Ñamombaʼepañaína ñane ermanokuérape?

‘Pejoayhu oñopehẽnguéicha ha peñomokunuʼũ. Peñehaʼã peẽ raẽ pehechauka pemombaʼeha pende rapichápe.’ (ROM. 12:10, NM)

1, 2. a) Mbaʼépa Pablo heʼi umi Romayguápe? b) Mbaʼe porandúpa ñambohováita?

 APÓSTOL Pablo ohaírõ guare umi Romayguápe heʼi iñimportantetereiha jahechauka jajoayhuha kongregasiónpe. Ha ñanemomanduʼa jajapo hag̃ua upéva “tovamokõiʼỹre”. Heʼi ‘jajoayhuvaʼerãha oñopehẽnguéicha ha kunuʼũme’ (Rom. 12:9, 10a, ÑÑB).

² Koʼápe Pablo heʼi jajoayhuvaʼerãha oñopehẽnguéicha ha upéva ndahaʼéi peteĩ mbaʼe ñañandúnteva, síno jahechaukavaʼerã umi mbaʼe jajapóvare. Ndaikatúi voi ningo peteĩ tapicha oikuaa jahayhuha chupe ndajahechaukáiramo chupe. Upévare Pablo heʼi porã: ‘Peñehaʼã peẽ raẽ pehechauka pemombaʼeha pende rapichápe’, péva heʼise ñande ñamoĩvaʼerãha ehémplo (Rom. 12:10b). Péro mbaʼépa heʼise ñaporomombaʼe? Mbaʼérepa iñimportánte ñamoĩ ehémplo ñamombaʼévo ermanokuérape? Mbaʼéichapa ikatu jahechauka upéva?

Mbaʼépa heʼise ñamombaʼe ha jarrespeta ñande rapichápe

3. Mbaʼépa heʼise “ñemombaʼe” evréo ha griégope?

³ La Bíbliape pe ñeʼẽ evréo ojetradusíva “ñemombaʼe”, ojeporu jepi ojeʼe hag̃ua “ovaletereiha” ñandéve g̃uarã peteĩ mbaʼe (Gén. 45:13). Ha griégope katu ojeporu ko ñeʼẽ ojehechauka hag̃ua umi mbaʼe iporã ha hepýva, ñanerakateʼỹva hese (Luc. 14:10). Upéva ohechauka, jaguerekóramo ñande rapicha jahayhu ha jaguerohorýva, katuete ñamombaʼeha chupe. Haʼe heʼíva ovaleterei ñandéve g̃uarã ha jajapo.

4, 5. Mbaʼépa heʼise ñamombaʼe ha jarrespeta ñane ermanokuérape? Emoĩ peteĩ ehémplo.

⁴ Mbaʼépa heʼise “ñamombaʼe” ha “jarrespeta” ñane ermanokuérape? Koʼã mokõi ñeʼẽ ojojoguaiterei ha upévare ojeporu jepi oñondive. Ñamombaʼe heʼise mbaʼéichapa jahecha ñande rapichápe térã mbaʼépa ñapensa hese. Ha jarrespeta heʼise, jahechauka pe ñañandúva jatrata porãvo chupe.

⁵ Mbaʼéicha piko peteĩ kristiáno heʼíta omombaʼeha ermanokuérape ndorrespetáiramo chupekuéra ipyʼaite guive? (3 Juan 9, 10.) Pór ehémplo peteĩ plánta okakuaa porã hag̃ua oĩvaʼerã yvy porãme ha hapo pypuku vaʼerã. Upéicha avei ñane ñeʼã mbytetégui heñoivaʼerã pe rrespéto, ñambohapovaʼerã ñandepype. Upévare umi omombaʼe guaʼúva hapichápe ojechauka hag̃uánte ha hovamokõiva, katuete osẽ vai, opa rei ha opyta tesaráipe. Ndareíri apóstol Pablo omokyreʼỹtarõ guare kristianokuérape omombaʼe hag̃ua hapichápe, heʼi porã chupekuéra: “Pejoayhu tovamokõiʼỹre” (Rom. 12:9; elee 1 Pedro 1:22).

Ñamombaʼékena ‘Ñandejára ojapovaʼekuépe ijoguaháramo’

6, 7. Mbaʼérepa jarrespetavaʼerã opavavépe?

⁶ Jahecha haguéicha, ñamombaʼe hag̃ua ñande rapichápe iñimportánte jarrespeta chupe ñande pyʼaite guive. Upévare ko artíkulope ñahesaʼỹijóta mokõi mbaʼe Ñandejára  Ñeʼẽ heʼíva. Koʼãva tuicha ñanepytyvõta jarrespeta hag̃ua opaichagua ermánope.

⁷ Ñepyrũrã, la Biblia heʼi Ñandejára ojapo hague yvypórape añoite ‘ijoguaháramo’ (Sant. 3:9). Upéicha rupi ikatu japorohayhu, ñanearandu ha ñanderekojoja. Pe salmísta omombeʼu mbaʼépa omeʼẽve ñandéve Ñandejára: ‘Jehová ore Jára, ndereko mimbipa og̃uahẽ yvága peve. Michĩmínte remomichĩve [yvypórape] anhelkuéragui, ha rembotuicha chupe terakuã ha teko mimbipápe [“rembombaʼe”]’ (Sal. 8:1, 4, 5; 104:1, ÑÑB). * Ko téystope heʼi Jehová ‘ñanemombaʼe ha ñanembotuichaha’, ojapo upéva omeʼẽvo yvyporakuérape terakuã ha teko mimbipa. Haʼe ñandeapóvo ijoguaháramo haʼete omoĩva káda únore jeguaka iporãitereíva. Upévare ñamombaʼévo ñande rapichápe, Jehovápe ñamombaʼeñaína. Upéicha, tekotevẽramo jarrespeta opavave tapichápe, koʼýte jarrespetavaʼerã ñane ermanokuérape (Juan 3:16; Gál. 6:10).

Ñande ningo peteĩ família

8, 9. Mbaʼe rehépa apóstol Pablo heʼi jajorrespetavaʼerãha?

⁸ Pe mokõiha katu apóstol Pablo omombeʼu ñandéve, haʼe heʼi: ‘Pejoayhu oñopehẽnguéicha ha peñomokunuʼũ’. Heʼívo ‘peñomokunuʼũ’ oñeʼẽ pe mborayhu oĩvare ogapýpe. Peteĩ família ojogueraha porãva ningo ojoayhueterei ha oñopytyvõ. Upéicharõ Pablo ohechaukahína kongregasiónpe jajorrespeta ha jajotratavaʼerãha mborayhúpe peteĩ famíliaicha (Rom. 12:5). Pablo ohaivaʼekue ko mbaʼe umi kristiáno unhídope primer síglope. Haʼekuéra Jehová família, haʼe oiporavo rupi chupekuéra oiko hag̃ua itaʼýraramo. Upévare umi ohótava yvágape, koʼág̃a peve ojorrespeta ha oñomombaʼe.

⁹ Ha mbaʼépa ikatu jaʼe “ambue ovechakuérare”? (Juan 10:16.) Koʼãva ndahaʼéi gueteri Ñandejára raʼy, upéicharamo jepe ko múndo tuichakuére omombaʼeguasu Ñandejárape peteĩ famíliaicha. Upévare hendaitépe oñohenói hikuái “ermáno” ha “ermána” (1 Ped. 2:17; 5:9). Umi ambue ovechakuéra ohechakuaáramo mbaʼérepa oñohenói ermáno ha ermána, ojorrespeta ha ojoayhúta ipyʼaite guive (elee 1 Pedro 3:8).

Mbaʼérepa iñimportanteterei?

10, 11. Mbaʼérepa tekotevẽterei jajorrespeta ha ñañomombaʼe?

¹⁰ Mbaʼérepa tekotevẽterei jajorrespeta ha ñañomombaʼe? Ñamombaʼéramo ñane ermáno ha ñane ermánape jaikóta pyʼaguapýpe ha peteĩ ñeʼẽme kongregasiónpe.

¹¹ Péro jaikuaa opa mbaʼégui iñimportanteveha ñaime porã Jehová ndive ha jaguereko ipytu marangatu. Upéva hína pe añetehápe omombaretéva ñande jerovia (Sal. 36:7; Juan 14:26). Upéicharamo jepe ñanemokyreʼỹ jahechávo ñane ermanokuéra ñanemombaʼeha (Pro. 25:11). Ajépa javyʼaite ñane ermáno ñanderrespeta ha ñanemombaʼéramo opa mbaʼe heʼi ha ojapóva rupive! Upéva koʼýte ñanembovyʼa ha ñanemombareteve jasegi hag̃ua pe tape oporoguerahávare jeikove opaʼỹvape. Katuete ningo nde oimevaʼerã heta vésema reñeñandu upéicha.

12. Mbaʼépa jajapovaʼerã káda uno jajoayhu ha jajogueraha porã hag̃ua kongregasiónpe?

¹² Jehová oikuaa porã ñande jaipotaha ñande rapichakuéra ñanderrespeta, upévare Iñeʼẽme omeʼẽ ko konsého opavave kristiánope: ‘Pehechauka pemombaʼeha  pende rapichápe’ (Rom. 12:10, NM; elee Mateo 7:12). Ñañehaʼãramo jajapo ko téysto heʼíva, jajoayhu ha jajogueraha porãta ermanokuéra ndive kongregasiónpe. Upéicharõ iporãta káda uno ñañeporandumi: “Arakaʼépa ahechaukáraʼe umi mbaʼe haʼe térã ajapóva rupive amombaʼeha ermanokuérape?” (Rom. 13:8).

Konsého opavavépe g̃uarã

13. a) Máva raẽpa omoĩvaʼerã ehémplo omombaʼévo ermanokuérape? b) Mbaʼépa ohechauka avei Pablo heʼíva Romanos 1:7-pe?

¹³ Máva raẽpa omoĩvaʼerã ehémplo omombaʼévo ermanokuérape? Pablo ohaivaʼekue ansianokuéra ‘omboʼeha’ kongregasiónpe (Heb. 13:17, JMP). Añetehápe ningo umi ansiáno ñanerekomboʼe ha heta hembiapo kongregasiónpe. Upéicharamo jepe haʼekuéra raẽ omoĩvaʼerã ehémplo omombaʼévo ermanokuérape ha avei ambue ansiánope. Mbaʼéichapa ikatu ojapo upéva? Oñembyaty jave hikuái ohecha hag̃ua mbaʼépa oikotevẽ kongregasión, ohechaukavaʼerã ojorrespetaha ojapysaka porãvo ambue ansiáno heʼívare. Ha odesidi mboyve hikuái peteĩ mbaʼe ohendu raẽ vaʼerã mbaʼépa opensa káda uno. Péicha ohechauka oñomombaʼeha hikuái (Hech. 15:6-15). Péro ñanemanduʼavaʼerã apóstol Pablo noñemoñeʼẽi hague umi ansiánopente, haʼe heʼi upéva opavave kristiánope (Rom. 1:7). Upéicharõ jaʼekuaa enterovete ñamoĩvaʼerãha ehémplo ñamombaʼévo ñande rapichakuérape.

14. a) Mbaʼépa heʼise ‘peñehaʼã peẽ raẽ pehechauka pemombaʼeha pende rapichápe’? Emoĩ peteĩ ehémplo. b) Mbaʼépa káda uno ñañeporanduvaʼerã?

¹⁴ Ñahesaʼỹijovemína pe konsého Pablo omeʼẽvaʼekue. Haʼe ndahaʼéi heʼínteva umi ermáno Romayguápe omombaʼevaʼerãha hapichápe, heʼi voi katu chupekuéra: ‘Peñehaʼã peẽ raẽ pehechauka pemombaʼeha pende rapichápe’. Upéva heʼise haʼekuéra omoĩvaʼerãha ehémplo. Ñantende porãve hag̃ua ñapensami ko mbaʼére. Omokyreʼỹtapa peteĩ mboʼehára iñalumnokuérape oleekuaa hag̃ua, oleekuaáramo voi hikuái? Nahániri, oñehaʼãta guei oipytyvõ chupekuéra olee porãve hag̃ua. Upéicha avei ñande kristiáno añeteguáva jahechaukáma voi jajoayhu ha ñañomombaʼeha (Juan 13:35). Upéicharamo jepe koʼẽ koʼẽre jasegivaʼerã jahechaukave ñamombaʼeha ñande rapichápe, ha upéicha ñamoĩ ehémplo opavavépe  (1 Tes. 4:9, 10). Ha koʼýte kongregasiónpe káda uno ñañehaʼãvaʼerã ñamoĩ ehémplo ñamombaʼévo ermanokuérape. Ndépa rejaporeína upéicha?

Ñamombaʼékena umi “imboriahúvape”

15, 16. a) Mávaguipa ndovaléi ñanderesarái ha mbaʼérepa? b) Mbaʼéichapa jaikuaáta ñamombaʼepañaína enterove ermanokuérape?

¹⁵ Jahechaukávo ñamombaʼeha ermanokuérape; mávaguipa ndovaléi ñanderesarái? Ñandejára Ñeʼẽ heʼi: ‘Upe oipytyvõva umi oikotevẽvape omeʼẽhína Ñandejárape, ha pe mbaʼe porã ojapóva, Haʼe omyengovia jey vaʼerã chupe’ (Pro. 19:17). Mbaʼéichapa ko téysto ñanepytyvõta ñamombaʼeve hag̃ua ermanokuérape ha péicha ñamoĩ ehémplo opavavépe?

¹⁶ Ko múndope pyʼỹinte jahecha oñemombaʼeha umi iplátava ha poguasukuérape. Péro ojeapoʼi ha ojetrata vai umi imboriahuvévape. Jehová katu ndahaʼeiete upéicha, haʼe heʼi: ‘Che amombaʼéta umi chemombaʼévape’ (1 Sam. 2:30, ÑÑB; Sal. 113:5-7). Jehová omombaʼe opa ojapóvape hembipota, haʼe ndahesaráiri umi ‘imboriahu’ ha oikotevẽvagui (elee Isaías 57:15; 2 Cró. 16:9). Ñande ningo ñahaʼangase Jehovápe, upévare jajepyʼamongetavaʼerã jahecha hag̃ua añetehápepa ñamombaʼeñaína enterove ermanokuérape. Iporã ñañeporandu: “Mbaʼéichapa atrata umi imboriahumívape térã umi ndorekóiva heta priviléhio kongregasiónpe?” (Juan 13:14, 15). Ñambohovái lájare ko porandu jaikuaáta ñamombaʼe ha jarrespetapañaína ñande pyʼaite guive ermanokuérape (elee Filipenses 2:3, 4).

Ñañemotiémpokena ermanokuérape g̃uarã

17. Mbaʼéichapa ikatu jahechauka ñamombaʼetereiha ermanokuérape? Ha mbaʼérepa jaʼe upéva?

¹⁷ Ñañemotiémporamo ñane ermanokuérape g̃uarã jahechaukañaína ñamombaʼetereiha chupekuéra. Mbaʼérepa jaʼe upéva? Jaikuaa rupi ñande jaservíva Jehovápe jarekoha heta mbaʼe jajapovaʼerã, ha pe tiémpo jarekomíva jaiporupaite ñakumpli porã hag̃ua ñane rembiapo kongregasiónpe. Jajapo ningo opa ikatúva jaiporu porã hag̃ua ñane tiémpo. Upévare ñanembaʼerechakuaavaʼerã ha ani ñahaʼarõ ermanokuéra ou ñanerendápe jaipotaha órante. Ha upéicha avei ñande jaagradese ambue ermáno ndoikóiramo ojerureterei ñañemotiémpo hag̃ua chupe.

18. Jahechaháicha pe taʼanga oĩva páhina 18-pe, mbaʼéichapa jahechauka ñañemotiempoha ñane ermanokuérape g̃uarã?

¹⁸ Péro jahechakuaa (koʼýte umi jaservíva ansiánoramo) ñamopaʼũramo ñane tiémpo ñañatende hag̃ua ermanokuérare ñamombaʼeha chupekuéra. Upéicha haʼetévaicha jaʼéva ñane ermánope iñimportantetereiha ñandéve g̃uarã, ha upévare nañambyasýi jaheja haguére ñane rembiapo ñañatende hag̃ua hese (Mar. 6:30-34). Péro ndajahejaséiramo katu opensáta nañamombaʼeiha voi chupe. Ñanemanduʼavaʼerã sapyʼánte ndaikatumoʼãiha jaheja rei peteĩ mbaʼe jajapóva. Upéicharamo jepe iñimportanteterei ñañemotiémpo ñane ermanokuérape g̃uarã,  péicha ojekuaáta ñamombaʼépa ñande rapichápe térãpa nahániri (1 Cor. 10:24).

Ñañehaʼã memékena ñamoĩ ehémplo

19. Mbaʼéichapa ikatu avei jahechauka ñamombaʼeha ñane ermanokuérape?

¹⁹ Ndahaʼéi ningo ñamopaʼũvo ñane tiémponte jahechaukáva ñamombaʼeha ñane ermanokuérape, síno avei ñahendu porãvo chupekuéra. Péicha jasegitañaína Jehová ehémplo, pe salmísta David ohai: ‘Ñandejára ojesareko umi ijoheipyréva rehe ha ohendu umíva ñemboʼe’ (Sal. 34:15). Ojeʼeháicha tesa rei ndahaʼéi pohã, upévare umi ermáno ou jave oñemongeta ñanendive jajapysaka porã vaʼerã hese ha ñaipytyvõ chupe oikotevẽramo. Péicha jahechaukáta avei ñamombaʼeha chupekuéra.

20. Mbaʼépa jajedesidivaʼerã opavave jajapo?

²⁰ Jahecha haguéicha la Biblia heʼi iñimportanteha ñamombaʼe ñande pyʼaite guive ñane ermanokuérape, ha ñañehaʼã meme vaʼerã jajapo upéva. Pór ehémplo ñamombaʼevaʼerã enterovépe ha ani ñanderesarái umi imboriahuvévagui. Péicha jajapóramo jajoayhu ha jajogueraha porãta kongregasiónpe. Upévare ñañehaʼã memékena ñamoĩ ehémplo ñamombaʼévo ñane ermanokuérape. Rejedesidímapa nde rejapóvo upéicha?

[Nóta]

Nemanduʼápa?

• Mbaʼépa heʼise ñamombaʼe ha jarrespeta ñande rapichápe?

• Mbaʼérepa ñamombaʼevaʼerã ñane ermanokuérape?

• Mbaʼérepa iñimportánte jajorrespeta kongregasiónpe?

• Mbaʼéichapa ikatu jahechauka ñamombaʼeha ñane ermanokuérape?

[Porandu ñahesaʼỹijóva]

[Nóta oĩva taʼanga ndive páhina 18]

Mbaʼéichapa ikatu jahechauka ñamombaʼeha ñane ermanokuérape?