Peteĩ Rréi oisãmbyhy porãva Ñandejára espíritu rupive
Peteĩ Rréi oisãmbyhy porãva Ñandejára espíritu rupive
“Ñandejára espíritu hiʼári opytáta.” (ISA. 11:2)
1. Mbaʼépa oipyʼapy heta tapichápe?
“JAHECHÁVO mbaʼéichapa umi polítiko oiko vaipa, umi hénte noñontendevéi, ha ko yvy oñembyaipa, ñapensa voi ndajahamoʼãveimaha ni 100 áño.” Péicha heʼi 2006-pe peteĩ sientífiko hérava Stephen Hawking. Pe rrevísta New Statesman katu heʼi: “Koʼág̃a peve ndopái mboriahu ha ñorairõ. Ñambotuichave uvei koʼã provléma. Péro ndahaʼéi nañañehaʼãietéva mbaʼe. Ñatanteáma heta mbaʼe ñaime porãmie hag̃ua. Pór ehémplo, oñemoĩ pe komunísmo, okontroláva hetãyguakuéra ojapóva; ha oĩ avei goviérno ohejáva umi héntepe oiko oipotaháicha. Ojejoko hag̃ua umi ñorairõ oñepyrũ ombaʼapo pe Liga de Naciones, ha avei oĩ tetã ombyatýva árma ipeligrosoitereíva omongyhyje hag̃ua oñorairõsévape. Heta vésema ñahendu ojeʼérõ: ‘Ko gérra oipeʼaitéta opaichagua gérra’, péro avavéma ndogueroviavéi ojehupytýne hag̃ua pyʼaguapy ko yvy apére”.
2. Mbaʼépa ojapóta Jehová ohechauka hag̃ua haʼémante ikatuha ñanesãmbyhy?
2 Ñande jaservíva Jehovápe ndajahecharamói koʼã mbaʼe. Mbaʼérepa? Jaikuaágui la Biblia heʼiha yvypórape ndojeapói hague oñesãmbyhy hag̃ua ijupe (Jer. 10:23). Jehová hína pe Mburuvicha Guasu Ijojahaʼỹva, upévare haʼe añoite ikatu heʼi mbaʼépa iporã térã ivai. Haʼe oikuaa maʼerãpa jaikove ha mbaʼépa jajapovaʼerã javyʼa hag̃ua. Koʼẽrõite ohechaukáta haʼémante ikatuha ñanesãmbyhy ohundívo umi goviérno oñemoĩva hese ha opavave yvypóra ogueraha vaiséva hapichakuérape. Upéicha añoite yvyporakuéra hesãita, ojapóta hekopete opa mbaʼe ha ojeíta Satanás, “ko múndo ruvicha” poguýgui (2 Cor. 4:4, BNP).
3. Mbaʼépa Isaías heʼivaʼekue Jesucristo rehe?
3 Pe múndo pyahúpe Jehová oisãmbyhýta mborayhúpe Jesucristo Goviérno rupive (Dan. 7:13, 14). Isaías heʼivaʼekue: ‘Jesé rapógui osẽta hoky pyahu, upégui heñóita. Ñandejára espíritu hiʼári opytáta, espíritu omeʼẽva arandu, akãporã, ñemoñeʼẽkuaa, mbarete, mbaʼekuaa ha kyhyje Ñandejáragui’ (Isa. 11:1, 2). Pe ‘hoky pyahu’ haʼehína Jesucristo. Péro, mbaʼéichapa pe espíritu sánto ombokatupyry chupe oisãmbyhy hag̃ua? Mbaʼe iporãvapa ojapóta igoviérno rupive? Mbaʼépa jajapovaʼerã jahupyty hag̃ua umi mbaʼe porã?
Ñandejára ombokatupyry chupe oisãmbyhy hag̃ua
4-6. Mbaʼérepa Jesúsgui añoite ikatu oiko Mburuvicha, Saserdóte Guasu ha Hués?
4 Jehová oipota umi tapicha oikóva irréino poguýpe ohupyty perfeksión. Péro upearã oipytyvõvaʼerã chupekuéra peteĩ Mburuvicha, Saserdóte Guasu ha Hués iñarandu ha imbaʼeporãva. Upévare Jehová oiporavo Jesúspe ha ombokatupyry chupe ijespíritu rupive ojapo hag̃ua koʼã mbaʼe. Jahechamína mbaʼérepa Cristo añoite ikatu ojapo hekopete umi tembiapo Itúva omeʼẽva chupe.
5 Jesús hína pe oikuaa porãvéva Jehovápe. Ndaipóri haʼéicha hiʼarémava Ñandejárandi. Oime aja Itúva ndive, pe Taʼýra peteĩete oaprende heta mbaʼe chugui ha upéicha rupi ohaʼanga porãiterei chupe. Upévare Jesús rehe ojeʼe: “[Ñandejára] jahechaʼỹva joguahaite” (Col. 1:15, JMP). Ha haʼe voi heʼi: “Upe chéve cherecháva, ohecháma che Rúpe” (Juan 14:9).
6 Jesús oikuaa porã yvyporakuérape ha opa Jehová rembiapokue. Colosenses 1:16, 17 heʼi Jesús rehe: “Haʼe rupi, [Ñandejára] ojapo opa mbaʼe oĩva yvágape ha yvýpe, ojehecháva ha ojehechaʼỹva [...]. Cristo oiko opa mbaʼe mboyve ha haʼe rupi opa mbaʼe oĩ hendápe”. Ñapensamína, haʼehína pe ‘pytyvõhára’ ombaʼapovaʼekue Jehová ndive ojapo hag̃ua opa mbaʼe. Upéicha rupi oikuaapaite mbaʼépa oĩ ko arapy tuichaitévape, oikuaa umi mbaʼe michĩvéva ndajahecháiva jepe ha avei mbaʼéichapa ombaʼapo ñane apytuʼũ. Añetehápe Jesús iñarandueterei (Pro. 8:12, 22, 30, 31).
7, 8. Mbaʼéichapa espíritu sánto oipytyvõ Jesúspe oiko aja ko yvy ape ári?
7 Ñandejára oiporavo Jesúspe espíritu sánto rupive. Jesús heʼi: ‘Jehová espíritu oĩ chendive, haʼe cheporavo amombeʼu hag̃ua marandu porã imboriahúvape, aikuaauka hag̃ua isãsotaha umi oikóva iñapytĩmby, umi ohechaʼỹva ohecha jeytaha, ha umi ojepyʼapýva ipyʼaguapytaha. Avei amoherakuã hag̃ua pe ára Jehová ñandeporiahuverekotaha’ (Luc. 4:18, 19, NM). Jesús ojevautisárõ guare oiméne pe espíritu sánto omomanduʼa chupe opa mbaʼe oaprendevaʼekue yvágape. Umíva apytépe oĩ umi tembiapo Jehová omeʼẽvaʼekue chupe ojapo hag̃ua ko yvy ape ári (elee Isaías 42:1, Lucas 3:21, 22 ha Juan 12:50).
8 Jesús ningo perfektovaʼekue, hesãi ha iñarandueterei, hiʼarive pe espíritu sánto ombokatupyry chupe. Upévare oiko chugui pe kuimbaʼe iñimportantevéva oĩvaʼekue ko yvy ape ári ha avei pe mboʼehára ivalevéva. Bíbliape oñemombeʼu umi hénte opyta hague ‘ijurujaipa’ ohendu rire chupe (Mat. 7:28, NM). Jesús oikuaa yvyporakuéra ohasa asyha ndoikuaáigui Ñandejárape, iñimperfékto ha oiko rupi pekádo poguýpe. Avei ohecha mbaʼépa oĩ umi hénte pyʼapýpe; iñañávape okorrehi ha oipytyvõ ipyʼaporãvape (Mat. 9:4; Juan 1:47).
9. Jajepyʼamongetávo Jesús rekovekuére, mbaʼérepa jaʼekuaa haʼe añoite ikatupyryha ñanesãmbyhy hag̃ua?
9 Jesús yvyporavaʼekue avei. Haʼe oiko kuimbaʼéicha umi yvypóra imperfékto apytépe, upévare ndaipóri ikatupyryvéva chugui oisãmbyhy hag̃ua. Pablo heʼivaʼekue: ‘Upévare tekotevẽkuri ojogua opa mbaʼépe ipehẽnguekuérape, oiko hag̃ua ñandéve Ñandejára renondépe saserdóte guasúramo, oiporiahuverekóva ha ijeroviaháva, oipeʼa hag̃ua pekadokuéra omano rupi. Haʼete voi ohasa asy ha ojepyʼaraʼã haguére ikatu oipytyvõ umi ojepyʼaraʼãvape’ (Heb. 2:17, 18, JMP). Jahechaháicha, Jesús “ohasa asy” rupi ikatu ñandeporiahuvereko. Ha oiko aja ko yvy ape ári ohechauka imbaʼerechakuaaha. Umi ojejopy vaíva, hasýva, ha ndojevaléiva ijehe, ndokyhyjéi oñemboja hag̃ua hendápe. Umi mitã jepe oñemoag̃uise hese (Mar. 5:22-24, 38-42; 10:14-16). Avei ou Jesús rendápe umi tapicha ipyʼaporãva ha oikuaaséva Jehovápe. Péro umi oñemombaʼeguasu, ijejapo ha ‘ndohayhúiva Ñandejárape’ ndaijaʼéi hese (Juan 5:40-42; 11:47-53).
10. Mbaʼeichaite pevépa ohechauka Jesús ñanderayhuha?
10 Jesús omano ñanderayhupápe. Péicha ohechauka ndaiporiha mburuvicha ombojojavaʼerã chupe (elee Salmo 40:6-10). Jesús heʼivaʼekue: “Ndaipóri niko mborayhu tuichavéva kóvagui: Ñameʼẽ ñande rekove ñane angirũ rehehápe” (Juan 15:13, JMP). Ajépa tuichaite ojoavy umi mburuvichágui! Haʼekuéra ndojepyʼapýi hetãyguakuéra ohasa asýramo, upéva rangue oñemombaʼeterei hikuái. Jesús katu omano opavave rehehápe (Mat. 20:28).
Ñandejára ombokatupyry chupe oiporu hag̃ua huguy repykue ñanderehehápe
11. Mbaʼérepa Jesús añoite ikatu oiporu huguy repykue ñanepytyvõ hag̃ua?
11 Jesús ningo Saserdóte Guasu, upévare haʼémante ikatu oiporu huguy repykue ñanepytyvõ hag̃ua. Oĩrõ guare yvy ape ári, ohechauka mbaʼépa ojapóta oisãmbyhy vove mil áñore. Haʼe omongueravaʼekue opaichagua mbaʼasy, omoingove jey omanóvape, omongaru hetápe ha torménta pochy jepe ojoko. Akóinte ñaneñeʼẽrendúramo chupe ikatúta jahupyty koʼã mbaʼe porãite Igoviérno poguýpe (Mat. 8:26; 14:14-21; Luc. 7:14, 15). Ojapóramo jepe heta milágro Jesús ndaijejapói. Haʼe ohayhu ha oiporiahuvereko umi héntepe, upévare oipytyvõ chupekuéra. Pór ehémplo, peteĩ karai iléprava ojerurérõ guare Jesúspe omonguera hag̃ua chupe, haʼe heʼi: ‘Aipota rekuera’ (Mar. 1:40, 41, NM). Oisãmbyhy vove mil áño aja, ohechaukáta avei oiporiahuverekoha mayma yvypórape.
12. Mbaʼéichapa oñekumplíta Isaías 11:9?
12 Oikórõ guare ko yvy ape ári, Jesús omoñepyrũvaʼekue peteĩ tembiapo iñimportantetereíva ojejapóva gueteri koʼág̃a peve: oikuaauka umi héntepe Ñandejára rape. Ha Isãmbyhy poguýpe haʼe ha umi ogovernáva hendive osegíta omboʼe yvyporakuérape. Upérõ oñekumplíta Isaías 11:9 [ÑÑB]: ‘Pe yvy henyhẽta Ñandejára arandúgui ku y omyenyhẽháicha pe yguasu’. Upépe oiméne ñanemboʼéta hikuái mbaʼéichapa ñañangarekovaʼerã ko yvýre ha mymbakuérare, yma Jehová omboʼe haguéicha Adánpe. Ha opávo pe mil áño oñekumplítama Ñandejára rembipota ko yvýpe g̃uarã oñemombeʼúva Génesis 1:28-pe. Avei Jesús sakrifísio rupive yvyporakuéra ohupytýtama perfeksión.
Ñandejára ombokatupyry chupe oporohusga hag̃ua
13. Mbaʼéichapa Jesús ohechauka hekojojaha?
13 ‘Ñandejára omoĩ Jesúspe oikovéva ha omanóva Huésramo.’ (Hech. 10:42, BNP.) Tuichaite ñanembopyʼaguapy jaikuaávo ojeporavo hague Jesúspe ñandehusga hag̃ua. Haʼe naipokarẽi ni michĩmi, hekojoja ha ijeroviaha. Haʼete orekóva koʼã mbaʼe ikuʼa jokuaháramo (Isa. 11:5). Cristo ohechauka porã vaʼekue ndogustaiha chupe mbaʼeve ivaíva, upévare ndoguerohorýi umi hovamokõi ha itaryrýivape. Haʼe omongavaju umi ndoiporiahuverekóiva ohasa asývape ha umi ipyʼahatãvape (Mat. 23:1-8, 25-28; Mar. 3:5). Jesús “oikuaapa yvypóra pyʼapýpe oĩva” upévare avave nombotavýi chupe (Juan 2:25).
14. Mbaʼéichapa Jesús ohechaukahína ohayhuha pe iporãva? Ha mbaʼépa ñañeporanduvaʼerã?
14 Koʼág̃a peve Jesús ohayhu pe iporãva. Upévare omotenonde pe tembiapo ndaijojaháiva: opárupi ojepredika ha oñemboʼe umi héntepe pe marandu porã. Avave ndojokomoʼãi ko tembiapo, tahaʼe yvypóra, mburuvicha térã demónio. Ko marandu ojepredikáta Jehová oipotaha peve. Upévare jaguerovia Armagedón rire Ñandejára rembipota oñekumplipaitetaha (elee Isaías 11:4 ha Mateo 16:27). Ñañeporandumi: “Apredikápa kyreʼỹme Jesús ojapo haguéicha? Ajapópa ikatúva guive Jehová servísiope, jepe cherasykatu térã areko heta mbaʼe ajapovaʼerã?”.
15. Mbaʼépa ñanepytyvõta ñañemeʼẽmbaite hag̃ua Jehová servísiope?
15 Ñañemeʼẽmbaite hag̃ua predikasiónpe ñanemanduʼavaʼerã ko tembiapo ouha Jehovágui. Haʼe heʼi jajapovaʼerãha, omoĩ Itaʼýrape ñanemoakã hag̃ua ha hiʼarive ñanepytyvõ ijespíritu rupive. Javyʼápa ñambaʼapo haguére Jehová ndive ha ñamoirũ Jesúspe, pe Rréi oisãmbyhýva espíritu sánto rupive? Koʼág̃a oĩ 7 millón ári oservíva Jehovápe, ha haʼe añoite ikatu oipytyvõ chupekuéra opredika hag̃ua 236 tetã ha território rupi, jepe ojeʼe hesekuéra ‘naiñaranduiha’ (Hech. 4:13).
Umi mbaʼe porã jahupytýva Cristo rupive
16. Mbaʼépa oñepromete Génesis 22:18-pe?
16 Jehová oprometevaʼekue Abrahánpe: “Opa tetã ko yvy arigua ojehovasáta ne ñemoñare rupi, rejapo haguére haʼevaʼekue ndéve” (Gén. 22:18). Ko promésa ohechauka jahayhúramo Jehovápe jahupytytaha heta mbaʼe porã pe Ñemoñare Jesucristo rupive. Ha ñanemanduʼávo koʼã mbaʼére ñanekyreʼỹve rei ñañemeʼẽmbaite hag̃ua Jehová servísiope.
17, 18. Mbaʼépa opromete Jehová Deuteronomio 28:2-pe, ha mbaʼépa heʼise upéva?
17 Umi isrraelíta ningo Abrahán familiare ha Ñandejára opromete chupekuéra: ‘Peneñeʼẽrendúramo Jehová pende Járape pehupytýta koʼã mbaʼe porã [oĩva pe Léipe] Haʼe omeʼẽva’ (Deu. 28:2). Ko promésa oñekumpli avei ko tiémpope. Upéicharõ nde reipotáramo Jehová nderovasa ‘neñeʼẽrenduvaʼerã’ chupe. Rejapóramo péicha ‘rehupytýta umi mbaʼe porã haʼe omeʼẽva’. Péro mbaʼéichapa jahechauka ‘ñaneñeʼẽrenduha’ Jehovápe?
18 Upearã tekotevẽ ñamombaʼe Ñandejára Ñeʼẽ ha opa mbaʼe omeʼẽva pe tembiguái jeroviaha (Mat. 24:45). Tekotevẽ avei jajapo Jehová ha Itaʼýra heʼíva. Upévare Jesús heʼivaʼekue: ‘Ndahaʼéi opa heʼíva: “Che jára, che jára” oikétava pe rréino yvagapeguápe. Oikéta guei umi ojapóva che Ru yvagapegua rembipota’ (Mat. 7:21, NM). Ñaneñeʼẽrendu hag̃ua Ñandejárape vyʼápe jarrespetavaʼerã opa mbaʼe haʼe omohendáva iñorganisasiónpe. Omoakã hag̃ua kongregasión Jehová omoĩ umi ansiáno. Koʼãva haʼe ‘jopói’ oúva Ñandejáragui (Efe. 4:8).
19. Mbaʼépa jajapovaʼerã Jehová ñanevendesi hag̃ua?
19 Umi ‘jopói’ Ñandejára omeʼẽva apytépe oĩ umi ermáno Cuerpo Gobernantepegua, haʼekuéra orrepresenta entéro kongregasión (Hech. 15:2, 6). Ñanemanduʼáke ko mbaʼére: Jesús ñandehusga vove pe jehasa asy guasúpe ohecháta mbaʼéichapa jatratáraʼe iñermanokuérape (Mat. 25:34-40). Upévare, Jehová ñanevendesi hag̃ua tekotevẽ ñambaʼapo kyreʼỹ umi unhído ndive.
20. a) Mbaʼépa ojapovaʼerã umi ansiáno? b) Mbaʼéichapa jahechaukáta ñamombaʼeha koʼã ermánope?
20 Umi ermáno oĩva comité de sucursálpe, superintendénte ha umi ansiáno kongregasionpegua haʼe avei jopói oúva Jehovágui ha ojeporavóva espíritu sánto rupive (Hech. 20:28). Haʼekuéra ñanepytyvõvaʼerã ikatu hag̃uáicha ‘jahupyty peteĩ jeroviánte ha jaikuaa porã Ñandejára Raʼýpe, oiko hag̃ua ñandehegui yvypóra hekopeteguáva ha kristiáno añetete’. Péva hína pe tembiapo tuichavéva oñemeʼẽva chupekuéra (Efe. 4:13, JMP). Añetehápe koʼã ansiáno iñimperfékto ñandéicha. Péro vyʼápe ñañemoĩramo ipoguypekuéra, Jehová katuete ñanderovasáta (Heb. 13:7, 17).
21. Mbaʼérepa tekotevẽterei ñaneñeʼẽrendu Jesúspe?
21 Koʼẽrõite Jesús ohundíta ko múndo vaiete ha ñande rekove opytáta ipópe. Mbaʼérepa? Jehová omoĩ rupi chupe ogueraha hag̃ua pe “aty guasu” “yvu oporomoingovéva” oĩháme (Rev. 7:9, 16, 17, BNP). Upévare, vyʼapópe ñañemoĩvaʼerã Cristo poguýpe. Haʼe hína pe mburuvicha Jehová ombokatupyrýva ijespíritu rupive.
Mbaʼépa ñanemboʼéraʼe koʼã téysto?
[Porandu ñahesaʼỹijóva]
[Nóta oĩva taʼanga ndive páhina 17]
Jesús ohechauka oporoporiahuverekoha omoingove jeýrõ guare Jairo rajyʼípe
[Nóta oĩva taʼanga ndive páhina 18]
Jesús ñanemoakã ñamoherakuã hag̃ua pe marandu porã oparupiete