Mitãrusu, mbaʼépa rehupytyse nde rekovépe?

“Ndahaʼéi ainupãva yvytu rei.” (1 COR. 9:26, JMP)

1, 2. Mbaʼépa reikotevẽ resẽ porã hag̃ua opa mbaʼe rejapóvape?

 EPENSAMÍNA rehotaha peteĩ táva reikuaaʼỹvape. Mbaʼépa ikatu rejapo ani hag̃ua rekañy? Iporãta regueraháramo peteĩ mapaʼi ha manterei remaña hese ikatu hag̃uáicha reho porã. Péro ndereikuaáiramo moõpa rehose mbaʼevépe ndaideprovechomoʼãi ndéve upe mápa ha rekorrepa reíta reg̃uahẽʼỹre mamove.

² Koʼág̃a rekakuaáma rehóvo ha haʼete ku rehótava peteĩ táva reikuaaʼỹvape. Reikotevẽháicha peteĩ mápa reg̃uahẽ hag̃ua peteĩ hendápe, péicha avei reikotevẽ Ñandejára Ñeʼẽre ikatu hag̃uáicha reguata tape porãre (Pro. 3:5, 6). Ha oiméramo rehekomboʼe porã nde pyʼapy ñeʼẽ, upéva nepytyvõta akóinte rejapo hag̃ua iporãva (Rom. 2:15). Péro avei resẽ porã hag̃ua opa mbaʼe rejapóvape, tekotevẽ reikuaa mbaʼépa rehupytyse nde rekovépe.

3. Heʼiháicha Pablo 1 Corintios 9:26-pe, mbaʼéichapa ñanepytyvõ jaikuaáramo mbaʼépa jahupytyse?

³ Apóstol Pablo omombeʼu mbaʼérepa iporã jaikuaa mbaʼépa jahupytyse ha ñañehaʼã upéva rehehápe. Haʼe heʼi: “Che añani, aikuaa rupi mamópa ahaʼaína. Ha ndahaʼéi ainupãva yvytu rei” (1 Cor. 9:26, JMP). Reikuaa porãrõ moõpa rehose, katuete reñaníta upe gotyo reg̃uahẽ hag̃uáicha. Koʼẽrõitéma redesidivaʼerã heta mbaʼe iñimportánteva Jehová servísiope, nde rogapýpe, reiporavóta vove nde travahorã ha avei oiméramo remendase. Sapyʼánte katu reñandúta ndereikuaaveimaha ni moõ gotyópa rejapíta. Ani hag̃ua resẽ vai, voi porã reiporavomavaʼerã nde raperã ha reheja Ñandejára Ñeʼẽ tanesãmbyhy. Upéicharamo ni mbaʼevéicharõ neresẽvaimoʼãi (2 Tim. 4:4, 5).

4, 5. a) Mbaʼépa oikóta ndereikuaáiramo mbaʼépa rejapóta nde rekovépe? b) Mbaʼérepa reñehaʼãvaʼerã rehupyty umi mbaʼe Jehová oguerohorýva?

⁴ Ndereikuaaporãiramo gueteri mbaʼépa rejapóta, katuete ne mboʼehára térã ne irũnguéra nemokyreʼỹséta rehupyty hag̃ua peteĩ mbaʼe oimoʼãva iporãvetaha ndéve g̃uarã. Ha reikuaa porãramo jepe mbaʼépa rehupytyse, oĩtante voi heʼíva ndéve mbaʼépa rejapovaʼerã. Rehendu rire nde rapichakuéra heʼíva, iporã reñeporandumi: “Aikóramo apena hesekuéra, añemoag̃uivétapa Jehováre térãpa amboykéta chupe?” (elee Eclesiastés 12:1).

⁵ Rejapo mboyve peteĩ mbaʼe reñeporanduvaʼerã oguerohorýtapa upéva Jehová. Mbaʼérepa? Haʼe ningo omeʼẽ ndéve opaite mbaʼe (Sant. 1:17). Opavave yvypóra hetaiterei jadeve chupe ha jaagradesevaʼerã opa umi mbaʼére (Rev. 4:11). Upéicharõ, iporãiténepa reñehaʼãramo rehupyty umi mbaʼe Jehová oguerohorýva. Péicha rehechaukáta remombaʼeha chupe. Jahechamína koʼág̃a mbaʼe mbaʼépa reñehaʼãvaʼerã rehupyty ha mbaʼépa nepytyvõta upearã.

 Mbaʼe mbaʼépa ikatu rehupyty?

6. Mbaʼe iporãvapa reñehaʼãvaʼerã rejapo, ha mbaʼérepa?

⁶ Jahecha haguéicha pe ótro artíkulope iporãvaʼerã nde voi rehecháramo añetépa umi mbaʼe reaprendevaʼekue Ñandejára Ñeʼẽgui (Rom. 12:2; 2 Cor. 13:5). Ne irũnguéra kolehiopegua oiméne oguerovia heta mbaʼe japu, pór ehémplo yvyporakuéra ouha mymbágui. Péro mbaʼérepa oguerovia hikuái? Ojeʼéguinte chupekuéra. Aníkena nde avei reiko haʼekuéraicha, regueroviapa rei rehendúva guive. Nemanduʼáke Ñandejára oipotaha reiporu ne arandu reservi hag̃ua chupe (elee Mateo 22:36, 37). Nde Ru yvagapegua oipota ipyenda porã nde jerovia (Heb. 11:1).

7, 8. a) Mbaʼépa rejapovaʼerã remombarete hag̃ua nde jerovia? b) Mbaʼéichapa ideprovéchota ndéve rehupytýramo umi mbaʼe porã?

⁷ Remombarete hag̃ua nde jerovia oĩ heta mbaʼe ikatúmava rejapo koʼág̃a. Pór ehémplo reñemboʼe ára ha ára. Reñemongeta porãve hag̃ua Jehovándi tuichaiterei nepytyvõta nemanduʼáramo térã rehaírõ kuatiáre umi mbaʼe rehasavaʼekue upe árape ha remombeʼu chupe. Naiporãmoʼãi remombeʼúramo umi ne provlemakueténte, ikatu avei ere Ñandejárape umi mbaʼe porã rehasavaʼekue (Fili. 4:6). Iporã avei reñehaʼãramo relee la Biblia ára ha ára. Reikuaápa releéramo 4 páhina jepe káda día, un áñope remohuʼãtamaha? * Salmo 1:1, 2-pe [ÑÑB] heʼi: ‘Ovyʼaite upe ojuhúva pyʼaguapy Ñandejára Ñeʼẽme ha hese ojepyʼamongeta ára ha pyhare’.

⁸ Jahechamína ambue mbaʼe ikatúva rejapo koʼág̃a: rejeprepara rekomenta hag̃ua rreunionhápe. Ñepyrũrã ikatúnte releénte peteĩ téysto téra peteĩ párte nde rrevísta térã  lívrogui. Upe rire iporãta avei rekomenta ne ñeʼẽtépe. Nemanduʼákena rekomenta jave remeʼẽha peteĩ jopói Jehovápe (Heb. 13:15). Rehupyty rire koʼã mbaʼe porã ndepyʼaguasuvétama rejapo hag̃ua ambue mbaʼe iñimportantevéva, ndekatupyryvéta ha remombaʼevéta Jehovápe.

9. Mbaʼépa reñehaʼãvaʼerã rejapo amo gotyove?

⁹ Mbaʼépa ikatu rejapo amo gotyove? Oimérõ neʼĩra oiko ndehegui maranduhára, eñehaʼãkena ehupyty upéva. Ha upe rire ani reheja ohasa ni un més reseʼỹre remombeʼu pe marandu porã. Revyʼa hag̃ua rejapóvo ko tembiapo, reñembokatupyryvaʼerã ha reñehaʼã reiporukuaa Ñandejára Ñeʼẽ. Iporãta reñemotiémporamo resẽve hag̃ua repredika ha remboʼe la Biblia peteĩ tapichápe. Ha oikómaramo ndehegui maranduhára, mbaʼére piko nereñemeʼẽi Jehovápe ha rejevautisa?

10, 11. Oiméramo rejevautisáma, mbaʼépa ikatu rehupytyve?

¹⁰ Oiméramo rejevautisáma, ikatu rejapo hetave mbaʼe Ñandejára servísiope. Pór ehémplo, sapyʼánte rehokuaa reipytyvõ umi kongregasión iterritório tuichávape ha hasýpe ojepredikapáva. Koʼág̃a neresãi ha nemitãre reaprovechavaʼerã rejapo hag̃ua nde prekursorádo auxiliar térã regular. Hetaiterei ermáno ojapo upéva, ha reporandúramo chupekuéra omombeʼúta ndéve mbaʼeichaitépa ovyʼa ha ipyʼarory oiporu haguére hekove imanduʼa hag̃ua Ijapoharére. Opa koʼã mbaʼe ikatu rehupyty koʼág̃a reiko aja nde tuvakuéra ndive. Avei ndedeprovechoitereíta ne kongregasiónpe.

¹¹ Mbaʼe mbaʼépa ikatu rejapove Jehová servísiope? Revakuaa umi lugár oñekotevẽhápe hetave maranduhára, tahaʼe ne retãme térã ambue tetãme. Avei ikatu rembaʼapo Salón del Reino ỹrõ sukursál oñemopuʼãhápe, reservi Betélpe térã misionéroramo. Jahecha haguéicha, rejapo hag̃ua koʼã mbaʼe rejevautisamantevaʼerã. Oimérõ neʼĩra rejapo upéva, epensami mbaʼépepa rembaʼapovevaʼerã rehupyty hag̃ua ko mbaʼe.

Mbaʼépa rejapovaʼerã rejevautisa hag̃ua?

12. Mbaʼérepa ojevautisase heta mitãrusu? Mbaʼérepa upéva noĩporãi?

¹² Mbaʼépa nemomyivaʼerã rejevautisa hag̃ua? Oĩ mitãrusu opensáva ojevautisáramo oñangarekovetaha ijehe ani hag̃ua ojapo ivaíva. Oĩ katu ojapóva upéva ohaʼangaségui iñirũnguérape térã ituvakuéra oguerohory hag̃ua chupe. Péro pe vautísmo ndahaʼéi peteĩ kontráto rejapóva rejeporta porã hag̃ua térã ndejokóva ani hag̃ua rejapo umi mbaʼe vai. Nemanduʼáke avei ndovaleiha rejevautisa oĩgui nemboligávante. Rejapo hag̃ua upéva tekotevẽ rentende mbaʼépa oñehaʼarõ peteĩ testígo de Jehovágui, avei rehechakuaavaʼerã pe vautísmo tuicha mbaʼeha ha reimemavaʼerã rekumpli hag̃uáicha (Ecl. 5:4, 5).

13. Mbaʼérepa rejevautisavaʼerã?

¹³ Jesús heʼivaʼekue hemimboʼekuérape: ‘Peipytyvõ umi héntepe oiko hag̃ua chuguikuéra che remimboʼe, ha pevautisa’. Ha haʼe voi oheja ñandéve iñehémplo ojevautisárõ guare, upévare oĩ porã rejevautisa (elee Mateo 28:19, 20 ha Marcos 1:9). Avei tekotevẽ rejevautisa ikatu hag̃uáicha rejesalva. Imanduʼávo Noé ha pe árka ojapovaʼekuére ojesalva hag̃ua haʼe ha ifamília, apóstol Pedro heʼivaʼekue: ‘Ha upéva orrepresenta pe vautísmo, oguerúva ñandéve salvasión Jesucristo oikove jey rupi omanóva apytégui’ (1 Ped. 3:20, 21, BNP). Upéicharamo jepe, ndovaléi rejevautisa neremanoséiguinte. Rejapovaʼerã upéva rehayhúgui Jehovápe nde pyʼaite guive, ne ánga rugua guive ha opa ne arandukue ha ne mbaretekue reheve (Mar. 12:29, 30).

14. Mbaʼérepa oĩ okyhyjéva ojevautisa hag̃ua? Péro mbaʼérepa ndovaléi rekyhyje?

 ¹⁴ Oĩ katu mitãrusu ndojevautisáiva okyhyjégui upéi ofalla ha oñemosẽrõ g̃uarã kongregasióngui. Ndépa reñeñandúmava péicha? Upéva ndaivaíri katuete. Heʼise uvei ndéve g̃uarã ndahaʼeiha vyrorei reservi Jehovápe itestígoramo. Ikatu avei ndejoko ambue mbaʼe, pór ehémplo nderegueroviái iporãveha ndéve g̃uarã reiko Ñandejára oipotaháicha. Oimérõ upéicha, rejepyʼamongetavaʼerã rehecha hag̃ua mbaʼépepa osẽ umi iñeʼẽrenduʼỹva Jehovápe. Térã ikatu reguerovia iporãha umi léi Ñandejára omoĩva, péro nderejeroviapái ndejehe rekumpli porãne hag̃ua. Péva ndaivaíri, ohechauka uvei nereñemombaʼeguasuiha. Ñandejára Ñeʼẽ heʼi voi ñane korasõ ikatuha ñanembotavy ha ñandegueraha vai (Jer. 17:9). Upéicharamo jepe ani rekyhyje, nde ikatúta rejapo Ñandejára ojeruréva ndehegui. Upearã tekotevẽ ‘reiko Iñeʼẽ heʼiháicha’ (elee Salmo 119:9). Oiméramo ndereikuaaporãi gueteri mbaʼépa rejapóta, eñehaʼã emyesakã umi mbaʼe ndepyʼapýva ha ani ndepyʼamokõi. *

15, 16. Mbaʼéichapa reikuaáta ikatumaha rejevautisa?

¹⁵ Péro mbaʼéichapa reikuaáta ikatumaha rejevautisa? Iporãta reñeporandúramo koʼã mbaʼe: Ikatúnepa chete amyesakã umi mbaʼe iñimportantevéva oĩva Ñandejára Ñeʼẽme? Asẽpa apredika pe marandu porã nosẽiramo jepe che tuvakuéra? Añehaʼãmbaitépa ani afalta rreunionhápe? Mbaʼépa ajapo ambohovái hag̃ua che irũnguéra ojapoukaséramo chéve peteĩ mbaʼe ivaíva? Mbaʼépa ajapóta che tuvakuéra térã che angirũ umíva ohejáramo Ñandejára rape? Amombeʼúmapa Jehovápe iñimportantetereiha chéve g̃uarã añemoag̃ui hese? Añemeʼẽmapa chupe ñemboʼe rupive?

¹⁶ Pe vautísmo ningo peteĩ mbaʼe iñimportantetereíva ha ndahaʼéi jajapóva péicha péichante. Tekotevẽ neakãguapy upearã. Ikatu ndekatupyryeterei rejapo hag̃ua nde párte rreunionhápe térã rekomentakuaa, péro ndahaʼéi upe haguérente eremavaʼerã ndejehe neakãguapyha. Ojekuaavaʼerã avei reiporuha Ñandejára Ñeʼẽ redesidi hag̃ua opa mbaʼe (elee Hebreos 5:14). Oimérõ nde jerovia imbaretéma rejevautisa hag̃uáicha, ikatúma rejapo peteĩ mbaʼe ijojahaʼỹva: reservi Jehovápe nde pyʼaite guive, ha ára ha ára rehechauka remeʼẽma hague chupe nde rekove.

17. Mbaʼépa nepytyvõta regueropuʼaka hag̃ua umi mbaʼe ijetuʼúva rejevautisa rire?

 ¹⁷ Katuete rejevautisa rire nekyreʼỹetereíta reservi hag̃ua Jehovápe. Péro avei oĩta heta mbaʼe ijetuʼúva regueropuʼakavaʼerã (2 Tim. 3:12). Aníkena reimoʼã neañónte ikatutaha rembohovái umíva. Ejerurékena nde tuvakuéra ha ambue ermáno ikatupyrývape tanepytyvõ. Ehekákena ne angirũrã umi nemokyreʼỹtava akóinte neñeʼẽrendu hag̃ua Ñandejárape. Opa mbaʼe ári, aníkena nderesarái Jehová nderayhuha ha nemombaretetaha regueropuʼaka hag̃ua opa mbaʼe ijetuʼúva (1 Ped. 5:6, 7).

Mbaʼépa ikatu nepytyvõ?

18, 19. Mbaʼérepa reiporu porã vaʼerã ne tiémpo?

¹⁸ Haʼetevaichapa ndéve nanetiempoiha rejapo hag̃ua opa mbaʼe rejaposéva, reñehaʼãramo jepe? Upéicharõ rehechavaʼerã mbaʼépa remotenonde reikóvo. Ñamoĩmína peteĩ ehémplo: jaʼe chupe remoĩha peteĩ váldepe heta ita ha upéi reñohẽ hiʼári yvykuʼi remyenyhẽ meve. Péicha ijapa porã peteĩ váldepe umi ita ha avei pe yvykuʼi. Péro mbaʼépa oikóta remoĩramo pe yvykuʼi raẽve ha upéi umi ita? Ndaijapamoʼãi ningo ndéve, ajépa?

¹⁹ Péicha avei oiko ndereiporuporãiramo ne tiémpo. Remotenondéramo umi vyʼarãnte saʼíma hembýta ndéve reservi hag̃ua Jehovápe, hiʼarive upéva hína pe iñimportantevéva. Péro ‘reiporavo meméramo pe iporãvéva’ ikatúta rejapo hetave mbaʼe Ñandejára servísiope ha avei netiémpota rejapo hag̃ua ambue mbaʼe ndegustáva (Fili. 1:10).

20. Mbaʼépa rejapovaʼerã oimérõ rekyhyje gueteri rejevautisa hag̃ua?

²⁰ Repensa jave mbaʼépa rehupytyse, ikatu rejepyʼapy ha ndereikuaái mbaʼépa rejapóta. Pór ehémplo rejevautisaséramo ha rekyhyje gueteri, mbaʼépa ikatu rejapo? “Ñandejára pópe emoĩ umi mbaʼe ndepyʼapýva ha haʼe oñangarekóta nderehe.” (Sal. 55:23, [55:22, NM].) Koʼág̃a ikatu reipytyvõ ojejapo hag̃ua peteĩ tembiapo iporãiterei ha ndaijojaháiva: oñemoherakuã pe marandu porã oparupiete ko yvy ape ári (Hech. 1:8). Mbaʼépa nde rejapóta? Rehejátapa ambue ermanokuérante osẽ opredika ha nde katu repytátante remaña mombyrymi guive hesekuéra? Térãpa kyreʼỹme remoirũta chupekuéra? Reiporúramo ne arandukue reservi hag̃ua Ñandejárape, arakaʼeve neresẽvaimoʼãi. Ni mbaʼevéicharõ nerembyasyichéne reservi haguére ‘nde Apoharépe ne mitã aja’ (Ecl. 12:1).

[Nóta]

Mbaʼéichapa rembohováita?

• Mbaʼérepa iporã reikuaa mbaʼépa rehupytyse?

• Mbaʼe iporãvapa reñehaʼãvaʼerã rejapo?

• Mbaʼépa rejapovaʼerã rejevautisa hag̃ua?

• Mbaʼérepa reiporu porã vaʼerã ne tiémpo rejapo hag̃ua hetave mbaʼe Ñandejára servísiope?

[Porandu ñahesaʼỹijóva]

[Nóta oĩva taʼanga ndive páhina 13]

Releépa la Biblia káda día?

[Nóta oĩva taʼanga ndive páhina 15]

Mbaʼe mbaʼépa rejapovaʼerã rejevautisa hag̃ua?

[Nóta oĩva taʼanga ndive páhina 16]

Mbaʼépa nemboʼe ko ehémplo?