Jahayhúkena Jehová hustísia ñande pyʼaite guive

“Rehayhu hustísia.” (SAL. 45:7, ÑÑB)

1. Mbaʼépa ñanepytyvõta jaguata hag̃ua Ñandejára ‘hustísia rapére’?

ÑANDEJÁRA ñanesãmbyhy ijespíritu sánto ha Iñeʼẽ rupive jaguata hag̃ua “ihustísia rape rehe” (Sal. 23:3, ÑÑB). Péro ñaneimperfékto rupi japia jepi upe tapégui. Upéicha jave tekotevẽ ñañehaʼãmbaite jaguata porã jey hag̃ua. Mbaʼépa ñanepytyvõta upearã? Jahayhuvaʼerã tekojoja ñande pyʼaite guive Jesús ohayhu haguéicha (elee Salmo 45:7).

2. Mbaʼépa heʼise ‘hustísia rape’?

² Oiméne jahechakuaa ojeporuha pe ñeʼẽ ‘hustísia rape’. Mbaʼérepa ojeʼe upéicha? Ko tape ojejapo rupi Ñandejára hustísia ojerureháicha. Evréo ha griégo ñeʼẽme “hustísia” heʼise tekojoja ha ojejapoha hekopete Ñandejára oipotáva. Jehová hína ‘hustísia renda’ ha upévare vyʼápe ñañemoag̃ui hese ikatu hag̃uáicha ñanerekomboʼe ha ñanesãmbyhy hapére (Jer. 50:7, NM).

3. Mbaʼépa jajapovaʼerã jahayhuve hag̃ua pe tekojoja?

³ Ñambovyʼa hag̃ua Jehovápe tekotevẽ jajapo opaite mbaʼe haʼe ojeruréva (Deu. 32:4). Ñepyrũrã jaleevaʼerã la Biblia jaikuaa porã hag̃ua Chupe, upéicha ñañemoag̃uivéta hese ha jahayhuvéta pe tekojoja (Sant. 4:8). Upévare jadesidi hag̃ua umi mbaʼe iñimportantevéva jahecha raẽ vaʼerã mbaʼépa heʼi Iñeʼẽ.

Ñamotenondékena Ñandejára hustísia

4. Mbaʼépa heʼise ñamotenonde Ñandejára hustísia?

⁴ (Elee Mateo 6:33.) Mbaʼépa heʼise ñamotenonde Ñandejára hustísia? Heʼisépa ñamombeʼuntevaʼerãha pe marandu porã? Nahániri. Tekotevẽ avei ñaneñeʼẽrendu Jehovápe koʼẽ koʼẽre, upéicharõmante haʼe ñandeguerohorýta. Umi omotenondéva Ñandejára hustísia omonde ‘pe teko pyahu Ñandejára ojapovaʼekue’ ihustísia rupive (Efe. 4:24).

5. Mbaʼépa ñanepytyvõta ani hag̃ua ñanekangy?

⁵ Ñañehaʼãmbaitéramo jepe jaiko Jehová oipotaháicha, katuete jajavy jepi. Upéicharõ, mbaʼépa ñanepytyvõta ani hag̃ua ñanekangy? Mbaʼépa ñanemomýita akóinte jahayhu ha jajapo hag̃ua Ñandejára hustísia ojerureháicha? (Pro. 24:10.) Ñañemboʼevaʼerã Ñandejárape ára ha ára “pyʼaporã” ha ‘jerovia mbarete reheve’ (Heb. 10:19-22). Enterove jahechaukavaʼerã jajeroviaha Crístore, tahaʼe ohótava yvágape térã oikótava ko yvy ape ári. Haʼe ningo upe ñanemosãsovaʼekue ha ñande Saserdóte Guasu (Rom. 5:8; Heb. 4:14-16). Ko rrevísta osẽ ypýrõ guare julio 1879-pe, omombeʼu tuichaiterei mbaʼeha Cristo ruguy oñohẽvaʼekue ñanemosãso hag̃ua (1 Juan 1:6, 7). Páhina 6-pe osẽvaʼekue ko ehémplo: “Ñamoĩramo peteĩ mbaʼe pytã hesakãhápe ha jaiporu vídrio pytã ñamaña hag̃ua hese, upe mbaʼe pytã haʼetéta morotĩva. Upéicha avei, Cristo ruguy rupive jahecháramo ñane rembiapo vaikue Ñandejára ohechaháicha haʼetéta morotĩva”. Ajépa imbaʼeporãite Jehová ombou haguére Itaʼýra ohayhuetéva omano hag̃ua ñanderehehápe ha péicha ñandesalva! (Isa. 1:18.)

 Jajesareko pe armadúra Jehová omeʼẽvare

6. Mbaʼérepa tekotevẽ jajesareko káda día pe armadúra Jehová omeʼẽvare ñandéve?

⁶ La Biblia heʼi akóinte jarekovaʼerãha ñandejehe pe tekojoja haʼerõguáicha ‘ñande pytiʼamoʼãha’ (Efe. 6:11, 14). Oiméramo jaservi ramónte Jehovápe térã aréma, jajesarekovaʼerã káda día pe armadúra Jehová omeʼẽvare ñandéve. Mbaʼérepa jajapovaʼerã upéva? Satanás ha idemoniokuéra oñemosẽ rupi yvágagui ha koʼág̃a oĩ ko yvy ape ári (Rev. 12:7-12). Haʼe ipochyeterei ha oikuaa saʼipaitemaha itiémpo. Upévare, oñehaʼãmbaite ombyai Ñandejára siervokuérape. Ajépa tekotevẽ jaiporu meme pe tekojoja haʼeramoguáicha ‘ñande pytiʼamoʼãha’!

7. Mbaʼépa jajapóta jahechakuaáramo iñimportanteha pe ‘pytiʼamoʼãha’?

⁷ Ymave umi soldádo oiporu peteĩ pytiʼamoʼãha oprotehe hag̃ua ikorasõ. Péicha avei ñande ñañangarekovaʼerã ñane korasõre ojapoukase rupi ñandéve mbaʼe vaínte (Gén. 8:21). Haʼe ningo ikatu ñanembotavy ha ñandegueraha vai (Jer. 17:9). Upéicha rupi, tekotevẽ ñahekomboʼe ha ñasãmbyhy. Jahechakuaa iñimportanteha jaiporu pe ‘pytiʼamoʼãha’ ha arakaʼeve ndajaipeʼaivaʼerãha. Upévare ndajajapói umi mbaʼe Ñandejárape ndogustáiva ni nañapensái umi mbaʼe ivaívare, ha ndajaiporureíri ñane tiémpo téle renondépe. Upéva rangue, ñañehaʼãmbaite ñambovyʼa Jehovápe opa mbaʼe jajapóva rupive. Péro, mbaʼépa ikatu jajapo ñapensárõ térã jajapóramo ivaíva? Aníkena ñanekangy, Ñandejára ningo ñanepytyvõta jaipeʼa hag̃ua ñane akãgui umi mbaʼe vai (elee Proverbios 24:16).

8. Mbaʼérepa ñande “jerovia” jarekovaʼerã ‘ñande retemoʼãháramo’?

⁸ Jehová omeʼẽ avei ñandéve ñande “jerovia” jareko hag̃ua peteĩ eskúdoicha térã ‘ñande retemoʼãháramo’. Péva añoite ikatu ojoko ha omboguepa ‘umi flécha rendy’ opoíva Satanás (Efe. 6:16). Jajeroviáramo Ñandejárare ha jahayhu chupe ñande pyʼaite guive, ikatúta jaguata pe ‘hustísia rapére’ ha jaikovéta opa ára g̃uarã. Jahayhuvéramo Jehovápe katuete jahayhuvéta ihustísia. Ha mbaʼépa ikatu avei ñanepytyvõ ñamombaʼe hag̃ua Jehová hustísia? Ñane konsiénsia tuicha ñanepytyvõta upearã.

Akóintekena ñane konsiénsia potĩ

9. Mbaʼépa jahupyty ñande pyʼapy potĩramo?

⁹ Jajevautisaha árape ñañemboja Jehová renondépe “jajerure hag̃ua [chupe] taipotĩ ñande pyʼapy” (1 Ped. 3:21). Jajerovia rupi Jesús sakrifísiore, huguy omoʼãta ñane rembiapo vaikue ha ñaime porã jeýta Ñandejára renondépe. Péro jajesalva hag̃ua tekotevẽ akóinte ñandepyʼapypotĩ. Upévare javyʼavaʼerã ñane konsiénsia ñaneatõiramo jajapo mboyve peteĩ mbaʼe, térã ohechaukáramo ñandéve ivaiha pe jajapóva. Mbaʼérepa? Upéicha ojekuaáta ñahekomboʼe porãha ha pyaʼe ñandeavisáta ani  hag̃ua ñamboyke Ñandejára heʼíva (1 Tim. 4:2). Péro, mbaʼéichapa ñane konsiénsia ñanepytyvõ avei jahayhuve hag̃ua Ñandejára hustísia?

10, 11. a) Emombeʼu peteĩ ehémplo ohechaukáva mbaʼérepa iporã ñapena ñane konsiénsia rehe? b) Mbaʼépa jahupyty jaiko haguére Jehová oipotaháicha?

¹⁰ Jajapóramo peteĩ mbaʼe ivaíva, ñane konsiénsia ñandekutu rasy ha ñanemoñeñandu vai. Upéicha oiko peteĩ mitãrusúre oservi ñepyrũme Ñandejárape. Haʼe ou ojepokuaa ohecha pelíkula tieʼỹ ha opita mariguána. Rreunionhápe omyangekói chupe ikonsiénsia hembiapo vaikuére ha osẽ jave predikasiónpe katu ohechakuaa hovamokõiha. Upévare, saʼi saʼípe oñemomombyry Jehovágui. Haʼe heʼi: “Naimoʼãiete ningo peichaite peve cheatõitaha che konsiénsia. Péro, chevyroiterei ha cuatro áño pukukue aikónte upéicha”. Upe rire ko mitãrusu ojepyʼamongeta ha oñemoag̃uise jey kongregasión rehe. Oimoʼãramo jepe Jehová nohendumoʼãiha iñemboʼe, ojerure chupe ombohasa reimínte hag̃ua hembiapo vaikue. Ni diez minúto mboyve isy og̃uahẽ ohóvo hendápe ha omokyreʼỹ chupe oho jey hag̃ua rreunionhápe. Haʼe ojapo upéva ha ojerure peteĩ ansiánope ombostudia jey hag̃ua chupe la Biblia. Upéi ojevautisa, ha koʼág̃a ovyʼaiterei ha oagradese Jehovápe oipeʼa haguére chupe heta mbaʼe vaígui.

¹¹ Ajépa hetaite mbaʼe porã jahupyty jaiko haguére Jehová oipotaháicha! Ñamombaʼéramo Ñandejára Ñeʼẽ ha ñañehaʼã koʼẽ koʼẽre jajapo heʼíva ipype, javyʼaitereíta jaikuaa rupi Ñandejára oguerohoryha opa mbaʼe jajapóva. Ñapensamíntena, koʼẽrõitéma opavave yvypóra ohecháta opa mbaʼe Jehová ohechaháicha ha ipyʼapy potĩta. Upévare koʼág̃ama jajapovaʼerã opa mbaʼe oñekotevẽva jahayhuve hag̃ua Jehová hustísia ha ñambovyʼa chupe (Pro. 23:15, 16).

12, 13. Mbaʼéichapa ñahekomboʼe ñane konsiénsia?

¹² Péro mbaʼéichapa ñahekomboʼe ñane konsiénsia? Jastudiávo Ñandejára Ñeʼẽ, umi puvlikasión oñeʼẽva la Bíbliare ha jajapo Proverbios 15:28-pe heʼíva: “Hekojojáva ojepyʼamongeta”. Pór ehémplo, iporãitereíta jajepyʼamongeta oĩramo peteĩ traváho ndajaikuaáiva iporãpa jajapo. Heta vése tembiguái jeroviaha ha iñarandúva omyesakã ñandéve Ñandejára Ñeʼẽ rupive mbaʼeichagua tembiapópa naiporãi, upévare ndajajapói umíva. Péro nosẽi jave ñane puvlikasiónpe iporã térãpa ivai hína peteĩ tembiapo, jajerurevaʼerã Jehovápe tañanepytyvõ omyesakã hag̃ua ñandéve Iñeʼẽ rupive mbaʼépa iporãve jadesidi. * Pór ehémplo, tekotevẽ ñañatende ani hag̃ua ñamoñepysanga ñande rapichakuérape (1 Cor. 10:31-33). Ha ani ñanderesarái iñimportanteveha ñaime porã Ñandejára ndive. Upévare Jehová ñane amígoramo ñañeporanduvaʼerã:  “Amoñembyasýtapa Jehovápe ko mbaʼe ajapótavare?” (Sal. 78:40, 41).

¹³ Ani ñanderesarái jajepyʼamongetavaʼerãha japrepara jave ñande rrevísta Ñemañaha térã ñande lívro ñahesaʼỹijótava kongregasiónpe. Mbaʼéichapa jajapoñaína koʼã mbaʼe? Jajepokuaápa ñamarkánte pyaʼe pyaʼe? Jajapóramo upéicha nañahekomboʼeporãmoʼãi ñane konsiénsia ha ndajahayhumoʼãi Ñandejára hustísia. Upévare ñahesaʼỹijo porã vaʼerã ha jajepyʼamongeta Ñandejára Ñeʼẽre. Ani ñaimoʼã jastudiáramo vai vaínte og̃uahẽtaha ñane korasõme umi mbaʼe porã oĩva la Bíbliape.

Jahayhúkena hustísia

14. Mbaʼéichapa Jehová ha Itaʼýra oipota ñañeñandu ñande servísiope?

¹⁴ Jehová ha Itaʼýra oipota javyʼa ñande servísiope. Mbaʼépa tekotevẽ jajapo upearã? Jahayhuvaʼerã Ñandejára hustísia. Jesús heʼivaʼekue: ‘Ovyʼavaʼerã umi oipotaitereíva oĩ tekojoja, umívape oñemeʼẽta ojeruréva’ (Mat. 5:6, NM). Mbaʼépa ohechauka ko téysto umi ohayhúvape Ñandejára rape?

15, 16. Mbaʼépa ojapóta Ñandejára umi ohayhúva ihustísia rehehápe?

¹⁵ Ko múndo ningo oĩ Satanás poguýpe (1 Juan 5:19). Oparupiete osẽ diáriope opaichagua mbaʼe vai ojapóva umi hénte ipyʼahatãva. Upévare umi ohayhúva Ñandejára hustísia oñeñandu vai ohechávo mbaʼéichapa yvyporakuéra oñemboharái hapicháre (Ecl. 8:9). Umi ohayhúva Jehovápe ha Iñeʼẽ ohechakuaa haʼémante ikatuha omombarete chupekuéra ijerovia. Koʼẽrõitéma umi hénte aña oñehundipáta ha opa hekojojáva ndohechamoʼãvéima umi mbaʼe vaieta oikóva koʼág̃a rupi (2 Ped. 2:7, 8). Ajépa iporãitéta upéva!

¹⁶ Ñande ñamoirũva Crístope ha jaservíva Jehovápe jaikuaa porã umi ohayhúvape hustísia oñemeʼẽtaha ‘ojeruréva’. Upéva oikóta Ñandejára goviérno poguýpe “oĩtahápe tekojoja” ko yvy ape ári (2 Ped. 3:13, JMP). Upéicha rupi ndajajepyʼapýi ni nañanekangýi jahecháramo jepe oĩha heta oñemboharáiva hapicháre ha ojopýva chupekuéra (Ecl. 5:8). Ñandejára ohecha opa mbaʼe oikóva ha koʼẽrõitéma omosãsóta umi ohayhúvape tekojoja.

Mbaʼépa jahupyty jahayhúgui hustísia

17. Mbaʼépa jahupyty jahayhúgui tekojoja?

¹⁷ Salmo 146:8-pe heʼi: “Ñandejára ohayhu umi hekojojávape”. Jahechakuaa piko mbaʼépa jahupyty avei ñanderekojojáramo? Ko téysto heʼi Jehová ñanderayhuha. Ajépa tuichaite mbaʼe upéva! Upéicha rupi jajeroviakuaa Haʼe omeʼẽtaha ñandéve opa mbaʼe ñaikotevẽva ñamotenonde haguére Irréino (elee Salmo 37:25 ha Proverbios 10:3). Amo ipahápe ko yvy opytáta umi ohayhúvape tekojoja (Pro. 13:22). Ñandejára siervokuéra iñeʼẽrendúva oikovéta opa ára g̃uarã peteĩ múndo pyahu neporãvape. Péro koʼág̃ama voi oiko pyʼaguapýpe, upévare oiko porã hogaygua ha ermanokuéra ndive (Fili. 4:6, 7).

18. Mbaʼépa jajapovaʼerã ñahaʼarõ aja Jehová ára guasu?

¹⁸ Hiʼag̃uimbaitéma ningo Jehová ára guasu, upe aja ñamotenonde meme vaʼerã  ihustísia (Sof. 2:2, 3). Jahechaukavaʼerã jahayhu añeteha Ñandejára rape ha jaiporu ñande ‘pytiʼamoʼãha’ ñañangareko hag̃ua ñane korasõre. Avei tekotevẽ akóinte ñande pyʼapy potĩ, upéicha añoite ikatúta javyʼa ha ñambovyʼáta Jehovápe (Pro. 27:11).

19. Mbaʼépa tekotevẽ akóinte jajapo, ha mbaʼépa jahecháta pe artíkulo oúvape?

¹⁹ Jehová “omaʼẽ opa mbaʼe ko yvy ári ojehúvare, oipytyvõ hag̃ua umi hese añetehápe ojeroviávape” (2 Cró. 16:9). Ajépa tuicha ñanembopyʼaguapy ko téysto! Ñande ningo ñañehaʼãmbaite ñanderekojoja ko múndo añáme, ivai vaivéva ohóvo. Umi hénte oñemomombyry Ñandejáragui ha noimoʼãi jajapoha Jehová oipotáva. Péro ñande jaikuaa ñaneñeʼẽrendúramo oho porãvetaha ñandéve (Isa. 48:17; 1 Ped. 4:4). Upévare tekotevẽ akóinte jahechauka jahayhuha Ñandejára hustísia ñane ánga rugua guive. Péro ñanembojeguaruvaʼerã avei umi mbaʼe ivaíva jahechauka hag̃ua jahayhuha Ñandejárape ñane korasõ mbytete guive. Upéva jahecháta ambue artíkulo oúvape.

[Nóta]

Mbaʼépa ñambohováita?

• Mbaʼérepa ñamombaʼevaʼerã Jesucristo sakrifísio?

• Mbaʼérepa iñimportanteterei pe ‘pytiʼamoʼãha’?

• Mbaʼéichapa ñahekomboʼe ñane konsiénsia?

[Porandu ñahesaʼỹijóva]

[Nóta oĩva taʼanga ndive páhina 26]

Ñahekomboʼéramo ñane konsiénsia jaikuaáta mbaʼeichagua traváhopa naiporãi jajapo