Ndépa mbaʼe eréta Jehovápe?

ADÁN ningo heʼivaʼekue Ñandejárape: “[Upe] kuña remeʼẽvaʼekue chéve cheirũrã, omeʼẽ chéve upe yva ha haʼu”. Upémarõ Eva ojecha vai ha osẽ heʼi: “Mbói chembotavýgui haʼu”. Koʼã mbaʼe heʼíva hikuái ohechauka norrekonoséi hague hembiapo vaikue. Ha upe guive koʼag̃aite peve yvyporakuéra osegínte ojapo upéicha (Gén. 3:12, 13).

Jehová okastigárõ guare Adán ha Évape naiñeʼẽrendúi haguére, ohechauka ndoguerohorýi hague haʼekuéra heʼíva (Gén. 3:16-19). Péro heʼisépa upéva Ñandejára nohendumoʼãiha ñamombeʼuséramo chupe mbaʼérepa ndajajapói ojeruréva ñandéve? Térãpa oĩ vése ñanentendetaha? Ha oiméramo upéicha, mbaʼéicha javépa ñanerendu? Jahechamína mbaʼéichapa ikatu ñambohovái koʼã porandu.

Ikatu ningo ñamombeʼu mbaʼérepa jajapo peteĩ mbaʼe, térã mbaʼérepa ndajajapopái ỹrõ ndajajapoiete voi oñemandáva ñandéve. Ikatu avei ñamombeʼu jajapovaʼekue jaipotágui ótro ñaneperdona. Péro sapyʼánte ikatu jaʼe peteĩ mbaʼe ñamoʼãséguinte jajapo vaíva, Adán ha Eva ojapo haguéicha. Opáichavo koʼã tiémpope jahecha hetave oĩha omoʼãva hembiapo vai norrekonoseséi rupi.

Upévare ñande kristianokuéra jajesareko porã vaʼerã jaservívo Ñandejárape, ‘ani hag̃ua ñañembotavy ñandejupe voi’ (Sant. 1:22). Jahechamína koʼág̃a umi téysto ha ehémplo oĩva la Bíbliape ñanepytyvõtava ‘jaikuaa ha jajapo hag̃ua umi mbaʼe ombovyʼátava Ñandejárape’ (Efe. 5:10, ÑÑB).

Mbaʼépa ohaʼarõ Jehová ñandehegui?

Ñandejára omoĩmbaite Iñeʼẽme opa mbaʼe oipotáva ojapo isiervokuéra. Umíva apytépe Jesús heʼivaʼekue hemimboʼekuérape síglo primérope: ‘Peipytyvõ umi hénte opa tetãyguápe oiko hag̃ua chuguikuéra che remimboʼe’; ko tembiapo ñande koʼag̃aite peve ñakumplivaʼerã (Mat. 28:19, 20, NM). Apóstol Pablo ohechauka avei iñimportantetereiha upéva heʼírõ guare: ‘Tajererekóke namoherakuãiramo pe marandu porã’ (1 Cor. 9:16).

Upéicharamo jepe oĩ tapicha heta tiémporema ostudiáva la Biblia ha ndojedesidíri gueteri osẽ opredika (Mat. 24:14). Ótro katu ojapo ko tembiapo ha upe rire oheja rei. Mbaʼépa heʼi jepi koʼã tapicha? Mbaʼérepa nokumplíri Jehovándi? Jahechamína mbaʼépa ojapovaʼekue Jehová ambue hembiguaikuéra heʼírõ guare ndaikatumoʼãiha ojapo Haʼe omandáva.

Mbaʼéicha javépa Ñandejára nohendúi jaʼéva

“Ijetuʼueterei ningo.” Oĩ oimoʼãva arakaʼeve ndaikatumoʼãiha opredika, ha koʼýte iñotĩ mbaʼéramo. Péro Jonás ehémplo katuete oipytyvõta chupekuéra ombohovái hag̃ua ko situasión. Jahechamína mbaʼérepa. Jehová heʼi Jonáspe oho hag̃ua Nínivepe omomarandu upe táva oñehunditaha katuete, péro upe tembiapo omongyhyje chupe, mbaʼérepa? Nínive ningo Asiria táva guasu, ha opavavénte oikuaa haʼekuéra ipyʼahatãha ha oñemboharaiha iñenemigokuéra  rehe. Oiméne katuete pe proféta oñeporandu: “Mbaʼe piko ojehumíta chéve aháramo upépe? Ha oikóramo cherehe ivaíva?”. Upévare, haʼe oho rangue Nínivepe osẽ oho ótro ladoite. Péro Jehová ndoguerohorýi Jonás ojapovaʼekue, upévare heʼi jey chupe oho hag̃ua omomarandu umi Niniveyguápe. Upe rire Jonás pyʼaguasúpema ojapo Ñandejára heʼi hagueichaite, ha Haʼe ohovasa hembiapo (Jon. 1:1-3; 3:3, 4, 10).

Repensáramo ijetuʼuetereitaha ndéve repredika, nemanduʼavaʼerã Jesús heʼi hague ‘Ñandejára ikatuha ojapo opa mbaʼe’ nepytyvõ hag̃ua (Mar. 10:27, NM). Upévare, ejerure memékena chupe tanepytyvõ, ha Haʼe katuete nemombaretéta. Enterovéva ñañehaʼãvaʼerã ñandepyʼaguasu ikatu hag̃uáicha Jehová ñanderovasa (Luc. 11:9-13).

“Nachekyreʼỹi ajapo hag̃ua.” Mbaʼépa ikatu rejapo nanekyreʼỹiramo reservi porã hag̃ua Jehovápe? Nemanduʼavaʼerã Jehová ikatuha opoko ne korasõre ha nemokyreʼỹ. Apóstol Pablo ohaivaʼekue: “[Ñandejára] voi ningo omoheñoihína pendepype hembipota porã ha haʼe omongakuaa hembipota pende rekovépe pejapopa peve haʼe oipotáva guive” (Fili. 2:13, ÑÑB). Péicha jahechakuaa Jehová ikatuha ñanemokyreʼỹ jaservise hag̃ua chupe. Rréi David ojerurevaʼekue avei: “Chemboguatamína nde hustísia [rapére]” (Sal. 25:4, 5, ÑÑB). Upéicharõ, jajerure meme vaʼerã Jehovápe tañanemomýi jajapo hag̃ua chupe ogustáva.

Péro sapyʼánte ñanekaneʼõitereígui térã ñanekangy rupi jajeovligámante jaha hag̃ua rreunionhápe térã ñasẽ hag̃ua predikasiónpe. Heʼise piko upéva ndajahayhuiha Jehovápe ñande pyʼaite guive? Nahániri, Ñandejára siervokuéra yma guarépe ijetuʼuvaʼekue avei ojapo hag̃ua Jehová rembipota. Pór ehémplo, apóstol Pablo heʼivaʼekue: ‘Añehaʼãmbaite ajoko che rete heta mbaʼégui’ (1 Cor. 9:26, 27). Ñañehaʼãmbaitéramo jajapo porã pe tembiapo Jehová omeʼẽva ñandéve, Haʼe katuete ñanderovasáta, oikuaágui jajapoha upéva jahayhúgui chupe. Avei upéicha ikatúta jahechauka Satanás ijapu hague heʼírõ guare yvyporakuéra omboyketaha Jehovápe ojecha vaíramo (Job 2:4).

“Nachetiémpoi.” Oĩramo oimoʼãva naitiempoieteha osẽ hag̃ua opredika, tekotevẽterei opensa mbaʼépa omotenondehína hekovépe. Jesús heʼivaʼekue mbaʼépa iñimportanteve vaʼerã ñandéve g̃uarã: ‘Pemotenonde meméke Ñandejára rréino’ (Mat. 6:33, NM). Mbaʼépa jajapovaʼerã ñakumpli hag̃ua upéva? Noiméipa tekotevẽ hína ñamboyke heta mbaʼe ñande rekovépe? Ikatúpa ñasẽve predikasiónpe, jaiko rangue umi vyʼarã rapykuéri hoʼuetereíva ñane tiémpo? Umi vyʼarã térã ambue mbaʼe jajapóva hendapaite hína, ani jaʼétei ndaikatuiha jaservi porã Ñandejárape ha jaiko jaiporu vaipa ñane tiémpo. Opavave oservíva Jehovápe omotenondevaʼerã Hembipota.

 “Che ningo ndavaléi ajapo hag̃ua upéva.” Oiméramo reimoʼã nandekatupyryiha remyerakuã hag̃ua pe marandu porã, repensantevaʼerã Jehová rembiguaikuéra yma guarére. Heta ehémplo jatopa la Bíbliape ohechaukáva ñandéve haʼekuéra oimoʼã hague avei ndaikatumoʼãiha ojapo porã Jehová omandáva chupekuéra. Pór ehémplo Jehová ojerurérõ guare Moiséspe ojapo hag̃ua peteĩ tembiapo, haʼe ombohovái: “Ái, che Jára, yma guive koʼág̃a peve, che nañeʼẽporãi ha nacheñeʼẽsyryrýi”. Ñandejára heʼíramo jepe oipytyvõtaha chupe, Moisés heʼi jey: “Emondóna ambue kuimbaʼépe [ojapo hag̃ua] ko tembiapo” (Éxo. 4:10-13, ÑÑB). Mbaʼépa ojapo Ñandejára upémarõ?

Ñandejára ndeʼíri Moiséspe ohejánte hag̃ua upe tembiapo, síno oiporavo Aarónpe oipytyvõ hag̃ua chupe (Éxo. 4:14-17). Avei oikove aja omeʼẽ chupe opa mbaʼe oikotevẽva ojapo porã hag̃ua hembiapo ha akóinte oĩ hendive. Koʼág̃a rupi avei Jehová ikatu omomýi heta ermáno ikatupyrývape, ñanepytyvõtava ñamyerakuã hag̃ua pe marandu porã. Ha iñimportanteveha katu, Iñeʼẽme heʼi ñanembokatupyrytaha jajapo porã hag̃ua ko tembiapo omeʼẽva ñandéve (2 Cor. 3:5; ehecha pe rrekuádro heʼihápe: “Ndavyʼáiva upeichaite peve”).

“Chembopochy ojejapóva cherehe.” Oĩ nosẽvéiva predikasiónpe térã ndohovéiva rreunionhápe, ótro ermáno ojapógui peteĩ mbaʼe ombopochýva chupe. Jaikuaaháicha  koʼã mbaʼe ikatu ñanemoñeñandu vai, péro mbaʼéichapa oñeñandúta Jehová jahejáramo ñande servísio upe haguérente? Ñapensamína Pablo ha Bernabé kásore. Oiméne katuete opyta oñembyasy hikuái “tuicha ojoavy” rire (Hech. 15:39, BNP). Péro nosẽvéipa omyerakuã Ñandejára marandu upe haguérente? Ni mbaʼeveichavérõ.

Ñanemanduʼavaʼerã ñane ermáno ndahaʼeiha ñane enemígo sapyʼánte ñañandu rupi ofallaha ñanendive, síno Satanás hína upe ñanerundiséva. Upévare ani jahejátei ogana, ‘ñañemoĩ mbarete guei hese ñande jerovia rupive’ (1 Ped. 5:8, 9; Gál. 5:15). Aníkena ñanderesarái, jajeroviáramo Ñandejárare ñande pyʼaite guive ikatúta ñambohovái porã koʼãichagua situasión (Rom. 9:33).

Mbaʼéicha javépa Jehová ñanentende

Jahecha haguéicha la Bíbliape, Jehová ndoipotái jaheja rei ñande servísio. Péro oĩ vése ontendeha mbaʼérepa japredika saʼive. Pór ehémplo ikatu jaguereko ambue rresponsavilida henondépe oiporuvéva ñane tiémpo, térã ikatu avei ñanekaneʼõiterei ỹrõ ñanderasykatúgui ndaikatuvéi jaservi chupe ñande jajaposeháicha. Umícha jave ñanembopyʼaguapy Ñandejára Ñeʼẽ, heʼi rupi Jehová ohechakuaaha jaserviseha chupe ñande pyʼaite guive ha ontendeha moõite pevépa ikatu jajapo iservísiope (Sal. 103:14; 2 Cor. 8:12).

Upévare ani ñahaʼarõiterei ñandejehegui, ni ñande rapichakuéragui. Upéva rangue jajepyʼamongetavaʼerã apóstol Pablo heʼivaʼekuére: “Máva piko nde reñeʼẽ hag̃ua pe ambuépe g̃uarã ombaʼapóvare? Opyta porã térã opyta vaírõ, upéva oikuaa ijára” (Rom. 14:4). Jaiko rangue ñañembojoja ótro ermánore, ñanemanduʼavaʼerã peteĩteĩ jajechataha Ñandejára ndive (Rom. 14:12; Gál. 6:4, 5). Ha ñañemboʼe jave Jehovápe, ñamombeʼuvaʼerã chupe ñane situasión pyʼapotĩ reheve (Heb. 13:18).

Javyʼaiterei jaservívo Jehovápe

Opavave ikatu javyʼa jaservívo Ñandejárape tahaʼe haʼéva ñane situasión. Jaikuaa ningo ikatuha jajerovia hese, ndojeruremoʼãigui ñandéve ikatuʼỹva jajapo. Mbaʼérepa jaʼe upéva?

Ñandejára Ñeʼẽ heʼi ñandéve: “Oikotevẽva oñembojárõ nerendápe, ani rejere chugui. Ikatúramo, eipytyvõ chupe” (Pro. 3:27). Jahechakuaápa heʼiha “ikatúramo”? Mbaʼépa upéicharõ Jehová ohaʼarõ ñandehegui? Haʼe ningo ojerure ikatúva ñande jajapo, ndahaʼéi jajapo hag̃ua ótro ojapoháicha. Upévare, ñameʼẽramo Jehovápe heta térã saʼi, ikatúnte avei jajapo ñande servísio ñane ánga ruguaite guive (Luc. 10:27; Col. 3:23).

[Taʼanga ha rrekuádro oĩva páhina 14-pe]

 “Ndavyʼáiva upeichaite peve”

Ani ñaimoʼã ndaikatumoʼãiha jaservi porã Jehovápe ñanderasykatu térã ñaneotĩetereíramo. Peteĩ ermáno Canadaygua hérava Ernest ohechauka ñandéve nañapensaivaʼerãha upéicha. Jahechamína mbaʼépa ikatu ñaaprende iñehémplogui.

Ernest ningo ndaikatuivaʼekue oñeʼẽ porã ha iñotĩeterei. Peteĩ jey ogolpea vai ilómo ha ndaikatuvéi ombaʼapo konstruksiónpe. Péro chupe g̃uarã upéva peteĩ oportunida opredikave hag̃ua. Haʼe ohendu jepi oñemokyreʼỹha rreunionhápe opa ikatúvape ojapo hag̃ua iprekursorádo auxiliar. Koʼã mbaʼe opoko ikorasõre, péro haʼe ndojeroviái ijehe ha heʼi ndaikatumoʼãiha ojapo.

Ha ohechauka hag̃ua ijupe voi ndaikatumoʼãiha ojapo iprekursorádo auxiliar, otantea un més. Noimoʼãiramo jepe, ohupyty porã umi óra ojejeruréva; péro opensa: “Aikuaa porã ajapo jeýramo che prekursorádo auxiliar ndaikatumoʼãveimaha ahupyty umi óra ojejeruréva”. Upémarõ omyenyhẽ ótra solisitu ha okumpli porã jey upe tembiapo.

Ernest ojapo iprekursorádo auxiliar un áño pukukue. Péro opensa: “Aikuaa porã ndaikatumoʼãiha ajapo pe prekursorádo rregulár”. Upémarõ otantea, ha ovyʼaiterei ojapo haguére un áño upe servísio. Upéi vyʼapópe osegi jey ojapo dos áño aja iprekursorádo rregulár, péro upe rire imbaʼasy ojuka chupe. Omano mboyvemi, Ernest hesay pororopa heʼívo umi ohóvape ovisita chupe: “Ahasa porãiterei aservírõ guare Jehovápe de prekursór. Ndavyʼáiva upeichaite peve”.

[Nóta oĩva taʼanga ndive páhina 13]

Anítei jaheja mbaʼeve ñandejoko japredika hag̃ua

[Nóta oĩva taʼanga ndive páhina 15]

Jehová ovyʼa jajapóramo opa ikatúva jaservi hag̃ua chupe ñande pyʼaite guive