Umi ijedáva oservi avei Ñandejárape

Málagape (sur de España gotyo), 19 de diciembre de 2009-pe, ojevautisa peteĩ kuñakarai ha imembykuña, mokõivéva héra Ana. Ha jepeve upe áñope ojevautisa 2.352 tapicha upe tetãme, koʼã mokõi kuña ojapóva entéronte ohecharamoiterei. Mbaʼérepa? Pe kuñakarai oreko rupi 107 áño ha imembykuña katu 83.

Mbaʼépa omomýi chupekuéra oñemeʼẽ hag̃ua Jehovápe ha ojevautisa? Amo áño 1970 rupi peteĩ ivesína testígo oinvita upe kuñakarai imitãvévape oho hag̃ua Estúdio de Líbrope, ojejapóva upérõ upe testígo rógape. Ohóramo jepe heta vése, haʼe ndaikatúi oservi porã Jehovápe ombaʼapoiterei rupi.

Diez áño haguépe, ifamília apytépe oĩ oñepyrũva ostudia la Biblia ha ojevautisa. Imemby, hérava Mari Carmen, omokyreʼỹ chupe ostudia hag̃ua la Biblia. Péicha haʼe oñepyrũ ohayhu Ñandejárape ha upe rire Mari Carmen avuéla ostudiáma avei la Biblia. Upéicha diez voi ifamiliakuéra apytégui ojevautisa.

Koʼã mokõi kuñakarai ovyʼaiterei ojevautisárõ guare. Upe orekóva 107 áño heʼi voi: “Jehová imbaʼeporãiterei chendive oheja rupi aikuaa chupe”. Imembykuña katu heʼi: “Aservise Jehovápe og̃uahẽ meve pe múndo pyahu, ajapóvo hembipota ha apredikávo opa ikatúva”.

Koʼã ermána viúda omombaʼeterei umi rreunión. Peteĩ ansiáno ikongregasiongua heʼi voi: “Haʼekuéra ndofaltái ni peteĩ rreuniónpe. Ha ojejapo jave Ñemañaha Ñehesaʼỹijo katuete okomenta hikuái”.

Ñapensávo mbaʼeichaitépa koʼã ermána ijerovia mbarete, ñanemanduʼa pe viúda oñeñeʼẽvare la Bíbliape, hérava avei Ana. Haʼe ningo ‘nosẽiva voi pe témplogui. Upépe omombaʼeguasu Ñandejárape ára ha ára, oñemboʼe ha oajuna’. Ojapo meme rupi upéva ikatuvaʼekue ohecha Jesúspe imichĩetérõ guare (Luc. 2:36-38, NM). Ko viúda orekóramo jepe 84 áño, ndeʼiséi ijedaitereimaha oservi hag̃ua Jehovápe. Upéicha avei jaʼekuaa itokajakuérare ñane tiempopegua.

Ndépa reguereko avei ne hénte oikuaaséva Ñandejára rembipota? Oĩpa nde territóriope peteĩ karai térã kuñakarai ijedámava ostudiaséva la Biblia? Ñanemanduʼavaʼerã umi ijedáva ikatuha avei oservi Ñandejárape, Ana ha imemby ojapo haguéicha.

[Komentário oĩva páhina 25-pe]

“Jehová imbaʼeporãiterei chendive”

[Komentário oĩva páhina 25-pe]

“Aservise Jehovápe og̃uahẽ meve pe múndo pyahu”