Jehová ñanemombarete jagueropuʼaka hag̃ua opa mbaʼe

“Ndaipóri chéve g̃uarã ikatuʼỹva [Ñandejára] rupi, upe chemombaretéva.” (FILI. 4:13, BNP)

1. Mbaʼérepa ñande jaservíva Jehovápe jahasa avei heta mbaʼe ijetuʼúva?

ÑANDE jaservíva Jehovápe jahasánte avei heta mbaʼe ijetuʼúva. Mbaʼérepa upéva? Opavave ningo ñaneimperfékto, ha Satanás ha imúndo ndaijaʼéi ñanderehe (Gén. 3:15). Ymaite guive heta tapicha ojopy Jehová siervokuérape ojapo hag̃ua mbaʼe vai, térã opersegi chupekuéra oipotágui oheja ijerovia. Péro Jehová akóinte oipytyvõ opavave hembiguáipe ijespíritu sánto rupive ogueropuʼaka hag̃ua opa mbaʼe.

Oĩ jave ñandepersegíva

2. Mbaʼérepa heta oĩ opersegíva umi ndahaʼéivape irrelihiongua? Mbaʼe rehépa oñembojoja Satanáspe?

² Heta oĩ omyangekói térã ojahéiva hapicháre ndahaʼéi rupi irrelihiongua. Haʼekuéra opersegi chupekuéra ndoipotáigui iñeʼẽrendu ha anivéma hag̃ua oñeʼẽ umi mbaʼe ogueroviávare, péicha ohundise upe rrelihión. Satanás oiporu koʼã mbaʼe heta hendáicha. Upévare, Ñandejára Ñeʼẽme oñembojoja chupe peteĩ león rehe, ñaneraʼã rupi derechoite, ha peteĩ mbóire oĩva kañyhápe ñandesuʼu hag̃ua (elee Salmo 91:13).

3. Mbaʼéichapa Satanás ñaneraʼã?

³ Ojapoháicha peteĩ león pochy, Satanás oporohaʼã derechoite. Upearã oiporu umi hénte añáme oñemboharái hag̃ua kristianokuérare, omoinge kárselpe térã ojokose predikasión (Sal. 94:20). Pe Anuario, omombeʼúva testígo de Jehová ojapóva koʼã tiémpope, ohechauka avei mbaʼe mbaʼépa  ojapo Satanás ohupyty hag̃ua oipotáva. Pór ehémplo, heta hendápe umi rrelihión omoakãva térã polítiko oiko vaisénteva, ombyaty heta tapicha ojahéi hag̃ua Ñandejára siervokuérare. Ha oĩ ermáno ojepersegi rupi noaguantavéiva ha oheja Jehovápe. Avei Satanás ñaneraʼã peteĩ mbói ojapoháicha, ikatu kañyha guive ñandesuʼu ha opoi ivenéno. Ñaimoʼãʼỹre ombyaikuaa ñapensáva ha ñanembotavy jajapo hag̃ua chupe ogustáva. Péicha ñanemokangyse térã oipota jahejaite voi Jehovápe. Péro pe espíritu sánto ñanepytyvõ rupi ikatu jagueropuʼaka koʼã mbaʼe Satanás oiporúva.

4, 5. Mbaʼépa ñanepytyvõta jagueropuʼaka hag̃ua oĩramo oñemoĩva ñanderehe, ha mbaʼérepa? Emombeʼu peteĩ ehémplo.

⁴ Opavave ningo ñanembaretevaʼerã jagueropuʼaka hag̃ua oĩramo ñandepersegíva. Péro jajepyʼapy ha ñapensa reíta mbaʼépa ojapóne umi hénte aña ñandejoko hag̃ua. Avave ndajaikuaái ñane renonderã. Upévare jajesarekovaʼerã umi kristiáno iñeʼẽrendúva ohasavaʼekuére. Heta oĩ ijapytepekuéra oaguantavaʼekue ojepyʼamongeta rupi Ñandejára siervokuéra rembiasakuére oĩva la Bíbliape, Jesús ehémplore ha umi mbaʼe omboʼevaʼekuére. Koʼã mbaʼe oipytyvõiterei chupekuéra ohayhuve hag̃ua Jehovápe ha imbareteve oaguanta hag̃ua opa mbaʼe vai Satanás omoĩva henonderãme.

⁵ Jahechamína ohasavaʼekue mokõi ermána oikóva Maláuipe. Peteĩ hénte aty oipota katuete koʼã ermána ojogua peteĩ tarhéta ojeafilia hag̃ua polítikape. Ndojaposéivo upéva, oinupã, omboi ha heʼi oviolataha chupekuéra. Ha hiʼarive heʼi umi ermáno ombaʼapóva Betélpe ojoguáma hague pe tarhéta. Mbaʼépa ojapo umi ermána? Haʼekuéra heʼi: “Ore ningo Jehovápente romombaʼeguasu ha umi ermáno ojoguáramo jepe umi tarhéta ore ndorojoguamoʼãi, orejukátaramo jepe upévare!”. Upéicha umi hénte ohechakuaa ipyʼaguasuetereiha koʼã ermána, ha opoi chuguikuéra.

6, 7. Mbaʼéichapa Jehová omombarete hembiguaikuérape ojepersegi jave?

⁶ Apóstol Pablo heʼi umi kristiáno Tesalonicaygua oservi hague Jehovápe “heta jehasa asy paʼũme”, upéicharõ jepe ‘ovyʼaha’ hikuái “espíritu sánto” rupive (1 Tes. 1:6). Heta kristiáno ojepersegíva, tahaʼe yma guare térã koʼag̃agua, omombeʼu tuicha ipyʼaguapy hague ijetuʼuve jave. Pe espíritu sánto oñangareko umi mbaʼe opensávare ha ipyʼapykuérare (Gál. 5:22). Upeichaite, Jehová omombarete hembiguaikuérape ogueropuʼaka hag̃ua ohasa asy jave ha omoarandu chupekuéra ombohovái hag̃ua opa mbaʼe vai. *

⁷ Oĩ heta hénte omombaʼéva ohechávo mbaʼéichapa kristianokuéra iñeʼẽrendu Ñandejárape, ojejapóramo jepe hesekuéra heta mbaʼe ivaietereíva. Ohechakuaa ogueropuʼakaha hikuái heta mbaʼe ndaikatumoʼãiva ojapo ijehegui reínte. Apóstol Pedro heʼi porã: “Pevyʼa ambuekuéra pendejaʼóramo Jesucristo réra rehehápe, [Ñandejára] espíritu jajái oĩgui pende ári” (1 Ped. 4:14, ÑÑB). Péicha jahecha oĩtaha ojahéiva ñanderehe jajapógui Ñandejára Ñeʼẽ heʼíva, péro upéva ohechauka Jehová ñandeguerohoryha. Ajépa javyʼaite upe haguére! (Mat. 5:10-12; Juan 15:20.)

Ñande rapichakuéra ñandejopy jave

8. a) Mbaʼérepa ndokyhyjéi Josué ha Caleb ojoavy hag̃ua iñirũnguéragui? b) Mbaʼépa ñanemboʼe Josué ha Caleb ohasavaʼekue?

⁸ Ñande kristianokuéra jahasa asy avei ñande rapichakuéra ñandejopy jave. Péro Jehová espíritu imbaretevéva opa mbaʼégui, ñanepytyvõ jagueropuʼaka hag̃ua oĩ jave oñembohorýva ha oñeʼẽ vaíva ñanderehe,  térã oipotáva jaiko haʼekuéra oikoháicha. Jahechamína Josué ha Caleb ohasavaʼekue. Haʼekuéra ningo oho omangea Canaán yvy diez iñirũnguéra ndive ha upe rire ou omombeʼu ohechavaʼekue. Péro Josué ha Caleb heʼíva tuicha ojoavy umi diez kuimbaʼégui. Mbaʼépa ombopyʼaguasu chupekuéra ojapo hag̃ua upéva? Ñandejára espíritu oipytyvõ chupekuéra ani hag̃ua opensa umi diez opensaháicha (elee Números 13:30 ha 14:6-10, 24).

9. Mbaʼérepa ndajakyhyjéi ñanediferénte hag̃ua?

⁹ Síglo primérope espíritu sánto oipytyvõ umi apóstolpe iñeʼẽrendu hag̃ua Ñandejárape ha ani hag̃ua hoʼa umi mboʼehára japu poguýpe (Hech. 4:21, 31; 5:29, 32). Koʼág̃a rupi heta oĩ ojapónteva hapichakuéra oipotáva ndoikovaiséi rupi avavéndi. Péro ñande kristiáno ndajaikói upéicha, síno jajapo Ñandejára rembipota. Ha ijespíritu sánto ñanemombarete rupi ndajakyhyjéi ñanediferénte hag̃ua chuguikuéra (2 Tim. 1:7). Jahechamína mbaʼéichapa ikatu ñambohovái oĩ jave ñandejopyséva.

10. Mbaʼépa sapyʼánte ijetuʼueterei kristianokuérape g̃uarã?

¹⁰ Heta mitãrusu ndoikuaái mbaʼépa ojapóta ohechávo peteĩ iñamígo hembiapo vaiha. Oimoʼã omombeʼúramo opyta vaitaha hendive ha opensa iporãveha okirirĩnte. Heta vése pe hembiapo vaíva ojopy hapichápe ani hag̃ua omombeʼu mbaʼeve. Péro koʼã mbaʼe ndoikói imitãvarente, kakuaápe jepe ijetuʼu omombeʼu hag̃ua ansiánope peteĩ iñamígo térã ihénte hembiapo vaiha. Upéicharõ, mbaʼépa jajapovaʼerã umícha jave?

11, 12. Mbaʼépa jajapovaʼerã ñane ermáno ojeruréramo ñandéve ñaguerokirirĩ hag̃ua hembiapo vai? Ha mbaʼérepa?

¹¹ Ñamoĩ chupe peteĩ kongregasiónpe oĩha mokõi mitãrusu oñoamigoitéva. Luis oikuaa Carlos oikoha jepi ohecha taʼanga tieʼỹ, upémarõ oipytyvõse chupe ha heʼi oñeʼẽ hag̃ua ansianokuérandi. Cárlospe g̃uarã vyroreieterei upe ojapóva ha heʼi chupe: “Oimérõ nde che amígo, neremombeʼumoʼãi avavépe”. Mbaʼépa ojapóta Luis? Oguerokirirĩtapa ani hag̃ua iñamígo ipochy hese? Katuete opensáne opyta vaitaha, Carlos onegáramo umi ansiánogui hembiapo vai. Upéicharõ jepe ohechakuaa iñamígo oho vaivetaha nomombeʼúiramo, ha ikatu oñemomombyryete Jehovágui. Avei imanduʼa porã Proverbios 29:25 heʼívare: “Yvypóragui jekyhyje, péva peteĩ ñuhã, ha ojeroviáva Ñandejárare oñeguenohẽne jejopy vaígui”. Luis opensa mbaʼépa iporãve Cárlospe g̃uarã, upévare oñembopyʼaguasu ha oñemongeta jey hendive. Haʼe oipotaiterei iñamígo ohechakuaa ojavyha ha omokyreʼỹ chupe oñeʼẽ hag̃ua ansianokuérandi. Omeʼẽ chupe tiémpo ojapo hag̃ua upéva, péro ndojapóiramo heʼi haʼete voi omombeʼutaha (Lev. 5:1).

 ¹² Sapyʼánte ñande avei ikatu jajecha koʼãichagua situasiónpe. Ñepyrũrã ikatu ñane amígo ipochy ñaipytyvõse rupi chupe, péro upe rire ohechakuaáta jajapo hague jajepyʼapýgui hese. Haʼe ohejáramo umi ansiáno oipytyvõ chupe, katuete oagradeséta ipyʼaite guive ñandepyʼaguasu ha jajapo haguére Jehová oipotaháicha. Péro opytáramo ipyʼaro ñanendive, ñañeporanduvaʼerã: “Iporãta piko aguereko chupe che amígoramo?”. Ñanemanduʼavaʼerã iporãveha ñambovyʼa ha ñamotenonde Jehovápe. Upéicha avei umi ohayhúva chupe ñanderayhúta, ñanemombaʼéta ha ñane amígota. Aníkena arakaʼeve ñameʼẽ juruja Satanáspe ombyai hag̃ua kongregasión ha ani ñamoñembyasy pe espíritu sánto. Upéva rangue jahejavaʼerã ñanesãmbyhy ha jajapo ikatúva guive akóinte ipotĩ hag̃ua kongregasión (Efe. 4:27, 30).

Jahasa asy jave

13. Mbaʼe mbaʼépa ñanembohasa asy, ha mbaʼérepa ndajahecharamói koʼã mbaʼe?

¹³ Heta mbaʼe ningo ikatu ñanembohasa asy. Pór ehémplo ñandesogue, ñañemosẽ ñande traváhogui, ñanderasy, ñanehentemano, oiko torménta vai ha umícha. Jaiko peteĩ tiémpo ijetuʼúvape ha ndaikatúi voi jajehekyipaite opaichagua provlémagui (2 Tim. 3:1). Upévare ivai jave ani jajepyʼapyeterei umi mbaʼe jahasávare, Ñandejára espíritu ñanemombaretéta jagueropuʼaka hag̃ua opaichagua jehasa asy.

14. Mbaʼépa oipytyvõ Jóbpe ogueropuʼaka hag̃ua ohasárõ guare heta mbaʼe ijetuʼúva?

¹⁴ Job ohasavaʼekue ojoapykueripa hetaiterei mbaʼe ijetuʼúva. Operdepa imbaʼerepy ha iñamigokuéra ohejapa chupe, omanomba itaʼýra ha itajyrakuéra, haʼe katu hasyete ha hiʼarive hembireko ou ndojeroviavéi Ñandejárare (Job 1:13-19; 2:7-9). Péro ivaivérõ guare hendive, peteĩ mitãrusu hérava Elihú ombopyʼaguapy chupe. Upe rire Jehová ohechauka añeteha umi mbaʼe Elihú heʼíva: “Ehechakuaána umi mbaʼe hechapyrã [Ñandejára] ojapóva” (Job 37:14). Jahechakuaa piko mbaʼépa oipytyvõ Jóbpe ogueropuʼaka hag̃ua ijehasa asy? Haʼe ojepyʼamongeta ohecha hag̃ua mbaʼéichapa Jehová oiporu ijespíritu ha ipuʼaka heta hendáicha (Job 38:1-41; 42:1, 2). Ñande avei jajapóramo upéva tuicha ñanepytyvõta. Katuete ñanemanduʼáne Jehová oñangareko hague ñanderehe jahasa asýrõ guare. Aníkena ñanderesarái upévagui, haʼe koʼag̃aite peve ñanderayhuetereiha.

15. Mbaʼépa oipytyvõ Páblope iñakãguapy ha oikokuaa hag̃ua ijetuʼuve jave?

¹⁵ Apóstol Pablo oservi rupi Ñandejárape heta vése ohasa asy ha haimetemete omano (2 Cor. 11:23-28). Mbaʼépa oipytyvõ chupe iñakãguapy ha oikokuaa hag̃ua ijetuʼuve jave? Haʼe oñemboʼe ha ojerovia mbarete Jehováre. Upévare ohasárõ guare heta mbaʼe vai, ohaivaʼekue: “[Ñandejára] katu chepytyvõ ha chemombarete porã  amyasãi hag̃ua iñeʼẽ porãite opa tetãyguakuérape, ha chepeʼáma pe león jurúgui” (2 Tim. 4:17, ÑÑB). Jahechakuaa upéicharõ apóstol Pablo oñandu hague Jehová oipytyvõha chupe, upévare heʼi avei: “Ani pejepyʼapy mbaʼevére” (elee Filipenses 4:6, 7, 13).

16, 17. Mbaʼéichapa Jehová oipytyvõ hembiguaikuérape ijetuʼu jave? Eiporu pe ehémplo.

¹⁶ Peteĩ prekursóra hérava Roxana ohechakuaa avei Jehová akóinte oñangarekoha hembiguaikuérare. Peteĩ árape upe ermána ojerure ipatrónpe permíso oho hag̃ua aty guasuhápe. Ipatrón heʼi omosẽtaha chupe ndoúiramo ombaʼapo. Upéicharõ jepe, pe ermána ohónte pe aty guasúpe ha ojerure Jehovápe toipytyvõmi chupe ani hag̃ua oñemosẽ itraváhogui, ha upéi opyta ipyʼaguapyve. Og̃uahẽvo lunes, oho ombaʼapo hag̃ua, péro ipatrón omosẽ chupe. Haʼe ojepyʼapyeterei, jepe saʼi oganákuri oikotevẽterei omantene hag̃ua ifamília. Upémarõ oñemboʼe jey Jehovápe. Ohechakuaa mbaʼéichapa Ñandejára omombarete chupe pe aty guasuhápe ha ojerovia avei oipytyvõtaha chupe ohupyty hag̃ua hemikotevẽ. Ohokuévo hógape ohecha peteĩ letréro heʼihápe oñekotevẽha ombovyvykuaáva mákinape. Upémarõ oho oñemongeta pe enkargádo ndive, péro haʼe ohecha pe ermána ndojapokuaaiha gueteri heta mbaʼe. Upéicharõ jepe heʼi ikatuha oho ombaʼapo ha opaga porãve chupe. Roxana ohechakuaa Jehová ohendu hague iñemboʼe. Ha ovyʼaveha katu opredika umi ombaʼapóvape hendive, umíva apytégui cuatro ostudia ha upéi ojevautisa, avei ipatróngui oiko testígo.

¹⁷ Sapyʼánte ikatu ñapensa Jehová nohenduiha ñane ñemboʼe, térã ohendúramo jepe nombohovairiha ñande ñahaʼarõháicha. Ikatu avei ñaimoʼã imbegueha. Péro katuete Haʼe oikuaa porã mbaʼérepa ojapo upéicha, jepe upe riréma ñantende. Aníkena ñanderesarái Jehová arakaʼeve ndohejareimoʼãiha hembiguaikuéra iñeʼẽrendúvape (Heb. 6:10).

Ijetuʼu ha jajepyʼaraʼã jave

18, 19. a) Mbaʼérepa ndajahecharamói jahasa haguére heta mbaʼe vai? b) Mbaʼéichapa ikatu jagueropuʼaka umi mbaʼe vai?

¹⁸ Ñande jaiko peteĩ múndo añáme, upévare katuete jajepyʼaraʼã, ñañeñandu vai, jajepersegi ha ñande rapichakuéra ñandejopy (Juan 15:17-19). Péro espíritu sánto rupive jagueropuʼakáta opa mbaʼe vai ikatúva jahasa Jehová servísiope. Hiʼarive Haʼe ndohejamoʼãi jahasa peteĩ mbaʼe ikatuʼỹva jagueropuʼaka (1 Cor. 10:13). Ha ni mbaʼeveichavérõ nañanderejareimoʼãi (Heb. 13:5). Iñeʼẽ ñanepytyvõ ha ñanemombarete, upévare akóinte jajapovaʼerã heʼíva pype. Avei ijespíritu rupive ikatu omomýi umi ermánope ñanepytyvõ hag̃ua ñaikotevẽve jave.

¹⁹ Jaheka memékena espíritu sánto ñahesaʼỹijóvo la Biblia ha ñañemboʼévo Jehovápe. Iñeʼẽme ningo heʼi voi: ‘Tapeñemombarete Ñandejára puʼakápe, peropuʼaka hag̃ua pasiénsia ha vyʼa reheve’ (Col. 1:11, ÑÑB).

[Nóta]

Mbaʼépa rembohováita?

• Mbaʼépa ñanepytyvõta jagueropuʼaka hag̃ua oĩramo jepe ñandepersegíva?

• Mbaʼépa jajapovaʼerã ñane ermáno ojeruréramo ñandéve ñaguerokirirĩ hag̃ua hembiapo vai?

• Mbaʼérepa jaʼekuaa jagueropuʼakataha jahasa jave heta mbaʼe vai?

[Porandu ñahesaʼỹijóva]

[Nóta oĩva taʼanga ndive páhina 28]

Mbaʼépa ñanemboʼe Josué ha Caleb ehémplo?

[Nóta oĩva taʼanga ndive páhina 29]

Mbaʼéichapa ikatu ñaipytyvõ peteĩ ñane amígope ojapóramo ivaíva?