‘Máva piko oikuaa Jehová pyʼapy?’

‘Máva piko oikuaa Jehová pyʼapy? Máva piko ikatu omboʼe Ñandejárape? Ñande katu jareko Cristo pyʼapy.’ (1 COR. 2:16, BNP)

1, 2. a) Mbaʼérepa heta vése ijetuʼu ñantende ñande rapichakuérape? b) Mbaʼérepa idiferénte ñandehegui Jehová opensáva?

 HASÝPA ndéve sapyʼánte rentende hag̃ua nde rapicha opensáva? Umi omenda ramóvare pyʼỹi oiko upéva, ha haʼete chupekuéra nontendéiva mbaʼépa ogusta iména térã hembirekópe. Mbaʼérepa? Kuimbaʼe ha kuña ningo tuicha ojoavy oñeʼẽ ha opensa lája. Oĩ lugár umi kuimbaʼe ha kuña oñeʼẽha diferénte ojuehegui orekóramo jepe peteĩ idiómante. Avei ijetuʼu jepi ñantende ñande rapichakuéra tetã ambueguápe térã oñeʼẽva ótro idióma. Hasy voi ñapensa hag̃ua peteĩchapa idiferénte rupi ñane kostumbrekuéra. Upéicharõ jepe, ñañehaʼãramo ikatu ñantende ñande rapichakuérape.

² Ñande yvypóra jepe jajoavýramo umi mbaʼe ñapensávape, koʼýte Ñandejára tuicha idiferénteta ñandehegui. Proféta Isaías rupive Jehová heʼivaʼekue umi Israelguápe: ‘Che napensái peẽ pepensaháicha ha pende rape ndahaʼéi che rapéicha’. Ha ohechauka porãve hag̃ua ko mbaʼe heʼi: ‘Pe yvága ijyvateveháicha yvýgui, upéicha avei che rape ijyvateve pende rapégui, ha che apensáva peẽ pepensávagui’ (Isa. 55:8, 9, ÑÑB).

3. Emombeʼu mokõi mbaʼe jajapovaʼerã jaiko hag̃ua Jehová angirũramo.

³ Heʼisépa upéva ndaikatumoʼãiha voínte ñantende Jehová opensáva? Nahániri! Jepe nañantendemoʼãi opaite mbaʼe haʼe opensáva, Iñeʼẽ heʼi ikatuha jaikuaa porã chupe ha jaiko iñangirũramo (elee Salmo 25:14 ha Proverbios 3:32). Upearã jajapovaʼerã mokõi mbaʼe: ñahesaʼỹijo porã Bíbliape umi párte ohechaukáva mbaʼéichapa Haʼe otrata yvyporakuérape (Sal. 28:5). Ha ambue katu, tekotevẽ jaikuaa “Cristo pyʼapy”. ‘Haʼe ningo pe Ñandejára jahechaʼỹva joguahaite’ (1 Cor. 2:16, BNP; Col. 1:15, JMP). Ñañemotiémporamo jastudia ha jajepyʼamongeta hag̃ua Jehová Ñeʼẽre, ñantendevéta mbaʼeichaguápa haʼe ha mbaʼéichapa opensa.

Mbaʼépa ndovaléi jajapo

4, 5. a) Mbaʼépa ndovaléi ñapensa, ha mbaʼérepa? b) Mbaʼépepa ojavyrakaʼe umi Israelgua?

⁴ Jajepyʼamongeta jave Ñandejára ojapovaʼekuére, ñanemanduʼáke haʼe ndahaʼeiha yvypóra ha ndovaleiha jakopi hese ñaimoʼãgui oĩ vaiha peteĩ mbaʼe ojapóva. Jehová oikuaa upéva ikatuha oiko. Haʼe voi heʼivaʼekue Salmo 50:21-pe (ÑÑB): ‘Reimoʼãneraʼe che ndeichagua’. Ojapo 175 áño peteĩ karai arandu ohesaʼỹijóva la Biblia heʼi hague: “Pyʼỹinte ningo yvyporakuéra okopi Ñandejárare, haʼerõguáicha peteĩ yvypóra, ha avei oipota haʼe okumpli umi léi haʼekuéra omoĩva”.

⁵ Upéicharõ ñañatendevaʼerã ani ñapensa vai Jehováre ndojapói haguére peteĩ mbaʼe ñande jaipotaháicha. Mbaʼérepa iñimportánte upéva? Jastudiávo la Biblia ikatu jajuhu peteĩ mbaʼe Jehová ojapovaʼekue ha haʼetévaicha ñandéve ojavy hague. Péro ñanemanduʼáke ñande ñaneimperfektoha ha ndajaikuaái hetaiterei mbaʼe. Péicha oikovaʼekue umi Israelguáre. Haʼekuéra opensa vai Ñandejárare ha oimoʼã haʼe ndotrataporãiha  chupekuéra. Jahechamína mbaʼépa heʼi Jehová: ‘Peẽ pejéne cherehe ndacherekojojaiha. Ehendúna Israel, peẽ piko peimoʼã che ndacherekojojái? Ndahaʼéipa peẽ hína umi penerembiapo vaíva?’ (Eze. 18:25).

6. Mbaʼépa oaprendevaʼekue Job ikatúva ñanepytyvõ ani hag̃ua ñapensa vai Jehováre?

⁶ Mbaʼépa jajapovaʼerã ani hag̃ua ñapensa vai Jehováre? Tekotevẽ ñanemanduʼa ñande yvypóra ndajaikuaaporãiha heta mbaʼe ha manterei jajavyha. Jahechami mbaʼépa oikovaʼekue Job rehe. Umi provléma ojejapetepárõ guare hese, haʼe oñeñandu vaieterei, ha oñepyrũ opensa ijehénte. Oikuaase mbaʼérepa peichaite peve ohasa asy, ha ndohechakuaái oĩha peteĩ mbaʼe iñimportantevéva. Upémarõ Jehová mborayhúpe oñemoñeʼẽ chupe okambia hag̃ua. Oporandu Jóbpe heta mbaʼe, amo 70 rupi, ha haʼe ndaikatúi ombohovái. Upépe ae Job oaprende oĩha hetaiterei mbaʼe haʼe ndoikuaáiva. Upévare oñemomirĩ ha okambia opensa lája (elee Job 42:1-6).

Mbaʼéichapa ikatu jareko “Cristo pyʼapy”

7. Mbaʼérepa ñahesaʼỹijovaʼerã Jesús rembiasakue jaikuaa hag̃ua Jehová opensáva?

⁷ Jesús ohaʼanga porãiterei vaʼekue Itúvape (Juan 14:9). Upévare tuichaiterei ñanepytyvõta ñahesaʼỹijóramo hembiasakue ñantende hag̃ua Jehová opensáva (Rom. 15:5; Fili. 2:5). Jahechamína la Bíbliape mokõi ehémplo ohechaukáva upéva.

8, 9. Mbaʼépa oikovaʼekue áño 32-pe, hiʼag̃uívo pe Páskua? Ha mbaʼérepa Jesús oporandu Felípepe mbaʼépa ikatu ojejapo?

⁸ Ñepyrũrã jahechami peteĩ mbaʼe oikovaʼekue áño 32-pe, hiʼag̃uívo pe Páskua. Upérõ Jesús remimboʼekuéra oho ramoite opredika Galiléare ha osẽ porã chupekuéra hembiapo, péro ikaneʼõiterei oúvo hikuái. Upévare Jesús ogueraha chupekuéra opytuʼu hag̃ua peteĩ lugár trankilohápe már de Galilea rembeʼýpe, kuarahyresẽ gotyo. Umi hénte oikuaávo ohoha upépe, atyraite oho hendapekuéra. Upémarõ Jesús oñepyrũ omboʼe chupekuéra ha omonguera umi hasývape. Péro upéi umi hénte ivareʼapáma ha mombyry oĩ puévlogui. Moõgui piko oguenohẽta hikuái hembiʼurã? Felipe ningo uperupigua ha upévare Jesús ohenói chupe ha oporandu: ‘Moõgui piko jajoguáta tembiʼu ñamongaru hag̃ua koʼãvape?’ (Juan 6:1-5).

⁹ Mbaʼére Jesús oporandu upéva Felípepe? Ndoikuaái mbaʼe piko mbaʼépa ojapóta? Nahániri. Upéicharõ, mbaʼérepa oporandu upéva? Apóstol Juan oĩvaʼekue avei upérõ ha haʼe omombeʼu: ‘Jesús heʼínte upéicha ohecha hag̃ua mbaʼépa heʼi Felipe. Jesús niko oikuaáma voi upe ojapótava’ (Juan 6:6). Haʼe oikuaasevaʼekue mbaʼéichapa opensa hemimboʼekuéra ha ojeroviápa hese hikuái. Upérõ haʼekuéra ikatúkuri ohechauka imbareteha ijerovia. Péro umi apóstol ndojapói upéva, ha Jesús ohechakuaa haʼekuéra nontendeiha gueteri heta mbaʼe (elee Juan 6:7-9). Upe riremínte Jesús ohechauka chupekuéra ikatuha ojapo heta mbaʼe haʼekuéra oimoʼãʼỹva. Mbaʼépa ojapo? Peteĩ milágro rupive omongaru umi hénte atýpe (Juan 6:10-13).

10-12. a) Emombeʼu mbaʼérepa oiméne ñepyrũrã Jesús nopenái pe kuñakaraíre. b) Mbaʼépa jahecháta koʼág̃a?

¹⁰ Ko mbaʼe oikóva ñanepytyvõ ñantende hag̃ua avei peteĩ mbaʼe Jesús ojapovaʼekue upéi. Omongarupa rire umi héntepe Jesús ha hemimboʼekuéra oho Tiro ha Sidónpe, opytáva nórte gotyo Israélgui. Upépe oñemboja hendápe peteĩ kuñakarai ha ojerure chupe omonguerami hag̃ua imembykuñaʼípe. Ñepyrũrã Jesús nopenái hese, péro pe kuñakarai oiko hapykuéri ha ojerure jey jey chupe. Upémarõ haʼe heʼi: ‘Jahejavaʼerã umi mitã hyguatã raẽ, ndovaléi ningo jaipeʼa umi mitãgui hembiʼu ha ñameʼẽ umi jaguaraʼýpe’ (Mar. 7:24-27, NM).

¹¹ Mbaʼérepa Jesús ojapo péicha pe kuñakaraíre?  Oime piko ohechasénte avei mbaʼeichaite pevépa ojerovia hese, ojapo haguéicha Felipe rehe? La Biblia nomombeʼúi mbaʼéichapa Jesús oñeʼẽ pe kuñakaraípe, péro jaikuaa ndoapoʼíri hague chupe. Ha ndoipotáigui oñeñandu vai ombojoja chupe ‘jaguaraʼýre’. Ñantende hag̃ua Jesús ojapovaʼekue ñapensakuaa peteĩ mitã ojerureha itúvape peteĩ mbaʼe. Pe túva oikuaa porã omeʼẽtaha chupe pe ojeruréva, péro ñepyrurã oñembotavy guaʼu chugui. Maʼerãpa? Oikuaa hag̃ua pe mitã oñehaʼãtapa oñemeʼẽ peve chupe ojeruréva. Oiméne upéicha avei ojapo Jesús, ohecha rire pe kuñakarai ojeroviaha hese omonguera imembykuñaʼípe (elee Marcos 7:28-30).

¹² Koʼã mokõi ehémplo rupive ikatu ñantende porãve “Cristo pyʼapy”. Jahechamína koʼág̃a mbaʼéichapa umi mbaʼe Jesús ojapovaʼekue ñanepytyvõ jaikuaa hag̃ua Jehová opensa lája.

Jehová oñemongeta Moisés ndive

13. Mbaʼérepa tekotevẽ jaikuaa Jesús opensa lája?

¹³ Tekotevẽ jaikuaa Jesús opensa lája, upéichamante hesakã porãvéta ñandéve umi téysto hasýva ñantende hag̃ua. Pór ehémplo, jahechami mbaʼépa oiko umi Israelgua omombaʼeguasúrõ guare pe vakaraʼy raʼanga. Upérõ Jehová heʼi Moiséspe: ‘Ahecha haʼekuéra oikoseha iñakãrente voi. Eheja tahendy che pochy ha tambokusugue chupekuéra, ndehegui katu ajapóta peteĩ tetã guasu’ (Éxo. 32:9, 10).

14. Mbaʼépa heʼi Moisés oikuaávo Jehová ojaposéva?

¹⁴ La Biblia heʼive: ‘Moisés katu oñehaʼã ombopochyjera Jehová Ijárape ha heʼi: “Mbaʼére piko Jehová rehejáta hendy nde pochy ne retãygua rehe, renohẽvaʼekue Egíptogui tuicha pokatu reheve ha pyapy mbaretépe? Mbaʼe piko heʼíta nderehe umi Egiptoygua? Rehejáta piko heʼi neñañágui renohẽ hague chupekuéra ha regueraha mombyry umi sérrore rejuka ha rehapoʼo hag̃ua ko yvy árigui? Eñembyesaráina nde pochy rendýgui ha ani rejapo mbaʼeve ivaíva ne retãygua rehe. Nemanduʼána ne rembiguái Abrahán, Isaac ha Jacob rehe, chupekuéra ningo remeʼẽvaʼekue ne ñeʼẽ erévo: ‘Ambohetáta pene ñemoñare mbyjaita yvagapeguáicha. Ko yvy haʼevaʼekue ameʼẽtaha peẽme, ameʼẽta pene ñemoñarépe imbaʼe teéramo opa árape g̃uarã”’. Ha Ñandejára ombyasy jey upe ojapotavaʼekue ha oheja rei hetãygua rembiapo vaikue’ (Éxo. 32:11-14). *

15, 16. a) Mbaʼe oportunida omeʼẽ Jehová Moiséspe? b) La Biblia heʼi ‘Ñandejára ombyasy jey upe ojapotavaʼekue’, mbaʼépa heʼise upéva?

¹⁵ Añetehápepa Jehová oikotevẽraʼe Moisés  oñemoñeʼẽ chupe? Nahániri! Omombeʼúramo jepe Moiséspe mbaʼépa ojapose, ndeʼiséi odesidíma hague ojapotaha katuete upéva. Jehová otanteánte Moiséspe jahecha mbaʼépa heʼi. Jesús ojapo haguéicha Felipe ha pe kuñakarai rehe, haʼe omeʼẽ chupe oportunida heʼi hag̃ua mbaʼépa opensa. * Jehová ningo omoĩvaʼekue Moiséspe oikuaauka hag̃ua Iñeʼẽ umi Israelguápe ha avei oñeʼẽ hag̃ua umi hénte rehehápe. Ha upérõ haʼe oheja Moiséspe ojapo upe tembiapo. Mbaʼépa ojapóta upéicharõ koʼág̃a Moisés? Ipochýtapa umi Israelguáre? Oaprovechátapa heʼi hag̃ua Jehovápe iporãveha voi omboyke chupekuéra ha oiporavo ifamiliarépe Ipuevlorã?

¹⁶ Moisés heʼíva ohechauka ojeroviaha Jehováre ha oikuaa porãha haʼe ndojapomoʼãiha mbaʼeve hendapeʼỹ. Avei ohechauka nopensaiha ijehénte, síno iñimportanteveha chupe g̃uarã oñemombaʼeguasu Ñandejára réra. Péicha jahecha Moisés oikuaa hague “Ñandejára pyʼapy”, térã opensa lája (1 Cor. 2:16). Mbaʼépa oiko upe rire? Jaikuaaháicha Jehová ndeʼirivaʼekue ohunditaha katuete umi Israelguápe. La Biblia heʼi ‘Ñandejára ombyasy jey upe ojapotavaʼekue’. Evréo ñeʼẽme upéva heʼise Jehová ndojapói hague opensa haguéicha ha ndokastigái umi Israelguápe.

Jehová oñemongeta Abrahán ndive

17. Mbaʼéichapa Jehová ipasiénsia Abrahánre?

¹⁷ Jahechamína avei koʼág̃a mbaʼéichapa Jehová oheja ambue hembiguáipe ohechauka ojeroviaha hese. Haʼe omombeʼu Abrahánpe ohunditaha Sodoma, péro upéva ndogustapái chupe. Jehová ipasiénsia hese ha oheja ombohovái chupe 8 vése voi. Abrahán osẽ heʼi: ‘Nahaʼarõiete ndehegui ko mbaʼe kóva! Rejukáta piko hekopotĩva hekovaíva ndive? Rembojojáta piko hekopotĩva iñañáva ndive? Anichéne rejapóta péicha. Ko yvy ohusgáva piko ojapóta peteĩ mbaʼe hekopeʼỹ?’ (Gén. 18:22-33, ÑÑB).

18. Mbaʼépa ñaaprende Jehovágui oñemongetárõ guare Abrahán ndive?

¹⁸ Mbaʼépa ñanemboʼe ko mbaʼe Jehová opensa lájare? Jaikuaa ningo Jehová noikotevẽiha oporandu raẽ Abrahánpe odesidi hag̃ua mbaʼépa ojapóta. Avei Haʼe ikatúkuri omombeʼu chupe iñepyrũ guive mbaʼérepa ohundíta Sodoma. Péro upéva rangue Jehová ohejánte Abrahán ombohovái chupe ikatu hag̃uáicha ontende mbaʼéichapa Haʼe opensa. Péicha rupi Abrahán ohechakuaa Ñandejára hekojoja ha oporoporiahuverekoha. Jahecha Jehová otrata hague chupe iñirũ teéicha (Isa. 41:8; Sant. 2:23).

Mbaʼépa ñanemboʼe

19. Mbaʼéichapa ikatu ñahaʼanga Jóbpe?

¹⁹ Mbaʼépa ñanemboʼe ‘Jehová pyʼapýgui’ koʼã mbaʼe jahechavaʼekue? Ñaaprende tekotevẽha ñahesaʼỹijo la Biblia ikatu hag̃uáicha ñantende mbaʼéichapa Haʼe opensa. Tuichaiterei jajavýta ñañepyrũramo jataky Jehováre ñaimoʼãgui ojavyha, térã jaipotáramo ojapo opa mbaʼe ñandéve oĩ porãveháicha. Ñapensavaʼerã Job opensa haguéicha.  Haʼe heʼi: ‘Ñandejára ningo ndahaʼéi cheichagua yvypóra ambohovái hag̃ua chupe, térã roho hag̃ua oñondive roñombojovake’ (Job 9:32). Ha ñañehaʼãramo ñantende Jehová opensa lája katuete jaʼéta avei Job heʼi haguéicha: ‘Koʼã mbaʼe ningo saʼi gueteri hína ñamaʼẽrõ opa ojapovaʼekuére. Opa ñahenduvaʼekue ñeʼẽ mbegue reínte. Ava piko oikuaapáne iñeʼẽ ryapu guasu?’ (Job 26:14, ÑÑB).

20. Mbaʼépa jajapóta jatopáramo peteĩ téysto nañantendeporãiva?

²⁰ Mbaʼépa jajapóta nañantendéiramo peteĩ párte jaleéva la Bíbliape, ha koʼýte omombeʼúramo ñandéve mbaʼépa Jehová opensa? Jahekavaʼerã informasión oñeʼẽva upe témare. Péro ni upeichavérõ nahesakãiramo ñandéve, mbaʼépa jajapóta? Umícha jave jahechaukavaʼerã jajeroviaha Jehováre, ha avei ñanemanduʼavaʼerã ndaikatumoʼãiha voínte ñantendepa opa mbaʼe Haʼe ojapóva (Ecl. 11:5). Upéicha ñapensáta Pablo heʼi haguéicha: ‘Ipypukuete ningo Ñandejára mbaʼeta, arandu ha mbaʼekuaa! Ndaikatúi jaikuaapa hape ha hembipota. “Máva piko oikuaa Ñandejára pyʼapy?”. Térã, “máva piko ohekomboʼevaʼekue chupe? Máva piko omeʼẽ ñepyrũ rakaʼe Ñandejárape, ikatu hag̃uáicha Haʼe omyengovia jey chupe?”. Añetehápe opa mbaʼe ou chugui, Haʼe rupi ojejapovaʼekue ha hendápe og̃uahẽ jey vaʼerã. Toñemombaʼeguasu ha tojeguerohory Ñandejárape tapiaite. Taupéicha!’ (Rom. 11:33-36, JMP).

[Nóta]

Nemanduʼápa?

• Mbaʼépa jajapovaʼerã ani hag̃ua jakopi Jehováre ñaimoʼãgui oĩ vaiha peteĩ mbaʼe ojapóva?

• Mbaʼérepa jaikuaavaʼerã Jesús opensa lája oiko hag̃ua ñandehegui Ñandejára angirũ?

• Mbaʼe mbaʼépa ikatu ñaaprende Jehovágui oñemongetárõ guare Abrahán ha Moisés ndive?

[Porandu ñahesaʼỹijóva]

[Nóta oĩva taʼanga ndive páhina 5]

Mbaʼépa ikatu ñaaprende Jehovágui oñemongetárõ guare Moisés ha Abrahán ndive?