Peteĩ jopói ñandepeʼáva ñemano poguýgui
Peteĩ jopói ñandepeʼáva ñemano poguýgui
‘Pe ojeroviáva Taʼýra rehe oikovéta tapia g̃uarã; pe ojeroviaseʼỹva katu ndoguerekomoʼãi upe tekove, ohupytyvaʼerã uvei Ñandejára kastígo ipohyietéva.’ (JUAN 3:36, BNP)
1, 2. Mbaʼérepa ojejapo ko rrevísta?
“ENTÉRO ohesaʼỹijóva la Biblia katuete ohechakuaa mbaʼeichaitépa iñimportánte Jesús sakrifísio.” Péicha heʼi peteĩ artíkulo osẽvaʼekue ko rrevístape octubre 1879-pe. Ha opakuévo heʼi: “Oĩramo nomombaʼéiva Jesús sakrifísio ha ndogueroviáiva ñandepeʼaha pekádo ha ñemano poguýgui, aníkena ñahendu ni jarovia” (jaleemína 1 Juan 2:1, 2).
2 Ko rrevísta osẽ ypy julio 1879-pe, ha ojejapo ohechauka porã hag̃ua Jesús omano hague ñanderayhupápe. Síglo 19 opakuévo oĩmavaʼekue heta kristiáno guaʼu ndogueroviáiva Jesús sakrifísio ñandepeʼaha pekádo poguýgui. Upéicha rupi jaʼekuaa umi artíkulo osẽva ko rrevístape haʼe hague ‘tembiʼu oñemeʼẽva hiʼoraitépe’ (Mat. 24:45, NM). Upe tiémpope heta oĩ ogueroviáva yvypóra ouha kaʼígui. Ko teoría, hérava evolusión, heʼi saʼi saʼípe jahupytytaha perfeksión ha nañaikotevẽiha ñandepeʼáva pekádo poguýgui. Péro la Biblia heʼi Adán opeka guive, yvyporakuéra ndahaʼeveimaha perfékto. Upévare tekotevẽ jajapo Pablo heʼivaʼekue Timotéope: ‘Eñangareko porãke pe ojehejavaʼekue ndéve rehe. Ani rehendu ñeʼẽ rei ha vyrorei opoíva umi heʼíva ijehe aipo iñaranduha. Umi péicha oikóva omboyke ijerovia’ (1 Tim. 6:20, 21).
3. Mbaʼépa ñahesaʼỹijóta koʼág̃a?
3 Ñande ni mbaʼevéicharõ ‘nañamboykeséi ñande jerovia’. Upévare iporã ñahesaʼỹijo koʼã porandu: Mbaʼérepa ñaikotevẽ peteĩ ñandepeʼáva pekádo poguýgui? Mbaʼéichapa oñeñandúneraʼe Jehová ha Jesús ojapóvo pe sakrifísio ñandesalva hag̃ua? Mbaʼépa jajapovaʼerã ñaime porã jey hag̃ua Jehovándi?
Ikatu ñaime porã jey Jehová ndive
4, 5. Mbaʼépa ohechauka Jehová ipochyha yvyporakuéra ndive?
4 La Biblia heʼi Jehová ipochyha yvyporakuéra ndive Adán opeka guive, ha umi mbaʼe vai oikóva ko múndope ohechauka upeichaha (Juan 3:36). Hiʼarive ndaipóri ni peteĩ yvypóra ojehekýiva ñemanógui. Ko múndo opyta Satanás poguýpe ha upévare jahasa asyeterei. Ndaipóri goviérno oñangareko porãva hetãyguáre (1 Juan 5:19). Ha koʼag̃aite peve jahasa asy oĩ rupi ñorairõ, ñembyahýi ha hénte aña.
5 Jahecha porãiterei Jehová ndoguerohoryiha ko múndo aña. Pablo heʼi ‘Ñandejára ombouha yvága guive kastígo opaichagua yvyporakuéra hembiapo vai ha iñañáva ári’ (Rom. 1:18-20, BNP). Upéicharõ umi ndohejaséiva hape vai katuete oñehundíta. Koʼág̃a rupi ñande ñamomarandu umi héntepe Jehová okastigataha umi iñañávape. La Biblia heʼi koʼã marandu haʼeha ‘mbaʼyru henyhẽva Ñandejára pochýgui’ ha oñeñohẽva ko múndo aña rehe. Koʼã marandu ipohyietéva pyʼỹi osẽ ñane puvlikasiónpe (Rev. 16:1).
6, 7. Mbaʼe tembiapópa omotenonde umi unhído? Ha mbaʼe oportunidápa omeʼẽ gueteri Jehová enterovépe?
6 Heʼise piko upéva ndaikatumoʼãveimaha ñasẽ Satanás poguýgui ha ñaime porã jey Jehová ndive? Nahániri, koʼág̃a peve Jehová omeʼẽ oportunida enterovépe oñemoĩ porã jey hag̃ua hendive. Upearã umi unhído omotenonde pe predikasión oparupiete ko yvy ape ári. Haʼekuéra ningo “Cristo rembijokuái” ha omokyreʼỹ opavavépe ‘oiko porã jey hag̃ua Ñandejára ndive’ (2 Cor. 5:20, 21).
7 Pablo heʼi ‘Jesús [...] ñandesalvaha pe pochy guasu ouvaʼerãgui’ (1 Tes. 1:10, BNP). Upérõ Jehová ohechaukáta ipochyetereiha ohundívo umi hénte ndojevýivape hembiapo vaikuégui (2 Tes. 1:6-9). Ha máva piko ojesalváta? La Biblia heʼi: ‘Pe ojeroviáva Taʼýra rehe oikovéta tapia g̃uarã; pe ojeroviaseʼỹva katu ndoguerekomoʼãi upe tekove, ohupytyvaʼerã uvei Ñandejára kastígo ipohyietéva’ (Juan 3:36, BNP). Jahechaháicha, ág̃a og̃uahẽ vove Ñandejára ára pochy ha oñehundi ko múndo aña, ojesalváta entéro yvypóra ojeroviáva Jesús ha isakrifísiore.
Mbaʼéichapa ñandesalva Jesús sakrifísio
8. a) Mbaʼéichapa oikovaʼerãmoʼã Adán ha Eva iñeʼẽrendúrire Jehovápe? b) Mbaʼéicha ojehechauka Jehová okumpliha iñeʼẽ ha hekojojaha?
8 Ñandejára ojapovaʼekue Adán ha Évape perfékto. Iñeʼẽrendúrire Jehovápe, haʼekuéra ha iñemoñare oikovaʼerãmoʼã opa ára g̃uarã ko yvy ape ári vyʼa ha joayhúpe. Péro haʼekuéra naiñeʼẽrendúi, upévare Jehová omosẽ chupekuéra hardín de Edéngui ha heʼi omanovaʼerãha hikuái. Adán ha Eva ndahaʼevéima perfékto ha upéicha rupi ifamiliakuéra onaséma pekádo poguýpe. Amo ipahápe ituja ha omano hikuái, ha péicha ojehechauka Jehová katuete okumpliha iñeʼẽ ha ojapoha opa mbaʼe tekojojápe. Haʼe ningo heʼi porã Adánpe hoʼúramo pe yva omanotaha, ha upeichaite oiko.
9, 10. a) Mbaʼérepa enterove ñamano? b) Mbaʼéicha rupípa ikatu jajei ñemano poguýgui?
9 Enterove yvypóra jaju Adángui, upévare ñaneimperfékto, mbaʼe vaímante jajapose ha ipahápe ñamano katuete. Mbaʼérepa? Adán ningo ifamília opeka riréma, ha upévare enterove ñamano. Jehová operdonáramo Adánpe opyrũta iñeʼẽre, péro haʼe ndojapói upéva. Upéicha rupi ñaikotevẽmante peteĩ ñandepeʼáva pekádo poguýgui. Añetehápe maymáva ñañeñandu Pablo heʼi haguéicha: ‘Jaikuaa pe léi yvagapeguaha, che katu yvypóra añemeʼẽvaʼekue pekádo rembiguairã. Aichejáranga che! Mávapa chepeʼáne ñemano poguýgui?’ (Rom. 7:14, BNP, Rom. 7:24).
10 Jehová añoite ikatu omeʼẽ ñandéve upe ñaikotevẽva oñeperdona hag̃ua ñane rembiapo vaikue, ha jajei hag̃ua ñemano poguýgui. Mbaʼéichapa ojapo upéva? Ombou yvágagui Itaʼýra onase hag̃ua yvypóra perféktoicha ha omano hag̃ua ñanderehehápe. Jesús “ndojapói mbaʼeveichagua tembiapo vai”, upéicha rupi ndojoguái Adánpe (1 Ped. 2:22, ÑÑB). Jesús ningo ikatúkuri omenda, ha perfékto rupi ifamília onasevaʼerãmoʼã pekadoʼỹre. Péro haʼe ndojapói upéva, síno oheja ojuka chupe umi ndaijaʼéiva hese. Péicha umi Adán ñemoñare ojeroviáva hese ikatúta ohupyty jeikove opaveʼỹva. La Biblia heʼi: ‘Ñandejára peteĩnte, ha peteĩnte avei pe omoĩ porãva yvyporakuéra Ñandejára ndive. Upéva hína Cristo Jesús, yvypórava avei. Haʼe omano ñanderehehápe opavave ñasẽ hag̃ua jejopy vaígui’ (1 Tim. 2:5, 6).
11. a) Emoĩ peteĩ ehémplo ohechaukáva mbaʼéichapa Jesús sakrifísio ñandesalva. b) Máva mávapepa osalva Ñandejára Raʼy?
11 Ñamoĩmi peteĩ ehémplo jahecha hag̃ua mbaʼéichapa Jesús sakrifísio ñandesalva. Peteĩ vánkope oñemondapaite umi kliéntepe ha opyta odevepa hikuái. Upéi ojepilla umi vánko jára voi oporomondaha ha upémarõ ojegueraha chupekuéra kárselpe. Péro, mbaʼe piko oiko umi hénte oñemondavaʼekuégui? Imboriahupa anga opytávo, ha ohaʼarõ peteĩ karai iplátava ojogua pe vánko, omyengovia jey pe operdevaʼekue hikuái ha oheja rei chupekuéra ikuénta. Péicha avei Jehová ha Jesús ojogua Adán familiakuérape ha opaga yvypóra pekádore, Jesús ruguy rupive. Upévare Juan Bautista heʼivaʼekue Jesús rehe: ‘Kóva hína Ñandejára Ovecharaʼy oipeʼáva yvyporakuéra pekádo’ (Juan 1:29, BNP). Ñandejára Raʼy osalva enterove yvypórape, tahaʼe oikovéva térã omanóva.
Mbaʼéichapa oñeñandu Jehová ha Jesús
12, 13. Mbaʼéichapa Abrahán oñanduvaʼekue ñanepytyvõ ñantende hag̃ua Jehová oñandúva?
12 Ñande ndajaikuaaporãi mbaʼéichapa oñeñandu Jehová ohechávo ojejukaha Itaʼýrape ha mbaʼéichapa oñeñandu Jesús oikuaávo ojejukataha chupe. Péro la Bíbliape oĩ ehémplo ñanepytyvõva ñantende hag̃ua haʼekuéra oñanduvaʼekue. Ñanemanduʼami Abrahán ohasavaʼekuére. Jehová heʼi chupe: ‘Eraha nde raʼy peteĩmi rehayhuetéva, Isaac, peteĩ lugár hérava Móriape. Upépe, peteĩ sérro ruʼãme che ahechaukátava ndéve, eikuaveʼẽ chéve nde raʼy rejukávo ha rehapývo altár ári’ (Gén. 22:2-4). Mbaʼéichapa oñeñandúneraʼe Abrahán oviahávo 3 día aja ojapo hag̃ua Jehová ojeruréva chupe?
13 Ñapensamína mbaʼeichaitépa oiméne ipyʼapererepa anga og̃uahẽvo pe lugár ojukatahápe itaʼýrape. Upépe ojapovaʼerã pe altár, oipokua, oipykua ha omoñeno hiʼári Isaácpe. Ajépa oiméne ijetuʼuete chupe ohupívo ikyse ojuka hag̃uáicha itaʼýrape! Ñapensamína koʼág̃a Isaac rehe. Mbaʼe piko oiméne oñandu oĩvo pe altár ári ha ohaʼarõ itúva ojuka chupe? Jaikuaaháicha Jehová ánhel ojoko Abrahánpe ani hag̃ua ojuka itaʼýrape. Péro Abrahán ojapovaʼekue ohechauka mbaʼeichaitépa oñeñandu vaíne raʼe Jehová ohechávo umi kuimbaʼe aña ojukaha Itaʼýrape. Ha Isaac ehémplo katu ohechauka Jesús naiprovlémai hague ou hag̃ua ohasa asy ha omano ñanderayhupápe (Heb. 11:17-19).
14. Mbaʼéichapa Jacob ohasavaʼekue ñanepytyvõ ñantende hag̃ua Jehová oñandúva ohechávo ojejukaha Itaʼýrape?
14 Jacob ehémplo ñanepytyvõ avei ñantende hag̃ua Jehová oñanduvaʼekue. Haʼe heta ifamília, péro ombojeroviave itaʼýra Josépe. Upévare umi ótro itaʼýra ndochaʼéi Josére. Peteĩ ára Jacob ojokuái Josépe oho hag̃ua ohecha iñermanokuéra oĩva 100 kilometrohápe, táva Hebrónpe. Upépe haʼekuéra oñangareko ovechakuérare. José oikuaáramo jepe iñermanokuéra ndaijaʼeiha hese, osẽ oho hendapekuéra. Ñapensamína mbaʼeichaitépa oiméne oñeñandu vai Jacob itaʼyrakuéra oguerúvo chupe José aokue huguypáva. Ohechávo pe ao Jacob heʼi: ‘Kóva ningo che raʼy José aokue. Ojukáneraʼe chupe peteĩ mymba ñarõ’. Jacob oñeñandu vaieterei ha opyta oñembyasy heta árare (Gén. 37:33, 34). Jehová ndahaʼéi yvypóra, péro ko mbaʼe oikovaʼekue Jacob rehe ñanepytyvõ ñantende hag̃ua mbaʼéichapa oñeñandúneraʼe ohechávo umi kuimbaʼe aña oñemboharái ha ojuka Itaʼýra ohayhuetévape.
Mbaʼe iporãvapa jahupyty Jesús sakrifísio rupive
15, 16. a) Mbaʼéichapa Jehová ohechauka oguerohoryha Jesús ojapovaʼekue? b) Mbaʼéichapa nepytyvõ Jesús sakrifísio?
15 Jehová omoingove jey Jesúspe (1 Ped. 3:18). Upe rire Jesús opyta ko yvy ape ári 40 día, ha upe aja ojehechauka jepi hemimboʼekuérape ojerovia mbareteve hag̃ua hikuái. Avei ombosakoʼi chupekuéra predikasionrã. Upe rire oho yvágape, ha upépe oikuaveʼẽ Jehovápe huguy repykue, ojesalva hag̃ua entéro hemimboʼe ojeroviáva hese. Jehová oguerohory Jesús ojapovaʼekue ha upévare heʼi chupe omeʼẽ hag̃ua espíritu sánto hemimboʼekuérape. Upéva oiko Pentecostés 33-pe haʼekuéra ijatypárõ guare Jerusalénpe (Hech. 2:33).
16 Upéi pyaʼeterei umi kristiáno oñepyrũ omokyreʼỹ umi héntepe ojevautisa hag̃ua Jesucristo rérape ikatu hag̃uáicha Jehová ombohasa rei hembiapo vaikue ha ani okastiga chupekuéra (jaleemína Hechos 2:38-40). Upe guive Jehová oipytyvõ hetaiterei tapicha opa tetãyguápe oñemoĩ porã jey hag̃ua hendive ojerovia rupi Jesús sakrifísiore (Juan 6:44). Koʼág̃a ñahesaʼỹijomi koʼã mokõi porandu: Ikatúpa jaʼe jahupytytaha jeikove opaveʼỹva ñanderekoporã rupínte? Ha ikatúnepa ñambopochy Jehovápe ha oipeʼa ñandehegui ko esperánsa porãite?
17. Mbaʼépa jajapovaʼerã ani hag̃ua japyta vai Jehová ndive?
17 Añetehápe ni peteĩ yvypóra nomereséi Jesús omano hese. Péro oĩ hetaiterei kuimbaʼe ha kuña ojeroviáva Jesús sakrifísiore, ha upéva rupi oĩ porã Jehová ndive ha avei ikatúta oiko tapia g̃uarã peteĩ hardín neporãvape. Péro ñanemanduʼáke avei koʼág̃a ñaime porãramo jepe Jehová ndive, ikatuha japyta vai jey henondépe nañañatendéiramo. Jajesalvaséramo Jehová ára pochy og̃uahẽ vove, jahechaukavaʼerã koʼẽ koʼẽre ñamombaʼetereiha Jesucristo sakrifísio (Rom. 3:24; jaleemína Filipenses 2:12).
Jajerovia meméke Jesús sakrifísiore
18. Mbaʼéichapa jahechauka jajeroviaha Jesús rehe?
18 Heʼiháicha Juan 3:36, jahechaukáta jajeroviaha Jesús rehe ñaneñeʼẽrendúramo chupe. Ñamombaʼéramo isakrifísio ñañehaʼãta jaiko haʼe oipotaháicha ha ñanderekopotĩ (Mar. 7:21-23). Oĩ umi ‘hekovaíva’, ‘itieʼỹ’ ha ‘hekokyʼáva’, pór ehémplo, umi ojepokuaáva ohecha taʼanga tieʼỹ, ha ndohejaséiva hape vai. Ñandejára okastigatahína umichaguápe (Efe. 5:3-6).
19. Mbaʼe mbaʼépa jajapovaʼerã jahechauka hag̃ua jajeroviaha Jesús sakrifísiore?
19 Ñamombaʼéramo Jesús sakrifísio ñañehaʼãvaʼerã ‘ñanderekoporã Ñandejára renondépe’ (2 Ped. 3:11, ÑÑB). Upearã tekotevẽ ñamboyke tiémpo ñañemboʼe hag̃ua, jaha rreunionhápe, jastudia la Biblia ñande rogayguándi ha ñaneañohápe, ha japredika. Avei ndovaléi ‘ñanderesarái jajapovaʼerãha iporãva ha ñambojaʼo ñande rapichápe umi mbaʼe jarekomíva. Koʼã mbaʼe Ñandejára oguerohory’ (Heb. 13:15, 16).
20. Mbaʼe iporãvapa jahupytýta jajeroviáramo ipahaite peve Jesús sakrifísiore?
20 Jajeroviáramo ipahaite peve Jesús sakrifísiore ha jahechauka jaguerohoryha, katuete javyʼáta Jehová ohundi vove ko múndo aña. Upéi pe múndo pyahúpe jaikovéta opa ára g̃uarã, ha koʼẽ koʼẽre jaagradeséta Jehovápe omeʼẽ haguére ñandéve ko jopói ijojahaʼỹva, ñanepytyvõva ñaime porã jey hag̃ua hendive (jaleemína Juan 3:16; Revelación 7:9, 10, 13, 14).
Ñambohovái koʼã porandu
• Mbaʼérepa ñaikotevẽ Jesús omano ñanderehehápe?
• Mbaʼéichapa oñeñandu Jehová ha Jesús ojapóvo pe sakrifísio ñandesalva hag̃ua?
• Mbaʼe iporãvapa jahupyty Jesús omano rupi ñanderehehápe?
• Mbaʼéichapa jahechauka jajeroviaha Jesús sakrifísio rehe?
[Porandu ñahesaʼỹijóva]
[Nóta oĩva taʼanga ndive páhina 13]
Ikatu gueteri ñaime porã jey Jehová ndive
[Nóta oĩva taʼanga ndive páhina 15]
Abrahán, Isaac ha Jacob ohasavaʼekue ñanepytyvõ ñantende hag̃ua Jehová ha Jesús oñanduvaʼekue