Aníkena ñañembotavy ñandejupe voi

‘MBAʼE piko pe rejapóva’, heʼi Jehová Évape hoʼúrõ guare pe yva oproivivaʼekue chuguikuéra. Eva heʼi chupe: “Pe mbói chembotavy, ha haʼu” (Gén. 3:13, ÑÑB). Satanás ijapukuaaiterei ha oiporu peteĩ mbói ombotavy hag̃ua Évape ha ojapouka chupe Ñandejárape ndogustáiva. Upévare ojeʼe Satanás rehe ‘mbói ypykue ombotavýva opa yvypórape’ (Rev. 12:9).

Génesis kapítulo 3-pe jahecha porã pe Aña Ruvicha oporombotavykuaaitereiha, ha añeterõguáicha heʼi heta mbaʼe ohesarea hag̃ua umi ivýrovape. Upéva ojapo Eva rehe ha hoʼa iñuhãme. Péro Jehová rembiguaikuéra oikuaa oĩha avei ambue mbaʼe ikatúva oity chupekuéra, ndahaʼéi Satanás añónte. Ñandejára Ñeʼẽ heʼi porã ikatuha ‘ñañembotavy ñandejupe voi’ (Sant. 1:22).

Péro, ikatu piko ñañembotavy ñandejupe voi? Nañaimoʼãiramo jepe ikatuhína. Jehová ningo oikuaáguinte heʼi ñandéve. Upéicharõ iporãta jahecha mbaʼéichapa oikokuaa ñanderehe upéva ha mbaʼépa ndovaléi ñapensa. Jahechamína peteĩ ehémplo jatopáva la Bíbliape.

Haʼekuéra voi oñembotavy ijupe

Áño 537 rupi, Jesús ou mboyve, peteĩ rréi Persiaygua hérava Ciro el Grande, oguenohẽ peteĩ léi heʼihápe umi hudío oĩva Babilóniape ikatuha oho jey Jerusalénpe omopuʼã jey hag̃ua pe témplo (Esd. 1:1, 2). Ñandejára oipota haguéicha, un áño haguépe hudiokuéra oñepyrũ omboguapy umi simiénto pe templorã. Vyʼápe omombaʼeguasu hikuái Jehovápe oipytyvõ haguére chupekuéra omoñepyrũ porã hag̃ua pe tembiapo iñimportantetéva (Esd. 3:8, 10, 11). Upe riremínte oĩma oñemoĩva hesekuéra ha oñepyrũ ikangy hikuái (Esd. 4:4). Ha ivaiveha katu, 15 áño rire oho Jerusalénpe umi mburuvicha Persiaygua ha “mbaretépe ojokouka chupekuéra hembiapo” (Esd. 4:21-24).

Upéicha rupi haʼekuéra oñepyrũ oñembotavy ijupe voi ha opensa: ‘Neʼĩra gueteri og̃uahẽ pe ára oñemopuʼã jey hag̃ua Ñandejára róga’ (Ageo 1:2, ÑÑB). Haʼekuéra heʼi Jehová ndoipotaiha gueteri ojejapopa pe témplo. Ohecha rangue mbaʼéichapa ikatu okumpli Ñandejára rembipota, omboykénte hikuái upéva ha oñemoĩ omoporã joa hogakuéra. Upévare proféta Ageo oñemoñeʼẽ pohýi chupekuéra ha heʼi: “Iporãpa peiko óga porãme [Jehová rógagui] oiko aja tapere?” (Ageo 1:4).

Mbaʼépa ñanemboʼe ko ehémplo? Ndahasyieteha ñamboyke Jehová rembipota ha jajapo ñandéve ñandegustávante ndajahechakuaáiramo koʼẽrõitéma oñekumplitaha iñeʼẽ. Ñapensamínte ko mbaʼére: ñamoĩ chupe ñanembohupataha. Katuete ningo jajepreparáta haʼe ou mboyve ikatu hag̃uáicha ñañatende porã hese. Péro mbaʼépa jajapóne jaikuaáramo nog̃uahẽmoʼãiha gueteri? Ndajajapomoʼãvéimapa mbaʼeve?

Umi hudío noñembotavýirire ohechakuaavaʼerãmoʼã Jehová oipotamaha omopuʼãmba hikuái pe témplo. Hiʼarive Zacarías ha Ageo omomanduʼavaʼekue chupekuéra upévare. Ageo heʼi umi hudíope: “Peñemokyreʼỹ joaitéke tetãyguakuéra maymáva, ha pembaʼapo” (Ageo 2:4, ÑÑB). Haʼekuéra tekotevẽvaʼekue ojerovia Jehová oipytyvõtaha chupekuéra ijespíritu sánto rupive ha  oñemoĩ ombaʼapo (Zac. 4:6, 7). Ko ehémplo ñanemboʼe ikatuha tuicha jajavy ñapensáramo nog̃uahẽmoʼãiha gueteri Jehová ára guasu (1 Cor. 10:11).

Jajepyʼamongetáramo Jehová rembipotáre ndajajavymoʼãi

Pedro heʼivaʼekue Jehová orekomaha peteĩ ára omoĩ hag̃ua “yvága ha yvy ipyahúva” (2 Ped. 3:13). Avei heʼi oĩha tapicha opensáva Jehová ndojepyʼapyiha yvyporakuérare ha ndojapomoʼãiha mbaʼeve. Oñembohory voi hikuái ha heʼi ‘ko yvy oĩha iñepyrũmby guaréicha’ (2 Ped. 3:4). Pedro ndoipotái umi ermáno opensa haʼekuéraicha ha heʼi: “Pomokyreʼỹ pepensa hag̃ua hekópe”. Upéicha ohechauka umi hénte oñembohorýva hesekuéra tuichaiterei ojavyha. Ñandejára ningo ohundimavaʼekue umi iñañávape omboúrõ guare pe ama guasu ha osalva umi hekojojávape (2 Ped. 3:1, 5-7).

Áño 520-pe, Jesús ou mboyve, proféta Ageo omokyreʼỹ avei umi hudíope opensa hag̃ua hekópe. Haʼekuéra ikangyvaʼekue ha ohejarei pe tembiapo Jehová omeʼẽva chupekuéra, upémarõ Ageo omombarete iñermanokuérape ha heʼi: ‘Pemaʼẽ porã upe pejapóvare’ (Ageo 1:5). Haʼe oipota ojepyʼamongeta hikuái pe ojapóvare ha omomanduʼa chupekuéra mbaʼépa Jehová rembipota ipuévlope g̃uarã ha umi mbaʼe porã oprometevaʼekue (Ageo 1:8; 2:4, 5). Upéva omokyreʼỹ umi hudíope, ha ojeproivíramo jepe chuguikuéra oñepyrũ jey ombaʼapo pe témplore. Upéi umi iñenemígo ou jey, péro ni upeichavérõ ndohejavéima hikuái hembiapo. Ha amo ipahápe ojepeʼa upe léi ojokovaʼekue chupekuéra ñepyrũrã ha cinco áño haguépe ojejapopáma pe témplo (Esd. 6:14, 15; Ageo 1:14, 15).

Jahechavaʼerã mbaʼéichapa ñaime

Ageo tiémpope, heta hudíope omokangyvaʼekue umi mbaʼe ohasáva ha ñanderehe ikatu avei oiko upéva ha nañanekyreʼỹvéi japredika hag̃ua. Mbaʼépa ikatu ñanemokangy? Heta mbaʼe ojejapóva ko múndope ha ñanembohasa asýva. Proféta Habacuc oñeñandu vai vaʼekue umi mbaʼe ojejapóvare itiémpope, upévare heʼi: “Che Jára, arakaʼe peve piko asapukáita ndéve chepytyvõ hag̃ua ha nacherendumoʼãi? Arakaʼe peve piko asapukáita oĩgui jejuka ha nderejumoʼãi orepeʼa jejopy vaígui?” (Hab. 1:2). Koʼág̃a rupi heta oĩ ndohechakuaáiva mbaʼe tiémpopepa jaikoñaína ha oimoʼã nog̃uahẽmoʼãiha gueteri Jehová ára guasu, upéicha rupi oheka umi mbaʼe ijupe g̃uarãnte oiko porãve hag̃ua. Noiméipa ñande ñapensañaína upéicha? Aníkena ñañembotavy ñandejupe voi. Koʼág̃a koʼýte tekotevẽ ñande jaservíva Jehovápe ‘ñamaʼẽ porã upe jajapóvare’ ha ñañehaʼãmbaite ‘ñapensa hekópe’. Ñañeporandumína: “Chekueráimapa ahaʼarõ hague ko múndo aña oñehundi ha apensa nog̃uahemoʼãiha voi Jehová ára guasu?”.

 La Biblia heʼi ñahaʼarõvaʼerãha

Jahechamína mbaʼépa Cristo heʼivaʼekue jajapovaʼerãha koʼã ára pahápe. Marcos kuatiañeʼẽme ohechauka ko tiémpope tekotevẽha ñañatende porã (Mar. 13:33-37). Upe rire Revelaciónpe, oñeʼẽrõ guare Armagedón rehe heʼi jey tekotevẽha jajesareko porã (Rev. 16:14-16). Mbaʼérepa heʼi joʼa joʼa upéva? Haʼe oikuaa porã ñahaʼarõ puku vove ikatumaha ñanekaneʼõ ha ndajahechakuaavéi mbaʼe tiémpopepa ñaime.

Jesús omoĩ peteĩ ehémplo ohechauka hag̃ua tekotevẽha ñañatende porã koʼã ára pahápe. Omombeʼu peteĩ ógape oike hague mondaha. Pe óga jára ndokéirire, noñemondaivaʼerãmoʼã. Jesús omohuʼãvo ko ehémplo heʼi hemimboʼekuérape: ‘Pehechaukáke peñembosakoʼimaha, peimoʼãʼỹve jave oúta pe Yvypóra Raʼy’ (Mat. 24:43, 44, NM).

Upe ehémplo Jesús oiporuvaʼekue ohechauka tekotevẽha ñahaʼarõkuaa, tahaʼe jepe raʼe heta tiémpore. Ndajajepyʼapyivaʼerã hetáma ñahaʼarõ haguére ha koʼág̃a peve noñehundíri gueteri ko múndo aña. Péro upéicha avei aníkena ñañembotavy ñandejupe voi ha ñapensa ‘neʼĩraha gueteri og̃uahẽ pe ára’ Jehová omoĩvaʼekue. Ñapensáramo upéicha nañanekyreʼỹmoʼãi japredika hag̃ua (Rom. 12:11).

Ñapensákena hekópe

La Biblia ñanepytyvõ ñapensa hag̃ua hekópe. Gálatas 6:7 heʼi: “Aníke peñembotavy pendejupe. [...] Opa umi mbaʼe ñande ñañotỹva, katuete ñamonoʼõ jey vaʼerã avei” (ÑÑB). Pór ehémplo, mbaʼépa oiko ojeheja reíramo peteĩ kokue? Pyaʼeterei ningo iñanandypáta. Upeichaite avei oikóta ñanderehe nañañehaʼãiramo ñapensa hekópe, heñóita ñande pype umi mbaʼe noĩporãiva. Ikatu voi jaʼe: “Che aikuaa ág̃ante outaha Jehová ára guasu, péro chéverõ g̃uarã nog̃uahẽmoʼãi gueteri”. Ñapensáramo péicha ñandekaiguéta, mbeguekatúpe ñamboykéta umi mbaʼe jajapóva Jehovápe g̃uarã ha jajecha vaíta ou vove Ñandejára ára guasu (2 Ped. 3:10).

Ñapensa hag̃ua hekópe akóinte ñañehaʼãvaʼerã ‘jaikuaa Ñandejára rembipota, pe iporãva, pe oguerohorýva ha mbaʼevépe ivaiʼỹva’ (Rom. 12:2). Upearã tekotevẽ jalee Ñandejára Ñeʼẽ káda día. Péicha avei jajeroviavéta Jehová ojapotaha katuete itiempoitépe umi mbaʼe heʼivaʼekue (Hab. 2:3).

Tapiaite ñahaʼarõta ‘og̃uahẽ Ñandejára ára’ jajepokuaáramo ñahesaʼỹijo la Biblia, ñañemboʼe, jaha ñande atyhápe, japredika ha ñanembaʼeporã ñande rapichakuéra ndive (2 Ped. 3:11, 12). Ha Jehová katuete ohechakuaáta upéva, heʼi haguéicha Pablo: “Nañanekaneʼõivaʼerã jajapo hag̃ua iporãva. Nañaneateʼỹiramo, hiʼárape ñamonoʼõne” (Gál. 6:9).

Aníkena ñapensa Jehová imbegueha ha nog̃uahẽmoʼãiha gueteri hiʼára. Koʼýte koʼág̃a ñañemombarete ha ñañembosakoʼivaʼerã, hiʼag̃uimbaitéma ningo Jehová ára guasu.

[Nóta oĩva taʼanga ndive páhina 4]

Ageo ha Zacarías omokyreʼỹ umi hudíope omopuʼã jey hag̃ua pe témplo

[Nóta oĩva taʼanga ndive páhina 5]

Mbaʼépa ojapovaʼerãmoʼã pe óga jára oikuaárire outaha peteĩ mondaha?