Eipytyvõ ne famíliape oikuaave hag̃ua Jehová organisasión

OIMÉNE umi mitã isrraelíta osẽ mboyve Egíptogui heta mbaʼe oporandu, ojejapótarõ guare priméra Páskua. Pór ehémplo: “Mbaʼére piko ojejuka pe ovecharaʼymi?”, “Mbaʼére piko papa omoĩ tuguy pe okẽ kostádore?”, “Moõ piko jaháta?”. Jehovápe ningo nombopochýi asy umi mitã ombaʼeporandu jave. Ha upéva jahechakuaa heʼírõ guare umi túva isrraelítape mbaʼéichapa ogueromanduʼavaʼerã pe páskua: “Ha peẽme oporandúramo pende raʼykuéra: ‘Mbaʼe piko heʼise ko pejapóva?’ Peje péicha chupekuéra: ‘Kóva hína páskua rehegua mymba juka omboaretéva Ñandejárape g̃uarã, haʼe ohasáramo guare Israelgua róga renonde rupi Egíptope. Ha ojuka Egiptogua rogayguápe,  ore rogayguápe katu ndojukái’” (Éxo. 12:24-27). Upe rire Jehová omomanduʼa tuvakuérape mbaʼérepa ombohovaivaʼerã ifamília oporandu jave umi “mboʼepy ha tembiapoukapy” Haʼe omeʼẽvaʼekuére (Deu. 6:20-25, ÑÑB).

Péicha jahechakuaa Jehová oipota hague umi mitã oikuaa porã mbaʼéichapa omombaʼeguasuvaʼerã chupe. Ha oñembohovái rupi chupekuéra oikuaaséva, ohayhuve Jehovápe ha ohecha haʼeha Ijára ha Isalvadór. Koʼág̃a rupi avei Jehová oipota péicha oñehekomboʼe mitãnguérape. Ha ikatu hag̃uáicha haʼekuéra ohayhu ipyʼaite guive Ñandejára ha Ipuévlope, oñepytyvõvaʼerã chupekuéra oikuaa porãve hag̃ua Jehová organisasión. Avei ontendevaʼerã mbaʼépa ojapo ñanderehehápe ha mbaʼéichapa ikatu oipytyvõ chupekuéra. Jahechamína mbaʼéichapa tuvakuéra ikatu oipytyvõ ifamíliape oikuaa porãve hag̃ua Ñandejára organisasión.

Kongregasión

Umi mitã tekotevẽ oikuaa porã pe kongregasión ohohápe hikuái. Upearã tuvakuéra oguerahavaʼerã chupekuéra káda rreuniónpe. Upéicha okumplíta Jehová omandavaʼekue umi isrraelítape: ‘Pembyaty opavavépe: kuimbaʼe, kuña ha mitãnguérape, ohendu ha oikuaa hag̃ua Ñandejára Ñeʼẽ, ikatu hag̃uáicha okyhyje Jehovágui, ha ojapo hekoitépe haʼe heʼíva. Ha pende raʼykuéra ndoikuaáiva gueteri ohendúta ha ojepokuaáta iñeʼẽrendúvo Jehová pende Járape’ (Deu. 31:12, 13).

Umi mitã oaprendekuaa Jehová Ñeʼẽgui michĩete guive. Apóstol Pablo heʼivaʼekue Timotéope: ‘Ne michĩete guive reikuaa Ñandejára Ñeʼẽ’ (2 Tim. 3:15). Rreunionhápe, umi  mitã michĩvéva jepe ontendéma mbaʼe rehépa oñeñeʼẽ ha oñepyrũma oikuaa umi kántiko. Upépe avei oaprende oiporukuaa hag̃ua la Biblia ha ambue puvlikasión, ha oñangareko hag̃ua koʼã mbaʼére. Avei ohechakuaa opavave omoirũva Crístope ojoayhu añeteha. Jesús heʼivaʼekue voi: “Pejoayhúkena. Ha che pohayhu haguéicha pejoayhu avei peẽ. Peẽ pejoayhúramo opavave ohechakuaáta peẽ haʼeha che remimboʼe” (Juan 13:34, 35). Umi mitã ohechávo Jehová oñangarekoha ikongregasiónre ha ermanokuéra ojoayhuha, katuete oĩséta upépe ha ohechakuaáta akóinte ohovaʼerãha rreunionhápe.

Tuvakuéra, pejepokuaáramo peg̃uahẽ voi Salónpe ha pepytaʼimi opa rire rreunión, pene família ohekáta iñamigorã upépe. Iporãta avei pepresentáramo chupekuéra opaichagua ermáno ha ermánape, tahaʼe imitãva térã ijedáva. Umi ermáno ijedavéva iñarandu ha heta mbaʼéma ombohovái, pene família ohasáramo tiémpo hendivekuéra oaprendéta hetave mbaʼe. La Biblia heʼi Zacarías, peteĩ kuimbaʼe ‘oporohekomboʼéva ojehayhu hag̃ua Ñandejárape’, tuicha oipytyvõ hague Uzíaspe, peteĩ rréi imitãva oisãmbyhyvaʼekue Judá. Upéicha avei umi ermáno heta áñorema oservíva Jehovápe tuicha oipytyvõkuaa umi imitãvape (2 Cró. 26:1, 4, 5). Avei iporãta pehechaukáramo chupekuéra mbaʼéichapa ojeporuvaʼerã biblioteca, umi mbaʼe oñemoĩva tavlérope ha ambue mbaʼe oĩva Salónpe.

Jehová organisasión

Umi mitã oikuaavaʼerã oĩha cien mil kongregasión rasa ko múndo tuichakuére. Pemyesakãvaʼerã chupekuéra mbaʼeichaguápa ko organisasión, mbaʼéichapa oñembaʼapo ipype, mbaʼe mbaʼépa ojejapo ha mbaʼéichapa ikatu haʼekuéra oipytyvõ. Pemombeʼu avei mbaʼérepa peẽ pehaʼarõjoa jepi umi aty guasu peteĩ, mokõi ha mbohapy diagua ha superintendénte de sirkuíto pendevisitáta jave (ehecha pe rrekuádro heʼihápe  “Mbaʼe mbaʼépa ikatu pehesaʼỹijo pestudia vove pende rogayguándi”, oĩva páhina 28-pe).

Ija vove peẽme, peinvita okaru hag̃ua pende rógape umi superintendénte, misionéro, betelita ha ambue ombaʼapóvape de tiémpo kompléto Jehová servísiope. Ani peimoʼã koʼã ermáno naitiempomoʼãiha mitãme g̃uarã. Haʼekuéra ningo oñehaʼãmbaite ohaʼanga Jesúspe ha upévare ohayhu umi mitãme ha oñemongeta hendivekuéra (Mar. 10:13-16). Pene família ohendúramo koʼã ermáno ohasavaʼekue oservívo Jehovápe ha ohechakuaárõ mbaʼéichapa ovyʼa hikuái ojapóvo upéva, ikyreʼỹta avei oservi hag̃ua de tiémpo kompléto.

Mbaʼépa ikatu pejapove pene família oikuaa porã hag̃ua Jehová organisasión? Ikatu pór ehémplo pelee oñondivepa lívro Los testigos de Jehová, proclamadores del Reino de Dios ha pehechauka chupekuéra mbaʼéichapa umi ermáno yma guare ojerovia mbarete, hekomirĩ ha iñeʼẽrendu. Avei pemyesakã chupekuéra mbaʼéichapa Jehová ojevale koʼã ermánore oñemyerakuã hag̃ua pe marandu porã oparupiete. Ikatu avei peiporu umi vidéo pemboʼe hag̃ua chupekuéra heta mbaʼe iñimportánteva oikovaʼekue yma ha oikovahína koʼág̃a. Ha ijáramo peẽme ikatu pevisita Betel pene retãmegua térã oĩva ambue tetãme. Péicha haʼekuéra ontendevéta mbaʼéichapa ombaʼapo Jehová organisasión ko yvy ape ári, ñanesãmbyhy ha omog̃uahẽ hag̃ua ñandéve hiʼupy hiʼoraitépe tembiguái jeroviaha rupive, yma síglo primérope ojejapo haguéicha (Mat. 24:45-47; Hech. 15:22-31).

Pehekomboʼe chupekuéra oikotevẽháicha

Pehekomboʼe vove pene famíliape penemanduʼavaʼerã Jesús ehémplore. Peteĩ jey heʼi hemimboʼekuérape: “Areko gueteri heta mbaʼe haʼevaʼerã peẽme, opáichavo, peẽ koʼág̃a ndaikatumoʼãi gueteri peikuaa mbaʼépa  heʼise” (Juan 16:12, BNP). Jesús ndodesahusiái hemimboʼekuérape, síno saʼi saʼípente ha oikotevẽháicha omboʼe chupekuéra. Peẽ avei tuvakuéra ani pedesahusia pene famíliape, mbeguekatúpente peipytyvõvaʼerã chupekuéra, oikuaa porãve hag̃ua Jehová organisasión. Péro upéva ndeʼiséi sapyʼapyʼánte peñeʼẽvaʼerãha koʼã mbaʼére, síno akóinte pejapovaʼerã upéva. Upéicha oaprendesevéta hikuái ha ovyʼáta oikuaavévo heta mbaʼe kongregasióngui. Ha okakuaavévo ohóvo peipytyvõvaʼerã chupekuéra oikotevẽháicha ha pehesaʼỹijo jey hendivekuéra umi mbaʼe oikuaámava.

Jehová kongregasión tuicha ñanepytyvõ ñamombarete hag̃ua ñande jerovia. Upévare heta imitãva, ombaʼapo kyreʼỹva iservísiope, imbareteve ogueropuʼaka hag̃ua Satanás múndo aña (Rom. 12:2). Tuvakuéra, peipytyvõkena pene famíliape oikuaa porãve hag̃ua Jehová organisasión, upéva katuete penembovyʼáta. Hiʼãite Jehová penderovasa ha oipytyvõ pene famíliape akóinte iñeʼẽrendu hag̃ua chupe ha iñorganisasiónpe.

[Taʼanga ha rrekuádro oĩva páhina 28-pe]

 Mbaʼe mbaʼépa ikatu pehesaʼỹijo pestudia vove pende rogayguándi

Koʼã téma oñeʼẽva Jehová organisasión rehe ikatúta penepytyvõ:

▪ Pemombeʼu arakaʼe ha mbaʼéichapa oñepyrũvaʼekue pene kongregasión. Avei umi Salón peiporuvaʼekue pende aty hag̃ua. Upearã ikatu peinvita peteĩ ermáno ijedávape pene kongregasiongua pestudiáta vove, ombohovái hag̃ua pene família oporandúva.

▪ Pemombeʼu maʼerãpa ojejapo rreunionkuéra ha umi aty guasu, ha mbaʼéichapa ikatu oipytyvõ umi mitãme koʼã mbaʼe.

▪ Pemyesakã porã maʼerãpa ojejapo umi Escuela de Precursor, Galaad, Entrenamiento Ministerial ha umícha. Ha pemombeʼu mbaʼe mbaʼépa ojehupyty umi ermáno ohovaʼekue koʼã eskuélape ojapo porã rupi hembiapo.

▪ Peipytyvõ umi mitãme ontende hag̃ua mbaʼérepa tekotevẽ oiko chuguikuéra puvlikadór ikyreʼỹva predikasiónpe. Pemboʼe chupekuéra mbaʼéichapa ikatu oipytyvõ hikuái hetave hag̃ua pe infórme mundiál osẽva Anuario de los testigos de Jehová-pe.

▪ Pehesaʼỹijo mbaʼe mbaʼépa ikatu ojapo mitãrusu ha mitãkuña ombaʼapo hag̃ua de tiémpo kompléto Jehová organisasiónpe. Petopáta heta informasión oñeʼẽva koʼã mbaʼére lívro Organizados para hacer la voluntad de Jehová kapítulo 10-pe.

▪ Peipytyvõ umi mitãme ontende hag̃ua mbaʼéichapa oñembaʼapo kongregasiónpe. Avei mbaʼérepa akóinte iñeʼẽrenduvaʼerã Jehová organisasiónpe, umi mbaʼe michĩvévape jepe. Pehechauka chupekuéra heta mbaʼe osẽ porãvetaha kongregasiónpe, haʼekuéra iñeʼẽrendúramo ansianokuérape.

[Taʼanga]

Pene famíliape ou porãta ojeheʼáramo umi ermáno ijedávare

[Nóta oĩva taʼanga ndive páhina 26]

Tuvakuéra, umi mitã oporandúramo peẽme Jehová organisasión rehe, pembohovái porãnte chupekuéra, ojapo haguéicha yma umi isrraelíta