼe chupekuéra’.

[Nóta oĩva taʼanga ndive páhina 30]

Pablo oporomboʼe oñentende hag̃uáicha ha oñeʼẽ umi hénte oikuaávare

[Nóta oĩva taʼanga ndive páhina 31]

Pablo ojapo haguéicha, jarrespetavaʼerã umi hénte ogueroviá