Mbaʼépa tekotevẽ jajapo jajesalva hag̃ua
Mbaʼépa tekotevẽ jajapo jajesalva hag̃ua
‘Péicha oñehundipátagui opa mbaʼe, peẽ peñehaʼãvaʼerã pende reko marangatu ha pehechauka pehayhuha Ñandejárape!’ (2 PED. 3:11)
1. Mbaʼépa ohasahína umi kristianokuéra apóstol Pedro ohaírõ guare isegúnda kárta?
APÓSTOL Pedro ohaírõ guare isegúnda kárta, heta tiémporema Satanás opersegi kristianokuérape. Upéicharamo jepe nomokangýi ha ndojokói chupekuéra, hetave rei katu hikuái kongregasiónpe. Upévare Satanás oiporu jey peteĩ ñuhã oiporumavaʼekue voi heta vése. Haʼe ningo ogueraha vai hag̃ua Ñandejára rembiguaikuérape, oiporu umi mboʼehára japu ‘tekovaínte ohekáva’ ha ‘ivaléva oporombotavy hag̃ua’ (2 Ped. 2:1-3, 14; Jud. 4). Ha upe situasiónpe umi kristiáno osegivaʼerã iñeʼẽrendu Jehovápe. Upévare apóstol Pedro omokyreʼỹ chupekuéra isegúnda kárta rupive.
2. Mbaʼérepa oñeʼẽ apóstol Pedro pe kapítulo 3-pe, ha mbaʼépa ñañeporanduvaʼerã?
2 Apóstol Pedro ohai: ‘Aikuaa ningo koʼẽrõitéma pohejataha, upévare koʼág̃a añehaʼã pomombáy ha pomomanduʼa. Aikuaa voi ndaikoʼaremoʼãveimaha ko yvy ape ári. Upévare añehaʼãmbaite ajapo ikatumíva penemanduʼa hag̃ua koʼã mbaʼére ág̃a che aha rire’ (2 Ped. 1:13-15). Péicha heʼi Pedro oikuaágui omano ag̃uimaha. Haʼe ndoipotáikuri opyta tesaráipe umi konsého omeʼẽvaʼekue. Ha koʼág̃a peve voi enterove ikatu jajuhu la Bíbliape upe heʼivaʼekue. Pe kapítulo 3 iñimportanteterei ñandéve g̃uarã. Upépe apóstol Pedro oñeʼẽ pe ‘ára paháre’ ha mbaʼéichapa oñehundíta ko múndo aña oĩva Satanás poguýpe (2 Ped. 3:3, 7, 10). Mbaʼe konséhopa oheja ñandéve Pedro ikártape? Mbaʼéichapa ñanepytyvõta ñaime porã hag̃ua Jehovándi?
3, 4. a) Mbaʼépa heʼi apóstol Pedro tekotevẽha ojapo umi kristiáno, ha mbaʼépa heʼive? b) Mbaʼe mbaʼépa ñahesaʼỹijóta koʼág̃a?
3 Omombeʼu rire oñehunditaha ko múndo oĩva Satanás poguýpe, apóstol Pedro heʼi umi kristianokuérape mbaʼépa tekotevẽ ojapo: ‘Peẽ peñehaʼãvaʼerã pende reko marangatu ha pehechauka pehayhuha Ñandejárape!’ (2 Ped. 3:11, 12). Haʼe oikuaa porã, umi ojapóva Jehová rembipota ha omoheñóiva hekovépe umi mbaʼe porã añoite ikatutaha ojesalva Jehová árape (Isa. 61:2). Upévare heʼive: ‘Che pehẽnguekuéra ahayhuetéva, peẽ ningo peikuaáma voi koʼã mbaʼe oiko mboyve. Peñangarekóke pendejehe ani umi mboʼehára japu penembotavy ha ohejaka peẽme umi mbaʼe porã pejapóva peikóvo’ (2 Ped. 3:17).
4 Jehová oikuaaukavaʼekue avei apóstol Pédrope ‘heta mbaʼe oiko mboyve’. Upéicha rupi oikuaa pe ára pahápe, kristianokuéra tekotevẽtaha oñangarekove ijehe, térã oñatende porã akóinte iñeʼẽrendu hag̃ua Ñandejárape. Heta año rire apóstol Juan ohechauka porã mbaʼérepa tekotevẽterei oñatende porã hikuái. Peteĩ visión rupive haʼe ohecha mbaʼéichapa Satanás ‘ipochy’ ojeity rire chupe yvágagui, ha opersegi ‘umi iñeʼẽrendúvape Ñandejárape ha opredikáva Jesús rérape’ (Rev. 12:9, 12, 17). Péro jaikuaa umi unhído ha ambue ovechakuéra osegitaha iñeʼẽrendu Jehovápe (Juan 10:16). Upéicharõ iporã ñañeporandu: “Asegítapa cheñeʼẽrendu Jehovápe ipahaite peve?”. Upearã, tekotevẽ jajapo koʼã mbohapy mbaʼe: 1) ñamoheñói ñande rekovépe umi mbaʼe porã, 2) ñanderekopotĩ ha ñamombaʼeguasu Jehovápe añoite, ha 3) jahecha hendapete ñaneprovlemakuéra. Koʼág̃a ñahesaʼỹijóta koʼã mbohapy mbaʼe.
Ñamoheñóikena umi mbaʼe porã ñande rekovépe
5, 6. Mbaʼe iporãvapa ñamoheñoivaʼerã ñande rekovépe, ha mbaʼépa tekotevẽ jajapo?
5 Omoñepyrũvo isegúnda kárta apóstol Pedro ohai: ‘Peñehaʼãmbaitevaʼerã pende jeroviándi pende rekoporã, peikuaa porã Ñandejárape, pejejokokuaa, pegueropuʼakakuaa, pehayhu Ñandejárape, pejoayhu oñoermánoicha ha peiko mborayhúpe. Koʼã mbaʼe okakuaáramo pende pype napenderekoreimoʼãi ha peikuaa porãvéta Jesucrístope’ (2 Ped. 1:5-8).
6 Ñamoheñói hag̃ua ñande rekovépe umi mbaʼe porã ‘ñañehaʼãmbaitevaʼerã’. Upearã tekotevẽ ndajafaltái rreunionhápe, jalee la Biblia káda día, ha jareko peteĩ día ha óra jastudia hag̃ua. Ñañehaʼãvaʼerã avei jajapo káda semána pe Aty Jastudia hag̃ua Ñande Rogayguándi. Péva ningo jajapovaʼerã igústo ha ideprovécho hag̃uáicha. Ha jajepokuaa vove jajapo koʼã mbaʼe, ndahasyivéta jasegi hag̃ua jajapo, ha koʼýte jahechakuaávo mbaʼeichaitépa ñanepytyvõ.
7, 8. a) Mbaʼépa heʼi ermanokuéra pe Aty Jastudia hag̃ua Ñande Rogayguándi rehe? b) Mbaʼéichapa ndéve nepytyvõ ko aty?
7 Mbaʼéichapa oipytyvõ ermanokuérape pe Aty Jastudia hag̃ua Ñande Rogayguándi? Peteĩ ermána heʼi: “Hetaiterei mbaʼéma roaprende”. Ambue ermána katu heʼi: “Chéve chegustaitereivaʼekue pe estúdio de lívro ha upévare ndaipotáikuri opa. Péro koʼág̃a rojapo rire pe Aty Jastudia hag̃ua Ñande Rogayguándi, ahechakuaa Jehová oikuaaha mbaʼépa roikotevẽ, ha omeʼẽ oréve upe roikotevẽva”. Ha peteĩ ermáno heʼi: “Chéve ha che rembirekópe tuichaiterei orepytyvõ. Ikatu voi rostudia umi mbaʼe roikotevẽva. Orepytyvõ romoheñói hag̃ua ore rekovépe umi mbaʼe porã oúva Ñandejára espíritugui ha rovyʼaitereive predikasiónpe”. Peteĩ túva heʼi avei: “Che raʼykuéra ohesaʼỹijo umi informasión rostudiátava ha ovyʼa hikuái oikuaavévo heta mbaʼe. Koʼág̃a rogueroviave Jehová ojepyʼapyha orerehe ha ohenduha ore ñemboʼe”. Ha ndépa mbaʼe repensa ko jopói porãite Jehová omeʼẽvare ñandéve?
8 Aníkena remboyke ko Aty umi mbaʼe naiñimportánteivare. Peteĩ ermáno ha hembireko omombeʼu: “Umi cuatro jueves ohasavaʼekuépe, oiko umi mbaʼe rohaʼãroʼỹva upéicharõ jepe rostudia”. Jaikuaa avei sapyʼánte tekotevẽtaha ñakambia pe día ha óra ñamoĩva jastudia hag̃ua. Péro animoʼãkena jaheja ohasa ni una semána jajapoʼỹre pe Aty Jastudia hag̃ua Ñande Rogayguándi.
9. Mbaʼépa oipytyvõ Jeremíaspe, ha mbaʼérepa jasegise iñehémplo?
9 Pe proféta Jeremías omoĩ peteĩ ehémplo iporãva ñandéve g̃uarã. Haʼe akóinte omombaʼevaʼekue umi mbaʼe Jehová omeʼẽva chupe omombarete hag̃ua ijerovia, upéicha rupi osegi opredika umi hénte ipyʼahatãitévape. Upévare haʼe heʼi: ‘Jehová ñeʼẽ oĩva che pyʼapýpe haʼete voi ku tata rendýicha oĩva che kanguekuápe’ (Jer. 20:8, 9). Jehová omombarete avei chupe ombohovái hag̃ua umi mbaʼe ijetuʼuetéva oikovaʼekue Jerusalén oñehundítarõ guare. Ha ñandéve katu koʼág̃a Ñandejára omeʼẽ Iñeʼẽ la Biblia. Upévare, jasegi hag̃ua Jeremías ehémplo jastudia meme vaʼerã ha ñapensa Ñandejára opensaháicha. Upéicharõ ñande avei akóinte vyʼapópe japredikáta, jagueropuʼakáta heta mbaʼe ijetuʼúva ha jasegíta ñanderekopotĩ ha ñamombaʼeguasúta Jehovápe añoite (Sant. 5:10).
Ñanderekopotĩkena
10, 11. Mbaʼépa tekotevẽ jajapo akóinte ñanderekopotĩ hag̃ua?
10 Ñande jaikuaa jaikomaha ára pahápe. Upévare ndajahecharamói la hénte ojapo haguére umi mbaʼe vai Jehovápe ndogustáiva. Haʼekuéra hekokyʼa, oipotapotave mbaʼe ahéno, ha oñorairõse. Satanás okalkula voi: “Ndaikatúiramo amongyhyje Ñandejára siervokuérape, ajapoukáne chupekuéra ivaíva” (Rev. 2:13, 14). Upéicha rupi tekotevẽterei ñahendu ko konsého Pedro omeʼẽvaʼekue iñermanokuérape: ‘Pejapo ikatúva entéro ani Ñandejára pendetopa pejapohápe ivaíva, tapendetopa guei pyʼaguapy ha tekopotĩme’ (2 Ped. 3:14).
11 Koʼápe apóstol Pedro heʼi ‘pejapo ikatúva entéro’, ha upe mboyve heʼíma voi kuri ‘peñehaʼãmbaitevaʼerã’. Péicha jahecha Jehová oikuaaha ñande ñañehaʼãmbaitevaʼerãha ikatu hag̃uáicha akóinte ‘ñanderekopotĩ’, térã ani hag̃ua ko múndo aña ñanemongyʼa. Upearã ñañatendevaʼerã ani umi mbaʼe vai ñapensáva oike ñane korasõme (jaleemína Proverbios 4:23 ha Santiago 1:14, 15). Ha ñaaguantavaʼerã avei umi oñembohorývape ñande jaiko lájare ha umi ‘osegívape oñeʼẽvai ñanderehe’ (1 Ped. 4:4).
12. Mbaʼépa heʼi Lucas 11:13 oñemeʼẽtaha ñandéve?
12 Ñandéve ningo ñane imperfékto rupi ijetuʼueterei jajapo hag̃ua iporãva (Rom. 7:21-25). Upévare jajeruremantevaʼerã Jehovápe ñanepytyvõ hag̃ua, ha haʼe katuete omeʼẽ ijespíritu umi ojerurévape chupe ipyʼaite guive (Luc. 11:13). Ha upe ijespíritu ikatu omoheñói heta mbaʼe porã ñande rekovépe ikatu hag̃uáicha ñaime porã Jehovándi. Ñanepytyvõ avei pono jaʼa Satanás ñuhãme, ha ñambohovái hag̃ua ñaneprovlemakuéra, heta hetave reítava hiʼag̃uivévo Jehová ára.
Umi provléma jagueropuʼakáva ñanemombareteve
13. Mbaʼépa jajapovaʼerã ani hag̃ua ñanemokangy umi provléma?
13 Jaikuaa ningo ndopamoʼãiha umi provléma jaiko aja ko múndo añáme. Péro jahejarangue ñanemokangy umi provléma, jaaprovechavaʼerã jahechauka hag̃ua jahayhuha Ñandejárape, ñamombarete hag̃ua ñande jerovia hese ha Iñeʼẽre. Santiago ohaivaʼekue: ‘Pevyʼákena che ermanokuéra, pehasáramo opaichagua jejopy vai, pórke pehasa asýramo jepe pende jerovia rehehápe, pegueropuʼakáta opa mbaʼe’ (Sant. 1:2-4). Aníkena ñanderesarái ‘Jehová oguenohẽha jejopy vaígui umi ohayhúvape chupe’ (2 Ped. 2:9).
14. Mbaʼéichapa nemokyreʼỹ José rembiasakue?
14 Jahechamína José rembiasakue. Haʼe ningo Jacob raʼy, ha iñermanokuéra ovendevaʼekue chupe tembiguáiramo (Gén. 37:23-28; 42:21). Upéicharõ jepe, haʼe akóinte ojerovia Jehováre ha ndaipochýi hese oheja haguére oiko hese upéva. Péro ndahaʼéi upéva añónte oikovaʼekue José rehe. Upe rire ojeʼe rei hese oviolase hague peteĩ kuñakaraípe ha upévare ojegueraha chupe kárselpe. Upéicharõ jepe haʼe osegi iñeʼẽrendu ha ohayhu Jehovápe (Gén. 39:9-21). Umi mbaʼe ijetuʼúva ohasavaʼekue omombareteve Josépe, ha amo ipahápe ohupyty heta mbaʼe porã.
15. Mbaʼépa ñanemboʼe Noemí rembiasakue?
15 Umi provléma ningo añetehápe ñandepyʼapy ha ikatu voi ñanedeprimi. Upéva oiméne oikorakaʼe avei José rehe. Ha ambue Ñandejára rembiguaikuéra oiméne oñeñandurakaʼe avei upéicha. Pór ehémplo Noemígui omano iména ha mokõive imemby. Upévare heʼi: ‘Anive peje chéve Noemí, peje chéve Mará [heʼiséva “iróva”], Ñandejára ipuʼakapáva ohejágui ahasa irokuete’ (Rut 1:20, 21). Ñantende ningo mbaʼérepa haʼe heʼi péicha. Péro Joséicha avei, haʼe akóinte ojerovia Jehováre ha ohayhu chupe. Upévare Jehová ovendesi Noemípe (Rut 4:13-17, 22). Ha iporãveha katu Jehová imúndo pyahúpe omeʼẽ jeýta Noemípe opa mbaʼe operdevaʼekue. Ha upéicha avei ojapóta ambue isiervokuéra ohasa asy vaʼekuére Satanás ha imúndo poguýpe. Hiʼarive la Biblia heʼi voi ‘umi mbaʼe yma guare opytataha tesaráipe, ha nañandejopymoʼãvéima’ (Isa. 65:17).
16. Mbaʼérepa ñañemboʼe meme vaʼerã?
16 Oúramo jepe ñande ári heta provléma, ikatúta jagueropuʼaka ñanemanduʼáramo mbaʼeichaitépa Jehová ñanderayhu (jaleemína Romanos 8:35-39). Ha Satanás katu oñehaʼãta ñanemokangy, péro ndaipuʼakamoʼãi ñanderehe ‘jaikóramo akãguapýpe’ ha ‘ñañemboʼe meme’ (1 Ped. 4:7). Jesús heʼivaʼekue avei: ‘Peñatende porãkena, ha peñemboʼe meme pende pyʼaite guive, ani hag̃ua penderupyty umi mbaʼe vaieta outavahína ko yvy ape ári, ikatu hag̃ua upéi peñemboʼy pe Yvypóra Raʼy renondépe’ (Luc. 21:36). Jahecha Jesús heʼi porã hague ñañemboʼevaʼerãha ñande pyʼaite guive. Upéicha haʼe ohechauka iñimportanteha ñañatende mbaʼéichapa ñaimeñaína hendive ha Itúvandi. Ha ikatu hag̃uáicha jahasa Jehová ára guasu, tekotevẽta ñaime porã Jehová ha Jesús renondépe.
Akóintekena jaservi kyreʼỹme Jehovápe
17. Mbaʼéichapa ñanepytyvõ japredika hag̃ua umi proféta ohasavaʼekue?
17 Ñanemombarete ha ñanemokyreʼỹ ningo umi mbaʼe jajapóva Jehovápe g̃uarã. Apóstol Pedro ohechauka voi ñandéve upéva heʼívo: ‘Peẽ peñehaʼãvaʼerã pende reko marangatu ha pehechauka pehayhuha Ñandejárape!’ (2 Ped. 3:11). Upéva jahechaukáta ñamombeʼúvo pe marandu porã ñande rapichakuérape (Mat. 24:14). Jaikuaángo oĩha umi lugár ijetuʼuha japredika hag̃ua. Mbaʼérepa? Oĩgui umi hénte nohenduséiva pe marandu, térã ndogustáiva chupekuéra ñane rembiapo, ha oĩ avei umi nañanerenduséiva ojepyʼapyetereígui iprovlemakuérare. Péro Jehová profetakuéra ohasamavaʼekue avei koʼã mbaʼe ha mbaʼeve ndojokói chupekuéra, oho jey jey katu omombeʼu hapichakuérape Ñandejára marandu (jaleemína 2 Crónicas 36:15, 16; Jer. 7:24-26). Mbaʼépa oipytyvõrakaʼe chupekuéra oaguanta hag̃ua? Primero, haʼekuéra ohecha pe hembiapo Jehová ohechaháicha, ndahaʼéi umi hénte aña ohechaháicha. Segundo, chupekuéra g̃uarã tuichaiterei mbaʼe oñeʼẽ Jehová rérape (Jer. 15:16).
18. Mbaʼéichapa japredika meme rupi oñemombaʼeguasúta Ñandejára réra?
18 Ñandéve g̃uarã ningo tuichaiterei mbaʼe avei jaikuaauka Ñandejára réra ha hembipota. Ha ñande japredika meme rupi, Jehová ára og̃uahẽ vove, avave ndaikatumoʼãi heʼi ndoikuaaiha mbaʼépa la oikóva. Yma pe faraón Egiptopegua oikuaa haguéicha, umi hénte oikuaáta avei Jehová ogueruha upe ñehundi (Éxo. 8:1, 20; 14:25). Upe árape Ñandejára omombaʼéta avei hembiguaikuérape oikuaaukávo enterovépe haʼekuéra oñeʼẽ hague hérape (jaleemína Ezequiel 2:5; 33:33).
19. Mbaʼéichapa jaaprovechavaʼerã Jehová pasiénsia?
19 Apóstol Pedro omohuʼãvo pe isegúnda kárta ohai: ‘Pehechakuaákena Ñandejára ipasiénsia rupi ikatuha jajesalva’ (2 Ped. 3:15). Upévare jaaprovechavaʼerã Jehová pasiénsia ha ñamoheñói ñande rekovépe umi mbaʼe porã, akóinte ‘ñanderekopotĩ’, jahecha ñaneprovlemakuéra hendapete, ha kyreʼỹme japredika. Upéicha jajapóramo jahupytýta heta mbaʼe porã oguerútava pe ‘yvága pyahu’ ha pe ‘yvy pyahu’ (2 Ped. 3:13).
Nemanduʼápa koʼã mbaʼére?
• Mbaʼéichapa ikatu ñamoheñói ñande rekovépe mbaʼe porã?
• Mbaʼépa ñanepytyvõta akóinte ‘ñanderekopotĩ’ hag̃ua?
• Mbaʼépa ñanemboʼe José ha Noemí rembiasakue?
• Mbaʼérepa tuicha mbaʼe ñamombeʼu pe marandu porã?
[Porandu ñahesaʼỹijóva]
[Nóta oĩva taʼanga ndive páhina 9]
Mbaʼépa oipytyvõta ména ha hogayguakuérape omoheñói hag̃ua umi mbaʼe porã hekovépe?
[Nóta oĩva taʼanga ndive páhina 10]
Mbaʼépa ñanemboʼe José rembiasakue?