Ñamotenonde memékena ‘Ñandejára hustísia’

‘Pemotenonde meméke Ñandejára rréino ha ihustísia, ha koʼã mbaʼe peikotevẽva oñemeʼẽta avei peẽme.’ (MAT. 6:33, NM)

1, 2. Mbaʼépa Jehová añoite ikatu ojapo, ha mbaʼépa ohechauka umi léi haʼe omoĩva?

 PETEĨ jey Jesús heʼivaʼekue: ‘Pemotenonde meméke Ñandejára rréino’ (Mat. 6:33, NM). Ñande testígo de Jehová jaikuaa porã ko téysto, ha akóinte jahechauka ñamombaʼetereiha Ñandejára rréino ha jaikoseha ipoguýpe. Péro Jesús ñanemokyreʼỹvaʼekue avei jajapo hag̃ua ambue mbaʼe: Ñamotenonde ‘Ñandejára hustísia’. Ko artíkulope jahecháta mbaʼépa heʼise upéva ha mbaʼéichapa ikatu ñamotenonde meme ñande rekovépe.

² Ko ñeʼẽ ‘hustísia’ ikatu avei ojetradusi ‘iporãva Ñandejára renondépe’ térã ‘umi mbaʼe haʼe oguerohorýva’. Jehová hína opa mbaʼe Apohare, upéicha rupi haʼémante oikuaa mbaʼépa oĩ porã ha mbaʼépa oĩ vai. Hiʼarive haʼe hekojoja ha upévare umi mbaʼe odesidíva oĩ porã katuete (Rev. 4:11). Péro Jehová ndahaʼéi hekojojánteva, avei iñarandu, ñanderayhu ha tuicha ipuʼaka. Haʼe nomoĩri ñande ári atyraite umi léi ipohýiva ha nañandejopýi ñakumpli hag̃ua. Upéva rangue umi léi omoĩvare jahecha mbaʼeichaitépa imbaʼeporã. Upévare ñahesaʼỹijóvo  hembipota jahechakuaa hekojojaha, ha jaguerovia ni mbaʼevéicharõ ndaivaimoʼãiha umi mbaʼe ojeruréva ñandéve.

3. a) Mbaʼépa heʼise ñamotenonde Ñandejára hustísia? b) Mbaʼérepa ñaneñeʼẽrendu Jehovápe?

³ Mbaʼépa heʼise ñamotenonde meme Ñandejára hustísia? Heʼise jajapoha hembipota ñaime porã hag̃ua henondépe. Avei heʼise ndajaikoveimaha ñane akãre, upéva rangue ñañehaʼãmbaite jajapo opa mbaʼe Ñandejára oipotaháicha (elee Romanos 12:2). Ñañehaʼã jaiko upéicha ñañemoag̃uise rupi hese ha jaikuaa ndaiporiha mbaʼeve iñimportantevéva upévagui. Avei ñaneñeʼẽrendu Jehovápe jahayhúgui chupe ha ndahaʼéi jakyhyjégui ñandekastigárõ g̃uarã. Jaguerovia ñande pyʼaite guive ñande Apohare oikuaaha mbaʼépa iporãve ñandéve g̃uarã. Upévare Jesús ojapo haguéicha, akóinte ñamotenonde Ñandejára oguerohorýva (Heb. 1:8, 9).

4. Mbaʼérepa tekotevẽterei ñamotenonde Ñandejára hustísia?

⁴ Mbaʼérepa tekotevẽterei ñamotenonde Ñandejára hustísia? Ñantende hag̃ua upéva, ñapensami Adán ha Eva ojapovaʼekuére hardín de Edénpe. Haʼekuéra odesidivaʼerã iñeʼẽrendútapa Jehovápe ha ohejátapa Haʼe heʼi chupekuéra mbaʼépa iporã ha mbaʼépa ivai (Gén. 2:17; 3:5). Péro Adán ha Eva omboyke ijapoharépe ha ikáusare opavave yvypóra jahasa asy ha ñamano (Rom. 5:12). Upéicharamo jepe Ñandejára Ñeʼẽ opromete ñandéve: ‘Umi ohekáva tekojoja ha tekomarangatu oikovéta, hekojojáta, ha ojeguerohorýta’ (Pro. 21:21). Upévare ñamotenondéramo Ñandejára hustísia, ñaime porãta hendive ha jaikovéta opa ára g̃uarã (Rom. 3:23, 24).

Naiporãi ñapensa ñanderekoporãveha ñande rapichakuéragui

5. Mbaʼépa ndovaléi jajapo?

⁵ Ohaírõ guare umi kristiáno Romayguápe, apóstol Pablo omombeʼu peteĩ mbaʼe ojapóva umi hudío upe tiémpope. Haʼe heʼi: ‘Che aikuaa porã hakateʼỹha hikuái Ñandejárare, péro ndoikuaaporãi chupe. Haʼekuéra ndoikuaái Ñandejaraha pe ombohekojojáva yvyporakuérape. Ha ohechaukase hikuái ijehegui reínte hekojojaha, upévare ndojapói Ñandejára heʼíva’ (Rom. 10:2, 3, NM). Pablo heʼi haguéicha, umi hudío oikoseterei hekojojávaramo hapichakuéra renondépe, péro nontendéi Ñandejára añoite ikatuha odesidi mbaʼépa iporã ha mbaʼépa ivai. Ñamotenondeséramo Ñandejára hustísia ñañatendevaʼerã ani hag̃ua jajapo umi hudío ojapo haguéicha.

6. Mbaʼéichapa ikatu jajavy umi hudío ojavy haguéicha? Ha mbaʼérepa ñañatendevaʼerã?

⁶ Ikatúnepa jajavy avei umi hudío ojavy haguéicha? Upéva ikatu oiko, pór ehémplo ñambojojasérõ ñande jajapóva Jehová servísiope ambue ermanokuéra ojapóvare, térã jaikose ñandevalevévaramo kongregasiónpe. Péro ñañatendékena, cháke jajapóramo péicha ñañepyrũta jajeroviaiterei ñandejehe ha ñamboykéta Ñandejára oguerohorýva (Gál. 6:3, 4). Ñanemanduʼáke jaservivaʼerãha Jehovápe jahayhúgui chupe. Péro jaikóramo ñanderekoporã guaʼu jajechauka hag̃uánte, ni vymi ndajahayhúi chupe (elee Lucas 16:15).

7. Mbaʼéichapa Jesús ohechauka ivaiha jaʼe ñanderekojojaveha ñande rapichágui?

⁷ Jesús oikórõ guare ko yvy ape ári ‘oĩ umi heʼíva ijehe hekojojaha, ha oapoʼíva hapichápe’. Ha ohechauka hag̃ua ivaiha jajapo upéva, haʼe omoĩ peteĩ ehémplo: ‘Mokõi kuimbaʼe oho oñemboʼe témplope, peteĩ fariséo ha ambue katu impuésto kovraha. Pe fariséo oñemboʼy, ha oñemboʼévo heʼi ipyʼapýpe: “Ñandejára, aagradesete ningo ndéve ndaikói haguére ambue kuimbaʼéicha, haʼekuéra imonda, ndahekojojái, ha omoakãratĩ hembirekópe, ha ndajoguái avei  ko impuésto kovrahápe. Dos vése voi aajuna káda semána, ha ameʼẽ pe diésmo opa mbaʼe arekóvagui”. Péro pe impuésto kovraha katu oñemboʼy mombyrymínte voi, ha ni noñanimái ojesaupívo yvágare, upéva rangue ojepytiʼanupã ha heʼi: “Cheporiahuverekomína Ñandejára, che ningo ajapo heta mbaʼe ivaíva ne renondépe”’. Ha omohuʼãvo Jesús heʼi: ‘Añete haʼe peẽme: Ko kuimbaʼépe Ñandejára oguerohoryve pe fariséogui. Upévare umi oñembotuicháva ojeapoʼíta ha umi oñemomichĩvape katu oñembotuicháta’ (Luc. 18:9-14, NM).

Naiporãi ‘ñañembotuichase’

8, 9. Mbaʼépa ojapo umi ‘oñembotuichaséva’? Mbaʼépa ikatu oiko ñanderehe péicha ñapensáramo?

⁸ Oĩ avei ambue mbaʼe ndovaléiva jajapo. Romanos 12:3 (ÑÑB) heʼi: ‘Aníke avave oñembotuichase’. Ha Eclesiastés 7:20 omombeʼu mbaʼérepa: ‘Ndaipóri avave ko yvy apére akóinte ojapo porãva opa mbaʼe ha arakaʼeve ndojavýiva’. Pe ‘oñembotuichaséva’ oipota oiko opa mbaʼe haʼe oipotaháicha, ha peichahágui ndojejapóiramo chupe ogustáva, oñepyrũma okopi opavavére. Ojapóvo péicha haʼete ku heʼíva oikuaaveha Jehovágui, ha amo ipahápe opyta vaíma Ñandejára renondépe.

⁹ Mbaʼépa ikatu oiko ñanderehe péicha ñapensáramo? ‘Ñañembotuichaséramo’ ikatu ñapensa Ñandejára ojavyha. Ha jaʼéramo oĩ vaiha peteĩ mbaʼe haʼe odesidíva jaʼeñaína ñanearanduveha chugui. Haʼete ku ñamboguapýva Jehovápe ha jaʼe chupe: ‘Tuichaiterei ningo rejavy, che haʼéva iporãve hína’. Péro, ikatúpa ñande yvypóra jaʼe mbaʼépa iporã térã ivai? Nahániri. Upéva Jehová añoite ikatu odesidi (Rom. 14:10).

10. Ojehu haguéicha Jóbpe, mbaʼérepa ikatu ñapensa vai Ñandejárare?

¹⁰ Oiméne ñande jaʼeñaína: ‘Che ningo ni mbaʼevéicharõ napensavaimoʼãi Ñandejárare’. Péro ñanemanduʼáke ñaneimperfektoha ha nañañatendéiramo ikatu jajapo upéva. Pór ehémplo, jahasa asýramo térã ojejapóramo ñanderehe peteĩ mbaʼe vai ikatu ñapensa Jehová kulpareha. Job rehe oikovaʼekue upéicha. Ñandejára Ñeʼẽ heʼi haʼe ‘imarangatu ha ijoheipyreha, ojapoha opa ára Ñandejára rembipota ha oñehaʼã ani hag̃ua ojapo mbaʼeve ivaíva’ (Job 1:1). Péro upéi ou ojere vaipa chupe, ha haʼe oñeñandu vaieterei oimoʼãgui nomereseiha peichaite peve ohasa asy. ‘Heʼi ijehe hekopotĩha, ha Ñandejára káusare ohasa asyha’ (Job 32:1, 2). Job tuicha ojavy, ha tekotevẽ okambia opensa lája. Ñande avei jahasáramo sapyʼa peteĩ mbaʼe ijetuʼúvare ikatu ñañeñandu Job oñeñandu haguéicha. Ha oimérõ oikóma ñanderehe upéva, mbaʼépa ñanepytyvõta ñakambia hag̃ua ñapensa lája?

Ndajaikuaái opa mbaʼe oikóva

11, 12. a) Mbaʼépa ñanemanduʼavaʼerã haʼetéramo ñandéve noĩporãiha peteĩ mbaʼe? b) Mbaʼérepa ikatu ñapensa pe parralty jára naimbaʼerechakuaái hague umi ombaʼapóva ndive?

¹¹ Mbaʼérepa ñanemanduʼavaʼerã haʼetéramo ñandéve noĩporãiha peteĩ mbaʼe? Primero, ndajaikuaaiha opa mbaʼe oikóva.  Upéva ojehu Jóbpe. Haʼe ningo ndoikuaaivaʼekue umi ánhel oñembyaty hague dos vése yvágape ha upépe Satanás reiete otaky hague hese Ñandejára renondépe (Job 1:7-12; 2:1-6). Job ndoikuaái Satanás káusare ohasa asyha, ha ikatu voi jaʼe ndoikuaái hague oĩha pe tekove aña. Upévare haʼe oimoʼã Ñandejára ombohasa asyha chupe. Jahechakuaa upéicharõ ikatuha jajavy ndajaikuaái jave opa mbaʼe oikóva.

¹² Koʼág̃a jahechami peteĩ káso Jesús omombeʼuvaʼekue. Haʼe heʼi peteĩ parralty jára omombaʼapo hague heta kuimbaʼépe (elee Mateo 20:8-16). Oĩ umi ombaʼapóva un día pytã ha ambue katu una oramínte. Ipahápe pe parralty jára opaga enterovépe peteĩchante. Mbaʼépa ere chupe? Oĩ porãpa pe karai ojapovaʼekue? Jajepyʼamongetávo umi ombaʼapovaʼekuére un diaite pe kuarahy akúpe ikatu voi jaʼe: ‘Chupekuéra ningo ojepagavevaʼerã’. Ha jahechávo mbaʼépa ojapo pe parralty jára ñapensáta haʼe iñaña ha naimbaʼerechakuaaiha. Ha koʼýte jaleévo mbaʼéichapa ombohovái umi kuimbaʼe ojeplageárõ guare ojepaga haguére opavavépe peteĩchapa, jaʼeséta voi hese ijarhél ha ipyʼahatãha. Péro jaikuaa porã piko ñande opa mbaʼe oikovaʼekue?

13. Mbaʼe mbaʼérepa jajepyʼamongetavaʼerã ñantende porãve hag̃ua pe ehémplo Jesús omoĩvaʼekue?

¹³ Ñañehaʼãmína ñantende mbaʼépa oiko upérõ. Pe parralty jára oikuaáneraʼe entéro umi ombaʼapóva chupe g̃uarã omoĩvaʼerãha ifamiliakuérape hemikotevẽ. Upe tiémpope umi ombaʼapóvape ojepaga kaʼaruete opoi rire, ha upe plátagui haʼekuéra ojoguavaʼerã hiʼupy hogayguakuérape g̃uarã. Ñapensamína umi kuimbaʼe ombaʼapovaʼekuére una órante. Ndotopáirire hesekuéra pe karai, mbaʼépa oikovaʼerãmoʼã ifamiliakuéragui? Mbaʼe anga piko hoʼukáta hogayguakuérape ojepagáramo chupekuéra una órarente? Hiʼarive haʼekuéra ombaʼaposékuri. Ha pe ára pukukuére ohaʼarõ jahecha oĩpa omombaʼaposéva chupekuéra. Jahechaháicha ndahaʼéi ku hekoreíva mbaʼe hikuái, ndotopáinte ningo itravahorã (Mat. 20:1-7). Mbaʼéichapa reñeñandúne upéicha oikóramo nderehe? Kaʼarumahína, nderejuhúi gueteri nde travahorã ha remongaruvaʼerã ne familiakuérape. Ajépa revyʼaiténe upéi oúramo peteĩ karai nemombaʼaposéva sapyʼaitemínte jepe. Ha ni nderegueroviasemoʼãi upéi opagáramo ndéve ndahaʼéi una órarente, síno un día repykue voi.

14. Mbaʼépa ñanemboʼe pe ehémplo Jesús omoĩvaʼekue?

¹⁴ Jahechami jey mbaʼépa ojapóraʼe pe parralty jára. Ohechávo hetaha umi ombaʼaposéva ikatúkuri ojaprovecha hesekuéra ha heʼi umi kuimbaʼépe: ‘Apagaʼivétamante peẽme’. Péro pe karai ndojapói upéva, haʼe opaga porã chupekuéra ha upévare umi kuimbaʼe ikatu ogueraha hiʼupyrã hógape. Ñapensávo koʼã mbaʼére, jahecha pe parralty jára imbaʼeporã hague. Haʼe ndotratavaíri avavépe, imbaʼerechakuaa katu hendivekuéra.  Ko káso rupive jahecha ndajaikuaáiramo opa mbaʼe oikóva ikatuha jajavy tuichaiterei. Avei jahecha ñande yvypóra ndaikatuiha ni michĩmi ñañembojoja Jehováre. Haʼe ningo hekojoja, noñemohatãi haʼe heʼívapente ha ndoikói omaña mávapa ivaleve térã iñaranduve.

Heta mbaʼe nañantendéi ha ikatu oĩ vai upe ñapensáva

15. Mbaʼérepa nañantendéi heta mbaʼe ha oĩ vai jepi upe ñapensáva?

¹⁵ Avei, ñanemanduʼavaʼerã nañantendeiha heta mbaʼe ha ikatuha oĩ vai upe ñapensáva. Upévare sapyʼánte ñandéve g̃uarã haʼete ku noĩporãiva peteĩ mbaʼe ojejapóva. Mbaʼérepa oiko upéva ñanderehe? Ñande ñaneimperfékto, ñamañaiterei mávapa imboriahu térã ipláta, mávapa tetã ambuegua, ỹrõ katu umi ikostúmbre diferénteva. Avei ndaikatúi jahecha mbaʼépa oĩ ñande rapicha pyʼapýpe ha upévare ndajaikuaái mbaʼépa opensa térã ojapose. Jehová ha Jesús katu ohechapaite umi mbaʼe (Pro. 24:12; Mat. 9:4; Luc. 5:22).

16, 17. Mbaʼérepa Jehová nokumplíri iléi ohusgárõ guare David ha Bat-sébape?

¹⁶ Jahechamína mbaʼépa oikovaʼekue David ha Bat-seba hekokyʼárõ guare (2 Sam. 11:2-5). Ñandejára Léi heʼi mokõivéva omanovaʼerãha (Lev. 20:10; Deu. 22:22). Péro Jehová ndojukái chupekuéra, upéva rangue okastiga pohýinte mokõivévape. Mbaʼére piko Ñandejára nokumplíri pe léi haʼe voi omeʼẽvaʼekue? Ojavýparaʼe ohusgárõ guare David ha Bat-sébape? Ikatúpa jaʼe omboyke hague iléi ohayhúguinte Davídpe? Heta oĩ opensáva upéicha.

¹⁷ Péro ñanemanduʼákena umi hués oñatendevaʼerã umichagua káso iñimperfékto ha ndohechakuaaiha heta mbaʼe. Haʼekuéra ndaikatúi ohecha mbaʼépa oĩ hapichakuéra pyʼapýpe, upévare Ñandejára léi oipytyvõ chupekuéra ohusga hag̃ua peteĩchante umi hembiapo vaívape (Gén. 18:25; 1 Cró. 29:17). Jehová katu ohecha mbaʼépa oĩ opavave pyʼapýpe, ha upévare natekotevẽi okumpli pe léi omeʼẽvaʼekue yvypórape g̃uarã. Jaipotáramo ojapo upéva haʼete ku jajopýva peteĩ ohecha porãvape oiporu hag̃ua lénte. Jehová ohechakuaa David ha Bat-seba oñembyasy hague ipyʼaite guive ha upévare oiporiahuvereko chupekuéra.

Ñamotenonde meméke Ñandejára hustísia

18, 19. Mbaʼérepa ñanemanduʼavaʼerã ani hag̃ua ñapensa vai Jehováre?

¹⁸ Upéicharõ, jatopárõ Ñandejára Ñeʼẽme peteĩ párte noĩporãmbáiva ñandéve g̃uarã, térã jahasa asýramo ha ñaimoʼã Jehová kulpareha, aníkena jakopi hese. Ñanemanduʼákena ñande ndajaikuaaiha opa mbaʼe, avei heta mbaʼe nañantendéi ha pyʼỹinte jajavy japorohusga jave. Aníke ñanderesarái ‘pe ipochýva ndojapoiha iporãva Ñandejára renondépe’ (Sant. 1:19, 20). Ñanemanduʼa meméramo koʼã mbaʼére arakaʼeve ‘nañandepochymoʼãi Jehová ndive’ (Pro. 19:3).

¹⁹ Ojapo haguéicha Jesús, jahechakuaavaʼerã Jehová añoite ikatuha heʼi mbaʼépa oĩ porã ha mbaʼépa oĩ vai (Mar. 10:17, 18). Upévare, ñañehaʼãkena jareko ‘arandu añete’ ha jaikuaa pe “añetegua” ikatu hag̃uáicha jajapo Ñandejára oipotáva (Rom. 10:2; 2 Tim. 3:7, ÑÑB). Jajapóramo umi mbaʼe Haʼe oguerohorýva jahechaukáta ñamotenondehañaína ‘ihustísia’ (Mat. 6:33).

Nemanduʼápa?

• Mbaʼérepa ñamotenondevaʼerã Jehová hustísia?

• Mbaʼépa hína umi mokõi mbaʼe ndovaléiva jajapo?

• Mbaʼépa jajapovaʼerã ñamotenonde meme hag̃ua Ñandejára hustísia?

[Porandu ñahesaʼỹijóva]

[Nóta oĩva taʼanga ndive páhina 9]

Mbaʼépa ikatu ñaaprende umi mokõi kuimbaʼégui ohovaʼekue témplope oñemboʼe hag̃ua?

[Nóta oĩva taʼanga ndive páhina 10]

Oĩ porãpa pe parralty jára opaga enterovépe peteĩchante?