‘Jajeroviákena Jehová réra ñanemoʼãtaha’

‘Ahejáta peteĩ tetã oñemomirĩva ha añetehápe ojeroviáta hikuái Jehová réra omoʼãtaha chupekuéra.’ (SOF. 3:12)

1, 2. Mbaʼépa oikóta koʼẽrõitéma ohupytýtava ko yvy tuichakue?

ÑAPENSAMI ñaimeha mombyry ñande rógagui ha ñandejagarra peteĩ ama guasu térã oñepyrũ hoʼa amandáu. Pyaʼeterei ningo jahekáta peteĩ lugár ñañemoʼã hag̃ua, ajépa! Péro peichahágui oúramo tornádo térã huracán jahámante vaʼerã peteĩ óga imbarete porãvape.

² Koʼág̃a oñemoag̃uimbaitéma peteĩ torménta ndaijojaháiva ikatúva ohundipa yvyporakuérape, upéva hína ‘Jehová ára guasu’. “Upe árape [...] oikóta ñehundi opytaʼỹre mbaʼeve”, oikoháicha jepi oĩ jave torménta tuichaitereíva ha hiʼarive ohupytýta ko yvy tuichakue. Péro oĩ peteĩ lugár ikatuha ñañemoʼã (elee Sofonías 1:14-18). Mbaʼépa jajapokuaa ñaime hag̃ua upépe ág̃a oñepyrũ vove ‘Jehová ipochyha ára’?

Ára pochy ouvaʼekue yma

3. Mbaʼe ‘yvytu pochýpa’ ohundirakaʼe umi 10 trívu Israelguápe?

³ Jehová ára oñepyrũta oñehundívo entéro rrelihión japu. Jaikuaa hag̃ua moõpa ñañemoʼãvaʼerã jahechami mbaʼépa oikovaʼekue Ñandejára puévlore yma. Upérõ umi 10 trívu Israelgua omboyke Jehovápe. Ha proféta Isaías (oikovaʼekue síglo 8-pe Jesús ou mboyve) heʼi Ñandejára okastigataha chupekuéra ha ombojoja upéva ‘yvytu pochýre’ ndaikatúiva ojejoko (elee Isaías 28:1, 2). Ko profesía oñekumpli áño 740-pe oúrõ guare umi Asiriaygua ohundipa umi 10 trívu *.

4. Mbaʼéichapa ohupyty Jerusalénpe ‘Jehová ára guasu’?

⁴ Heta tiémpo oñehundi rire Israel oiko jey ambue ‘Jehová ára guasu’. Áño 607-pe Ñandejára oiporu umi Babiloniayguápe okastiga hag̃ua avei Judá ha Jerusalénpe omboyke haguére chupe. Umi hudío ojerovia Egipto ‘omoʼãtaha’ chupekuéra péro reiete ojapo hikuái upéva. Ku amandáu guasúicha umi Babiloniaygua sarambi ojapo chuguikuéra (Isa. 28:14, 17).

5. Mbaʼépa oikóta Ñandejára siervokuéragui oñehundi vove umi rrelihión japu?

⁵ Umi mbaʼe oikovaʼekue ohechauka mbaʼéichapa ojekastigáta ñane tiémpope umi rrelihión heʼíva ijehe kristianoha péro  omboykéva Jehovápe. Avei oñehundipáta ambue rrelihión japu ha péicha opaitétama ‘Babilonia Guasu’. Hapykuéri oñehundíta opa mbaʼe oĩva Satanás múndope. Ñandejára siervokuéra katu ojesalváta oñemoĩgui Jehová poguýpe (Rev. 7:14; 18:2, 8; 19:19-21).

Mbaʼéichapa Jehová oñangareko ñanderehe

6. Mbaʼépa jajapovaʼerã Jehová oñangareko hag̃ua ñanderehe?

⁶ Mbaʼépa jajapovaʼerã koʼág̃ama voi Jehová oñangareko hag̃ua ñanderehe? Jaikuaaháicha haʼe ñanepytyvõ ani hag̃ua mbaʼeve ñanemomombyry chugui. Ha upearã ‘ñamombaʼevaʼerã héra’ ha kyreʼỹme jajapo haʼe heʼíva (elee Malaquías 3:16-18). Péro ndahaʼéi upéva añónte, la Biblia heʼi avei: “Opa ohenóiva [Jehová] réra, ojesalváta” (Rom. 10:13, BNP). Upéicharõ jajesalva hag̃ua tekotevẽ jajerure Jehovápe tañanepytyvõ ha jajerovia hérare. Heta tapicha ipyʼaporãva ohechakuaa voi ñande testígo de Jehová ñanediferenteha jaiporu ha ñamombaʼégui Ñandejára réra, ha jaikuaauka rupi hembipota.

7, 8. Mbaʼéichapa ojesalvavaʼekue umi kristiáno ypykue, ha mbaʼépa ikatu ñaaprende chuguikuéra?

⁷ Jehová ndahaʼéi ku ñanepytyvõnteva ñaime porã hag̃ua hendive. Opromete avei oñangarekotaha ñanderehe ani hag̃ua ñamano. Hesakã hag̃ua ñandéve ko mbaʼe jahechami mbaʼépa oikovaʼekue Jerusalén rehe áño 66-pe. Upérõ umi ehérsito Romaygua oĩva Cestio Galo poguýpe ou ohundipa hag̃uáicha chupekuéra. Jesús heʼimavaʼekue pe jehasa asy guasu ou vove, ‘umi ára oñemombykytaha’ (Mat. 24:15, 16, 21, 22, NM). Upe profesía oñekumpli pe ehérsito ohopa jeýrõ guare ha upéicha umi kristiáno tee ojesalva. Haʼekuéra osẽ pe távagui, ha oĩ ohasavaʼekue rrío Jordán mboypýri ha okañy umi sérrore oĩva kuarahyresẽ gotyo.

⁸ Mbaʼépa ikatu ñaaprende umi kristiáno ypykuégui? Haʼekuéra oho Jehová heʼi haguépe chupekuéra ha ñande upéicha vaʼerã avei. Jaikuaaháicha, ñande testígo de Jehová ñanesarambi oparupiete ko yvy ape ári, upévare ndaikatúi jaha peteĩ hendápente. Upéicharamo jepe ág̃a oñehundi vove umi rrelihión heʼíva ijehe kristianoha, ojesalváta entéro oĩva Ñandejára puévlope, tove tahaʼe umi ‘ojeporavovaʼekue’ oho hag̃ua yvágape térã ambue ovechakuéra. Upearã jajeroviavaʼerã Jehová oñangarekotaha ñanderehe iñorganisasión rupive. La Bíbliape oñembojoja voi ko organisasión peteĩ montáña rehe.

9. Mávapa umi oipotáva Jehová réra opyta tesaráipe? Emombeʼu peteĩ ehémplo.

⁹ Umi rrelihión heʼíva ijehe kristianoha katu oñehundimantevaʼerã. Haʼekuéra pytũmbýpe oreko umi héntepe ha ndaijaʼéi Ñandejára rérare. Yma áño 500 guive 1500 peve oĩvaʼekue Európape heta hendárupi ko téra porãite. Oĩ umi ojehaíva létra evréape (oñehenóiva Tetragrámaton) térã ojehai YHWH (ỹrõ JHVH). Ñandejára réra oñemoĩvaʼekue monédare, lívro ha bibliakuérape, umi óga renondépe ha umi tupaópe tove tahaʼe katóliko térã protestánte. Koʼág̃a katu umi rrelihión kristiána guaʼu nomoĩsevéima Ñandejára réra umi bíbliape ha ndoipotái ojeporu mamove hendápe. Pór ehémplo 29 de junio de 2008 pe Congregación para el Culto Divino y la Disciplina de los Sacramentos onohẽ pe “Carta a las Conferencias Episcopales sobre ‘el Nombre de Dios’”. Upépe pe Iglésia Katólika heʼi ndojeporumoʼãveimaha Ñandejára réra ha oñemoĩtantema ivése “Señór”. Pe Vaticano heʼi avei ndovaleiha ojeporu ko téra umi purahéi ha ñemboʼépe ojejapóva tupaópe. Ambue rrelihionkuéra katu hetaitereípema ombotavy nomboʼéivo mávapa Jehová.

 Ñamomarangatúramo Jehová réra, haʼe oñangarekóta ñanderehe

10. Mbaʼéichapa oñemombaʼeguasu Ñandejára réra ko tiémpope?

¹⁰ Ñande testígo de Jehová ndajajoguaiete ambue rrelihiónpe. Ñamombaʼeguasu, ñambotuicha ha ñamomarangatu Ñandejára réra, ha jaiporu Haʼe oipotaháicha. Jaikuaaháicha Jehová réra heʼise haʼe ikatuha ojapo opa mbaʼe oñekotevẽva ohovasa ha oñangareko hag̃ua ipuévlore. Upévare ovyʼa oĩramo oñemoĩva ipoguýpe. Añetehápe haʼe ‘oikuaa umi hese ojeroviávape’ (Nah. 1:7; Hech. 15:14).

11, 12. Mávapa umi ojeroviavaʼekue Jehová rérare yma, ha mávapa ojapo upéva ñane tiémpope?

¹¹ Judápe ningo yma oĩvaʼekue hetaiterei omboykéva Ñandejárape, upéicharamo jepe oĩ avei ‘ojeroviáva Jehová réra omoʼãtaha chupekuéra’ (elee Sofonías 3:12, 13). Mbaʼépa oiko chuguikuéra ojekastigárõ guare umi hudío iñeʼẽrenduʼỹvape? Ojesalva hikuái oúrõ guare umi Babiloniaygua ojagarra upe tetã ha ogueraha préso heta héntepe. Pór ehémplo Jeremías, Baruc ha Ébed-mélec opytavaʼekue Judápe. Oĩ avei umi ojeguerahavaʼekue Babilóniape péro osegi iñeʼẽrendu Ñandejárape. Ipahápe, áño 539-pe Ciro omoakã umi médo ha pérsape ojagarra hag̃ua Babilonia. Upe riremínte onohẽ peteĩ dekréto heʼíva umi hudío ikatuha oho jey hetãme.

¹² Sofonías heʼi haguéicha, Jehová osalva umi héntepe ha oho jey hikuái Judápe omombaʼeguasu hag̃ua chupe. Upévare Ñandejára ovyʼaiterei hesevekuéra (elee Sofonías 3:14-17). Ko profesía oñekumpli avei ko tiémpope. Oñepyrũ riremi Ñandejára rréino yvágape, Jehová oguenohẽvaʼekue umi unhídope Babilonia Guasúgui. Ha koʼag̃aite peve ovyʼaiterei hesevekuéra.

13. Mbaʼéguipa isãsóma heta tapicha opa tetãygua?

¹³ Umi kristiáno oikótava ko yvy ape ári isãsóma avei umi rrelihión japúgui (Rev. 18:4). Upévare ko tiémpope oñekumpli porãvéma ohóvo Sofonías 2:3 [ÑÑB] heʼíva: “Peheka [Ñandejárape] peẽ peñemomirĩva guive”. Upeichaite, koʼág̃a oĩ tapicha opa tetãygua (tahaʼe umi unhído térã ambue ovechakuéra) ipyʼaporã, oñemomirĩ ha ojeroviáva Jehová réra omoʼãtaha chupekuéra.

Ñandejára réra ndahaʼéi peteĩ amuléto térã kurundu

14, 15. a) Mbaʼépa oiporu jepi umi hénte oimoʼãgui omoʼãtaha chupekuéra mbaʼe vaígui? b) Mbaʼépa ndovaléi jaiporu peteĩ amulétoicha?

¹⁴ Umi oikovaʼekue Jeremías tiémpope oimoʼã pe témplo omoʼãta chupekuéra mbaʼe vaígui haʼeramoguáicha peteĩ amuléto (Jer. 7:1-4). Heta áño upe mboyve umi isrraelíta opensavaʼekue avei pe árka dél pákto oñangarekotaha hesekuéra oñorairõ aja (1 Sam. 4:3, 10, 11). Upéi pe mburuvicha Constantino el Grande omoĩ isoldádo eskudokuérare mokõi létra ojeporúva griégo ñeʼẽme ojehai hag̃ua “Cristo”. Ha upéva ojapo ani hag̃ua ojehu chupekuéra mbaʼeve. Ikatu avei ñamombeʼu ojapovaʼekue pe rréi Gustavo II Adolfo Sueciaygua. Áño 1600 rupi Európape oiko tuicha ñorairõ umi rrelihión káusare, ha ojeʼe haʼe oiporúmi hague peteĩ armaduraichagua orekóva hese tuicha porã pe téra “Iehova” (páhina 7-pe oĩ ifóto).

¹⁵ Oĩ ermáno omombeʼúva umi demónio ojapomoʼã hague hese mbaʼe vai ha ojesalva heʼi hatã rupi Jehová réra. Upéicharamo jepe, ani ñaimoʼã ojehai haguére Ñandejára réra ñande rógape térã ñande kosakuérare ndoikomoʼãiha ivaíva ñanderehe. Ñande ñañemoĩse Jehová poguýpe haʼe ñanemoʼã hag̃ua, péro upéva ndeʼiséi jaikotaha ñamoĩ héra ápe ha pépe.

Mbaʼéichapa ñañemoʼã mbaʼe vaígui koʼág̃a

16. Mbaʼe mbaʼéguipa jajehekýi ñaime rupi Ñandejára puévlope?

¹⁶ Ñande ndajakyhyjéi mbaʼe vaígui ñaĩ  rupi Ñandejára puévlope (Sal. 91:1). Pe ‘tembiguái jeroviaha’ ha umi ansiáno ñanemomarandu ani hag̃ua ko múndo ñandegueraha vai ha ñasẽ Jehová poguýgui (Mat. 24:45-47; Isa. 32:1, 2). Heta vésema ojeʼe ñandéve ani hag̃ua jaiko pláta rapykuéri, ha ñapena rupi koʼã konséhore, jajehekýi heta akãrasýgui. Ojeʼe jepi avei ndovaleiha ñaneateʼỹ Jehová servísiope, cháke upéi ndajajaposemoʼãvéima mbaʼeve chupe g̃uarã. Bíbliape heʼi: ‘Pe tekorei ohundíta ivýrovape. Umi cherendúva katu oikovéta pyʼaguapýpe, okyhyjeʼỹre mbaʼevégui’ (Pro. 1:32, 33). Ani hag̃ua ko múndo ñandegueraha vai ñañehaʼãvaʼerã ñanderekopotĩ tapiaite.

17, 18. Mbaʼéichapa oñepytyvõ hetaiterei tapichápe ojerovia hag̃ua Jehová rérare?

¹⁷ Pe tembiguái jeroviaha ñanemokyreʼỹ avei ñamoherakuã hag̃ua pe marandu porã opárupi ko yvy ape ári, heʼi haguéicha Jesús (Mat. 24:14; 28:19, 20). Sofonías heʼi oikotaha peteĩ mbaʼe oipytyvõtava umi héntepe ojerovia hag̃ua Ñandejára rérare: ‘Upérõ amboʼéta opa tetãme oñeʼẽ hag̃ua peteĩ ñeʼẽ ipotĩva, ikatu hag̃uáicha oñondivepa oiporu Jehová réra ha oservi chupe’ (Sof. 3:9, NM).

¹⁸ Mbaʼépa ko ‘ñeʼẽ ipotĩva’? Péva hína pe añetegua oĩva la Bíbliape ha omombeʼúva ñandéve mávapa Jehová ha mbaʼépa hembipota. Jaiporu ko idióma ipotĩva ñamyesakã jave umi héntepe mbaʼépa Ñandejára rréino ha mbaʼéichapa upéva omopotĩta héra ha ohechaukáta Jehová añoite ikatuha ñanesãmbyhy. Avei jaiporu ñañeʼẽ jave umi mbaʼe porãita ohupytýtavare yvyporakuéra iñeʼẽrendúva. Ñaiméma hetaiterei ñañeʼẽva ko idióma ha ñaipytyvõ heta hetave tapichápe ‘oiporu hag̃ua Jehová réra’ ikatu hag̃uáicha ‘jaservi chupe oñondivepa’. Atyraite kuimbaʼe ha kuña oparupigua ojeroviáma Jehová réra omoʼãtaha chupekuéra (Sal. 1:1, 3).

19, 20. Mbaʼérepa tuicha ojavy umi isrraelíta ojeroviavaʼekue umi tetã ambuére?

¹⁹ Ko múndope heta provléma ijetuʼúva ojahoʼi umi héntepe. Ndoikuaáigui mbaʼépa ojapóta itarovaite oheka oipytyvõvaʼerã chupekuéra. Oĩ ojeroviáva umi goviérnore, ojapo haguéicha umi isrraelíta. Haʼekuéra ojeroviavaʼekue umi mburuvicha ambue tetãygua oipytyvõtaha chupekuéra. Péro oiko haguéicha hesekuéra, koʼág̃a avei umi mburuvicha ndaikatúi oipytyvõ umi héntepe. Ni peteĩ goviérno ni pe Naciones Unidas ndaikatumoʼãi omyatyrõmbaite yvyporakuéra provléma. Ñandevyroitétapa upéicharõ jaikóramo jajerovia umi mburuvicha térã polítikore. La Biblia heʼi umíva omoʼãha hentekuérape péro guaʼu guaʼúnte, upévare ndaideprovéchoi chupekuéra. Heta vésema jahecha añeteha ko mbaʼe, upévare umi ojeroviáva yvypóra goviérnore tuichaiterei opoʼẽta (elee Isaías 28:15, 17).

²⁰ Koʼẽrõitéma ‘Jehová ára guasu’ ojahoʼíta ko yvy ouramoguáicha ñande ári amandáu tuichaicháva. Marãve ndoikói umi  hénte ohóramo oike yvyguýpe térã ipláta hetáramo, ndaikatumoʼãi okañy chugui. Isaías 28:17 heʼi: “Upe kañyha peẽ pehekavaʼekue, japu oĩháme, ohundíta amandáu, ha y oguerahapáta upe peñemoʼãha”.

21. Mbaʼépa jahupytýta jajapóramo ñande téysto ko áñope g̃uarã heʼíva?

²¹ Jehová oñangareko ñanderehe koʼág̃a ha avei ojapóta upéva oñehundívo ko múndo aña. Proféta Sofonías réra heʼise: “Jehová ñanemoʼã”, ha péicha ohechauka ipoguýpe añoite ikatuha ñaime porã. Upévare ñande téysto ko 2011-pe g̃uarã oñenohẽ Sofonías 3:12-gui: ‘Jajeroviákena Jehová réra ñanemoʼãtaha’. Jahecha haguéicha, koʼág̃a ñañemoĩvaʼerã Ñandejára poguýpe ha jajerovia hese ñande pyʼaite guive (Sal. 9:10). Ñanemanduʼa memékena ko promésare oĩva Iñeʼẽme: “[Jehová] réra katu peteĩ óga yvate oñemombarete porãva; hendápe oñanivaʼerã pe hekopotĩva ojesalva hag̃ua” (Pro. 18:10, ÑÑB).

[Nóta]

Ñanemanduʼa hag̃ua

• Mbaʼépa jajapovaʼerã ñañemoĩ hag̃ua Jehová poguýpe koʼág̃ama voi?

• Mbaʼérepa ndajajeroviaivaʼerã umi mburuvicha ñanemoʼãtaha?

• Mávapa ñanemoʼãta ág̃a oñehundi vove ko múndo aña?

[Porandu ñahesaʼỹijóva]

[Nóta oĩva taʼanga ndive páhina 6]

Téysto 2011-pe g̃uarã: ‘Jajeroviákena Jehová réra ñanemoʼãtaha’ (Sofonías 3:12)

[Nóta oĩva taʼanga ndive páhina 7]

Thüringer Landesmuseum Heidecksburg Rudolstadt, Waffensammlung “Schwarzburger Zeughaus”