Ñanembojeguarúpa umi mbaʼe vai?

‘Nderechaʼéi umi mbaʼe ivaívare.’ (HEB. 1:9, NM)

1. Mbaʼéichapa heʼi Jesús ojoayhuvaʼerãha hemimboʼekuéra?

JESÚS heʼivaʼekue hemimboʼekuérape mbaʼérepa iporã ojoayhu: “Ko [mandamiénto] ipyahúva aheja peẽme: Pejoayhúkena. Ha che pohayhu haguéicha pejoayhu avei peẽ. Peẽ pejoayhúramo opavave ohechakuaáta peẽ haʼeha che remimboʼe” (Juan 13:34, 35). Péicha ojekuaa entéro ohechavaʼerãha Jesucristo remimboʼekuéra ojoayhuha ha oĩha omano hag̃uáicha iñermáno rehehápe. Jesús heʼi avei chupekuéra: ‘Pehayhu meméke umi penderayhuʼỹvape ha peñemboʼe tapiaite umi penembohasa asývare’ (Mat. 5:44, NM).

2. Mbaʼéguipa jajeguaruvaʼerã?

² Jesús omboʼevaʼekue hemimboʼekuérape mbaʼépa ohayhuvaʼerã ha mbaʼépa ombojeguaruvaʼerã chupekuéra. Ñandejára Ñeʼẽme ojeʼemavaʼekue péicha hese: ‘Rehayhu hustísia ha nderechaʼéi umi mbaʼe ivaívare’. Upéva heʼise Jesúspe ombojeguaru hague umi “mbaʼe vai” (Heb. 1:9. NM; Sal. 45:7, ÑÑB). Péicha ñanemboʼe jahayhu meme vaʼerãha tekojoja ha avei jajeguaruvaʼerãha opa mbaʼe oñemoĩvare Ñandejára léire. Apóstol Juan heʼi porãiterei: ‘Opa ojapóva tembiapo vai naiñeʼẽrendúi Ñandejára léipe, tembiapo vai ningo heʼise upe oñemoĩva Ñandejára léi rehe’ (1 Juan 3:4, ÑÑB).

3. Mbaʼe mbaʼépa ñahesaʼỹijóta koʼág̃a?

³ Maymáva jaservíva Jehovápe ñañeporanduvaʼerã: “Ahechaukápa chembojeguaruha umi mbaʼe oñemoĩva Ñandejára léire?”. Koʼág̃a ñahesaʼỹijóta mbaʼéichapa ikatu jahechauka nañandejaʼeiha umi mbaʼe vaíre. Upearã ñamyesakãta mbaʼéichapa jahechavaʼerã 1) vevída, 2) espiritísmo, 3) tekokyʼa ha 4) mbaʼéichapa jatratavaʼerã umi hembiapo vaíva ha noñembyasýivape.

 Ñañatendékena ani jaʼu rasa vevída

4. Mbaʼéicha rupípa Jesús ikatuvaʼekue oñemoñeʼẽ oimeraẽvape vevídare?

⁴ Ñandejára voi omeʼẽ víno yvyporakuérape, upéicha rupi Jesús hoʼuvaʼekue avei (Sal. 104:14, 15). Péro haʼe arakaʼeve ndoʼurasái (Pro. 23:29-33). Upévare ikatuvaʼekue oñemoñeʼẽ oimeraẽvape ani hag̃ua hoʼu rasa vevída ha ndaipóri ohovaʼapivaʼerã chupe (elee Lucas 21:34). Peteĩ tapicha hoʼu rasáva vevída ikatu ndojejokokuaái ha ojapo heta mbaʼe ivaietevéva. Upévare apóstol Pablo ohaivaʼekue: ‘Ani pekaʼútei, upe rire ndaikatuvéi pejejoko. Tapenerenyhẽ uvei espíritu sántogui’ (Efe. 5:18). Avei oñemoñeʼẽ umi ermána ijedavévape ani hag̃ua oiko hoʼu rasa vevída ha “ikaʼu” (Tito 2:3).

5. Mbaʼe mbaʼépa ñañeporanduvaʼerã jadesidíramo jaʼutaha vevída?

⁵ Jadesidíramo jaʼutaha vevída, tekotevẽ ñañeporandu: “Apensápa avei Jesús opensa haguéicha ha ahecha ivaiha haʼu rasa? Tekotevẽramo añemoñeʼẽ peteĩ ermánope, ikatúnepa aipytyvõ chupe ohekyiʼỹre chéve mbaʼeve? Haʼúpa vevída cheresarái hag̃ua che provlemakuéragui? Upéva añóntepa chejora chekaneʼõ jave? Mboýpa haʼu káda semána? Mbaʼéichapa añeñandu oĩramo ohendukáva chéve haʼu rasamaha? Amoʼãsépa pe ajapóva ỹrõ chepochy voi?”. Ñañemeʼẽtereíramo vevídape ndaikatumoʼãi jajepyʼamongeta jadesidi porã hag̃ua. Upévare ñañatendevaʼerã ani oiko ñanderehe koʼã mbaʼe ha ñañehaʼã akóinte ñañangareko ñapensávare (Pro. 3:21, 22).

Jajehekyivaʼerã espiritísmogui

6, 7. a) Mbaʼe ehémplopa oheja ñandéve Jesús? b) Mbaʼérepa pe espiritísmo isarambi opárupi?

⁶ Oiko aja ko yvy ape ári, Jesús oñemoĩ mbarete vaʼekue Satanás ha idemoniokuérare. Heta vése pe Aña Ruvicha oñehaʼãmbaite oity chupe, péro haʼe akóinte iñeʼẽrendu Jehovápe (Luc. 4:1-13). Avei ojehekýi heta ñuhãgui oikuaa rupi mbaʼéichapa Satanás oiporukuaa oimeraẽ mbaʼe omopensa ha ojapouka hag̃ua chupe ivaíva (Mat. 16:21-23). Jesús oipytyvõ avei hetápe ojei hag̃ua umi demónio poguýgui (Mar. 5:2, 8, 12-15; 9:20, 25-27).

⁷ Áño 1914-pe Jesús oñepyrũ oisãmbyhy yvágape ha omosẽ upégui Satanás ha idemoniokuérape. Upévare koʼág̃a pe Aña Ruvicha oñehaʼãmbaite ‘ombotavy opa yvypórape’ (Rev. 12:9, 10). Upearã oiporu avei pe espiritísmo ha oparupiete umi hénte itarovaite hese. Péro ñande ñañangarekovaʼerã ani hag̃ua jaʼa ko ñuhãme. Mbaʼéichapa ikatu jajapo upéva?

8. Mbaʼépa ñañeporanduvaʼerã jaiporavo mboyve jahecha, jalee ha jahugátava?

⁸ Ñandejára Ñeʼẽ heʼíma ñandéve ivaietereiha pe espiritísmo ha opaite mbaʼe ojoguáva chupe (elee Deuteronomio 18:10-12). Koʼág̃a rupi Satanás ha idemoniokuéra omoinge umi hénte akãme ndaivairiha pe espiritísmo ha upearã oiporu pelíkula, lívro ha videohuégo ohechaukáva koʼã mbaʼe. Upévare tekotevẽ ñañatende  mbaʼépa jaiporavoñaína jahecha, jalee ha jahuga hag̃ua. Oĩ heta pelíkula, prográma osẽva télepe, huégo elektróniko, lívro ha rrevísta ohechaukáva umi orekóva podér ha máhia. Upévare iporã ñañeporandu: “Umi més ohasa ramóvape, aiporavóparaʼe koʼã mbaʼe añentretene hag̃ua? Ahechakuaápa ivaietereiha pe espiritísmo térãpa vyroreínte chéve g̃uarã? Mbaʼépa opensáne Jehová umi mbaʼe aiporavóvare? Ha oimérõ ahecha ku mbaʼeveʼỹrõguáicha, adesidímapa amboykete koʼã mbaʼe?”. Jajapóramo péicha jahechaukáta jahayhuha Jehovápe, ñamombaʼeha hembipota ha ndajahejaiha Satanás ipuʼaka ñapensávare (Hech. 19:19, 20).

Ñahendúkena Jesúspe ha ñanderekopotĩ

9. Mbaʼéichapa peteĩ tapicha ohechauka ohayhuha umi mbaʼe vai?

⁹ Jesús akóinte oiporu Ñandejára Ñeʼẽ ohechauka hag̃ua mbaʼérepa ñanderekopotĩvaʼerã. Haʼe heʼi: ‘Ndapeikuaái piko Ñandejára kuatiañeʼẽme heʼiha Ñandejára ojapórõ guare yvypórape iñepyrũmbýpe, ojapo hague kuimbaʼe ha kuña? Heʼi avei: “Upévare kuimbaʼe ohejavaʼerã itúva ha isýpe ojoaju hag̃ua hembirekóndi, ha oiko mokõivégui peteĩ”. Péicha upe guive haʼekuéra ndahaʼevéima mokõi yvypóra, síno peteĩntema. Upévare, yvypóra ndoipeʼaivaʼerã ojuehegui Ñandejára ombojoajuvaʼekue’ (Mat. 19:4-6). Cristo oikuaa avei umi mbaʼe jahecháva ikatuha opoko ñande pyʼapýre, upévare Sermón del Móntepe heʼivaʼekue: ‘Peẽ peikuaa ojeʼe hague: “Ani reporomoakãratĩ”. Che katu haʼe peẽme, oimeraẽ omañáva peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩ’ (Mat. 5:27, 28, NM). Umi nohendúiva koʼã konsého Jesús omeʼẽvaʼekue saʼi saʼípe ohayhuvéta ohóvo umi mbaʼe vai.

10. Emombeʼu peteĩ ehémplo ohechaukáva umi ohecháva mbaʼe tieʼỹ ikatuha oheja pe vísio vai.

¹⁰ Satanás oipota opavave hekokyʼa ha upémarõ omosarambi opárupi taʼanga tieʼỹ. Oĩramo ohecháva koʼã mbaʼe hasýma oipeʼa hag̃ua iñakãgui ha oĩ opytáva itavyete hese. Upéva oikovaʼekue peteĩ ermánore. Haʼe omombeʼu: “Ahecha jepi pelíkula tieʼỹ ñemiháme. Añepyrũ amoinge che akãme heta mbaʼe vai ha aiméramo jepe kongregasiónpe, apensa upéva nachemokangymoʼãiha. Aikuaa naiporãiha upe ajapóva, ha upéicharõ jepe aimoʼã Jehová oguerohoryha ajapóva iservísiope”. Mbaʼépa oipytyvõ ko ermánope okambia hag̃ua? Haʼe heʼi: “Ijetuʼuetereíramo jepe chéve, añeʼẽ ansianokuérandi che provlémare”. Ko ermáno oñehaʼãmbaite opoi ko vísio vaietégui ha tiémpo rire ohejaitéma. Haʼe omombeʼu: “Aheja rire ko mbaʼe kyʼa, upépe ae añandu che konsiénsia potĩmaha”. Jahechaháicha, ñanembojeguarúramo umi mbaʼe ivaíva, jajeguarúta avei umi lívro, rrevísta ha pelíkula ohechaukávagui mbaʼe tieʼỹ.

11, 12. Mbaʼépa jaikuaavaʼerã jaiporavo mboyve umi músika ñahendútava?

¹¹ Pe músika ha umi mbaʼe heʼíva ipype ikatu opoko ñanderehe ha og̃uahẽ ñane korasõme. Pe purahéi ningo peteĩ jopói oúva Ñandejáragui ha ojeporu yma guive oñemombaʼeguasu hag̃ua chupe (Éxo. 15:20, 21; Efe. 5:19). Péro ko múndope umi purahéi tekovaímante  omombaʼeguasu (1 Juan 5:19). Mbaʼéichapa ikatu jaikuaa noiméipa ñanembyai umi mbaʼe ñahendúva?

¹² Ikatu ñañeporandu: “Mbaʼeichagua músikapa ahendu? Oñeʼẽpa jejuka, ñemoakãratĩ, tekovai térã mbaʼe tieʼỹre? Aleéramo che rapichápe umi mbaʼe heʼíva pe músikape, opensátapa chembojeguaruha umi mbaʼe ivaíva térãpa aguerohoryha?”. Ndaikatúi jaʼe ndajachaʼeiha umi mbaʼe vaíre ñahendúramo músika omombaʼeguasúva koʼã mbaʼe. Aníkena arakaʼeve ñanderesarái Jesús heʼivaʼekuégui: ‘Umi mbaʼe osẽva pende jurúgui ou pene korasõgui, ha umíva penemongyʼa. Yvypóra korasõgui ningo osẽ umi mbaʼe vai, jejuka, ñemoakãratĩ, tekovai, ñemonda, japu, ha ñeʼẽ vai ambuére’ (Mat. 15:18, 19, NM; embojoja heʼívare Santiago 3:10, 11).

Ani jajeheʼa umi hembiapo vaívare

13. Mbaʼéichapa Jesús ohecha umi noñembyasýivape hembiapo vaikuégui?

¹³ Jesús heʼi ou hague oipytyvõ hag̃ua umi hénte añáme ikatu hag̃uáicha ojevy hembiapo vaikuégui (Luc. 5:30-32). Mbaʼéichapa ohecha umi noñembyasýivape? Haʼe ohechauka porã koʼã tapicha ikatuha oporogueraha vai (Mat. 23:15, 23-26). Avei heʼi: ‘Ndahaʼéi ningo opa heʼíva chéve: “Che jára, che jára”, oikétava pe rréino yvagapeguápe. Oikéta guei umi ojapóva che Ru yvagapegua rembipota. Upe árape oĩta heta heʼíva: “Che jára, che jára, ore ningo roñeʼẽ nde rérape ha nde rérape romosẽ umi demóniope ha rojapo heta milágro”’. Koʼãichagua tapicha noñembyasýivape ha ndohejáiva hembiapo vai, Cristo heʼíta: ‘Tapeho koʼágui’ (Mat. 7:21-23, NM). Mbaʼérepa Jesús okondena chupekuéra? Ohechauka rupi hembiapóre nomombaʼeiha Jehovápe ha ogueraha vaígui hapichakuérape.

14. Mbaʼérepa oñemosẽ kongregasióngui umi noñembyasýivape?

¹⁴ Ñandejára Ñeʼẽ heʼi porã oñemosẽvaʼerãha kongregasióngui umi noñembyasýiva ha ndohejaséivape hembiapo vai (elee 1 Corintios 5:9-13). Upéva tekotevẽ ojejapo: 1) ani hag̃ua oñemongyʼa Jehová réra, 2) oñemopotĩ hag̃ua kongregasión ha 3) oñepytyvõ hag̃ua pe hembiapo vaívape ikatu hag̃uáicha oñembyasy.

15. Mbaʼépa tekotevẽ oñeporandu opavave iñeʼẽrenduséva Jehovápe ipyʼaite guive?

¹⁵ Jatratápa Jesús otrata haguéicha umi ndojapóivape Ñandejára léi heʼíva? Opavave iporã ñañeporandu: “Oĩramo oñemosẽva kongregasióngui térã haʼe voi orrenunsia, aikótapa ajeheʼa meme hese? Mbaʼépa ajapóne oñemosẽramo che hénte ndoikovéimava ógape?”. Koʼã mbaʼe ijetuʼueterei jepi ñambohovái hag̃ua ñamotenondeséramo tekojoja ha ñaneñeʼẽrenduséramo Ñandejárape ñande pyʼaite guive. *

16, 17. Mbaʼépa oiko peteĩ ermánare, ha mbaʼépa oipytyvõ chupe iñeʼẽrendu hag̃ua Jehovápe?

¹⁶ Jahechamína mbaʼépa oiko peteĩ ermánare. Haʼe ohecha mbaʼéichapa imemby  kariaʼy saʼi saʼípe oñemomombyry ohóvo Jehovágui. Upéi katu ojapóma mbaʼe vai, ha noñembyasýi rupi oñemosẽmante kongregasióngui. Pe ermána ohayhu Jehovápe, péro ohayhu avei imemby kariaʼýpe. Haʼe oikuaa porã ndovaleiha ojeheʼa hese, upévare hasyeterei chupe okumpli hag̃ua la Biblia heʼíva.

¹⁷ Mbaʼépa ñande jaʼéne pe ermánape? Peteĩ ansiáno oipytyvõ chupe ohechakuaa hag̃ua Jehová ontendeha mbaʼéichapa oñeñandu. Heʼi chupe imanduʼa hag̃ua Ñandejára oñeñandu vaieterei hague opuʼãrõ guare hese heta itaʼýra yvagapegua. Upéicha avei, Jehová oikuaa ijetuʼutaha ñandéve, péro oñemosẽmantevaʼerã kongregasióngui umi noñembyasýivape. Pe ermána omombaʼe koʼã konsého ha ojapo la Bíbliape heʼiháicha. * Katuete Jehová ovyʼaiterei péicha iñeʼẽrendu haguére (Pro. 27:11).

18, 19. a) Mbaʼépa jahechauka ndajajeheʼáivo umi oñemosẽvare kongregasióngui? b) Mbaʼépa ikatu ojehupyty ñaneñeʼẽrendúramo Jehovápe?

¹⁸ Oiméramo jahasa pe ermána ohasavaʼekuére, ani ñanderesarái Jehová ontendeha mbaʼéichapa ñañeñandu. Ndajajeheʼáivo pe oñemosẽ térã orrenunsiávare, jahechaukañaína ñanembojeguaruha umi mbaʼe vai ojapovaʼekue. Jahechauka avei jahayhuha ñande rapichápe ha ñantende ojekorrehi hague oñepytyvõ hag̃uánte chupe. Ñaneñeʼẽrendúramo Jehovápe ikatuhína pe hembiapo vaíva oñembyasy ha oñemoag̃ui jey hese.

¹⁹ Peteĩ ermána oñemosẽvaʼekue kongregasióngui ha upe rire ou jey, omombeʼu: “Chembopyʼarory aikuaágui Jehová ohayhuetereiha iñorganisasión ha upévare ndohejái ikyʼa. Umi ndoservíriva chupe ikatu opensa ipohyietereimaha ñakumpli la Biblia ojeruréva oĩ jave oñemosẽva kongregasióngui. Péro ñande jaikuaa Jehová ojapoha upéva ñanderayhu ha tekotevẽguinte”. Ajépa ko ermána nopensaivaʼerãmoʼã upéicha umi ermáno ha ihentekuéra oikórire ojeheʼa hese. Jajapóramo la Biblia heʼíva ñamombaʼeñaína hustísia ha jahechauka Jehová añoite ikatuha heʼi ñandéve mbaʼépa jajapovaʼerã.

Jajeguarúke “mbaʼe vaígui”

20, 21. Mbaʼérepa tekotevẽ ñañehaʼãmbaite ñamboyke umi mbaʼe vai?

²⁰ Apóstol Pedro heʼi porã ñandéve: “Peikokuaákena ha peñeñangareko”. Mbaʼérepa heʼi péicha? Satanás oiko rupi ‘león pochýicha ñande jerére ha oheka mávapepa hoʼúta’ (1 Ped. 5:8, BNP). Ani hag̃ua jaʼa pe león pochy poguýpe jajeguaruvaʼerã umi mbaʼe vaígui.

²¹ Ñande ñaneimperfékto ha umi hénte oipota ñapensa ñandejehénte, upévare ijetuʼuve ñamboyke umi mbaʼe vai (1 Juan 2:15-17). Péro jaikóramo Jesús oiko haguéicha ha jahayhuve Jehovápe, ñanembojeguarúta opa mbaʼe vai. Upéicharõ, ñañehaʼãmbaitékena ‘ñamboyke umi mbaʼe vai’ ha ani ñanderesarái Jehová oñangarekoha “hekopotĩva ánga rehe, ha oguenohẽ ichupekuéra iñañáva poguýgui” (Sal. 97:10, ÑÑB).

[Nóta]

Mbaʼéichapa ñambohováita?

• Mbaʼépa ñanepytyvõta ani hag̃ua jaʼu rasa vevída?

• Mbaʼépa jajapovaʼerã ani hag̃ua Satanás ñanemoñuhã espiritísmo rupive?

• Mbaʼérepa ndovaléi jahecha mbaʼe tieʼỹ?

• Mbaʼépa jajapovaʼerã oñemosẽramo kongregasióngui peteĩ jahayhúva?

[Porandu ñahesaʼỹijóva]

[Nóta oĩva taʼanga ndive páhina 29]

Mbaʼe mbaʼépa ohechavaʼerã peteĩ kristiáno odesidíva hoʼu vevída?

[Nóta oĩva taʼanga ndive páhina 30]

Ñañatendékena ani Satanás ñanemoñuhã espiritísmo rupive

[Nóta oĩva taʼanga ndive páhina 31]

Mbaʼépa omoinge ipyʼapýpe peteĩ tapicha ohecháva mbaʼe tieʼỹ?