Peteĩ invitasión iporãitereíva!

REPRODUCIR EN

Peteĩ invitasión iporãitereíva!

MAʼERÃPA? Javisita hag̃ua Betel. Péicha oñembohéra umi 118 sukursál ombaʼapohápe testigos de Jehová. Heta tapicha ovisitáva Betel oguerohoryeterei ojejapóva upépe.

Pór ehémplo, Méxicope peteĩ mitãrusu ostudiáva la Biblia ovisita pe sukursál ha ohecharamoiterei mbaʼéichapa umi kuimbaʼe ha kuña vyʼapópe oservi Jehovápe upépe. Upévare oporandu: “Mbaʼe piko ajapovaʼerã ambaʼapo hag̃ua koʼápe?”. Umi ermáno heʼi chupe: “Primero rejevautisavaʼerã, ha upéi iporãta rejapóramo nde prekursorádo”. Pe mitãrusu ojapo ojeʼéva chupe ha 2 áño upe rire oikéma katu Betélpe. Ojapóma 20 áño ombaʼapoha upépe.

Mbaʼépa heʼise Betel?

Evréo ñeʼẽme Betel heʼise “Ñandejára róga” (Gén. 28:19). Umi sukursál rupive oñepytyvõ umi 100 mil kongregasión oĩva ko yvy ape ári. Heta Betélpe ojejapo avei Biblia, lívro ha ambue puvlikasión oñeʼẽva Ñandejára Ñeʼẽre. Umi sukursálpe ombaʼapo káda día 20 mil voluntário, kuña ha kuimbaʼe, oipytyvõ hag̃ua ermanokuérape ha omombaʼeguasu hag̃ua Jehovápe. Koʼã voluntário apytépe oĩ oúva mombyrýgui, imboriahúva, iplatamiéva, ijestúdio porãva térã ijeskuelaʼíva. Betélpe oĩ ermáno ijedáva ha aréma ombaʼapóva upépe, ha avei heta mitãrusu ha mitãkuña hesãiva ha kyreʼỹme ombaʼapóva. Opoi rire itraváhogui térã fín de semána jave umi ermáno osẽ opredika ha oho rreunionhápe. Avei omboyke hikuái tiémpo ostudia hag̃ua la Biblia, ojediverti térã ojapo hag̃ua umi mbaʼe oikotevẽva.

Betélpe avave ndokovrái itraváhore, péro káda més oñemeʼẽ chupekuéra michĩmi viru ikatu hag̃uáicha ojogua oikotevẽva. Avei oñemoĩ chupekuéra tembiʼu héva ha iñaliméntova, ha koty iporãva. Betel ndahaʼéi peteĩ lugár kate, síno upépe ojeguereko umi mbaʼe tekotevẽkueténte. Umi ovisitáva Betel ohecha ojejapoha opa mbaʼe hendapete ha oñembaʼapoha oñondivepa torýpe. Avei ohecha mbaʼéichapa ipotĩ pe óga ha korapy. Upépe entéro horyjoa hembiapoitereíramo jepe. Betélpe enterove peteĩchapánte, tahaʼe haʼéva hembiapo. Opa mbaʼe ojejapóva upépe iñimportanteterei, pór ehémplo: oĩ ombaʼapóva hardínpe téra ofisínape, oĩ omopotĩva térã oñekosináva, ha oĩ umi ojapóva lívro ha rrevísta. Umi oikóva Betélpe oñehenói betelita, ha enterovéva oñopytyvõ omotenonde hag̃ua predikasión opa tetãme (Col. 3:23).

Jaikuaami umi ombaʼapóva Betélpe

Jahechamína mbaʼéichapa oñeñandu umi ermáno ombaʼapóva sukursálpe. Mbaʼépa omokyreʼỹraʼe chupekuéra ou hag̃ua ombaʼapo Betélpe? Pór ehémplo, peteĩ ermáno Alemaniaygua hérava Mario, ombaʼapovaʼekue peteĩ emprésa guasúpe, ojejapohápe kóche. Upépe haʼe ikatúkuri ogana porã ha ohupyty puésto ijyvatevéva. Péro upe riremínte oho ombaʼapo una semána pe sukursálpe ha oñemondo chupe ombaʼapo hag̃ua impréntape. Pyaʼeterei ohechakuaa mbaʼéichapa idiferénte umi betelita ikompañéro de travahokuéragui. Upémarõ omyenyhẽ peteĩ solisitu oike hag̃ua Betélpe. Ihénte ha ikompañerokuéra oimoʼã ivyroha oheja haguére itraváho porãite. Péro Mario ovyʼaiterei ombaʼapo haguére pe sukursálpe.

Oĩ katu oúva ombaʼapo Betélpe ndorekóiramo jepe profesión. Péicha vaʼekue Abel, ombaʼapómava 15 áño sukursál Mexicoyguápe. Haʼe heʼi: “Heta mbaʼe aikuaa aike rire Betélpe. Koʼápe aaprende mbaʼéichapa amombaʼapóta umi mákina tuicháva. Aikuaa asẽramo koʼágui ikatutaha agana heta pirapire, péro nakambiaichéne mbaʼevére umi mbaʼe porã ahupytýva. Koʼápe chepyʼaguapy, opa mbaʼe ajapóva chembovyʼa ha ndaikoivaʼerã ahaʼã che irũnguérandi mávapa ivaleve. Chéve g̃uarã ndaipóri iporãvéva koʼápe aaprendevaʼekuégui. Chepytyvõ chearandu hag̃ua ha añemoag̃uive hag̃ua Jehováre. Ni ahárire umi universida iporãvévape ndahupytyivaʼerãmoʼã koʼã mbaʼe porãite”.

Javisitávo Betel imbareteve ñande jerovia

Iporãite vaʼerã javisitami Betel, upéva ikatu ñanepytyvõ ñañemoag̃uive hag̃ua Jehováre. Péva oikovaʼekue Omar rehe, oikóva Méxicope. Isy omboʼe chupe la Biblia michĩmi guive, péro ohupytývo 17 áño ndohovéi rreunionhápe ha nosẽvéi opredika. Upéi ou hoʼa vísiope ha oiko pláta rapykuéri. Heta áño rire ombaʼapórõ guare peteĩ emprésape, Omar oho ikompañerokuérandi Betélpe ohechauka hag̃ua mbaʼéichapa ojeporuvaʼerã umi mákina. Haʼe omombeʼu: “Rojapopávo ore rembiapo, umi ermáno ohechauka oréve mbaʼe mbaʼépa ojejapo Betélpe. Ahechávo mbaʼéichapa ombaʼapo ha hory hikuái, apyta ajepyʼamongeta che rekovére. ‘Mbaʼe piko ajapoʼaína mombyry Jehovágui?’ Upe riremínte aha meme jeýma rreunionhápe ha añepyrũ astudia la Biblia. Seis mése haguépe ajevautisa. Aha rupi Betélpe ahechakuaa akambiavaʼerãha ha aagradeseterei Jehovápe upe haguére”.

Japónpe oĩ peteĩ kariaʼy hérava Masahiko, ha isy ha itúva testígo de Jehová. Péro haʼe opensavaʼekue hasyetereiha jaiko hag̃ua kristiáno teéicha. Upévare ndohovéi rreunionhápe ha nosẽvéi opredika, upéva rangue oiporupaite itiémpo koléhiope. Haʼe heʼi: “Peteĩ árape, che família ha ambue ermanokuéra ohóta ovisita Betel ha chemboliga aha hag̃ua hendivekuéra. Rokorrévo pe sukursál rehe añeñandu porãiterei. Ndavyʼáiva peichaite peve aimévo che irũnguéra kolehiopeguándi. Upe guive adesidi aservitaha Jehovápe, ha ajerure peteĩ ermánope chembostudia hag̃ua la Biblia”. Koʼág̃a Masahiko ojapo iprekursorádo.

Peteĩ ermána Franciaygua ova Moscúpe ombaʼapo hag̃ua. Upépe oñemomombyry Jehová puévlogui ha ikangy ijerovia. Upéi ou hekovai ha ipahápe omenda peteĩ ndahaʼéivare testígo. Peteĩ jey ou ovisita chupe peteĩ ermána hetãygua, ha osẽ oho oñondive táva San Petersbúrgope, oĩháme Betel Rusiaygua. Peteĩ kárta rupive haʼe omombeʼu mbaʼépa oikóraʼe upérõ: “Umi ermáno Betelgua oremomaitei torýpe, ha upéva opokoiterei cherehe. Igustoite ningo upépe! Ojekuaa mbaʼeichaitépa pe espíritu sánto oipytyvõ chupekuéra. Ajépa chevýra ahejávo Jehovápe! Upe rire ajerure Ñandejárape tachepytyvõ ha añepyrũ amboʼe meme che membykuérape la Biblia heʼíva”. Oĩramo jepe ermáno oipytyvõva chupe, jaʼekuaa ovisita rupi Betel ikyreʼỹha opytávo. Upe guive ko ermána oñakãrapuʼã jey kongregasiónpe.

Mbaʼépa heʼi umi ndoikuaáiva testigos de Jehovápe ovisitávo Betel? Áño 1988-pe peteĩ polítiko hérava Alberto ovisita sukursál Brasilgua. Omombaʼeterei ohechávo mbaʼéicha ipotĩ pe lugár ha opa mbaʼe ojejapo hekoitépe. Upe mboyvemi haʼe ohókuri ovisita hovajápe peteĩ semináriope ha ohecha mbaʼeichaitépa idiferénte. Alberto heʼi: “Pe semináriope ningo haʼete ku opa mbaʼe ojejapóva ñemiháme”. Ovisita rire Betel, Alberto oñepyrũ ostudia la Biblia, nombaʼapovéi polítikape ha koʼág̃a oservi ansiánoramo ikongregasiónpe.

Ejúna orevisita!

Oĩ ermáno ojapóva tuicha sakrifísio ovisita hag̃ua sukursál hetãmegua. Pór ehémplo, Paulo ha Eugenia ombyaty oikóvo ipláta 4 áño pukukue ikatu hag̃uáicha ovisita Betel. Upearã oviaha míkrope 2 día aja 3.000 kilómetro. Mbaʼéichapa oñeñandu hikuái? “Rovyʼaiterei ningo roho haguére. Koʼág̃a ae roikuaa porã mbaʼeichaitépa ombaʼapo Jehová puévlo. Yma romombeʼúvo ore estudiántepe mbaʼe mbaʼépa ojejapo Betélpe haʼekuéra oporandu oréve: ‘Ha peẽ piko pehóma upépe?’. Koʼág̃a ikatúma roʼe chupekuéra roho hague.”

Oĩpa nde reikoha ypýrupi peteĩ sukursál? Upéicharõ roipotaite reho revisita. Rehecháta mbaʼéichapa upépe torýpe oñatende nderehe hikuái, ha reikuaávo upe lugár reñandúta imbareteveha nde jerovia.