Jehová ndohejareíri umi ikangývape

RRÉI Salomón heʼivaʼekue opavavépe katuete ñanderupytyha umi mbaʼe ñahaʼarõʼỹva (Ecl. 9:11). Ikatu peteĩ desgrásia térã peteĩ provléma ijetuʼúva okambiaite ñande rekove. Pór ehémplo japyta vaieterei omanóramo ñane hénte; oĩ voi semána térã mésere oñembyasýva ha ndoikuaáiva mbaʼépa ojapóta. Ha heta vése ndaikatúi ni oñemboʼe Jehovápe.

Upéicha jave ñaikotevẽ peteĩ ñanemokyreʼỹva ha ohechaukáva ñandéve ñanentende ha ñanderayhuha. David opuraheivaʼekue kóicha: “Ñandejára ojoko umi hoʼávape, ikangývape omopuʼã jey” (Sal. 145:14). Ótro hendápe la Biblia heʼi avei ñande Ru yvagapegua omaʼẽha “opa mbaʼe ko yvy ári ojehúvare, oipytyvõ hag̃ua umi hese añetehápe ojeroviávape” (2 Cró. 16:9). Ha Ñandejára voi heʼi: “Aiko ikaneʼõva ha ojepyʼapýva ndive, amokyreʼỹ jey hag̃ua umi ikaneʼõva ha oñemomirĩvape” (Isa. 57:15, ÑÑB). Péro mbaʼéichapa haʼe oipytyvõ ha okonsola umi ikangývape?

“Ñeʼẽ hekoitepegua ha hiʼoraitépe”

Jehová ningo oiporu heta mbaʼe ñanemombarete hag̃ua, umíva apytépe oĩ kongregasión. La Biblia heʼi ‘ñamokyreʼỹvaʼerãha umi ikangývape’ (1 Tes. 5:14, BNP). Ñandejára siervokuéra ikatu ombopyʼaguapy umi ohasa asy ha ikangývape, ohechaukávo ohayhu ha ojepyʼapyha hesekuéra. Ha koʼýte oipytyvõta chupekuéra umi mbaʼe heʼíva peteĩ ohasámava upeichagua situasiónre térã peteĩ amígo oikuaámava heta mbaʼe. Jehová ningo ojevale koʼã mbaʼére omokyreʼỹ jey hag̃ua umi ndovyʼavéivape.

Jahechamína ohasavaʼekue peteĩ ansiáno hérava Alex. Haʼe omenda riremi hembireko ou hasyete ha omano. Oikuaávo upéva, peteĩ superintendénte ipyʼaporãitereíva oho hendápe ombopyʼaguapymie hag̃ua chupe. Ko ermáno rembireko omanovaʼekue avei, péro haʼe omenda jey. Heʼi Álexpe heta vése ikangy hague ha ndoikuaái mbaʼépa ojapóta. Omombeʼu oĩrõ guare ermanokuérandi predikasión térã rreunionhápe ikyreʼỹ hague, péro og̃uahẽ jeývo hógape oñeñandu jey haʼeño peteĩ. Alex heʼi: “Tuicha chembopyʼaguapy aikuaa rire ndahaʼeiha che añónte ahasáva ko situasiónre”. Jahechaháicha “pe ñeʼẽ hekoitepegua ha hiʼoraitépe” tuicha  ombopyʼaguapy ha okonsola umi ohasa asývape (Pro. 15:23, ÑÑB).

Ótro ansiáno oikuaáva heta ermáno viúdo ha ermána viúdape, oho Alex rendápe omokyreʼỹ hag̃ua chupe. Oñemoĩ ilugárpe ha ohechauka chupe Jehová oikuaaha mbaʼépa oñandu ha oikotevẽ. Haʼe heʼi: “Mése térã áño rire reñandúramo reikotevẽ jeyha ne irũrã, ani nderesarái Jehová heʼiha ikatuha remenda jey remendaséramo”. Upéicharamo jepe naentéroipe osẽ upéva. Ojepyʼamongetávo ko ermáno heʼivaʼekuére, Alex omombeʼu: “Sapyʼánte apensa amenda jeýramo atraisionataha che rembireko térã Jehovápe. Upévare chembopyʼaguapy oĩramo chemomanduʼáva ikatu jeyha amenda” (1 Cor. 7:8, 9, 39).

Ñanemanduʼamína rréi David rehe, haʼe ningo heta ohasa asy vaʼekue, péro peteĩ jey ohai: ‘Ñandejára omaña umi hekopotĩva rehe, haʼe ojapysaka porã imbaʼejerure asy rehe’ (Sal. 34:15, ÑÑB). Upéicharõ, jajeroviakuaa Jehová katuete ohenduha umi oñeñandu vaietereíva ñemboʼe ha ombohovaiha chupekuéra itiempoitépe. Upearã heta vése ojevale umi ermáno ikatupyry ha ipyʼaporãvare. Aje piko javyʼaite péicha ñanepytyvõ haguére!

Umi rreunión tuichaiterei ñanepytyvõ

Umi kristiáno oñedeprimíva heta vése opensa vaipáma ha upéicha rupi ikatu oñemomombyry hapichakuéragui. Upévare Proverbios 18:1 heʼi porã: ‘Umi oñemomombyrýva ijehénte opensa ha ipochy oĩramo oñemoñeʼẽva chupe’. Alex orrekonosevaʼekue: “Omanóramo ne rembiayhu nerepensaporãvéima voi. Che pyʼỹinte añeporandumivaʼekue: ‘Ikatu piko raʼe ajapo porãve heta mbaʼe? Ikatúne piko atrata porãve térã antendevéraʼe chupe?’ Avei naimeseveimavaʼekue cheaño ni nañeñandusevéima upéicha. Ára ha ára chemanduʼa aimeha cheaño, ha ijetuʼueterei chéve aipeʼa hag̃ua che akãgui koʼã mbaʼe”.

 Ñañeñandu vaieterei jave koʼýte ñaikotevẽ ñande rapicha ñanemokyreʼỹvaʼerãre, ha Salón del Rréinope katuete jatopáta upéva. Avei upépe ñahendu heta mbaʼe porã Ñandejára omboʼéva ha tuicha ñanemokyreʼỹva.

Umi rreunión ñanepytyvõ jahechakuaa hag̃ua opa mbaʼe hekoitépe. Jajepyʼamongetávo umi téysto vívlikore ñanderesarái sapyʼami jepe ñane mbaʼembyasýgui ha jajesareko umi mbaʼe iñimportantevévare. Pór ehémplo Jehová añoite oguerekoha derécho ñanesãmbyhývo ha héra oñemomarangatuvaʼerãha. Avei ñanembareteve ñanemanduʼáramo Jehová ontendeha ñañandúva, ótro ndohechakuaáiramo jepe ñaĩ vaietereiha térã nontendeporãiramo upe jahasáva. Jehová oikuaa ‘ipyʼapýpe oñembyasýva ikangyha’, upévare oipytyvõse koʼãichaguápe (Pro. 15:13, ÑÑB). Jahechakuaáramo koʼã mbaʼe ñanembaretevéta ñambohovái porã hag̃ua ñane situasión (Sal. 27:14).

Rréi David ohasa asyetereírõ guare ojepersegi haguére, ipyʼaite guive heʼi Ñandejárape mbaʼéichapa oñeñandu: “Nameʼẽvéima niko ha pyʼatarovápe aiko” (Sal. 143:4). Ojehu haguéicha Davídpe umi provléma jahasáva ikatu ñanemokangy, nañanembovyʼavéi ha ñanemoangekói. Péro Jehová katuete ñanepytyvõta ñaaguanta hag̃ua peichahágui jajúramo ñanderasy, jaguerekórõ voi peteĩ mbaʼasy ndaikatúivagui jakuera térã jahasáramo oimehaichagua provléma (Sal. 41:1-3). Jepeve koʼág̃a nañanemongueramoʼãi peteĩ milágro rupive, ikatu ñanemoarandu ha ñanemombarete ñambohovái hag̃ua upe situasión. David oñeñandu vaietereírõ guare oñemoag̃uivaʼekue Jehováre, haʼe heʼi: ‘Chemanduʼa umi ára yma guare rehe ha opaite nerembiapokue rehe’ (Sal. 143:5, ÑÑB).

Koʼã mbaʼe Jehová omoĩkavaʼekue Iñeʼẽme, ohechauka porã ñandéve ontendeha ñañandúva ha ohenduha ñane ñemboʼe. Jahejáramo ñanepytyvõ “haʼe oñangarekóta ñanderehe” (Sal. 55:22).

“Peñemboʼe mante”

Santiago 4:8-pe heʼi: “Peñemboja [Ñandejárare] ha haʼe oñembojáta penderehe”. Upéva jajapo hag̃ua ñañemboʼevaʼerã chupe. Apóstol Pablo ñanemokyreʼỹ voi: “Peñemboʼe mante” (1 Tes. 5:17, BNP). Sapyʼánte ndaikatúiramo ñamombeʼu porã Jehovápe mbaʼéichapa ñañeñandu, “pe espíritu sánto voi ojerure ñanderehe pyahẽ reheve ojekuaaʼỹva ñeʼẽme” (Rom. 8:26, 27, BNP). Jahechakuaa upéicharõ Jehová ontendeha ñañandúva.

Pór ehémplo, peteĩ ermána hérava Monika omombeʼu: “Añemboʼe, alee ha astudia rupi la Biblia añemoag̃uive Jehováre ha areko chupe che amigoitéramo. Añandu oĩha che ykerete ha ohechaukaha chéve che raperã. Chembopyʼaguapy aikuaávo haʼe chentendeha, ndaikatúiramo jepe amombeʼu porã chupe añandúva. Haʼe ningo ipyʼaporã ha ñanderayhueterei”.

Jahejákena ñane ermanokuéra tañanembopyʼaguapy ha tohechauka ñandéve ñanderayhuha. Ñahendúkena umi konsého iporãva ha ñanemokyreʼỹva oñemeʼẽva ñandéve rreunionhápe ha ñañemboʼe Jehovápe ñande pyʼaite guive. Ñanemanduʼáke péicha Jehová ohechaukaha ñanderayhuha. Opensávo umi mbaʼe ohasavaʼekuére Alex omombeʼu: “Jehová heta hendáicha ñanepytyvõ ñamombarete hag̃ua ñande jerovia. Jaaprovecháramo koʼã mbaʼe Ñandejára omeʼẽta ñandéve ‘ipuʼaka guasuete’ ha péicha ikatúta ñambohovái oimehaichagua provléma” (2 Cor. 4:7, BNP).

[Taʼanga ha rrekuádro oĩva páhina 18-pe]

Mbaʼépa oipytyvõkuaa umi ikangývape

Heta salmo ohechauka mbaʼeichaitépa ikatu oñeñandu vai Ñandejára siervokuéra ombohovái jave iprovléma. Avei omombeʼu Jehová katuete ohenduha ojerure asy jave hikuái. Upéva ohechauka porã koʼã salmo:

“Vaípe ajecha ha Ñandejárape asapukái. Chupe ajerure chepytyvõ hag̃ua. [Itémplo] guive cherendu, ijapysápe og̃uahẽ che remiandu.” (Sal. 18:7 [18:6, NM].)

“Ñandejára oñemboja umi ohasa asýva rehe ha oguenohẽ umi ikangývape jejopy vaígui.” (Sal. 34:19 [34:18, NM].)

‘Jehová omonguera umi ojepyʼapyetereívape ha ojokua chupekuéra ijerída.’ (Sal. 147:3, NM.)

[Nóta oĩva taʼanga ndive páhina 17]

“Pe ñeʼẽ hekoitepegua ha hiʼoraitépe” tuicha omokyreʼỹ umi ikangývape