Mbaʼépa oikóta Jehová ára guasúpe?

‘Jehová ára og̃uahẽta oñehaʼarõʼỹve jave, ku mondaháicha. Ko yvy ha opa mbaʼe oĩva pype ojehecháta.’ (2 PED. 3:10)

1, 2. a) Mbaʼéichapa oñehundíta ko múndo aña? b) Mbaʼe porandúpa ñahesaʼỹijóta?

 HETAITEREI oĩ ogueroviáva yvyporakuéra ikatuha ogoverna porã ko yvy Jehová reheʼỹ (Sal. 2:2, 3). Péva ningo peteĩ japu tuichaitereíva. Upévare ko múndo aña ndaikatumoʼãi osegi are. Péro ani ñaimoʼã ko múndo oĩva Satanás poguýpe oñehunditaha ijehegui reínte. Jehová hína pe ohundítava ko múndo, ha ojapóta upéva hiʼoraitépe ha oikuaahaichaite. Péro upe árape haʼe ohechaukáta hekojoja ha ñanderayhuha (Sal. 92:7; Pro. 2:21, 22).

² Apóstol Pedro heʼi: ‘Jehová ára og̃uahẽta oñehaʼarõʼỹve jave, ku mondaháicha, upe árape pe yvága ohasavaʼerã tyapu guasúpe, ha umi mbaʼe oĩva ipype ikusuguéta, ko yvy ha opa mbaʼe oĩva pype ojehecháta’ (2 Ped. 3:10). Ha mbaʼépa orrepresenta hína ‘pe yvága’ ha ‘ko yvy’? Mbaʼépa hína ‘umi mbaʼe oĩva ipype ikusuguétava’? Mbaʼépa heʼiserakaʼe Pedro heʼírõ guare ‘ko yvy ha opa mbaʼe oĩva pype ojehechataha’? Ñahesaʼỹijomína koʼã porandu ikatu hag̃ua ñambohovái umi mbaʼe ijetuʼuetéva koʼẽrõitéma oikótava.

Pe yvága ha yvy ohasátava

3. Mbaʼépa orrepresenta ‘pe yvága ohasátava’? Ha mbaʼéichapa oñehundíta?

³ Sapyʼánte la Bíbliape oñehenói ‘yvága’ umi goviérnope, orekógui avei ipoguýpe yvyporakuérape (Isa. 14:13, 14; Rev. 21:1, 2). ‘Pe yvága ohasátava’ orrepresenta umi goviérno koʼag̃aguápe. Mbaʼérepa Pedro heʼi umíva ohasavaʼerãha peteĩ ‘tyapu guasúpe’? Oiméne heʼi upéicha oñehundíta rupi peteĩ tesapirĩme.

4. Mbaʼépa orrepresenta ‘pe yvy’ ha mbaʼéichapa oñehundíta?

⁴ ‘Pe yvy’ katu orrepresenta yvyporakuéra oñemomombyrývape Ñandejáragui. Yma ningo Noé tiémpope oĩvaʼekue peteĩ múndo aña, ha upe múndo Ñandejára ohundi peteĩ ama guasu rupive. Koʼág̃a avei oĩ peteĩ múndo aña Noé tiémpope guaréicha. Ha ‘Ñandejára heʼi haguéicha pe yvága ha yvy koʼag̃agua ojehejahína oñehundi hag̃ua tatápe, ohaʼarõhína ojehusga, ha umi hembiapo vaíva oñehundi hag̃ua’ (2 Ped. 3:7). Pe Ama guasu oúrõ guare oñehundipaitevaʼekue umi hénte añáme una vetépe. Péro ko múndo koʼag̃agua oñehundíta pór párte pe ‘jehasa asy guasu’ aja (Rev. 7:14). Ñepyrũrã Ñandejára omomýita umi polítikope ohundi hag̃ua Babilonia Guasu, térã umi rrelihión japu (Rev. 17:5, 16; 18:8). Upéi Armagedónpe Jehová ohundipaitéta umi opytáva gueteri Satanás múndope (Rev. 16:14, 16; 19:19-21).

‘Umi mbaʼe ikusuguétava’

5. Mbaʼépa hína ‘umi mbaʼe ikusuguétava’?

⁵ Mbaʼépa hína ‘umi mbaʼe ikusuguétava’? Umíva hína umi mbaʼe opensa ha ojapóva la hénte ha ndogustáiva Ñandejárape. Umi mbaʼe ikusuguétava apytépe oĩ avei ‘pe espíritu yvy arigua’, pe ‘oguerekóva ipoguýpe umi Ñandejárape iñeʼẽrenduʼỹva’ (1 Cor. 2:12; jaleemína Efesios 2:1-3).  ‘Pe espíritu yvy ariguápe’ oñehenói avei ‘yvytu’, ojagarrágui oparupiete ko múndo oĩva Satanás poguýpe. Upévare la hénte opensa, heʼi ha ojapóva rupive ohechauka ojoguaha Satanáspe.

6. Mbaʼéichapa ojekuaa heta héntere oĩha Satanás poguýpe?

⁶ Heta héntepe ningo ojagarráma ko ‘yvy arigua espíritu’, upévare opensa ha ojapóvare ojekuaa oĩha hikuái Satanás poguýpe. Upéicha rupi haʼekuéra ojapo ojaposévante ha ndoipyʼapýi chupekuéra mbaʼépa Ñandejára opensa. Haʼekuéra oñemombaʼeguasu, opensa ijehénte, opuʼã mburuvichakuérare ha ojapose umi mbaʼe vai ohecha ha oñandúva (jaleemína 1 Juan 2:15-17). *

7. Mbaʼépa jajapovaʼerã ñañangareko hag̃ua ñane korasõre ha mbaʼérepa?

⁷ Ajépa iporãitéta jajapóramo ko konsého heʼíva: ‘Eñangareko porãkena ne korasõre!’ (Pro. 4:23). Upearã tekotevẽ jaiporu pe arandu Jehová omeʼẽva ñandéve jaiporavo hag̃ua ñane amigorã, ñande vyʼarã, umi mbaʼe jaleétava térã jaiporu jave Internét. Apóstol Pablo heʼi voi ñandéve: ‘Peñatendékena, ikatúgui oĩ penemoñuhãséva yvypóra arandu ha umi kostúmbre rupive. Upearã haʼekuéra oiporu umi mbaʼe ko múndope oĩva, omboʼerangue Cristo heʼíva’ (Col. 2:8). Ha koʼág̃a rupi tekotevẽtereive ñañatende upe heʼivaʼekuére, pórke hiʼag̃uimbaitéma Jehová ára. Upe árape “tatarendy” hakuetereíva ombokusuguéta ‘umi mbaʼe oĩva’ Satanás múndope. Upéicharõ umíva ndogueropuʼakamoʼãi opyta hag̃ua Jehová renondépe. Malaquías 4:1-pe heʼi avei: ‘Og̃uahẽ oúvo pe ára tatakuáicha hendýva, ha umi oñembotuicháva ha hembiapo vaíva okáita ku ñana pirukuéicha. Ha upe ára oúva ombokusuguéta chupekuéra’.

‘Ko yvy ha opa mbaʼe oĩva pype ojehecháta’

8. Mbaʼéichapa ‘ko yvy ha opa mbaʼe oĩva pype ojehecháta’?

⁸ Mbaʼépa heʼiserakaʼe Pedro heʼírõ guare ‘ko yvy ha opa mbaʼe oĩva pype ojehechataha’? Upe ñeʼẽ haʼe oiporúva ikatu avei ojetradusi “oñemyesakãta” térã “ojekuaapáta”. Upéicharõ Pedro heʼivaʼekue, heʼise pe jehasa asy guasu aja ojehechataha mbaʼéichapa ko múndo hembiapo vai. Upérõ Jehová ohechauka porãta ko múndo aña opuʼãha hese ha irréinore, ha omereseha oñehundi. Isaías 26:21-pe oñemombeʼu voi mbaʼépa Jehová ojapóta: ‘Jehová osẽmahína pe hekohágui okastiga hag̃ua umi hembiapo vaívape. Ha ko yvy ohechaukáta tuguy oñohẽvaʼekue ha nomoʼãmoʼãvéima umi ojukavaʼekuépe’.

9. a) Mbaʼépa tekotevẽterei ñamboyke ha mbaʼérepa? b) Mbaʼépa ñamoheñoivaʼerã ñande rekovépe ha mbaʼérepa?

⁹ Jehová árape, umi hénte oĩva ko múndo ha ijespíritu aña poguýpe ohechauka porãta mbaʼeichaguápa hikuái, ha oĩta voi umi ojojukáva. Koʼág̃a rupi hetaiterei umi vyʼarã ivaíva ha oiméne ojeporuhína upe rire umi hénte ‘opuʼã hag̃ua ojuehe ha oñorairõ’ pe jehasa asy guasu aja (Zac. 14:13). Upévare tekotevẽterei ñamboyke umi pelíkula, lívro ha videohuégo ñanemomýitava ñañemombaʼeguasu ha ñañorairõse hag̃ua. Térã ñanemomýitava jajapo hag̃ua umi mbaʼe Ñandejárape ndogustáiva (2 Sam. 22:28; Sal. 11:5). Tekotevẽ avei ñamoheñói ñande rekovépe umi mbaʼe porã Ñandejára espíritu sántogui oúva. Umíva ñanepytyvõta jajesalva hag̃ua Jehová ára guasúpe (Gál. 5:22, 23).

‘Yvága pyahu ha yvy pyahu’

10, 11. Mbaʼépa orrepresénta pe ‘yvága pyahu’ ha ‘yvy pyahu’?

¹⁰ (Jaleemína 2 Pedro 3:13.) Mbaʼépa orrepresenta  pe ‘yvága pyahu’? Upéva hína Ñandejára Rréino oĩva yvágape, oisãmbyhýva 1914 guive opárõ guare ‘pe tiémpo oñemeʼẽva umi tetãme’ (Luc. 21:24). Kóva ko Rréino omoakã Jesús ha umi unhído oĩmava yvágape. Pe lívro de Revelación ombojoja koʼã unhídope ‘pe táva marangatu, Jerusalén Pyahu rehe. Oguejyvahína yvágagui, Ñandejára renondégui. Haʼete voi peteĩ nóvia ojeguapáva iménape g̃uarã’ (Rev. 21:1, 2, 22-24). Yma ningo Israélpe pe goviérno oĩvaʼekue Jerusalénpe. Péro Ñandejára múndo pyahúpe Jesús ha umi 144.000 ogovernátava haʼehína pe ‘Jerusalén Pyahu’. Ko táva ‘oguejýta yvágagui’, térã oisãmbyhýta yvága guive ko yvy.

¹¹ Pe ‘yvy pyahu’ katu orrepresenta yvyporakuéra oikótavape ko yvy ape ári ha oñemoĩvape Ñandejára Rréino poguýpe. Ñande ningo ñaiméma Ñandejára organisasiónpe ha jaikóma vyʼa ha pyʼaguapýpe. Ha iporãveha katu koʼẽrõitéma jaikóta upéicha Ñandejára ‘múndo pyahúpe’ ko yvy ape ári (Heb. 2:5). Mbaʼépa jajapovaʼerã jahupyty hag̃ua upéva?

Jajepreparákena ñahaʼarõvo Jehová ára guasu

12. Mbaʼérepa oñemondyipáta umi naiñeʼẽrendúiva og̃uahẽ vove Jehová ára?

¹² Apóstol Pablo heʼi avei Jehová ára og̃uahẽtaha oñehaʼarõʼỹve jave ku ‘mondaháicha’ (jaleemína 1 Tesalonicenses 5:1, 2). Jehová siervokuéra ohaʼarõmavahína jepe noimoʼãmoʼãi og̃uahẽmaha upe ára (Mat. 24:44). Péro umi naiñeʼẽrendúiva Jehovápe katu oñemondyipáta upe árape. Mbaʼérepa? Apóstol Pablo ohai: ‘Heʼi jave hikuái jaikóma “pyʼaguapy ha kyhyjeʼỹme”, oúta hiʼarikuéra ñehundi guasu oimoʼãʼỹve jave, pe kuña imembypotávare oikoháicha, oimoʼãʼỹve jave hasyete imemby hag̃ua. Upéicha avei haʼekuéra ni mbaʼevéicharõ ndojesalvamoʼãi’ (1 Tes. 5:3).

13. Mbaʼépa jajapovaʼerã ani hag̃ua ko múndo ñanembotavy heʼi vove ‘jaikomaha pyʼaguapy ha kyhyjeʼỹme’?

¹³ Ñandejára siervokuérape nombotavymoʼãi ko múndo heʼi vove: Jaikóma “pyʼaguapy ha kyhyjeʼỹme”. Haʼekuéra oikuaa upe japu ouha umi demóniogui. Apóstol Pablo heʼivaʼekue voi: ‘Peẽ, che ermanokuéra ndapeikói pytũnguýpe upe ára pendejagarra hag̃ua ku ojagarraháicha mondahápe. Peẽ ningo pe ohesapéva raʼykuéra hína’ (1 Tes. 5:4, 5). Upévare tekotevẽ akóinte jaguata Ñandejára rapére, ha ñañemomombyry ko múndo oĩvagui Satanás poguýpe. Apóstol Pedro heʼi voi oĩtaha avei mboʼehára japu kongregasiónpe, haʼe heʼi: ‘Che pehẽnguekuéra ahayhuetéva, peẽ ningo peikuaáma voi koʼã mbaʼe oiko mboyve. Peñangarekóke pendejehe ani umi heko añáva penembotavy ha ohejaka peẽme umi mbaʼe porã pejapóva peikóvo’ (2 Ped. 3:17).

14, 15. a) Mbaʼépa Jehová oikuaauka ñandéve? b) Mbaʼe konséhopa tekotevẽ ñamombaʼe?

¹⁴ Jehová heʼi ñandéve ‘ñañangareko hag̃ua ñandejehe’, térã ñañatende porã hag̃ua.  Ha iporãveha oikuaauka ñandéve mbaʼépa oikóta amo gotyove.

¹⁵ Pyʼỹinte kongregasiónpe oñemeʼẽ ñandéve konsého ñañatende porã hag̃ua jaikóvo, péro oĩ umi nopenáiva, oñembohorýva ha ndogueroviáiva upéva. Ikatu voi heʼi: “Ymaiterei guivéma ahendu upéva”. Péro umíva ohechakuaavaʼerã heʼívo upéicha opuʼãha Jehová ha Itaʼýra rehe voi, ndahaʼéi pe tembiguái jeroviaháre añónte. Jehová hína pe heʼíva ñandéve: ‘Peñatende porãke pehaʼarõ aja’ (Hab. 2:3). Ha Jesús heʼi avei: ‘Peñatende porãke, ndapeikuaaipeína arakaʼetépa oúta pende jára’ (Mat. 24:42). Apóstol Pedro ohaivaʼekue avei: ‘Peñehaʼãkena pende reko marangatu ha pehechauka pehayhuha Ñandejárape. Peñembosakoʼi ha pehaʼarõ Jehová ára guasu og̃uahẽ’ (2 Ped. 3:11, 12). Pe tembiguái jeroviaha ha pe Cuerpo Gobernante omombaʼeterei koʼã konsého.

16. Mbaʼépa ndovaléi jajapo ha mbaʼérepa?

¹⁶ Pe ‘tembiguái ñaña’ haʼehína pe oimoʼãva Jehová ára nog̃uahẽmoʼãiha gueteri (Mat. 24:48). Ha 2 Pedro 3:3, 4 oñeʼẽ avei hese heʼívo: ‘Pe ára pahápe ouvaʼerã tapichakuéra oñembohorýva ha oikóva oikoseháicha’. Haʼekuéra oiko opuka umi iñeʼẽrendúvare ha umi ohaʼarõvare Jehová ára. Ha omotenonderangue Ñandejára Rréino haʼekuéra opensa ijehénte. Péro ñande ndovaléi jajapo upéicha arakaʼeve. Upéva rangue ‘jahechakuaavaʼerã Ñandejára ipasiénsia rupi ikatuha jajesalva’. Japredikavaʼerã katu kyreʼỹme ha ñaipytyvõ ñande rapichakuérape oiko hag̃ua chuguikuéra Jesús remimboʼe. Aníkena jajepyʼapyeterei jaikuaaségui arakaʼetépa oúta Jehová ára guasu. Upéva jahejavaʼerã Jehová pópe, haʼémante odesidivaʼerã arakaʼépa oguerúta (2 Ped. 3:15; jaleemína Hechos 1:6, 7).

Ñandejára ñandesalváta katuete

17. Mbaʼépa ojaporakaʼe Jesús remimboʼekuéra umi Romaygua ojagarrárõ guare Judea ha mbaʼérepa?

¹⁷ Pe año 66-pe umi ehérsito Romaygua ojagarra Judea. Jesús heʼivaʼekue voi hemimboʼekuérape pyaʼe osẽvaʼerãha Jerusaléngui ohechávo upéva oiko, ha haʼekuéra ojapo upéicha (Luc. 21:20-23). Mbaʼérepa pyaʼete osẽ hikuái upégui? Iñeʼẽrendu rupi Jesúspe, ha ojeroviágui Jehová ndohejamoʼãiha chupekuéra arakaʼeve (Sal. 55:22). Péro upérõ oiméne oikuaa hikuái ijetuʼutaha hendivekuéra upéicha ojapo haguére.

18. Mbaʼépa repensa pe jehasa asy guasu oikótavare releévo Lucas 21:25-28?

 ¹⁸ Ñande avei jajeroviavaʼerã Jehováre ñane ánga ruguaite guive, jaikuaa rupi haʼe añoite ikatuha ñandesalva oiko vove pe jehasa asy guasu. Ha peichagua jehasa asy neʼĩrava gueteri oiko. Jehová ohundipa mboyve ko múndo, pe jehasa asy guasu aja umi hénte aña ‘omanóta voi okyhyjégui umi mbaʼe oikótavagui ko yvy ape ári’. Péro Jehová siervokuéra iñeʼẽrendúva ndoryryipamoʼãi kyhyjégui upe tiémpope. Ovyʼáta katu hikuái ohechakuaágui isãsopotaitemaha (jaleemína Lucas 21:25-28).

19. Mbaʼépa jahecháta pe ótro artíkulope?

¹⁹ Heta mbaʼe porã ohaʼarõ umi ndojeheʼáivape ko múndore ha ‘umi mbaʼe oĩvare ipype’. Pe ótro artíkulope jahecháta jaikove hag̃ua opa ára g̃uarã tekotevẽha ñamboyke umi mbaʼe ivaíva ha ñañehaʼã jajapo umi mbaʼe porã Jehová oguerohorýva (2 Ped. 3:11).

[Nóta]

Ikatúpa remyesakãmi?

• Mbaʼépa orrepresenta ‘pe yvága’ ha ‘pe yvy’ koʼag̃agua?

• Mbaʼépa hína ‘umi mbaʼe ikusuguétava’?

• Mbaʼépa orrepresenta ‘pe yvága pyahu’ ha ‘pe yvy pyahu’?

• Mbaʼérepa jajerovia Ñandejárare ñane ánga ruguaite guive?

[Porandu ñahesaʼỹijóva]

[Nóta oĩva taʼanga ndive páhina 5]

Mbaʼépa ikatu jajapo ñañangareko hag̃ua ñane korasõre ha ani hag̃ua jajeheʼa ko múndore?

[Nóta oĩva taʼanga ndive páhina 6]

Mbaʼépa jajapovaʼerã ‘jahechakuaáramo Ñandejára ipasiénsia rupi ikatuha jajesalva’?