Oñeporandúva jepi

Jesús heʼivaʼekue: ‘Peẽ ningo pendeperfektovaʼerã pende ru yvagapeguáicha’. Mbaʼéichapa jahupytýta upéva ñaneimperféktoramo jepe? (Mat. 5:48, NM.)

Ñambohovái hag̃ua ko porandu jaikuaa raẽ vaʼerã mbaʼéichapa ojeporu la Bíbliape pe ñeʼẽ “perfékto” ha “perfeksión”. Ñandejára Ñeʼẽme heʼi jave “perfékto” ndeʼiséi katuete oĩ porãmbaiteha opa mbaʼépe. Upévare yvyporakuéra térã ambue mbaʼe rehe ojeʼekuaa perfektoha. Péro oñeʼẽ jave Jehováre ñantendekuaa oĩ porãmbaiteha opa mbaʼépe. Evréo ha griégo ñeʼẽme “perfékto” pyʼỹinte heʼise oĩmbaiteha, ityarõ térã ndorekoiha defékto. Ñane tiémpope upéichante avei ojeporu ko ñeʼẽ.

Ñepyrũrã Adán ha Eva perfektovaʼekue avei opaite mbaʼépe ha ojapo porã Ijapohare omandavaʼekue chupekuéra. Péro upe rire naiñeʼẽrendúi Ñandejárape ha oiko chuguikuéra yvypóra imperfékto, upévare ifamiliakuéra onase avei imperfékto haʼekuéraicha. Upéicha rupi ñande avei japeka, ñaneimperfékto ha ñamano (Rom. 5:12).

Jesús ojapórõ guare pe diskúrso hérava Sermón del Monte ohechauka porã ñande yvypóra ñaneimperféktoramo jepe ikatuha avei ñandeperfékto. Mbaʼérepa upéva? Jesús omombeʼu mbaʼéichapa Ñandejára ohayhu yvyporakuérape, ha péicha ohechauka mbaʼeichaguápa pe mborayhu perfékto. Haʼe heʼi: ‘Pehayhu meméke umi penderayhuʼỹvape ha peñemboʼe tapiaite umi penembohasa asývare. Péicha pehechaukáta peẽ haʼeha Ñandejára yvagapegua raʼy, haʼe ningo oheja kuarahy osẽ iñaña ha hekopotĩvape g̃uarã; ha omongy hekojoja ha ndahekojojáivape g̃uarã’ (Mat. 5:44, 45, NM). Jaʼekuaa upéicharõ perfektoha Jesús remimboʼekuéra ohayhúramo hapichápe Ñandejára ohayhuháicha chupekuéra.

Koʼág̃a rupi avei ñande testígo de Jehová, ñaĩva ko múndo tuichakuére, ñañehaʼãmbaite ñahaʼanga Ñandejárape ha jahayhu ñande rapichakuérape. Pór ehémplo ñaipytyvõ umi héntepe oikuaave hag̃ua Ñandejárape, péro nañamañái moõguipa ou, hũ térã morotĩpa ni mbaʼe rrelihionguápa. Ñambostudia la Biblia hetaiterei tapichápe, amo siete millón rupi, 236 tetãme.

Jesús heʼivaʼekue: ‘Pehayhúramo umi penderayhúvapente, ani peimoʼã tuichaiterei mbaʼeha upéva. Umi impuésto kovraha ningo ojapónte avei upéicha. Ha pemomaiteírõ pene ermanokuérapente, ani peimoʼã tuichaiterei mbaʼeha upéva. Umi tetã ambuegua ningo ojapónte avei upéicha’ (Mat. 5:46, 47, NM). Kristianokuéra omoirũ añetéva Jesúspe nomombaʼéi hapichápe ipláta térã ijestúdio porã rupi ni hũ térã morotĩ haguérente. Ndohayhúi umi ohayhúvapente chupekuéra, síno oipytyvõ imboriahu ha hasývape, imitã ha ijedávape. Upéicha ohayhu hapichakuérape Jehová oporohayhuháicha ha jaʼekuaa perfektoha upe mbaʼépe.

Ikatúne piko ñandeperfékto jey Adán iperfékto haguéicha? Ikatu; entéro yvypóra iñeʼẽrendu ha ojeroviáva Jesús sakrifísiore ikatúta iperfékto jey haʼe oisãmbyhy vove mil áño pukukue. Upérõ g̃uarã Ñandejára Raʼy ‘ombyaíta aña rembiapokue’ (1 Juan 3:8, ÑÑB).