Nemanduʼápa koʼã mbaʼére?

Katuete revyʼáneraʼe releévo umi Ñemañaha ramoite osẽvaʼekue. Ehechami nemanduʼápa koʼã mbaʼére:

• Mbaʼérepa Jesús heʼi peteĩ kuñáme operdonaha chupe hembiapo vaikue? (Luc. 7:37, 48)

Upérõ Jesús nomanói gueteri, péro upéva oikóta katuete. Upéicha rupi ikatu ojeporu isakrifísio repykue oñeperdona hag̃ua umi tembiapo vai. Upévare heʼi pe kuña rekovaípe operdonaha chupe umi mbaʼe vai ojapovaʼekue (15/8, páhina 6, 7).

• Mbaʼéichapa ikatu osẽ porã ndéve ne família?

Remboʼevaʼerã chupekuéra ne ehémplo rupive. Ani rehaʼarõiterei chuguikuéra. Ere chupekuéra mbaʼe mbaʼépa ojapovaʼerã (1/10, páhina 28-30).

• Mávapa pe ánhel Jehová omondovaʼekue oñangareko hag̃ua ipuévlore osẽ rire Egíptogui? (Éxo. 23:20, 21)

Jehová ningo heʼi hese: “Ojapohína opa mbaʼe che rérape”, upévare jaʼekuaa upe ánhel haʼeha Itaʼýra peteĩete (15/9, páhina 21).

• Mbaʼépa heʼise ñamotenonde meme Ñandejára hustísia? (Mat. 6:33)

Heʼise jajapoha hembipota ñaime porã hag̃ua henondépe. Avei heʼise ndajaikoveimaha ñane akãre, upéva rangue ñañehaʼãmbaite jajapo opa mbaʼe Ñandejára oipotaháicha (15/10, páhina 7-11).

• Mbaʼépa ndovaléi jaʼe Jehovápe?

‘Ijetuʼueterei ningo. Nachekyreʼỹi ajapo hag̃ua. Nachetiémpoi. Che ningo ndavaléi ajapo hag̃ua upéva. Chembopochy ojejapóva cherehe.’ Ndaikatúi jaiporu koʼã mbaʼe ani hag̃ua jaservi porã Jehovápe (15/10, páhina 12-15).

• Mbaʼépa ikatu rejapo umi rreunionkuéra omokyreʼỹ hag̃ua enterovépe?

Ejepreparákena. Aníkena refalta. Eg̃uahẽkena órape. Eguerúkena umi puvlikasión ojeporútava. Eñatende porãkena. Ekomenta. Mbykymínte ekomenta. Ejapo umi tembiapo oñemeʼẽva ndéve. Eporoguerohory. Eñemongeta nde rapichakuérandi (15/10, páhina 22).

• Mbaʼéichapa Jehová oipytyvõ umi ikangývape?

Haʼe ningo oiporu heta mbaʼe omombarete hag̃ua chupekuéra. Umíva apytépe oĩ kongregasión, umi ermáno ha rreunionkuéra. Jehová ohendu avei iñemboʼekuéra (15/11, páhina 17-19).

• Mbaʼépa ñanemboʼe oikovaʼekue Aarón rehe, umi isrraelíta ojapoukárõ guare chupe mbaʼe vai?

Moisés ndaipóri aja, umi isrraelíta ojapouka chupe peteĩ taʼanga omombaʼeguasu hag̃ua hikuái. Upéva ohechauka enterovépe ikatuha ñandegueraha vai ñane irũnguéra, ndahaʼéi imitãvapente, avei ojopy umi oñehaʼãmbaitévape ojapo iporãva. Upévare ndajahejaivaʼerã ñane irũnguéra ipuʼaka ñanderehe (15/11, páhina 8).

• Ovalépa jajapo “kópia piráta”?

Jajogua jave peteĩ prográma oñemeʼẽ ñandéve peteĩ contrato de licencia ha jarrespetavaʼerã upépe heʼíva. Jajapóvo kópia piráta ndajarrespetái pe kontráto ha upéva naiporãi. Avei ñamonda pe prográma ojapovaʼekuépe, haʼe ningo oreko derécho okovrávo hembiapokuére (1/10, páhina 13).