Emokyreʼỹke ne famíliape olee ha ostudiase hag̃ua

IPORÃITE ningo sy ha túva oñehaʼãramo omokyreʼỹ ifamíliape michĩ guive olee ha ostudiase hag̃ua. Péva ideprovéchota chupekuéra oikove aja pukukue. Heta tapicha imanduʼa pyʼarorýpe mbaʼéichapa itúva térã isy oleemivaʼekue chupe imitãme. Añetehápe igústo jalee, ha ñanepytyvõ heta mbaʼépe, koʼýte jaservíramo Jehovápe. Mbaʼérepa? Upéva ikatu ñanepytyvõ jajerovia mbareteve hag̃ua hese. Peteĩ túva heʼi voi: “Umi mbaʼe iñimportantevéva jaikuaa jalee ha jastudia rupi”.

Ñane família ojepokuaáramo ostudia ikatúta oñemoag̃uive Jehováre (Sal. 1:1-3, 6). Ndahaʼéiramo jepe jaleekuaa haguérente jajesalvátamava, la Biblia heʼi ñanepytyvõtaha jahupyty hag̃ua heta mbaʼe porã. Pór ehémplo, Revelación 1:3 (BNP) heʼi: “Ovyʼavaʼerã pe oleéva ha umi ohendúva koʼã [...] Ñandejára ñeʼẽ”. Pablo katu heʼivaʼekue Timotéope iñimportanteha oñatende porã ostudia jave. Haʼe heʼi: “Ejepyʼamongetáke koʼã mbaʼe rehe ha emaʼẽ porã hese”. Maʼerãpa upéva? “Upéicha opavave ohechakuaáta oho porãha ndéve.” (1 Tim. 4:15, JMP.)

Oĩ heta tapicha olee ha ostudiakuaáva péro ndaideprovéchoi chupe, upéva rangue operde itiémpo vyroreípe. Nde nefamíliaramo, mbaʼéichapa ikatu remokyreʼỹ chupekuéra olee ha ostudiase hag̃ua?

Ehechaukáke rehayhuha chupekuéra ha emoĩ ehémplo iporãva

Iporãitevaʼerã pestudiáramo vyʼápe pene famíliandi. Upéicharõ umi mitã oñandúta rehayhuha chupekuéra. Owen ha Claudia imanduʼa mbaʼéichapa ifamiliakuéra oñeñandumivaʼekue: “Mokõivéva ohaʼarõma voi og̃uahẽ ore estúdio óra. Ovyʼa ha oñeñandu porã hikuái ohechágui rohayhuetereiha chupekuéra.” Péicha vyʼápe pestudiáramo, reipytyvõta ne famíliape ogueropuʼaka hag̃ua umi áño ijetuʼuvéva okakuaávo ohóvo. Owen ha Claudia familiakuéragui oiko prekursór. Koʼág̃a peve ohupyty hikuái heta mbaʼe porã, itúva ha isy oipytyvõ rupi chupekuéra michĩmi guive olee ha ostudiase hag̃ua.

Tuichaiterei oipytyvõta ne famíliape nde voi remoĩramo ehémplo. Ohecháramo hikuái rejepokuaaha relee ha restudia, haʼekuéra ijeheguíntema ojaposéta avei upéva. Péro, mbaʼépa rejapokuaa oimérõ ndereleeseguasúi? Upéicharõ reñehaʼãvaʼerã rekambia (Rom. 2:21). Releevaʼerã káda día, ha upéicha remoĩta peteĩ ehémplo neporãva nde raʼykuérape. Umi mitã ohecháramo releeha Ñandejára Ñeʼẽ, rejeprepara rreunionrã ha  restudiase hendivekuéra, ontendéta umi mbaʼe iñimportantetereiha.

Jahechaháicha, remboʼevaʼerã mborayhúpe ne famíliape, ha nde voi remoĩvaʼerã ehémplo relee ha restudiávo. Péro, mbaʼe mbaʼépa rejapovaʼerã avei remokyreʼỹ hag̃ua chupekuéra oleese hag̃ua?

Emokyreʼỹke ne familiakuérape oleese hag̃ua

Reipotáramo ne família olee, remeʼẽvaʼerã chupekuéra ilivrorã michĩete guive. Peteĩ ansiáno imanduʼa mbaʼéichapa itúva ha isy omokyreʼỹvaʼekue chupe olee hag̃ua. Haʼe heʼi: “Pemeʼẽ umi mitãme ilivrorã. Péicha añoite ogustáta chupekuéra ha ojepokuaáta olee”. Heta mitã olee mboyve jepe ohayhúma pe lívro Ñaaprende Mboʼehára Guasúgui ha Che lívro omombeʼúva istória oĩva Ñandejára Ñeʼẽme. Releéramo koʼã lívro ne familiakuérape, pyaʼeterei oñeʼẽ porãta ha oaprendéta “Ñandejára espíritu ñanemboʼéva” ha “espíritu sánto rehegua ñeʼẽ” (1 Cor. 2:13).

Releevaʼerã ne familiakuérape káda día. Péicha haʼekuéra oñeʼẽkuaáta ha avei oleeséta. Iporã relee kyreʼỹme ikatu hag̃uáicha ogusta chupekuéra. Sapyʼánte umi mitã ikatu ojerure ndéve relee hag̃ua heta vése peteĩ istória. Mbaʼeve ndoikói, elee katu chupekuéra. Mbeguekatúpe oikuaasevéta hikuái hetave mbaʼe. Péro aníkena rejopy chupekuéra oguapy hag̃ua olee nendive. Upéva rangue reñehaʼãvaʼerã rejapo Jesús ojapo haguéicha; haʼe omboʼe umi héntepe ‘ontende hag̃uáicha hikuái’ (Mar. 4:33, NM). Ndovaléi remboʼe chupekuéra hetaiterei mbaʼe peteĩ estúdiope ani hag̃ua ikuerái ha ndostudiasevéi. Péicha haʼekuéra vyʼapópe ohaʼarõta pe estúdio óra, ha ikyreʼỹta olee hag̃ua.

Peñemongeta umi mbaʼe peleévare ha emokyreʼỹ chupekuéra okomenta hag̃ua. Peñemongetárõ umi mbaʼe peleévare pyaʼeterei oñakãrapuʼãta hikuái. Ndejuruvyreíta rehechávo mbaʼéichapa ne família michĩmi guive oikuaáma umi létra, omoñeʼẽkuaa ha opilláma mbaʼépa heʼise pe oleéva. Peteĩ lívro omboʼéva mbaʼéichapa ñamokyreʼỹvaʼerã mitãme oleese hag̃ua heʼi: “Ñañemongetáramo umi mitãndi, haʼekuéra opilláta mbaʼe ñeʼẽpa oikuaa ha ontendevaʼerã olee jave [...] Iporã peñemongeta hendivekuéra ikatu hag̃uáicha omombaʼapo iñakã”.

Ejerure chupekuéra tolee ha toporandu. Pelee jave nde voi ikatu reprepara umi porandu, térã remoĩ heta rrespuésta ha rejerure chupekuéra toiporavo pe oĩ porãva. Péicha oaprendéta hikuái umi lívro ñanemboʼeha heta mbaʼe. Upéva iporãiterei, koʼýte jaleéramo peteĩ lívro omyesakãva Ñandejára Ñeʼẽ (Heb. 4:12).

Umi mitã olee porã hag̃ua tekotevẽ oñensaja meme. * Upévare rehecháramo oñakãrapuʼãha ohóvo reguerohoryvaʼerã chupekuéra nde pyʼaite guive. Péicha nde raʼykuéra ikyreʼỹta ha vyʼápe oleéta.

Igústo jalee ha ideprovécho opavavépe

Ñane família oñepyrũvo ostudia ohecháta mbaʼérepa iñimportánte oleekuaa. Peteĩ ostudiáva ningo ohekavaʼerã informasión ha ohesaʼỹijo porã. Upéi katu oñehaʼãvaʼerã imanduʼa pe oaprendevaʼekuére ha ohecha mbaʼéicha javépa oiporúta. Pe mitã ostudiakuaáva ha ohecháva mbaʼéichapa oipytyvõ chupe umi mbaʼe oaprendéva, ikyreʼỹvéta ostudia hag̃ua (Ecl. 10:10).

 Emboʼe chupekuéra mbaʼéichapa ostudiavaʼerã. Upéva ikatu rejapo peñembyaty jave pestudia hag̃ua Ñandejára Ñeʼẽ térã pehesaʼỹijóvo téysto káda diagua. Primero, pestudia mbykymítaramo jepe umi mitãndi, peñehaʼãvaʼerã toguapy ha topyta peteĩ hendápe. Péicha ojepokuaáta ojesareko ha oñatende pestudia jave. Ejerure chupekuéra tombojoja pe oleéva umi mbaʼe oikuaávare. Imanduʼa porãve hag̃ua, emokyreʼỹ chupekuéra tomombeʼu mbykymi iñeʼẽtépe pe oaprendevaʼekue. Iporã avei peñeʼẽ jey jey umi mbaʼe iñimportantevévare. Ha ojepokuaa hag̃ua ojesareko pestudia jave térã rreunionhápe, michĩ guive remeʼẽvaʼerã chupekuéra kuadérno ha lápis oanota hag̃ua. Koʼã mbaʼe penepytyvõta pestudia porãve hag̃ua.

Pestudia peteĩ lugár itrankilohápe. Peheka peteĩ lugár hesakã ha ipiroʼy porãva ikatu hag̃uáicha umi mitã oñatende porã ha ohecha pe estúdio iñimportanteha. Peteĩ sy heʼi: “Tekotevẽ jajapo ñande estúdio idía ha hiʼoraitépe. Péicha ñane membykuéra oikuaáta opa mbaʼe orekoha hiʼóra ha ñakumplivaʼerãha hekoitépe”. Upévare heta sy ha túva ndohejái ifamília ojapo ambue mbaʼe estúdio órape. Péicha umi mitã oaprendéta mbaʼéichapa ostudiavaʼerã.

Ehechauka chupekuéra ideprovechoha pe oaprendéva. Ehechauka ne famíliape mbaʼéichapa oipytyvõta chupekuéra pe oaprendéva. Upéicharõ ontendéta hikuái mbaʼérepa ostudiavaʼerã. Peteĩ mitãrusu heʼi: “Ndahecháiramo mbaʼépepa chepytyvõta pe aleéva, hasyve astudia hag̃ua. Péro ahecháramo ideprovechotaha chéve, cheakãrakuve alee hag̃ua”. Ne família ohechakuaáramo iporãha pe ostudiáva, ikyreʼỹvéta olee hag̃ua.

Jahupytýta peteĩ mbaʼe neporãmba jepéva

Hetaiterei mbaʼe ningo ikatu jahupyty ñamboʼéramo ñane famíliape olee hag̃ua. Ñanekoʼẽmbáta voi ñañemoĩtarõ ñamombeʼupa umi mbaʼe porã. Pór ehémplo, ñane família ñanderayhuvéta, ikatupyryvéta imboʼehaópe, itravahohápe, ojegueraha porãvéta hapichakuérandi, ha ontendéta mbaʼépa heʼise umi mbaʼe oikóva ko múndope. Hiʼarive ovyʼaitereíta hikuái olee ha ostudiakuaa haguére.

Iporãveha katu pe estúdio oipytyvõta chupekuéra ohayhu hag̃ua Jehovápe ha ojerovia hese. Ojesapeʼáta ha ontendéta ‘mbaʼeichaitépa ipy, ipuku, ipypuku ha ijyvate’ umi mbaʼe oĩva Ñandejára Ñeʼẽme (Efe. 3:18, BNP). Hetaiterei mbaʼe ningo oĩ remboʼevaʼerã ne familiakuérape. Upévare eñemotiémpokena ha ejapo ikatúva guive reipytyvõ hag̃ua chupekuéra oservise hag̃ua Jehovápe. Rembojepokuaáramo chupekuéra imitã guive olee ha ostudia hag̃ua, ikatúta oñemoag̃uive Ijapoharére. Jehová katuete ohendúta ne ñemboʼe ha nepytyvõta reñehaʼãramo remokyreʼỹ ne famíliape olee ha ostudiase hag̃ua (Pro. 22:6).

[Nóta]

 [Rrekuádro oĩva páhina 26-pe]

Emokyreʼỹ olee hag̃ua

• Emeʼẽ chupekuéra ilivrorã

• Elee chupekuéra

• Emokyreʼỹ okomenta hag̃ua

• Peñemongeta

• Ejerure chupekuéra tolee

• Emokyreʼỹ oporandu hag̃ua

Emokyreʼỹ ostudia hag̃ua

• Nde voi ehémplo vaʼerã

• Emboʼe chupekuéra mbaʼéichapa ostudiavaʼerã:

○ ojesareko

○ ombojoja

○ omombeʼu mbykymi

○ oñeʼẽ jey jey

○ oanota

• Pestudia itrankilohápe

• Ehechauka mbaʼépepa ideprovécho