Mitãrusu, aníkena reheja ndegueraha vai ne irũnguéra

‘Pene ñeʼẽ ijukyvaʼerã peikuaa hag̃ua mbaʼépa pejéta peteĩteĩme ombaʼeporandúramo peẽme.’ (COL. 4:6)

1, 2. Mbaʼéicha rupípa oikose iñirũnguéraicha heta mitãrusu?

 OIMÉNE katuete rehendúva mbaʼéichapa heta mitãrusu ojopy hapichápe ojapo hag̃ua peteĩ mbaʼe ivaíva, ha mbyky oikóma voi upéva nderehe. Mbaʼéichapa reñeñandu upéicha jave? Ikatu repensa Cristofer, orekóva 14 áño opensaháicha. Haʼe heʼi: “Aikese yvyguýpe mbaʼe, térã aikosénte umi che irũnguéraicha ani hag̃ua avave opena cherehe”.

² Oguapýpa nderehe umi mbaʼe heʼíva térã ojapóva umi mitãrusu nde javegua? Oiméramo upéicha, mbaʼérepa ojehu ndéve upéva? Noiméipa reipota haʼekuéra ndeguerohory? Upéva ndaivaíri katuete. Umi kakuaa jepe oipota hapichakuéra omombaʼe chupe. Tahaʼe mitã térã kakuaa ndajaipotái avave ñanemboyke. Péro oĩ peteĩ mbaʼe oikótava katuete: rejaposéramo pe iporãva, naentéroi ndeguerohorýta. Jesús rehe oikovaʼekue upéva: oĩ omoirũva chupe, ha avei heta oĩ ndaijaʼéiva hese ha orekóva chupe “mbaʼevérõ” (Isa. 53:3). Upéicharamo jepe haʼe akóinte ojapo iporãva.

Ñane irũnguéra ikatu ipuʼaka ñanderehe

3. Mbaʼérepa tuicha rejavýta rejapóramo ne irũnguéra oipotávante?

³ Heta vése repensáta ikuentaveha rejapónte ne irũnguéra oipotáva ani hag̃ua okopi nderehe hikuái. Aníke rejapo upéva, cháke tuichaiterei rejavýta rehejáramo haʼekuéra ipuʼaka nderehe. Nemanduʼákena  umi oservíva Jehovápe ndahaʼeiha ku mitãicha ‘ojeguerotyryrýva ágotyo pégotyo’ (Efe. 4:14, ÑÑB). Ndahasyirasa ñamboliga peteĩ mitãme ojapo hag̃ua oimeraẽ mbaʼe. Péro nde ndahaʼevéima mitã. Ha rehechakuaáramo Jehová heʼíva iporãveha ndéve g̃uarã, ani rehejátei avave ndejoko neñeʼẽrendu hag̃ua chupe. Ndete redesidivaʼerã mbaʼépa rejapóta (Deu. 10:12, 13). Rehejáramo haʼekuéra ipuʼaka nderehe, rejoguáta peteĩ muñekoʼípe orekóva hikuái ipópe ha ojapóta ojaposéva oñembosarái hag̃ua nderehe (elee 2 Pedro 2:19).

4, 5. a) Mbaʼéicha javépa umi isrraelíta ojapouka Aarónpe peteĩ mbaʼe vai, ha mbaʼépa ñanemboʼe upéva? b) Mbaʼéichapa ne irũnguéra ikatu ojapouka ndéve peteĩ mbaʼe vai?

⁴ Jahechamína mbaʼépa oikovaʼekue Aarón rehe, Moisés ermáno. Peteĩ jey haʼe oheja iñirũnguéra isrraelíta ogueraha vai chupe. Haʼekuéra ojapouka chupe peteĩ taʼanga omombaʼeguasu hag̃ua hikuái. Ikatúpa jaʼe Aarón ikangýgui ojapo hague upéva? Nahániri. Katuete nemanduʼáne haʼe pyʼaguasúpe omoirũ hague Moiséspe oñeʼẽ hag̃ua faraónpe, ha omombeʼu chupe Ñandejára marandu. Péro koʼág̃a katu ipuʼaka hese iñirũnguéra isrraelíta. Ipahápe ningo Aarón okyhyjeve chuguikuéra. Ajépa ijetuʼuete sapyʼánte ñandejopy jave ñande rapichakuéra jajapo hag̃ua haʼekuéra oipotáva (Éxo. 7:1, 2; 32:1-4).

⁵ Jahecha haguéicha ko ehémplo rupive, enterovépe ikatu ñandegueraha vai ñane irũnguéra, ndahaʼéi umi imitãvapente, térã ikangýva ha oikoséva ko múndope ojeikoháicha. Avei ojopy umi ndeichaguápe, oñehaʼãmbaitéva ojapo iporãva. Ojapouka hag̃ua ndéve peteĩ mbaʼe vai, ne irũnguéra ikatu ndeapoʼi, oñembohory ha otaky nderehe. Tahaʼe haʼéva upéva hasy jepi jagueropuʼaka. Upéicharõ jepe, resẽ porã hag̃ua rejeroviavaʼerã nde pyʼaite guive Ñandejára Ñeʼẽre.

‘Pejepyʼamongeta pehecha hag̃ua peime hatãpa pende jeroviápe’

6, 7. a) Mbaʼérepa tekotevẽ reguerovia la Biblia heʼíva iporãveha ndéve g̃uarã, ha mbaʼépa rejapovaʼerã upearã? b) Mbaʼe mbaʼépa ikatu reñeporandu remombarete hag̃ua nde jerovia?

⁶ Ndépa reguerovia oĩ porãha la Biblia heʼíva ha ideprovechoha umi léi omoĩva Ñandejára? Tekotevẽ reguerovia ndepuʼaka hag̃ua ne irũnguérare (elee 2 Corintios 13:5). Mbaʼérepa? Rejeroviáramo koʼã mbaʼére pyʼaguasúpe redefendéta Ñandejára heʼíva neotĩramo jepe (2 Tim. 1:7, 8). Péro nderegueroviapáiramo katu ijetuʼúta ndéve rembohovái  ne irũnguérape nembaretéramo jepe. Upévare, iporãta rehesaʼỹijo Ñandejára Ñeʼẽ ikatu hag̃uáicha ndete voi rehecha añetépa upe heʼíva ipype. Upearã tekotevẽ restudia umi mbaʼe iñimportantevéva. Pór ehémplo, nde reikuaa Ñandejára oĩha ha avei heta tapicha ojeroviaha hese. Ha koʼág̃a eñeporandumi: “Mbaʼére piko che aguerovia oĩha Ñandejára?”. Iporã rejepyʼamongeta koʼã mbaʼére, ndahaʼéi ndepyʼamokõi hag̃ua. Nde ningo remombaretese nde jerovia Ñandejárare. Eñeporandumína avei: “Mbaʼérepa aguerovia la Biblia ouha Ñandejáragui?” (2 Tim. 3:16). “Mbaʼérepa aikuaa jaikomaha umi ‘ára pahápe’?” (2 Tim. 3:1-5.) “Mbaʼérepa haʼekuaa asẽ porãtaha cheñeʼẽrendúramo Jehovápe?” (Isa. 48:17, 18.)

⁷ Ikatu rekyhyje rejepyʼamongeta hag̃ua koʼã mbaʼére reimoʼãgui ndaikatumoʼãiha rembohovái. Péro péicha rejapóramo haʼete ku remaneháva rehóvo peteĩ kóche ha neremañaséiva mboýpa oreko kombustívle rekyhyjégui saʼírõ g̃uarã. Ajépa ndevyroiténe! Tekotevẽ ningo rehecha ikatu hag̃uáicha rekarga ofaltáramo. Péicha avei rehechamavaʼerã mbaʼépepa nekangyve ha reñehaʼã remombareteve nde jerovia (Hech. 17:11).

8. Mbaʼépa rejapovaʼerã reguerovia hag̃ua iporãveha reñemomombyry tekovaígui?

⁸ Jahechami peteĩ ehémplo. La Biblia heʼi: ‘Peñemomombyrýke tekovaígui’. Epensamína: “Mbaʼérepa oĩ porã ko konsého? Mbaʼérepa hekovai umi che irũnguéra? Mbaʼéicha rupípa la Biblia heʼi ‘umi ojeitýva tekovaípe ijehe voi ojapoha ivaíva’?” (1 Cor. 6:18). Upéi ejepyʼamongeta: “Mbaʼépa iporãvéta ajapo? Mbaʼépe piko ideprovéchota chéve cherekokyʼáramo?”. Iporãta avei reñeporandu: “Mbaʼépa oikóne ajapóramo che irũnguéra ojapóva?”. Ikatu haʼekuéra ndeguerohory, péro mbaʼéichapa reñeñandúta upéi reime vove nde tuvakuérandi térã umi ermáno apytépe Salónpe? Mbaʼe továre piko reñemboʼéta Jehovápe? Añetehápepa remboykese chupe reipotáguinte ne irũnguéra ndeguerohory?

9, 10. Mbaʼépa nepytyvõta rembohovái hag̃ua ne irũnguérape?

⁹ Koʼág̃a ndetuichavévo rehóvo ndekatupyryvéma ymaguarégui, ha ikatúma repensa porã mbaʼépa rejapóta (elee Romanos 12:1, 2). Upévare iporã koʼág̃a rejepyʼamongeta rehecha hag̃ua mbaʼérepa reservi Jehovápe. Péicha imbaretevéta nde jerovia. Ha ág̃a ne irũnguéra ndejopy jave rejapo hag̃ua peteĩ mbaʼe vai, upepete voi reikuaáta mbaʼéichapa rembohovaivaʼerã ha nderekyhyjemoʼãi chuguikuéra. Reñeñandúta ko mitãkuñáicha heʼivaʼekue: “Ndahejái che irũnguéra ipuʼaka cherehe. Ahechauka chupekuéra mbaʼeichaguápa che. Ndaiporúi che rrelihión peteĩ téraichante. Ahechauka upéva che rekovépe umi mbaʼe apensáva, agueroviáva, ha ahupytysévare”.

¹⁰ Añetehápe ijetuʼu ñandepuʼaka ñane irũnguérare ha jajapo pe iporãva (Luc. 13:24). Ha oiméne heta vése reñeporandu maʼerãpa peichaite peve reñehaʼãvaʼerã. Péro nemanduʼákena ko mbaʼére: rehechaukáramo retĩha umi mbaʼe regueroviávare téra rembyasyha ndaikatúi haguére rejapo heta mbaʼe, ne irũnguéra pyaʼeterei ndepilláta ha koʼýte ojopýta nendive. Ha rehechaukáramo rejerovia mbareteha katu, pyaʼe nderejáta hikuái (embojoja Lucas 4:12, 13-re).

‘Ejepyʼamongeta raẽ rembohovái hag̃ua’

11. Mbaʼérepa iporãta rejepreparáramo rembohovái hag̃ua ne irũnguérape?

¹¹ Avei tekotevẽ reikuaa mbaʼépa eréta ne irũnguérape ani hag̃ua ipuʼaka nderehe (elee Proverbios 15:28). Rejecha vai mboyve repensamavaʼerã mbaʼépa ikatu oiko ha rejeprepara rembohovái hag̃ua. Upéva nepytyvõta  rejehekýi hag̃ua heta provlémagui. Pór ehémplo, epensamína reguataha rehóvo ha rehecha sapyʼa nde raperãme oĩha ne kompañerokuéra opitavahína. Oikuaveʼẽnepa ndéve isigarríllo? Mbaʼépa rejapokuaa? Proverbios 22:3 heʼi: “Oikokuaáva ohecha yvykua ha ojere chugui”. Upéicharõ iporãvéta rejerénte ha reho ambue tapérupi ani hag̃ua rejotopa hendivekuéra. Péicha rehechauka nearanduha, ndahaʼéi ndepyʼajuha.

12. Mbaʼépa ikatu rejapo ijetuʼúramo rembohovái hag̃ua oñeporandúva ndéve?

¹² Péro mbaʼépa rejapóta ndaikatúiramo rejehekýi chuguikuéra ha rembohovaimantevaʼerã? Epensamíntena ojeʼeha ndéve: “Nde piko vírhen gueteri? Anichéne!”. Mbaʼépa eréta chupe? Upéicha jave rejapovaʼerã Colosenses 4:6 heʼíva: ‘Pene ñeʼẽ ijukyvaʼerã peikuaa hag̃ua mbaʼépa pejéta peteĩteĩme ombaʼeporandúramo peẽme’. Upéva heʼise rembohovái porã vaʼerãha ha ndovaleiha neñeʼẽ pohýi. Heʼiháicha ko téysto, rehecha raẽ vaʼerã mbaʼérepa oñeporandu ndéve reikuaa hag̃ua mbaʼéichapa rembohováita. Reiko rangue remyesakã atyraite téysto oĩva la Bíbliape, iporãvéta eréramo chupe kyhyjeʼỹme ha ontende hag̃uáicha: “Si, ha mbaʼe oreko upéva”, térã “Maʼerãtepa reikuaase umíva”.

13. Mbaʼe mbaʼépa rehechavaʼerã rembohovái hag̃ua ne irũnguérape?

¹³ Rejapokuaa avei Jesús ojapo haguéicha. Haʼe ohechakuaárõ natekotevẽiha omyesakãiterei peteĩ mbaʼe, ombohovái mbykymínte térã okirirĩnte, ojapo haguéicha Herodes rehe (Luc. 23:8, 9). Sapyʼánte ningo iporãve voi rekirirĩnte oñeporandu jave ndéve peteĩ mbaʼe nemoĩ vai hag̃uánte (Pro. 26:4; Ecl. 3:1, 7). Péro mbaʼépa rejapóta rehechakuaáramo ne irũ pyʼaporãme oporandu hague? Heʼi vaíramo jepe ndéve, oiméne ndoikuaaporãinte mbaʼérepa nde ndereikói haʼekuéraicha (1 Ped. 4:4). Umícha jave reaprovechavaʼerã ha remyesakã chupe mbaʼépa heʼi la Biblia koʼã mbaʼére. Ha ani rekyhyje ‘rembohovái hag̃ua oĩramo oporandúva ndéve’ umi mbaʼe regueroviávare (1 Ped. 3:15).

14. Mbaʼéichapa ikatu reiporu ne irũ heʼíva rembohovái hag̃ua chupe?

¹⁴ Sapyʼánte ikatu avei reiporu hesekuéra pe oporandúva ndéve. Anínte rembopochy chupekuéra. Pór ehémplo, peteĩ ne irũ nemboligáramo repita hag̃ua, nde erekuaa chupe: “Che grásias. Nde piko repita? Chéngo ajeroviákuri nderehe nderejapomoʼãiha koʼã vyrorei”. Upéicharõ, reiko rangue rembohovái chupe, haʼeháma ojepyʼamongetavaʼerã mbaʼérepa opita. *

15. Mbaʼéicha javépa ikuentave reho, ha mbaʼérepa?

¹⁵ Ha nanderejáiramo hikuái ni upeichavérõ? Ikuentave reho upégui. Repyta arevéramo  hendivekuéra, koʼýte ndejopýta rejapo hag̃ua ivaíva ha ikatuhína ipuʼaka nderehe hikuái. Upéva ndeʼiséi ndepyʼajuha. Nemanduʼáke nde ndepuʼakaha hesekuéra, nderehejái heʼi ndéve mbaʼépa rejapovaʼerã, ha hiʼarive rembovyʼa Jehovápe (Pro. 27:11).

Ojepyʼamongetáva ‘rembiapo osẽ porã katuete’

16. Mbaʼéichapa ikatu ndejopy mbaʼe vairã umi mitãrusu heʼíva ijehe kristianoha?

¹⁶ Sapyʼánte kongregasiónpe oĩ avei mitãrusu ojapoukaséva ndéve mbaʼe vai. Epensamíntena ojejapotaha peteĩ fiésta ermáno rógape ha neinvita hikuái reho hag̃ua. Reg̃uahẽvo rehecha mitãrusu memete ha ndaipóri ni peteĩ kakuaa oñatendevaʼerã. Térã katu rehecháma voi oĩha oguerúva vevída ha peẽ penemitãiterei gueteri peʼu hag̃ua umíva. Mbaʼépa rejapóta? Péicha jave ndete redesidivaʼerã. Ha oiméramo reikuaa porã mbaʼépa heʼi Ñandejára Ñeʼẽ, upéva nepytyvõta rejapo hag̃ua pe iporãva. Peteĩ mitãkuña testígo omombeʼu: “Che ha che ermána roho sinehápe ambue ermanokuéra ndive. Péro upe pelíkulape ojeporu hetaiterei ñeʼẽ kyʼa ha upévare rosẽ roho upégui. Ore tuvakuéra oreguerohory rojapo haguére upéva. Umi ótro katu opytánte ohechapa ha upéi heʼi orerehe roheja vaiha chupekuéra”.

17. Rehótaramo peteĩ fiéstape, mbaʼépa nepytyvõta ani hag̃ua rejapo peteĩ mbaʼe naiporãiva?

¹⁷ Rehecháma haguéicha, rehendúramo nde pyʼapy ñeʼẽ heʼíva ikatu repyta vai nde javeguakuérandi. Upéicharõ jepe rejapovaʼerã pe iporãva. Upearã rejepreparavaʼerã. Rehótaramo peteĩ fiéstape tekotevẽ reikuaa mbaʼépa rejapóta oikórõ peteĩ mbaʼe naiporãiva. Heta mitãrusu heʼíma voi ituvakuérape ohenoitaha chupekuéra oho hag̃ua ipiári oiméramo oiko upéicha (Sal. 26:4, 5). Heʼiháicha la Biblia, ojepyʼamongetáva ‘rembiapo osẽ porã katuete’ (Pro. 21:5).

‘Evyʼákena nemitã aja’

18, 19. a) Mbaʼérepa erekuaa Jehová oipotaha revyʼa? b) Mbaʼépa omeʼẽta ndéve Jehová rembohováiramo ne irũnguérape?

¹⁸ Jehová ndeapovaʼekue revyʼa hag̃ua tapiaite (elee Eclesiastés 11:9). Ikatu repensa umi ne irũnguéra kolehiopegua ovyʼaha, péro upéva hína ‘vyʼa sapyʼamiguánte oguerúva tembiapo vai’ (Heb. 11:25). Ñandejára katu oikuaveʼẽ ndéve vyʼa opaveʼỹva ha ndaipóri iporãvéva upévagui. Upévare, rejapose jave peteĩ mbaʼe Jehová ndoguerohorýiva nemanduʼákena rejapóramo haʼe heʼíva katuete resẽ porãtaha.

¹⁹ Amo ipahápe, mbaʼépepa ideprovéchota ndéve rejapóramo ne irũnguéra oipotáva? Mbaʼevépe. Koʼẽrõite haʼekuéra ni nde rérare naimanduʼamoʼãvéima. Péro reñehaʼãmbaitéramo ani hag̃ua ndegueraha vai hikuái, Jehová ohechakuaáta upéva ha arakaʼeve ndahesaraimoʼãi ndehegui. Haʼe ‘oipeʼáta yvága rovetã ohykuavo hag̃ua nde ári mbaʼe porã renyhẽ chovi’ (Mal. 3:10). Koʼág̃ama voi imbaʼeporã nendive ha omeʼẽ ndéve ijespíritu nemombarete hag̃ua reikotevẽ jave. Aníkena rekyhyje, ne irũnguéra ndejopy jave rejapo hag̃ua ivaíva Jehová katuete nepytyvõta rembohovái hag̃ua chupekuéra.

[Nóta]

Nemanduʼápa?

• Ikatúpa ndegueraha vai ne irũnguéra?

• Mbaʼérepa tekotevẽ reguerovia la Biblia heʼíva iporãveha ndéve g̃uarã?

• Mbaʼéichapa rejepreparavaʼerã rembohovái hag̃ua ne irũnguéra ndejopy jave mbaʼe vairã?

• Mbaʼérepa erekuaa Jehová ovyʼaha neñeʼẽrendúramo chupe?

[Porandu ñahesaʼỹijóva]

[Nóta oĩva taʼanga ndive páhina 8]

Mbaʼérepa Aarón ojapo pe vakaraʼy raʼanga?

[Nóta oĩva taʼanga ndive páhina 10]

Reikuaamavaʼerã mbaʼépa eréta