Jehová hína pe Mburuvicha Guasu Ijojahaʼỹva

‘Jehová hína pe Mburuvicha Guasu Ijojahaʼỹva ha ipoguýpe añemoʼã.’ (SAL. 73:28, NM)

1. Mbaʼe rehépa oñeʼẽ Pablo 1 Corintios 7:31-pe?

 APÓSTOL Pablo heʼivaʼekue: ‘Koʼã yvy arigua ohasa ohóvo’ (1 Cor. 7:31, BNP). Upérõ amalisia Pablo ombojoja umi mbaʼe oikóva ñande jerére peteĩ dráma térã teátrore. Ko múndo haʼete peteĩ esenário ohasahárupi ohóvo umi aktór orrepresentáva ivuéno térã iñañávape oikoháicha jepi peteĩ drámape.

2, 3. a) Mbaʼe rehépa ikatu ñambojoja Satanás ojapóva opuʼãrõ guare Jehová goviérnore? b) Mbaʼe porandúpa ñambohováita?

² Ñane tiémpope oiko avei peteĩ dráma térã teátro, ha pévape oike enterove yvypóra. Ko drámape ojehecháta Jehová añoiteha pe Mburuvicha Guasu Ijojahaʼỹva. Ko situasión jahasavañaína ikatu ñambojoja peteĩ tetãre oĩháme mokõi grúpo oñorairõva. Peteĩvape oĩ pe goviérno añeteguáva, ojapóva opa mbaʼe hekoitépe. Ambue grúpope katu oĩ umi opuʼãva pe goviérno añeteguáre. Koʼãva ojapo heta mbaʼe vai, oiko iñakãre, oporombotavy ha oporojuka. Ko grúpo peteĩ pelígro pe goviérnope g̃uarã. Ha umi hénte oikóva pe tetãme odesidivaʼerã oñemoĩtapa pe goviérno añetegua ykére térãpa nahániri.

³ Mbaʼérepa jaʼe ko univérsope oikoha avei péicha? Ñepyrurã oĩ rupi peteĩ goviérno añetegua oisãmbyhýva pe Mburuvicha Guasu Ijojahaʼỹva Jehová (Sal. 71:5). Péro Satanás omoakã avei peteĩ grúpo ojapóva heta mbaʼe vai ha ombohasa asýva yvyporakuérape (1 Juan 5:19). Satanás organisasión opuʼã mbarete Ñandejára goviérnore. Ha yvyporakuéra odesidivaʼerã oñemoĩtapa pe Mburuvicha Guasu Ijojahaʼỹva poguýpe. Mbaʼéichapa oñepyrũvaʼekue ko mbaʼe? Mbaʼérepa Jehová oheja oiko péicha? Mbaʼépa tekotevẽ ñande jajapo?

Mbaʼépa oñepresenta ko drámape

4. Mbaʼépa oñepresenta ko drámape?

⁴ Ko drámape oñepresenta mokõi mbaʼe iñimportantetereíva: orekópa Ñandejára derécho ñanesãmbyhývo ha iñeʼẽrendútapa chupe yvyporakuéra. La Bíbliape oñehenói Jehovápe ‘Mburuvicha Guasu Ijojahaʼỹva’. Pór ehémplo peteĩ salmísta heʼi: ‘Jehová hína pe Mburuvicha Guasu Ijojahaʼỹva ha ipoguýpe añemoʼã’ (Sal. 73:28, NM). Mbaʼépa heʼise Mburuvicha Guasu Ijojahaʼỹva? Upéicha  ojeʼe peteĩ omandapaitéva ha ipoderosovévape. Aje piko opyta porãite ñahenói Jehovápe péicha (Dan. 7:22).

5. Mbaʼérepa Jehová añoite haʼe pe Mburuvicha Guasu Ijojahaʼỹva?

⁵ Jehová ojapo opaite mbaʼe oĩva ko univérsope, upévare haʼehína pe Mburuvicha Guasu Ijojahaʼỹva (elee Revelación 4:11). Haʼe avei Hués, Léi meʼẽha ha Rréi, upévare ndaipóri tuichavéva chugui (Isa. 33:22). Jehová omeʼẽ ñandéve ñande rekove ha ñadepende hese jasegi hag̃ua jaikove. Upévare tekotevẽ jahechakuaa Jehová añoiteha pe Mburuvicha Guasu Ijojahaʼỹva ha ñadefende isãmbyhy. Ha upearã tuicha ñanepytyvõta akóinte ñanemanduʼáramo ko salmo heʼívare: ‘Ñandejára omohenda hatã iguapyha yvágape ha irréino oisãmbyhy opa mbaʼe ojapóva’ (Sal. 103:19, ÑÑB; Hech. 4:24).

6. Mbaʼeichaguápa pe iñeʼẽrendu ha hekopotĩva?

⁶ Ñadefendeséramo Jehová sãmbyhy, tekotevẽ ñaneñeʼẽrendu ha ñanderekopotĩ. Mbaʼépa heʼise upéva? Job ohechauka haguéicha, iñeʼẽrendu ha hekopotĩva ningo hekojoja, oiko porã opavavéndi ha oservi Jehovápe ipyʼaite guive (Job 1:1).

Mbaʼéichapa oñepyrũ pe dráma

7, 8. Mbaʼéichapa Satanás otaky Jehová sãmbyhýre?

⁷ Ojapo seis mil áño rupi peteĩ ánhel opuʼã Jehová rehe ha otaky isãmbyhýre. Ko ánhel ojaposégui haʼe heʼívante ha oipotágui oñemombaʼeguasu chupe, heʼi Jehová ndorekoiha derécho oisãmbyhývo. Upévare ombotavy Adán ha Évape omboyke hag̃ua pe Mburuvicha Guasu Ijojahaʼỹvape. Avei omongyʼase Jehová réra porãite heʼívo hese ijapuha (elee Génesis 3:1-5). Upe ánhel añágui oiko Ñandejára enemígo tuichavéva. Upe rire oñehenói chupe Satanás, Aña ruvicha, mbói ypykue ha mymba ñarõ. Upéicha ojeʼe chupe oñemoĩ rupi Ñandejárare ha oñeʼẽ vai hese, avei oñehaʼãgui ombotavy ha ohundi Jehová siervokuérape (Rev. 12:9).

⁸ Upéicha Satanás opuʼã Jehová goviérnore. Mbaʼépa ojapóta Jehová? Ohundítapa chupe upepete voi Adán ha Eva ndive? Añetehápe, Jehovápe hembypa puʼaka ojuka hag̃ua mbohapyvévape. Ojapórire upéicha ohechaukavaʼerãmoʼã haʼeha Ñandejára ipuʼakapáva, ha ndaijapúi hague heʼírõ guare Adán ha Évape omanotaha ndojapóiramo haʼe heʼíva. Upéicharõ, mbaʼérepa ndojukái chupekuéra?

9. Mbaʼépa ontendeukasevaʼekue Satanás?

⁹ Japúpe Satanás ombotavy Adán ha Évape ha omboyke chupekuéra Ijapoharégui. Upéicha ontendeukase Jehová ndorekoiha mbaʼérepa ojerurévo yvyporakuérape iñeʼẽrendu hag̃ua chupe. Avei Satanás omboligávo ñande tuvakuéra ypykuépe opuʼã hag̃ua Jehováre, ohechaukase ikatutaha oguenohẽ enterovépe Ñandejára rapégui. Satanás ojopy vaírõ guare Jóbpe ohechaukase upéva, péro haʼe hekopotĩ ha iñeʼẽrendu tapiaite Jehovápe (Job 2:1-5).

10. Mbaʼérepa Jehová upepete voi nosolusionaivaʼekue pe provléma?

¹⁰ Jehová nosolusionáivo upepete pe provléma omeʼẽ tiémpo Satanáspe ohechauka hag̃ua añetépa upe heʼivaʼekue. Ha avei omeʼẽ enterove yvypórape oportunida ohechauka hag̃ua oñemoĩtapa Jehová goviérno ykére. Mbaʼépa oiko upe guive? Satanás omoakãhína peteĩ organisasión aña tuichaitereíva, oñemoĩ mbaretéva Ñandejárare. Péro Jehová ohundíta Satanáspe ha opa umi omoirũvape chupe, péicha ohechauka porãta haʼe añoiteha Mburuvicha Guasu Ijojahaʼỹva. Jehová oikuaamavaʼekue voi katuete osẽ porãtaha, upévare oñepuʼãrõ guare hese Edénpe heʼíma mbaʼépa ojapóta oñekumpli hag̃ua hembipota (Gén. 3:15).

11. Mbaʼéichapa heta yvypóra odefende Jehová sãmbyhy?

¹¹ Heta yvypóra ohechaukamavaʼekue ijerovia ojepytasóvo Ñandejára goviérno ykére ha oipytyvõ oñemomarangatu hag̃ua Jehová réra. Umíva apytépe oĩ Abel, Enoc, Noé, Abrahán, Sara, Moisés, Rut, David, Jesús ha umi kristiáno ypykue. Ha ñane tiémpope avei oĩ heta kuña ha kuimbaʼe hekopotĩ ha iñeʼẽrendúva Jehovápe. Upéicha odefendévo Jehová sãmbyhy  ohechauka Satanás ijapuha. Ha hekopotĩ rupi hikuái oipytyvõ oñemopotĩ hag̃ua Jehová réra Satanás omongyʼavaʼekue heʼívo omboyketaha oimeraẽvape Jehová rapégui (Pro. 27:11).

Jehová katuete osẽ porãta

12. Mbaʼérepa jajerovia Jehová koʼẽrõitéma ohunditaha umi oñemoĩvape hese?

¹² Koʼẽrõitéma Jehová ohechaukáta haʼe añoiteha pe Mburuvicha Guasu Ijojahaʼỹva. Mbaʼérepa jajerovia ojapotaha upéva? Ñepyrũrã, haʼe ndohejamoʼãi opa árare ojejapo mbaʼe vai. Avei umi mbaʼe oikóvare jahechakuaa jaikomaha ára pahápe. Yma Jehová ohundimavaʼekue voi umi iñañávape oguerúrõ guare pe ama guasu Noé tiémpope, ohundírõ guare Sodoma ha Gomórrape, faraón egiptopegua ha ijehérsitope. Ndaipuʼakái avei Jehováre Sísara soldadokuéra ni Senaquerib pe mburuvicha Asiriaygua soldádo (Gén. 7:1, 23; 19:24, 25; Éxo. 14:30, 31; Jue. 4:15, 16; 2 Rey. 19:35, 36). Upévare, ikatu jaʼe Jehová ni mbaʼevéicharõ ndohejamoʼãiha opa árare oñemongyʼa héra ha ojepersegi isiervokuérape. Avei umi mbaʼe oikóvare ojekuaa porãiterei Jesucristo ogovernamaha ha og̃uahẽtamaha huʼãme ko múndo aña. Koʼẽrõitéma Jehová ohundíta umi oñemoĩvape hese (Mat. 24:3).

13. Mbaʼépa jajapovaʼerã ndajaipotáiramo Jehová ñanerundi iñenemigokuéra ndive?

¹³ Ndajaipotáiramo Jehová ñanerundi iñenemigokuéra ndive, tekotevẽ jahechauka jajepytasoha igoviérno ykére. Mbaʼéichapa ikatu jajapo upéva? Ndajajeheʼaivaʼerã Satanás organisasiónre ha ani jaheja ñanemongyhyje umi omoirũva chupe (Isa. 52:11; Juan 17:16; Hech. 5:29). Péicharõmante jahechaukáta Jehová añoite orekoha derécho ñanesãmbyhývo ha nañamanomoʼãi haʼe omopotĩ vove héra. Upévo opavave ohecháta haʼeha pe Mburuvicha Guasu Ijojahaʼỹva.

14. Mbaʼe mbaʼépa omombeʼu la Biblia?

¹⁴ La Bíbliape oñepyrũ guive opa peve jatopa informasión iñimportánteva oñeʼẽva yvypórare ha Jehová sãmbyhýre. Umi tres kapítulo oĩva oñepyrũvo la Biblia omombeʼu mbaʼéichapa Ñandejára ojapovaʼekue opa mbaʼe ha mbaʼéichapa oñepyrũ pe pekádo. Ha umi tres kapítulo oĩva opakuévo katu omombeʼu yvyporakuéra oĩ porã jeytaha Jehová ndive. Upéi umi ótro kapítulo omombeʼu mbaʼépa ojapóta Ñandejára okumpli hag̃ua oprometevaʼekue yvyporakuérape ha ko univérsope g̃uarã. Upéicha jahecha Génesis oñepyrũvo omombeʼuha mbaʼépa ojapo Satanás ha mbaʼéichapa pe pekádo oike ko múndope. Ha Revelación opakuévo omombeʼu Jehová omyatyrõtaha opa mbaʼe oĩ vaíva, ohundíta Satanáspe ha ojejapóta Jehová rembipota ko yvy ape ári yvagapeguáicha. Añetehápe la Biblia omyesakã porã mbaʼérepa oĩ pekádo ha ñemano ha mbaʼéichapa opáta pe dráma. Avei heʼi umi iñeʼẽrendúva Jehovápe oikotaha vyʼápe opa ára g̃uarã peteĩ múndo pyahúpe.

15. Mbaʼépa jajapovaʼerã jahupyty hag̃ua umi mbaʼe porã Jehová oguerútava?

 ¹⁵ Oiko potaitéma hína peteĩ mbaʼe tuichaiterei okambiátava ko múndo. Pe teátro og̃uahẽma ohóvo huʼãme, pe kortína oñemboty potaitéma opa hag̃ua pe dráma ymaitéma oñepyrũvaʼekue. Upévo oñembotuicháta Jehová sãmbyhy, oñemosẽta Satanáspe esenáriogui ha upéi opytáta tesaráipe. Péicha oñekumplíta Jehová rembipota! Jahupytyséramo umi mbaʼe porãita Jehová oguerútava, tekotevẽ koʼág̃ama jajepytaso Jehová goviérno ykére. Aníkena ñandepyʼamokõi, ñañemoĩramo añoite Jehová ykére ikatúta jaʼe: ‘Ñandejára oĩ chendive’ (Sal. 118:6, 7).

Ikatu jajepytaso Jehová sãmbyhy ykére!

16. Mbaʼérepa jaʼe ikatuha jajepytaso Jehová sãmbyhy ykére?

¹⁶ Añetehápe, ikatu jajepytaso Jehová sãmbyhy ykére ha ñaneñeʼẽrendu chupe. Apóstol Pablo ohai: ‘Umi jepyʼaraʼã oúva pende ári ou avei opavave yvypóra ári. Peẽ pejeroviakuaa Ñandejára rehe, haʼe ndohejamoʼãi ojehu peẽme mbaʼeve ikatuʼỹvaʼerã pegueropuʼaka. Pejepyʼaraʼã vove Ñandejára penepytyvõta pegueropuʼaka hag̃ua, ha ohechaukáta peẽme mbaʼéichapa pesẽvaʼerã’ (1 Cor. 10:13, BNP). Mbaʼeichagua jepyʼaraʼãpa ikatu jahasa ha mbaʼéichapa Jehová ñanepytyvõ jagueropuʼaka hag̃ua?

17-19. a) Mbaʼe ñuhãpepa hoʼarakaʼe umi Israelgua? b) Mbaʼérepa jaʼe ikatuha ñaneñeʼẽrendu Jehovápe?

¹⁷ Ikatu avei, yma oiko haguéicha umi Israelguáre pe desiértope oñepresenta ñandeve peteĩ situasión ikatúva ñandegueraha vai nañañatendéiramo (elee 1 Corintios 10:6-10). Umi Israelgua ikatúkuri ogueropuʼaka umi jepyʼaraʼã, péro ou itaryrýi hikuái ‘oipotágui mbaʼe vai’. Upéva oiko Jehová omeʼẽrõ guare chupekuéra codorniz hoʼu hag̃ua un més aja. Arémaramo jepe ndoʼuvéi hikuái soʼo oiko porãnte avei kuri Jehová omeʼẽgui chupekuéra heta mana. Péro omeʼẽmaramo chupekuéra soʼo, itaryrýi hikuái ha ombyaty mbyatyve umi guyraʼi (Núm. 11:19, 20, 31-35).

¹⁸ Ha upe mboyvéma voi Jehová omeʼẽrõ guare Moiséspe iléi mónte Sinaípe, umi Israelgua ojapo peteĩ vakaraʼy raʼanga, omombaʼeguasu chupe ha hekovai henondépe. Ko ñuhã ijetuʼuvaʼekue chupekuéra ombohovái hag̃ua Moisés ndaipóri rupi hendivekuéra (Éxo. 32:1, 6). Upe rireve oike mboyvemi pe yvy oñeprometevaʼekuépe heta kuimbaʼe Israelgua iñakãraku umi kuña Moabguáre ha hekovai hendivekuéra. Ha upe mbaʼe vai ojapo haguére omano hikuái (Núm. 25:1, 9). Avei heta vése oimeraẽ mbaʼére ojekeha hikuái. Peteĩ jey ndahaʼéi Moisés rehe añónte oñeʼẽ vaíva, amo ipahápe Jehovárema voi otaky hikuái (Núm. 21:5). Ivaiveha katu ojeplagea hikuái ojejuka haguére umi tekove ñeʼẽrenduʼỹme, Core, Datán, Abirám ha umi omoirũvape chupekuéra. Ha upe haguére Jehová ojuka 14.700-pe (Núm. 16:41, 49).

¹⁹ Koʼã mbaʼe ohasavaʼekue umi Israelgua ikatuvaʼerãmoʼã ogueropuʼaka, péro ou ndojeroviavéi hikuái Jehováre ha hesarái mbaʼéichapa haʼe oñangarekovaʼekue hesekuéra. Umi jepyʼaraʼã ombohovaivaʼekue umi Israelgua ndahaʼéi mbaʼeve ipyahúva, opavave yvypóra ombohovái voínte umi mbaʼe. Ha jaʼekuaa umi ñuhã koʼág̃a upeichanteha avei. Upévare ñande ñañehaʼãmbaitéramo jagueropuʼaka ha jajeruréramo Jehovápe ñanepytyvõmi hag̃ua, ikatúta ñaneñeʼẽrendu chupe. Jaikuaa porã ‘Ñandejára ndohejamoʼãiha’ jahasa mbaʼeve ‘ikatuʼỹvaʼerã jagueropuʼaka’. Jehová  arakaʼeve nañanderejareimoʼãi, ndohejaichéne jahasa peteĩ situasión ijetuʼuetereíva ndaikatumoʼãiva ñaaguanta (Sal. 94:14).

20, 21. Mbaʼéichapa Jehová ñanepytyvõ ‘ñasẽ hag̃ua’ jejopy vaígui?

²⁰ Mbaʼéichapa Jehová ñanepytyvõ ‘ñasẽ hag̃ua’ jejopy vaígui? Ñanemombaretévo jagueropuʼaka hag̃ua. Pór ehémplo, jajepersegi jave ikatu ñane enemigokuéra ñandetrata vai oipotágui ñamboyke Jehovápe. Ha upéicha jave ikatu ñamboykese ñande jerovia ani hag̃ua jaipoʼo térã jakyhyjégui ñamanórõ g̃uarã. Péro Pablo ohai haguéicha 1 Corintios 10:13-pe, Ñandejára heʼi umi mbaʼe vai jahasáva sapyʼamitanteha. Jehová ndohejamoʼãi arakaʼeve jahasa peteĩ mbaʼe ndaikatumoʼãiva jagueropuʼaka. Haʼe ikatu omombarete ñande jerovia ñamombaʼeguasu hag̃ua chupe añoite.

²¹ Jehová ijespíritu rupive ñanepytyvõ, ñanemomanduʼa umi mbaʼe ñahesaʼỹijovaʼekuére la Bíbliape, ikatúva ñanemombarete jagueropuʼaka hag̃ua opa mbaʼe (Juan 14:26). Upéicha rupi nañasẽi Jehová rapégui. Avei jaikuaa Satanás otaky hague mokõi mbaʼére: Ñandejára sãmbyhýre ha yvyporakuérare. Heta kristiáno ontende porã rupi ko mbaʼe ha Jehová oipytyvõ rupi chupekuéra iñeʼẽrendu omanoite peve. Upéicharõ, mbaʼéichapa Jehová ‘oguenohẽvaʼekue’ koʼã ermánope jejopy vaígui? Ndahaʼéi ohejávo omano, síno omombaretévo chupekuéra ijespíritu rupive iñeʼẽrendu hag̃ua ipahaite peve. Péicha Jehová ikatu ñanepytyvõ enterovépe. Upearã haʼe ojevale avei anhelkuérare, koʼãva hína ‘espíritu ojejokuáiva oipytyvõ hag̃ua umi ojesalvátavape’ (Heb. 1:14, BNP). Pe ótro artíkulope jahecháta ikatuha jajapo peteĩ mbaʼe iporãitereíva, ñadefende Jehová sãmbyhy opa árare. Péro upearã ñanderekopotĩvaʼerã ha ñaneñeʼẽrendu Jehovápe ñande pyʼaite guive ha jahechakuaa haʼeha pe Mburuvicha Guasu Ijojahaʼỹva.

Mbaʼépa ñambohováita?

• Mbaʼérepa Jehová añoite haʼe pe Mburuvicha Guasu Ijojahaʼỹva?

• Mbaʼeichaguápa pe iñeʼẽrendu ha hekopotĩva?

• Mbaʼérepa jajerovia Jehová koʼẽrõitéma ohunditaha umi oñemoĩvape igoviérnore?

• Mbaʼéichapa 1 Corintios 10:13 ohechauka ikatuha jajepytaso Jehová goviérno ykére?

[Porandu ñahesaʼỹijóva]

[Nóta oĩva taʼanga ndive páhina 24]

Satanás ombotavy Adán ha Évape omboyke hag̃ua Jehovápe

[Nóta oĩva taʼanga ndive páhina 26]

Jajepytasókena Jehová goviérno ykére