“Chepytyvõ ag̃uahẽ hag̃ua che rapichakuéra korasõme”

ÁÑO 2005-pe, Brasílpe ojejapo peteĩ aty táva Porto Alégrepe, ha upépe oñembyaty hetaiterei tapicha oúva 135 tetãgui. Ko rreuniónpe haʼekuéra oñemongeta heta provlémare oĩva ko múndope ha ohecha mbaʼéichapa ikatu oñemyatyrõ. Upémarõ umi ermáno oikóva upe távape oaprovecha opredika hag̃ua pe marandu porã umi tetã ambueguápe. Péro mbaʼéichapa oñemongeta hendivekuéra?

Peteĩ prekursóra hérava Elizabete omombeʼu: “Roiporu folléto Notísia porã opavave tapichakuérape g̃uarã. Oĩ heta noñeʼẽiva gueteri testígo de Jehová ndive, péro ohendu porãiterei romombeʼúvo chupekuéra mbaʼépa heʼi Ñandejára Ñeʼẽ. Roñemongeta umi oúvandi Bolivia, China, Francia, India, Israel ha Nigériagui. Rogueraha lívro ha rrevísta oĩva iñeʼẽmekuéra ha ogustaiterei chupekuéra”.

Ko folléto ideprovechoiterei avei Raúlpe, peteĩ prekursór Mexicoygua. Peteĩ jey haʼe oñemongeta peteĩ karai Arabiaygua ndive, orekóva 80 áño ha hembireko omano ramoitéva. Raúl omeʼẽ chupe pe folléto, ha oleévo pe marandu porã pe karai hesay pororopaite. Mbaʼérepa? Opokoiterei hese oleévo iñeʼẽtépe Ñandejára promésa oĩva Revelación 21:3, 4-pe, heʼihápe ndaiporimoʼãveimaha ñemano. Ambue ára Raúl otopa peteĩ karai oñeʼẽva portuguéspe. Chugui katu omano itaʼýra, ha Raúl omeʼẽ avei chupe olee hag̃ua pe folléto. Pe karai oleepa rire heʼi oikuaaseveha Ñandejáragui ha oñepyrũ ostudia la Biblia.

Raúl opredikáma hetaiterei tapichápe folléto Notísia porã opavave tapichakuérape g̃uarã rupive. Oĩ umi oñeʼẽva alemán, armenio, chino, coreano, francés, hindi, inglés, mixe, persa, ruso ha zapotécope. Haʼe heʼi: “Ahecha mbaʼeichaitépa ideprovécho ko folléto japredika hag̃ua. Chepytyvõ ag̃uahẽ hag̃ua che rapichakuéra korasõme nañeʼẽiramo jepe iñidiómape”.

Koʼág̃a rupi heta hetave umi oviaháva térã ováva ótro tetãme, upévare jatopa jepi heta tapicha ambue tetãyguáre. Jaiporúramo folléto Notísia porã opavave tapichakuérape g̃uarã jaikuaaukáta chupekuéra pe marandu porã. Reguerahápa ko folléto resẽ jave?

[Nóta oĩva taʼanga ndive páhina 32]

Raúl oiporu pe folléto oipytyvõ hag̃ua umi tetã ambueguápe