Oñeporandúva jepi

Mbaʼérepa Moisés ipochyeterei Eleazar ha Itamar rehe, omano rire iñermanokuéra Nadab ha Abihú? Ha mbaʼérepa upe rire ipochyjera? (Lev. 10:16-20.)

Jehová omoĩ riremi umi saserdótepe oservi hag̃ua chupe tavernákulope, ojuka Aarón raʼykuérape, Nadad ha Abihú, oiporu haguére “tata ojeporuʼỹvaʼerã Ñandejárape g̃uarã” (Lev. 10:1, 2). Moisés heʼi Eleazar ha Itamárpe ani hag̃ua oñembyasy iñermanokuérare. Upe riremi ipochy hesekuéra ndoʼúi rupi pe kavara mácho roʼo oñekuaveʼẽvaʼekue umi pekádore. Upéva ningo umi saserdóte hoʼuvaʼerã kuri (Lev. 9:3). Mbaʼérepa peichaite ipochy Moisés?

Pe Léi Jehová omeʼẽvaʼekue Moiséspe heʼi pe saserdóte ombaʼekuaveʼẽva pekadokuérare hoʼuvaʼerãha pe sakrifísiogui tavernákulo korapýpe. Hoʼúvo upéva haʼete ku omog̃uahẽva Jehová renondépe umi hénte pekadokuéra. Péro ojegueraháramo pe mymba ruguy lugár Sántope ndojeʼuivaʼerã hoʼokue, síno ojehapyvaʼerã katuete (Lev. 6:24-26, 30).

Nadab ha Abihú omano rire oiméne Moisés oipotáraʼe ojejapo porã opa mbaʼe Jehová heʼi hagueichaite. Ha pe mymba ruguykue ndojeguerahái rupi Jehová renondépe pe lugár Sántope umi saserdóte hoʼuvaʼerã kuri pe sakrifísiogui. Péro Moisés oikuaávo ojehapy hague pe kavara mácho oñekuaveʼẽva pekadokuérare ipochyeterei Eleazar ha Itamár rehe, ha oporandu chupekuéra mbaʼérepa ndojapoporãi hembiapo (Lev. 10:17, 18).

Aarón omombeʼu Moiséspe mbaʼérepa ojapo hikuái upéicha, oiméne haʼe voi heʼi rupi itaʼyrakuérape ani hag̃ua hoʼu pe sakrifísiogui. Upe árape ningo ojejuka mokõi itaʼýrape naiñeʼẽrendúi haguére, upévare Aarón oimoʼãneraʼe ndaipyʼapypotĩriha hikuái hoʼu hag̃ua upéva. Opensáneraʼe Jehová ndoguerohorymoʼãiha ojapóramo hikuái upéicha, ndahaʼéiramo jepe ikausakuérare omanóva Nadab ha Abihú (Lev. 10:19).

Katuete Aarón oipotáneraʼe ojejapo porã opaite mbaʼe upe díape, oñepyrũ rupi ifamília oservi saserdóteramo. Umi mbaʼe michĩvéva jepe ojapo porã vaʼerã hikuái ikatu hag̃uáicha ombopyʼarory Ñandejárape. Péro itaʼyrakuéra, Nadab ha Abihú, ndojapoporãi hembiapo ha nomombaʼéi Jehová réra, upévare Ñandejára ipochyeterei hesekuéra. Oiméne Aarón opensáraʼe ifamiliakuéra opekágui umi ótro saserdóte ndovaleiha hoʼu mbaʼeve imarangatúva.

La Biblia omombeʼu: “Moisés ohendúvo heʼíva Aarón, ipochyjera” (Lev. 10:20). Péicha jahechakuaa Moisés ha Jehová ontende hague mbaʼérepa Nadab ha Abihú ndojapóikuri Ñandejára léi heʼiháicha.