Umi kristiáno añetegua oservi Ñandejárape peteĩ ñeʼẽme

‘Ovecháicha ambyatýta korápe oñondivepa.’ (MIQ. 2:12)

1. Mbaʼe mbaʼérepa jahechakuaa Ñandejára iñaranduha?

 PE Salmo ohaivaʼekue heʼi: ‘Hetaite mbaʼe rejapo Jehová! Péicha ojekuaa nearanduha. Ko yvy henyhẽte nerembiapokuégui’ (Sal. 104:24). Upévare jaʼekuaa Jehová iñaranduha jahechávo mbaʼeichaitépa heta oĩ hembiapokue ko yvy ape ári, oĩ umi plánta, bacteria, vícho ha ambue mymbakuéra. Ñamombaʼeterei avei mbaʼéichapa ojejapo ñande rete. Umi ñande célula michĩmíva ha opa mbaʼe oĩva ñande retepýpe ombaʼapo porã oñondive ikatu hag̃uáicha jaikove ha ñaneresãi.

2. Mbaʼérepa oiméne oñemombaʼetereirakaʼe umi kristiáno oiko porãmba haguére oñondive? Ikatu rehecha avei pe taʼanga oĩva páhina 13-pe.

² Yvyporakuéra napeteĩchapái, idiferénte hikuái ha káda uno ikatupyry ha ojapokuaa peteĩ mbaʼe. Péicha Jehová ñande apo ikatu hag̃uáicha ñaikotevẽ ojuehe. Péro Haʼe ñande apo avei ijoguaháramo, upéicha rupi ñambaʼapo oñondive ha ñañopytyvõ (Gén. 1:27; 2:18). Ñambyasýramo jepe yvyporakuéra oñemomombyry Ñandejáragui ha ndoikói peteĩ ñeʼẽme (1 Juan 5:19). Upévare síglo primérope oiméne oñemombaʼetereirakaʼe umi kristiánope oiko porãmba haguére oñondive. Umi kristiáno apytépe oĩvaʼekue umi kuñakarai fifi Greciaygua, umi hudío iñarandúva, umi tembiguái ha umi oadoravaʼekue taʼanga (Hech. 13:1; 17:4; 1 Tes. 1:9; 1 Tim. 6:1).

3. a) Mbaʼérepa pe rrelihión añetegua oñembojoja la Bíbliape? b) Mbaʼépa ñahesaʼỹijóta ko artíkulope?

³ La Bíbliape pe rrelihión añetegua oñembojoja ñande retére, ñanepytyvõgui ñambaʼapo porã hag̃ua oñondive ñande rete ombaʼapoháicha (jaleemína 1 Corintios 12:12, 13). Ko artíkulope ñahesaʼỹijóta koʼã mbaʼe: Mbaʼéichapa ñanemoĩ peteĩ ñeʼẽme pe rrelihión añetegua? Mbaʼérepa Jehová añoite ikatu omoĩ peteĩ ñeʼẽme umi hénte opa tetãyguápe? Mbaʼépa ikatu ñanemoingo vai, ha mbaʼéichapa Jehová ñanepytyvõ jaiko porã hag̃ua oñondive? Ha mbaʼérepa umi kristiáno guaʼu ndoikói peteĩ ñeʼẽme?

Mbaʼéichapa ñanemoĩ peteĩ ñeʼẽme pe rrelihión añetegua?

4. Mbaʼéichapa ñanepytyvõ pe rrelihión añetegua jaiko hag̃ua oñoermánoicha peteĩ ñeʼẽme?

⁴ Ñande kristiáno añetegua jahechakuaa Jehová haʼeha opa mbaʼe Apohare, ha ñande Ruvicha Guasu (Rev. 4:11). Ha ñanediferénteramo jepe heta mbaʼépe, enterove jajapo Ñandejára léi heʼíva. Avei ñañemboʼe jave jaʼe Jehovápe ‘ore Ru’ (Isa. 64:8; Mat. 6:9). Upéicha rupi jaiko oñoermánoicha peteĩ ñeʼẽme, pe salmísta heʼi haguéicha: ‘Ajépa iporãite ha ñanembohory jahechávo ermanokuéra oiko porãmba oñondive’ (Sal. 133:1).

5. Mbaʼépa oipytyvõ umi kristiáno teépe oiko hag̃ua peteĩ ñeʼẽme?

⁵ Ñane imperféktoramo jepe, jajoayhu rupi jaservi Ñandejárape oñondivepa peteĩ ñeʼẽme. Jehová voi ñanemboʼe jajoayhu hag̃ua, ha ndaipóri ótro ñanemboʼe porãve vaʼerã chugui (jaleemína 1 Juan 4:7, 8). Iñeʼẽme heʼi voi ñandéve: ‘Pesegíkena pejoporiahuvereko, penembaʼeporã, peñemomirĩ, ani pendepochyrei, ha penepasiénsia ojuehe. Peñoaguanta  ha peñoperdona oĩramo ofalláva penendive. Jehová peneperdonaháicha pejapo avei peẽ. Péro pe iñimportantevéva, peñemonde mborayhúgui, upéva penepytyvõta peiko porã hag̃ua oñondive’ (Col. 3:12-14). Upéicharõ pe mborayhu haʼe peteĩ márka oguerekóva umi kristiáno tee, ha upéicha rupi jaiko peteĩ ñeʼẽme. Ndépa rehechakuaa avei upeichaha? (Juan 13:35.)

6. Mbaʼéichapa ñanepytyvõ jaiko hag̃ua peteĩ ñeʼẽme jarekógui Ñandejára Rréino ñane esperánsaramo?

⁶ Ñande kristiáno tee jaiko avei peteĩ ñeʼẽme, jarekógui Ñandejára Rréino añoite ñane esperánsaramo. Upéva tuicha ñanepytyvõ jaikuaágui upe goviérno koʼẽrõitéma oipeʼapataha umi goviérno polítiko oĩva koʼág̃a ha oguerutaha pyʼaguapy entéro yvypóra iñeʼẽrendúvape g̃uarã (Isa. 11:4-9; Dan. 2:44). Upévare ñande jaiko Jesús heʼi haguéicha: ‘Che remimboʼekuéra ndojeheʼái ko múndore, che ndajeheʼaiháicha avei ko múndore’ (Juan 17:16). Ha oikóramo jepe ñorairõ ápe ha pépe, ñande jaiko porãmba oñondive, ndajahái rupi gerrahápe ha ndajaikéigui polítikape.

Mbaʼépa Jehová oiporu ñanemboʼe hag̃ua?

7, 8. Mbaʼéichapa Jehová ñanerekomboʼe jaiko hag̃ua peteĩ ñeʼẽme?

⁷ Primer síglope umi kristiáno oikovaʼekue peteĩ ñeʼẽme oñehekomboʼégui chupekuéra peteĩcha. Upérõ haʼekuéra ohechakuaa Jesús oisãmbyhy ha ohekomboʼeha pe kongregasión umi apóstol ha ansianokuéra rupive, oĩva Jerusalénpe. Haʼekuéra ojerovia Ñandejárare ha oiporu la Biblia odesidi hag̃ua opa mbaʼe. Upéi omondo hikuái umi superintendéntepe omog̃uahẽ hag̃ua kongregasionkuérape umi mbaʼe odesidivaʼekue. Oñeʼẽvo umívare la Biblia heʼi: ‘Ha ohasávo ohóvo hikuái umi siuda rupi, omombeʼu chupekuéra umi apóstol ha ansianokuéra odesidivaʼekue Jerusalénpe’ (Hech. 15:6, 19-22; 16:4).

⁸ Koʼág̃a avei oĩ peteĩ Cuerpo Gobernante, koʼã unhído oipytyvõhína mayma ermanokuérape oiko hag̃ua peteĩ ñeʼẽme. Upearã oguenohẽ umi puvlikasión heta idiómape, ha upéicha omombarete ñande jerovia. Umi puvlikasión ojejapo hag̃ua ojeporu la Biblia, upévare jaʼekuaa Jehovaha upe ñanerekomboʼéva ha ndahaʼéi yvypóra (Isa. 54:13).

9. Mbaʼéichapa pe predikasión ñanepytyvõ ñaimemba hag̃ua peteĩ ñeʼẽme?

⁹ Umi ansiáno omoakã pe predikasión ha péicha ñanepytyvõ ñaimemba hag̃ua peteĩ ñeʼẽme. Jehová siervokuéra ningo ojoayhu oñoermánoicha ha pe mborayhu orekóva ojuehe tuichaiteve opa mbaʼégui. Péro ko múndope heta hénte oreko peteĩ lugár oñembyatyha ojediverti hag̃ua. Pe kongregasión katu ndahaʼeihína peteĩ club ojehohápe ojevyʼa hag̃ua, síno peteĩ organisasión oñemoĩva oñemombaʼeguasu hag̃ua Jehovápe, ojepredika hag̃ua pe marandu porã, oñehekomboʼe hag̃ua tapichakuérape, ha oñemombarete hag̃ua kristianokuéra jerovia (Rom. 1:11, 12; 1 Tes.  5:11; Heb. 10:24, 25). Upévare apóstol Pablo heʼivaʼekue iñermanokuérape: ‘Peẽ peime peteĩ ñeʼẽme, ha peñehaʼã oñondivepa pe marandu porã rehehápe’ (Fili. 1:27).

10. Mbaʼérepa ñande Jehová siervokuéra jaiko peteĩ ñeʼẽme?

¹⁰ Jahecháma haguéicha ñande jaiko peteĩ ñeʼẽme jaguerekógui Jehovápe ñande Ruvicha Guasúramo, jajoayhúgui oñoermánoicha, jarekógui Ñandejára Rréino ñane esperánsaramo, ha jarrespetágui umi omoakãvape kongregasión. Péro ñane imperfékto rupi sapyʼánte ijetuʼu jaiko porãmba hag̃ua oñondive. Jahechamína mbaʼépa oiko jepi upévare, ha mbaʼéichapa Jehová ñanepytyvõ ñambohovái hag̃ua (Rom. 12:2).

Ndovaléi ñañemombaʼeguasu ha ñaneʼenvidióso

11. Mbaʼérepa oĩramo oñemombaʼeguasúva hasy ojeiko porãmba hag̃ua oñondive, ha mbaʼéichapa Jehová ñanepytyvõ?

¹¹ Umi oñemombaʼeguasúva opensa iñimportanteveha hapichágui, ha ojechaukase umi mbaʼe ohupytývare. Upeichagua oĩrõ ñandeapytépe hasy jaiko porãmba hag̃ua oñondive, ikatúgui oĩ oenvidiáva chupekuéra. Upévare pe disípulo Santiago heʼi porã: ‘Pe ñemombaʼeguasu ivaieterei’ (Sant. 4:16). Jaʼapoʼírõ ñande rapichápe, jahechaukañaína ndajaporohayhuiha. Péro Jehová iñumílde ha omoĩ ehémplo ñandéve g̃uarã upévape, haʼe ningo oñemoag̃ui ñanderehe ñane imperféktoramo jepe. Upévare David heʼi Ñandejárape: ‘Ne umílde rupi, chembotuicha’ (2 Sam. 22:36). La Biblia ñanemboʼe ani hag̃ua ñañemombaʼeguasu, ñanepytyvõ jahecha hag̃ua hendaitépe opa mbaʼe. Ha ohaívo ikuatiañeʼẽ apóstol Pablo oporandu: ‘Máva piko ndeapo péicha? Mbaʼépa nde reguereko Ñandejára nomeʼẽivaʼekue ndéve? Ha haʼe omeʼẽrire ndéve, mbaʼérepa rejejapo ku ndejeheguínte rehupytyramoguáicha?’ (1 Cor. 4:7).

12, 13. a) Mbaʼérepa ñaimoʼãʼỹre ikatu ñaporoenvidia? b) Mbaʼépa jahupytýta ñamombaʼéramo ñane ermanokuérape Jehová ojapoháicha?

¹² Hasy avei jaiko hag̃ua peteĩ ñeʼẽme oĩramo ñande apytépe envídia. Ñane imperfékto rupi enterovénte jaipota pe ñande rapicha oguerekóva (Sant. 4:5). Umi ermáno ijerovia mbaretéva jepe ikatu iñenvidióso, oipota hapicha orekóva, ipriviléhio, térã ikatupyryse ambue hapicháicha. Por ehémplo peteĩ túva ikatu oenvidia peteĩ ermáno oiporupaitévape itiémpo oservi hag̃ua Jehovápe, péro haʼe ndohechakuaái upe ermáno ikatuha oenvidia chupe ifamília haguére. Mbaʼépa ikatu jajapo ani hag̃ua pe envídia ñanemoingo vai?

¹³ Ñanemanduʼáramo la Bíbliape oñembojojaha kongregasión ñande retére ñanepytyvõta ani hag̃ua ñaneʼenvidióso (jaleemína 1 Corintios 12:14-18). Pór ehémplo ñande resa enterovénte ohecha, péro ñane korasõ nahániri. Upéicharamo jepe mokõivénte ñamombaʼe. Upéicha avei Jehová siervokuéra, oĩ umi ojehechavéva, péro ótrope katu ndojehechaguasúi. Upéicharõ jepe Jehová omombaʼe enterovépe peteĩcha. Upévare tekotevẽ ñande avei ñamombaʼe ermanokuérape Jehová ojapoháicha. Jajepyʼapýkena ñane ermanokuérare ñaenvidiarangue chupekuéra. Ha upéicha ojehecha porãvéta ñanderehe ñanediferenteha umi kristiáno guaʼúgui.

Umi kristiáno guaʼu ndoikói peteĩ ñeʼẽme

14, 15. Mbaʼéichapa ojedividipa umi kristiáno guaʼu rrelihión?

¹⁴ Jesucristo remimboʼekuéra ningo oiko peteĩ ñeʼẽme péro umi kristiáno guaʼu rrelihión  nahániri. Koʼã rrelihión omoñepyrũ pe goviérno rrománo síglo cuarto-pe, peteĩ mburuvicha guasu Romaygua oñepyrũrõ guare omoakã umi kristiáno guaʼu rrelihión. Upérõ umi kristiáno guaʼu hetaitereíma umi tetã oĩvape Roma poguýpe. Péro upéi mbeguekatúpe upe rrelihión ojedividi ohóvo ambue tetãnguéra ojeívo Roma poguýgui, ha péicha omoñepyrũ hikuái heta rrelihión pyahu.

¹⁵ Heta áñore koʼã tetãnguéra apytépe oĩ oñorairõva oñondive. Umi síglo diecisiete ha dieciocho-pe Gran Bretaña, Francia ha Estados Unidos omokyreʼỹ la héntepe omombaʼeguasu hag̃ua hetã, ha péicha pe tetã rayhúgui oiko peteĩ rrelihión pyahu. Umi síglo diecinueve ha veinte-pe oparupietéma umi hénte omombaʼeguasu hetã. Upe rire umi rrelihión japu ojedividive ha opermiti hikuái umi héntepe omombaʼeguasu hetã. Umi kristiáno guaʼu oho gerrahápe ha oñorairõ hapicha irrelihionpeguándi. Péicha jahecha umi kristiáno guaʼúpe odividiha umi mbaʼe omboʼéva ha hetã.

16. Mbaʼe mbaʼépepa ojoavy umi kristiáno guaʼu rrelihión?

¹⁶ Síglo veinte-pe heta rrelihión omoakãva oñepyrũ oñemongeta jahechápa noñemoĩri hikuái peteĩ ñeʼẽme. Heta áñorema oñehaʼã hikuái upearã péro ndohupytýi mbaʼeve. Katuete umi kristiáno guaʼu ojoavy oñeʼẽvo evolusiónre, imemby oitykávare, kuimbaʼe oikóvare kuimbaʼéndi, ha oñemoĩse jave kuñáme saserdóteramo. Ha oĩ umi rrelihión omoakãva oñehaʼãva avei omoĩ peteĩ ñeʼẽme umi diferénte rrelihiónpe, ojoavýramo jepe umi mbaʼe ogueroviáva hikuái. Upévare ikangy hemimboʼekuéra jerovia. Péicha jahecha umi kristiáno guaʼu rrelihión ndaikatuiha oñemoĩ peteĩ ñeʼẽme.

Opa tetãygua oĩva rrelihión añeteguápe oiko peteĩ ñeʼẽme

17. Mbaʼépa heʼi proféta Miqueas oikotaha ‘pe ára paha og̃uahẽvo’?

¹⁷ Yvyporakuéra koʼẽ koʼẽre noñontendevéiramo jepe, umi kristiáno tee oiko peteĩ ñeʼẽme jepiveguáicha. Ñandejára heʼimavaʼekue voi upéva proféta Miqueas rupive: ‘Ovecháicha ambyatýta korápe oñondivepa’ (Miq. 2:12). Upe proféta heʼi avei ojehechataha pe rrelihión añetegua idiferenteha umi rrelihión japúgui, oadoráva ñandejára guaʼu ha omombaʼeguasúva hetã. Miqueas heʼivaʼekue: ‘Ára paha og̃uahẽvo, pe montáña Jehová róga oĩha, oñemoĩta opa montáña ári, ha upépe ijatýta hentekuéra opa tetãygua’. Upéi heʼive: ‘Umi tetãnguéra oikóta omombaʼeguasu umi ñandejára guaʼúpe, ñande katu jaikóta Ñandejára Jehová rérape’ (Miq. 4:1, 5).

18. Mbaʼéichapa okambia umi hénte oike rupi rrelihión añeteguápe?

¹⁸ Miqueas heʼi avei pe rrelihión añetegua rupive oiko porãtaha oñondive umi ndaijaʼéiva ojuehe jepe. Haʼe omombeʼu hetaiterei hénte opa tetãygua heʼitaha: ‘Pejúke, jajupi Jehová sérrope ha Jacob Jára rógape; Haʼe ñanemboʼéta jaguata hag̃ua hapére’. ‘Haʼekuéra ijespádagui ojapóta arádo, ha ilánsagui ñana kytĩha. Umi  tetãnguéra noñorairõmoʼãvéima, ha avave nomboʼemoʼãvéima hapichápe oñorairõ hag̃ua’ (Miq. 4:2, 3). Ha upéicha oiko. Oparupiete heta oĩ okambiáva, nomombaʼeguasuvéimava hetã, ndoadoravéimava umi ñandejára guaʼu, ha oike pe rrelihión añeteguápe. Haʼekuéra oikóma peteĩ ñeʼẽme Jehová ohekomboʼégui chupekuéra oguata hag̃ua mborayhu rapére.

19. Mbaʼépa ohechauka umi kristiáno tee oikógui peteĩ ñeʼẽme?

¹⁹ Umi kristiáno tee oikógui peteĩ ñeʼẽme ohechauka Jehová oisãmbyhyha chupekuéra ijespíritu rupive. Opa tetã rupi koʼág̃a hetaitereivéntema umi oikóva peteĩ ñeʼẽme. Koʼág̃a rupi oñekumplihína Revelación 7:9 ha 14-pe heʼíva. Upéva ohechauka ñandéve koʼẽrõitéma umi ánhel opoitaha umi yvytúgui oñehundi hag̃ua ko múndo aña (jaleemína Revelación 7:1-4, 9, 10, 14). Ajépa tuichaite mbaʼe jaservi Jehovápe ñane ermanokuérandi! Péro, mbaʼépa tekotevẽ jajapo akóinte jaiko hag̃ua peteĩ ñeʼẽme ñane ermanokuérandi? Upéva jahecháta pe artíkulo oúvape.

Ñambohovaimi koʼã porandu

• Mbaʼéichapa pe rrelihión añetegua oipytyvõ la héntepe oiko hag̃ua peteĩ ñeʼẽme?

• Mbaʼépa ñanepytyvõta ani hag̃ua oĩ envídia ñande apytépe?

• Mbaʼérepa umi kristiáno teépe ndodividíri pe tetã rayhu?

[Porandu ñahesaʼỹijóva]

[Nóta oĩva taʼanga ndive páhina 13]

Síglo primérope oĩvaʼekue kristianokuéra heta tetãygua

[Nóta oĩva taʼanga ndive páhina 15]

Mbaʼéichapa ñanepytyvõ jaiko porã hag̃ua oñondivepa jaháramo ñambaʼapo Salón del Rréinope?