Umi nomendáiva ikatu oservi porã Ñandejárape

“Upe ikatúva upéicha ojapo, tojapo.” (MAT. 19:12, BNP)

1, 2. a) Mbaʼépa heʼivaʼekue Jesús ha Pablo umi opytávare soltéro? b) Mbaʼérepa heta nomendáivape ijetuʼu ohecha hag̃ua isituasión peteĩ jopóiramo?

ÑANDEJÁRA omeʼẽ ñandéve heta jopói neporãmba jepéva, umíva apytépe pe ñemenda (Pro. 19:14). Upéicharõ jepe, oĩ heta kristiáno nomendáiva ha oikónteva avei vyʼápe. Pór ehémplo Harold, peteĩ ermáno nomendáiva ha orekóva 95 áño, omombeʼu: “Che ningo cherory ha avyʼakuaa che rapichakuérandi, upéicharõ jepe ndakyhyjéi aime hag̃ua cheaño. Oiméne che solterorãnte voi mbaʼe!”.

² Jesucristo ha apóstol Pablo heʼivaʼekue japytáramo soltéro haʼeha avei peteĩ jopói oúva Ñandejáragui (elee Mateo 19:11, 12 ha 1 Corintios 7:7). Péro oĩ nomendáiva ndotopáiguinte iména térã hembirekorã, ndahaʼéi katuete opytaségui haʼeño. Ótro katu heta áño omenda haguépe opyta haʼeño,  ojopoígui térã omanógui peteĩva. Mbaʼére piko upéicharõ jaʼekuaa japytáramo soltéro haʼeha peteĩ jopói oúva Ñandejáragui? Ha mbaʼéichapa ikatu jaaprovecha upéva jaservi porãve hag̃ua Jehovápe?

Peteĩ jopói ijojahaʼỹva

3. Mbaʼe mbaʼépa ikatu ojapo umi nomendáiva itiempove rupi?

³ Umi nomendáiva itiempove jepi, upévare ikatu oñemoag̃uive Jehováre, ombaʼapove iservísiope ha iñamígo hetave (1 Cor. 7:32-35). Opa koʼã mbaʼére heta oĩ odesidíva opyta soltéro térã ohaʼarõve omenda hag̃ua. Péro oĩ avei nomendáiva ndahaʼéi katuete odesidígui upéva, mbaʼépa oipytyvõ umi oĩvape ko situasiónpe? Haʼekuéra oñemboʼe, ojepyʼamongeta ha ohechakuaa Jehová ikatuha oipytyvõ chupekuéra ogueropuʼaka hag̃ua opa mbaʼe. Upéicha rupi odesidi ipyʼaite guive osegitanteha haʼeño (1 Cor. 7:37, 38).

4. Mbaʼérepa umi nomendáiva ikatu oservi Jehovápe ipyʼaite guive?

⁴ Umi soltéro ha soltéra oikuaa porã natekotevẽiha omenda, Jehová ha iñorganisasión omombaʼe ha oguerohory hag̃ua chupekuéra. Haʼe ningo ñanderayhu enterovépe peteĩcha (Mat. 10:29-31). Ha ndaipóri mbaʼeve ni avave ñanemomombyryvaʼerã Imborayhúgui (Rom. 8:38, 39). Upévare, oiméramo ñamenda térã nahániri ikatu jaservi Jehovápe ñande pyʼaite guive.

5. Mbaʼépa tekotevẽ ojapo umi nomendáiva oservi porã hag̃ua Jehovápe?

⁵ Upéicharõ jepe umi nomendáiva tekotevẽ oñehaʼãmbaite oservi porã hag̃ua Jehovápe. Enterove ikatu oaprovecha isoltéro aja ombaʼapove hag̃ua Jehová servísiope, tahaʼe kuimbaʼe, kuña, imitãva, ijedáva, umi odesidíva nomendái térã ndotopáiva iñirũrã. Ñahesaʼỹijomína koʼág̃a umi kristiáno ypykue ehémplo ha jahecha mbaʼépa ñanemboʼe umíva.

Mitãrusu ha mitãkuña nomendáiva

6, 7. a) Mbaʼépa ojapovaʼekue Felipe rajykuéra Ñandejára espíritu rupive? b) Mbaʼépa ojapovaʼekue Timoteo isoltéro aja, ha mbaʼépa ohupyty upévare?

⁶ La Biblia omombeʼu Felipe cuatro itajýra hague, ha koʼã kuñataĩ kyreʼỹme opredika avei itúvaicha (Hech. 21:8, 9). Haʼekuéra oprofetisavaʼekue Ñandejára espíritu rupive, ojeʼéma haguéicha Joel 2:28, 29-pe.

⁷ Timoteo avei oaprovechavaʼekue isoltéro aja oservi porãve hag̃ua Jehovápe. Isy Eunice ha ijavuéla Loida oipytyvõ chupe imitã guive oikuaa hag̃ua “Ñandejára Ñeʼẽ” (2 Tim. 1:5; 3:14, 15). Ha mbohapyvévagui oiko kristiáno amo áño 47 rupi, ovisita ypýrõ guare apóstol Pablo táva Listra. Upéi dos áño haguépe ovisita  jey upe táva, ha Timoteo orekóma 20 áño rupi. Imitã ha ipyahúramo jepe Ñandejára servísiope, umi ansiáno Listra ha Iconiopegua oñeʼẽ porãiterei hese (Hech. 16:1, 2). Upévare Pablo ogueraha chupe iviahekuérape (1 Tim. 1:18; 4:14). Ndajaikuaái ningo omendaparakaʼe Timoteo upe rire, péro jaikuaa porã kyreʼỹme omoirũ hague Páblope ha oservi heta áñore superintendénte ha misionéroramo isoltéro aja (Fili. 2:20-22).

8. Mbaʼépa omokyreʼỹ Juan Márcospe ombaʼapove hag̃ua Jehová servísiope, ha mbaʼépa ohupyty upévare?

⁸ Juan Marcos oaprovechavaʼekue avei isoltéro aja ombaʼapove hag̃ua Jehová servísiope. Isy María, iprímo Bernabé ha haʼe oĩvaʼekue umi kristiáno ypykue Jerusalengua apytépe. Ha oiméne ndahaʼéi la imboriahuetéva hikuái, ajeve oguereko hóga pe távape voi ha peteĩ sirviénta (Hech. 12:12, 13). Upéicharõ jepe, Marcos ndahaʼéi ku opensáva ijehénte, ojapóva chupe ogustávante, térã opytaséva oñemofamília, ombyaty mbaʼerepy ha oiko porã. Mbaʼe piko omokyreʼỹ chupe ombaʼapove hag̃ua Jehová servísiope? Haʼe ningo ojeheʼa meme umi apóstol rehe. Upévare Pablo ha Bernabé heʼírõ guare Márcospe oipytyvõ hag̃ua chupekuéra pe primer viáhe misionálpe, haʼe pyaʼe voi oho hendivekuéra (Hech. 13:5). Upéi oviaha Bernabé ndive ha heta áño rire oipytyvõ avei Pédrope Babilóniape (Hech. 15:39; 1 Ped. 5:13). Ndajaikuaáiramo jepe mboy tiémpopa Marcos opyta soltéro, la Biblia ohechauka haʼe ikyreʼỹ hague Jehová servísiope ha oipytyvõse hapichakuérape.

9, 10. Mbaʼe mbaʼépa ikatu ojapo umi nomendáiva oservi porã hag̃ua Ñandejárape? Emoĩ peteĩ ehémplo.

⁹ Koʼág̃a rupi kongregasiónpe oĩ avei heta mitãrusu ha mitãkuña odesidíva ombaʼapove Jehovápe g̃uarã, Marcos ha Timotéoicha. Haʼekuéra ohechakuaa ikatuha ‘oservi Ñandejárape pyʼapeteĩ reheve’ isoltéro aja (1 Cor. 7:35, BNP). Añetehápe umi nomendáiva ikatu ojapo heta mbaʼe, pór ehémplo prekursorádo, ova oñekotevẽhápe, oaprende ambue idióma, oipytyvõ ojejapo hag̃ua Salón del Reino ha sukursál, oho Escuela de Entrenamiento Ministeriálpe térã ombaʼapo Betélpe. Ha nde mitãrusu térã mitãkuña oiméramo neremendái gueteri, reaprovechapareína rejapo hag̃ua koʼã mbaʼe?

¹⁰ Upéicha ojapovaʼekue Mark, haʼe oñepyrũ iprekursorádo imitãrusúpe, upéi oho Escuela de Entrenamiento Ministeriálpe ha oñemondóma chupe heta tetãme oservi hag̃ua. Ha veinticinco áño oservi rire Jehovápe, haʼe heʼi: “Añehaʼãmbaite aipytyvõ kongregasiónpe: asẽ apredika ermanokuérandi, ajapo visíta de pastoréo, akonvida chupekuéra okaru hag̃ua ógape ha roñembyaty jepi rovyʼa ha romombarete hag̃ua ore jerovia. Hetaite mbaʼe porãma ningo ahasa!”. Jahechaháicha ñaipytyvõramo ñande rapichakuérape javyʼavéta; péicha ojapo jepi umi oiporupaitéva itiémpo oservi hag̃ua Jehovápe (Hech. 20:35). Ha nde mitãrusu térã mitãkuña, tahaʼe haʼéva umi mbaʼe ndegustáva ha rejapokuaáva, ikatuhína reiporu umíva rembaʼapove hag̃ua Jehová servísiope (1 Cor. 15:58).

11. Mbaʼérepa ndovaléi rejapura remenda hag̃ua?

¹¹ Ndépa remendase avei ambue mitãrusu ha mitãkuñáicha? Oiméramo upéicha, nemanduʼákena ndovaleiha rejapura. Apóstol Pablo nemokyreʼỹ rehaʼarõ hag̃ua ‘netyarõ raẽ’ remenda hag̃ua, térã tohasa raẽ ndehegui akãraku rei (1 Cor. 7:36). Reiporavo mboyve ne ména térã ne rembirekorã tekotevẽ rejekuaa porã ndejupe voi ha ndekatupyry hetave mbaʼépe; ha jaikuaaháicha rejapo hag̃ua koʼã mbaʼe reikotevẽ tiémpo. Nemanduʼákena remendávo reñekomprometeha reikove aja entéro ha upéva tuicha mbaʼe hína (Ecl. 5:2-5).

 Kristianokuéra ityarõmava ha nomendái

12. a) Mbaʼépa ojapóraʼe Ana omano rire chugui iména? b) Mbaʼe iporãvapa ohupyty Ana omotenonde rupi Ñandejára rembipota?

¹² Lucas Kuatiañeʼẽme oñemombeʼu Ánagui omano hague iména siete áño omenda haguépe. La Biblia ndeʼíri imembyparakaʼe térã omendase jeýpa raʼe, péro heʼi iviudaha gueteri orekópe 84 áño. Jahechakuaa avei oiporu porã hague itiémpo oñemoag̃uive hag̃ua Jehováre. Haʼe ningo ndofaltáiva témplope, ‘omombaʼeguasu Ñandejárape ára ha ára, oñemboʼe ha oajuna’ (Luc. 2:36, 37, NM). Péicha Ana ohupyty heta mbaʼe porã omotenonde rupi Ñandejára rembipota hekovépe. Pór ehémplo, ohecha Jesúspe michĩrõ guare ha omombeʼu omosãsotaha opavavépe oiko rire chugui pe Mesías (Luc. 2:38).

13. a) Mbaʼérepa jaʼekuaa Dorcas iguápa hague? b) Mbaʼépa ohupytýraʼe Dorcas imbaʼeporã rupi?

¹³ Síglo primérope oĩvaʼekue peteĩ kristiána hérava Dorcas, oikóva Jerusalén noroéste gotyo, peteĩ táva héravape Jope. Haʼe oiméne nomendái ajeve la Bíbliape noñeñeʼẽi iménare. Ko ermána iguápa, ‘imbaʼeporã, oipytyvõ oikotevẽvape’, ojapo ao umi viúdape ha avei ótrope g̃uarã. Upévare opavavénte ohayhueterei chupe. Péro upe rire ou hasyete ha omano, upémarõ umi ermáno ikongregasionpegua ohenoika Pédrope ha ojerure asy chupe omoingove jey hag̃ua ko ermána ojehayhuetévape. Umi oikóva guive upe távape oikuaa oñemoingove jey hague chupe, upévare umíva apytégui heta oĩ ojeroviáva Ñandejárare (Hech. 9:36-42, BNP). Upe rire oiméne Dorcas oipytyvõraʼe avei koʼã ermáno pyahúpe.

14. Mbaʼérepa umi nomendáiva ohechakuaa oñemoag̃uivevaʼerãha Jehováre?

¹⁴ Koʼág̃a rupi oĩ avei heta kristiáno ijedámava ha nomendái, Dorcas ha Ánaicha. Oĩ nomendáiva ndotopáiguinte iñirũrã, ótro katu ojopoi térã opyta rupi viúdo. Ha ndoguerekóigui peteĩ omoirũ ha oipytyvõva chupekuéra, ohechakuaa oñemoag̃uivevaʼerãha Jehováre ha ojeroviave hese (Pro. 16:3). Peteĩ ermána soltéra hérava Silvia ojapóma treinta y ocho áño ombaʼapo hague Betélpe ha ovyʼa ikatu haguére péicha oservi porã Jehovápe. Haʼe heʼi: “Sapyʼánte chemokaneʼõma amokyreʼỹ hague che rapichakuérape, ha añeporandu voi: ‘Chéve piko máva chemokyreʼỹ?’. Péro chemanduʼa Jehová oikuaa porãveha chehegui jepe mbaʼépa aikotevẽ, ha upéva chemoag̃uive hese. Katuete oĩ jepi chemokyreʼỹva, ha sapyʼánte ahaʼarõʼỹve jave”. Ko ermánaicha, enterovéva jajeroviakuaa ñañemoag̃uíramo Jehováre haʼe ñanemombarete ha ñanepytyvõtaha.

15. Mbaʼépa ikatu ojapo umi nomendáiva hetave iñamígo hag̃ua?

¹⁵ Umi nomendáiva ikatu hetave iñamígo (elee 2 Corintios 6:11-13). Peteĩ ermána hérava Jolene, ojapómava treinta y cuatro áño iprekursorádo, heʼi: “Añehaʼã ajeheʼa opavavére, ndahaʼéi cheaveguárente. Ore noromendáivango ikatu rombaʼapove Jehovápe g̃uarã, roipytyvõve ore famíliape, kongregasiónpe ha ore rapichakuérape. Ha koʼẽ koʼẽre avyʼave aime haguére péicha”. Añetehápe opavave oĩva kongregasiónpe omombaʼeterei umi soltéro rembiapo, tahaʼe umi ermáno ijedámava, hasýva, tuvakuéra omongakuaáva haʼeño ifamília térã mitãrusukuéra. Añetehápe javyʼa ha ñañeñandu porãve jatrata porãramo ñande rapichakuérape. Upévare ñañeporanduvaʼerã: “Ikatúpa che avei añehaʼã hetave che amígo?”.

Umi odesidivaʼekue nomendái

16. a) Mbaʼérepa nomendaivaʼekue Jesucristo? b) Mbaʼépa ojapovaʼekue Pablo Jehová servísiope?

¹⁶ Jesús nomendaivaʼekue oikuaágui ojeprepara porã vaʼerãha ojapo hag̃ua pe tembiapo oñemeʼẽva chupe. Avei pyʼỹi oviahámi, ombaʼapo pyharevete guive pytũ  meve, ha ipahápe omano yvyporakuéra rehehápe. Isoltéro rupi ikatu ojapo porãve hembiapo. Upéicha ojapovaʼekue avei apóstol Pablo, haʼe oho mombyrymbyry ha ombohovái heta mbaʼe ijetuʼúva iservísiope (2 Cor. 11:23-27). Ndajaikuaái omendavaparakaʼe Pablo, péro jaikuaa porã oiko rire chugui apóstol odesidi hague opyta haʼeño (1 Cor. 7:7; 9:5). Upévare Jesús ha Pablo omokyreʼỹ umi ikatúvape guive opyta hag̃ua soltéro, ha upéicha ombaʼapove Jehová servísiope. Péro haʼekuéra ndeʼíri jaservi hag̃ua Ñandejárape ndovaleiha ñamenda (1 Tim. 4:1-3).

17. a) Mbaʼépa ojapo heta ermáno osegíva Jesús ha Pablo ehémplo? b) Mbaʼérepa ikatu jaʼe Jehová omombaʼetereiha umi oñehaʼãmbaitévape oservi chupe ipyʼaite guive?

¹⁷ Koʼág̃a oĩ avei odesidíva nomendái oservi porãve hag̃ua Ñandejárape. Pór ehémplo Harold cincuenta y seis áñoma ombaʼapo hague Betélpe, haʼe heʼi: “Ahupytývo diez áño aime hague Betélpe ahecháma heta omendáva osẽ upégui, tahaʼe hasykatúgui térã oñangareko hag̃ua ituvakuérare. Che katu ndarekovéima upe rresponsavilida omanombáma rupi che tuvakuéra. Ha cherakateʼỹgui che servísiore namendaséi”. Upéicha avei peteĩ ermána heta áñorema ojapóva iprekursorádo hérava Margaret, heʼi: “Che ningo heta vése arekovaʼekue oportunida amenda hag̃ua, péro namendái. Ha ndaguerekóigui chejokovaʼerã añehaʼãmbaite aservi porãve Jehovápe, ha añetehápe avyʼa”. Jehová arakaʼeve ndahesaraimoʼãi umi oñehaʼãmbaitévagui oservi chupe ipyʼaite guive, haʼe omombaʼeterei umichaguápe (elee Isaías 56:4, 5).

Embaʼapo memékena Jehovápe g̃uarã

18. Mbaʼéichapa ikatu ñamokyreʼỹ ha ñaipytyvõ solterokuérape?

¹⁸ Ñande jaguerohoryvaʼerã umi soltéro ha soltéra oñehaʼãmbaitévape oservi Jehovápe ipyʼaite guive. Ñamombaʼeterei ojapóva hikuái ha javyʼa oipytyvõ haguére kongregasiónpe. Upévare, jahechaukákena jahayhuha chupekuéra, tahaʼe ‘ñane ermáno, ermána, sy térã memby’ teéicha. Upéicharõ haʼekuéra arakaʼeve noñeñandumoʼãi haʼeño (elee Marcos 10:28-30).

19. Mbaʼéichapa ikatu oiporu porãve itiémpo umi nomendáiva?

¹⁹ Nde oiméramo soltéro térã soltéra, tahaʼe nde redesidígui térã nahániri, hiʼãite oréve umi ehémplo yma guare ha koʼag̃agua nepytyvõ rehechakuaa hag̃ua ikatuha revyʼa neremendáiramo jepe. Ikatu ñambojoja upéva peteĩ jopóire: sapyʼánte oñemeʼẽ ñandéve peteĩ jopói jaipotaitereíva ha ambue katu ñahaʼarõʼỹve jave, oĩ avei umi jaguerohorýva oñemeʼẽrema voi ñandéve ha ótro katu tiémpo rire ae. Ñanderehénte odepende ñamombaʼétapa pe jopói térã nahániri. Péicha avei odepende umi nomendáivare ovyʼa ha omombaʼétapa isituasión. Péro, mbaʼépa ikatu rejapo reservi porãve hag̃ua Jehovápe? Tekotevẽ reñemoag̃ui Hese, rembaʼapo meme iservísiope ha reñehaʼã ne amígo hetave. Upévare, oiméramo remendáma térã repyta soltéro, remombaʼevaʼerã koʼã jopói oúva Ñandejáragui! Ha aníkena nderesarái solterokuéra ikatuha ovyʼa oaprovecháramo upéva oservi porãve hag̃ua Jehovápe.

Nemanduʼápa?

• Mbaʼérepa ikatu jaʼe japytáramo soltéro haʼeha peteĩ jopói oúva Ñandejáragui?

• Mbaʼe iporãvapa ikatu ohupyty umi mitãrusu ha mitãkuñanguéra nomendáiva?

• Mbaʼéichapa umi nomendáiva ikatu oñemoag̃uive Jehováre ha hetave iñamígo?

[Porandu ñahesaʼỹijóva]

[Nóta oĩva taʼanga ndive páhina 18]

Mbaʼépa nde rejaporeína reservi porãve hag̃ua Ñandejárape?