Jajepyʼamongetákena Jehová ojapóvare ñanderehehápe

OÑEMOINGOVE jey riremi Jesúspe, mokõi hemimboʼe oho Jerusaléngui Emaús gotyo. ‘Ha oñeʼẽ aja ohóvo, Jesús oñemboja sapyʼa ha oho hendivekuéra. Umi hemimboʼe katu ndopillái mávapa upe kuimbaʼe. Upévo Jesús heʼi chupekuéra: “Mbaʼe rehe piko peñemongeta pehóvo?”. Upépe haʼekuéra opyta ha mokõivévante hova ñembyasy’. Mbaʼérepa oñembyasýraʼe hikuái? Haʼekuéra ningo ohaʼarõkuri Jesús omosãso chupekuéra Roma poguýgui, péro upéva rangue, ojejuka chupe. Upévare oñeñandu hikuái péicha (Luc. 24:15-21, NM; Hech. 1:6).

‘Upémarõ Jesús oñepyrũ omyesakã chupekuéra Ñandejára Kuatiañeʼẽme heʼíva hese. Oñepyrũ Moisés ohaivaʼekuégui ha avei umi Proféta kuatiañeʼẽgui’. Omomanduʼa chupekuéra oĩ aja ko yvy ape ári oiko hague heta mbaʼe iñimportánteva omombaretevaʼekue hemimboʼekuéra jerovia. Ohendúvo umi mbaʼe Jesús heʼíva chupekuéra ovyʼa jey hikuái. Upe rire, pe pyharépe haʼekuéra heʼi ojupe: ‘Ajeve voi ningo ñañandúraʼe pe ñane korasõ hendytarõguáicha ñandehegui, oñemongetávo ñanendive ha omyesakãvo ñandéve opa mbaʼe oĩva Ñandejára Kuatiañeʼẽme’. (Luc. 24:27, 32, NM.) Mbaʼépa ñanemboʼe ko oikovaʼekue?

Ndoikóiramo umi mbaʼe ñahaʼarõva

Umi mokõi Jesús remimboʼe oñembyasýkuri ndoikóigui upe ohaʼarõvaʼekue. Proverbios 13:12 heʼi voi: ‘Pe mbaʼe oñehaʼarõ aréva ogueru ñembyasy’. Ha péicha avei oiko jepi ñane ermanokuérare, koʼýte umi aréma oservívare Jehovápe. Heta oĩ opensavaʼekue koʼã tiémpope jahasatamaha pe ‘jehasa asy guasu’ ha ñaimetamaha pe múndo pyahúpe (Mat. 24:21; Rev. 7:14). Upéicharõ sapyʼánte ikatu ñañeñandu vai ha ñañembyasy ndoikóigui umi mbaʼe ñahaʼarõva.

Ñanemanduʼavaʼerã umi mokõi Jesús remimboʼe ovyʼa jey hague, Jesús omomanduʼárõ guare chupekuéra umi profesía oñekumplímavare haʼekuéra oikove aja.  Ñande avei jajapóramo upéicha ikatúta javyʼa ha ñañeñandu porã jey. Peteĩ ansiáno ikatupyrýva hérava Michael heʼi: “Ani rejesareko umi mbaʼe Jehová neʼĩravare ojapo, ejesareko uvei umi mbaʼe ojapómavare”. Ajépa iporãite ko konsého!

Umi mbaʼe Jehová ojapómava

Epensamíntena umi mbaʼe porãita Jehová ojapómavare. Jesús heʼivaʼekue: “Añetehápe haʼe peẽme: Pe cherehe ojeroviáva ojapóne avei umi mbaʼe che ajapóva. Ha tuichave mbaʼe katu ojapóne” (Juan 14:12). Ha upeichaite oiko koʼág̃a, ojejapo pe tembiapo tuichaitereíva oñemombeʼúvo pe marandu porã oparupiete! Ohasáma siete millón umi tapicha ojeroviáva ohasataha pe jehasa asy guasu. Neʼĩrava oĩ peichaite peve hetaite tapicha opa tetãygua oservíva Jehovápe! Péicha Jehová okumpli Jesús heʼivaʼekue. Añetehápe, koʼág̃a ojejapo ‘tuichave mbaʼe’ Jesús ojapovaʼekuégui.

Mbaʼépa ojapove Jehová ñanderehehápe? Haʼe oheja heta ñande rapicha ipyʼaporãva osẽ ko múndo añágui ha oike iñorganisasión iporãitévape (2 Cor. 12:1-4). Ejepyʼamongetamína umi mbaʼe porãita Jehová omeʼẽvare ñandéve iñorganisasión rupive. Pór ehémplo, emañamínte pe vivliotéka oĩvare nde rógape térã Salón del Réinope. Ehecha pe Índice de las publicaciones Watch Tower térã ne komputadórape Watchtower Library. Ehendu umi dráma, eñemomanduʼa jey umi mbaʼe porã rehecha ha rehenduvaʼekuére pe aty guasu ohasavaʼekuépe. Epensamínte avei mbaʼeichaitépa javyʼa ñaimévo ñane ermanokuéra apytépe. Aje piko imbaʼeporãite Jehová omeʼẽvo ñandéve heta mbaʼe ñamombareteve hag̃ua ñande jerovia, umíva apytépe ñane ermanokuéra ñanderayhuetéva! Añetehápe jaiko peteĩ vyʼa rendápe.

Pe salmísta David heʼi: ‘Jehová, hetaite mbaʼe porãma niko rejapo. Ndaipóri ndéicha imbaʼeporãva orendive’ (Sal. 40:5). Jajepyʼamongetáramo umi mbaʼe porã Jehová ojapómavare ha ojapótavare ñanderehehápe, ñanekyreʼỹ jeýta ha akóinte jaservíta ñande pyʼaite guive ñande Ru yvagapeguápe (Mat. 24:13).

[Nóta oĩva taʼanga ndive páhina 31]

Jesús oipytyvõ hemimboʼekuérape ojepyʼamongeta hag̃ua Jehová ojapovaʼekuére hesehapekuéra

[Nóta oĩva taʼanga ndive páhina 32]

Eñemomanduʼa jey umi mbaʼe porã rehecha ha rehenduvaʼekuére pe aty guasu ohasavaʼekuépe