Jahejápa espíritu sánto ñanesãmbyhy?

“Nde espíritu sánto tachemboguata tape porãme.” (SAL. 143:10, ÑÑB)

1, 2. a) Mbaʼéichapa Jehová oiporu ijespíritu oipytyvõ hag̃ua hembiguaikuérape? b) Ikatúpa jaʼe espíritu sánto oporopytyvõha ijetuʼu javénte térã ojejapo hag̃ua peteĩ mbaʼe guasúnte? Emyesakã.

MBAʼE rehépa repensa ojeʼe vove pe espíritu sánto oporopytyvõha? Ikatu nemanduʼa Gedeón ha Sansón ojapovaʼekuére (Jue. 6:33, 34; 15:14, 15). Térã repensa mbaʼéichapa ipyʼaguasu umi kristiáno yma guare, avei oipytyvõ hague Estébanpe ombohovái porã hag̃ua umi Sanedringuápe (Hech. 4:31; 6:15). Ñapensáramo ñane tiémpore katu, oiméne ñanemanduʼa mbaʼéichapa vyʼápe oñeime jepi umi Asamblea Internacionálpe. Avei ñanemanduʼa heta ermáno ndohejáivare Jehovápe ojegueraháramo jepe kárselpe ndoikéi haguére polítikape térã ndohói rupi gerrahápe. Hiʼarive jahecha pe marandu porã iñasãiha oparupiete. Koʼã mbaʼe ohechauka porã Ñandejára espíritu oporopytyvõha.

² Heʼisépa upéva pe espíritu sánto oporopytyvõha ijetuʼu javénte térã ojejapo hag̃ua peteĩ mbaʼe guasúnte? Nahániri. La Biblia heʼi kristianokuérare ‘oikoha espíritu sánto oipotaháicha’, ‘espíritu sánto oisãmbyhy chupekuéra’ ha ‘oikoveha espíritu sánto rupi’ (Gál. 5:16, 18, 25). Péicha ohechauka Ñandejára espíritu ikatuha ñanepytyvõ tapiaite. Upévare jajerurevaʼerã Jehovápe ára ha ára toisãmbyhy ijespíritu rupive ñapensáva, jaʼéva ha jajapóva (elee Salmo 143:10). Jahejáramo ñanesãmbyhy opa mbaʼe jajapóvape, katuete ñamombaʼeguasúta Ñandejárape ha ou porãta ñande rapichápe.

3. a) Mbaʼérepa tekotevẽte jaheja espíritu sánto ñanesãmbyhy? b) Mbaʼe porandúpa ñahesaʼỹijóta?

³ Mbaʼérepa tekotevẽte jaheja espíritu sánto ñanesãmbyhy? La Biblia heʼi ‘yvypóra rembipota’ oñemoĩha Ñandejára espíritu rehe ha ñandegueraha vaiseha katuete. Upéva oiko ñanderehe ñaneimperfékto ha jajavy mante rupi (elee Gálatas 5:17). Mbaʼéichapa jaheja pe espíritu sánto ñanepytyvõ? Mbaʼépa jajapovaʼerã ani hag̃ua ñandegueraha vai ‘yvypóra rembipota’? Ñahesaʼỹijomína koʼã porandu ha jahecha avei umi seis mbaʼe porã oúva espíritu sántogui: ‘pasiénsia, mbaʼeporã, pyʼaporã, jerovia, pochyʼỹ ha jejokokuaa’ (Gál. 5:22, 23, NM).

Ndovaléi ñandepochy rei ha ñanepasiensiavaʼerã

4. Mbaʼérepa ñanepasiénsia ha nañandepochyreíriramo jaikóta pyʼaguapýpe kongregasiónpe?

⁴ (Elee Colosenses 3:12, 13.) Ikatu hag̃uáicha jaiko pyʼaguapýpe ermanokuéra ndive, tekotevẽ ñanepasiénsia ha ndovaléi ñandepochy rei. Koʼã mokõi mbaʼe oúva espíritu sántogui ñanepytyvõ jajeko hag̃ua oĩramo ñanderekáva ha ani hag̃ua ñañevenga umi ñandetrata vaívare. Avei ñanemomýi ñandepyʼaporã hag̃ua. Pór ehémplo, jajoavy jave peteĩ ermáno ndive, ñanepasiensiavaʼerã ñasolusiona hag̃ua ñane provléma ha jaiko porã jey oñondive. Añetehápe enterovéva ñaneimperfékto, upévare ndovaléi ñandepochy rei ha tekotevẽ ñanepasiénsia jaiko porã hag̃ua kongregasiónpe.

5. Mbaʼépa ojapo Pablo ha Bernabé, ha mbaʼépa ohechauka ñandéve upéva?

 ⁵ Jahechamína mbaʼépa ojapo Pablo ha Bernabé. Mokõivéva oservi porãiterei vaʼekue Ñandejárape ha heta tiémpoma opredika oñondive. Péro peteĩ jey “tuicha ojoavy hikuái ha ojei ojuehegui” (Hech. 15:36-39, BNP). Upéva ohechauka ñandéve kristianokuéra iñeʼẽrendu ha ikatupyryvéva jepe ikatuha ojoavy. Oikóramo upéicha ñanderehe, mbaʼépa ikatu jajapo ani hag̃ua tuicha jaiko vai vyroreikuére ha upéi ñañemomombyryete ojuehegui?

6, 7. a) Mbaʼe téystopa ñanepytyvõta ani hag̃ua jaiko vai ñane ermáno ndive? b) Mbaʼépa jahupytýta ‘ñanekyreʼỹramo ñahendu hag̃ua, ha ñanembeguérõ ñañeʼẽ ha ñandepochy hag̃ua’?

⁶ La Biblia ohechauka Pablo ha Bernabé peichaháguinte “tuicha ojoavy” hague. Mbaʼépa ñanemboʼe upéva? Ñañemongeta jave peteĩ ermáno ndive ha jahechakuaáramo ñandepochymaha jahávo, iporãve jajapo Santiago 1:19, 20 heʼíva: “Penekyreʼỹvaʼerã pehendu hag̃ua ha penembegue peñeʼẽ ha pende pochy hag̃ua. Pe ipochýva niko ndojapói iporãva [Ñandejára] renondépe”. Upévare, ijáramo ñandéve ikatu ñañeʼẽnte ambue mbaʼére, jaʼe ótrope ñañemongeta jeytaha térã jaʼekuaa jarekoha jajapovaʼerã ha ñasẽ upégui oĩ mboyve huguyrakúva (Pro. 12:16; 17:14; 29:11).

⁷ Mbaʼéichapa ñanepytyvõta jajapóramo koʼã mbaʼe? Ñañehaʼãramo ñandepyʼaguapy raẽ, ñañemboʼe ha jajepyʼamongeta jaikuaa hag̃ua mbaʼépa jaʼéta, jahejañaína espíritu sánto ñanesãmbyhy (Pro. 15:1, 28). Upéicha ñanepasiénsiata ha ndajaikomoʼãi ñandepochy rei, avei ndahasymoʼãi ñakumpli heʼíva Efesios 4:26, 29: “Pendepochýramo, ani peʼa tembiapo vaípe. [...] Anive peneñeʼẽ [ivai]. Peiporu uvei ñeʼẽ iporãva, omombaretéva umi oikotevẽvape, ha oipytyvõva opa ohendúvape”. Ñanepasiénsia ha nañandepochyreíriramo oĩta pyʼaguapy kongregasiónpe ha ojeikóta peteĩ ñeʼẽme.

Ñanembaʼeporã ha ñandepyʼaporãvaʼerã

8, 9. Mbaʼépa heʼise mbaʼeporã ha pyʼaporã, ha mbaʼéichapa ñanepytyvõta ñande rogapýpe?

⁸ (Elee Efesios 4:31, 32; 5:8, 9.) Ajépa ára haku jave tuichaite ñanembopiroʼy pe yvytu vevyimi ha terere roʼysã asy! Upéicha avei ñandepiroʼy asýta ñanembaʼeporã ha ñandepyʼaporãramo ñande rogapýpe. Mbaʼépa heʼise koʼã mokõi mbaʼe oúva espíritu sántogui? “Mbaʼeporã” (benignidad) heʼise jaservi ñande rapichápe ha ñaneñeʼẽrory japorohayhúgui. Avei “pyʼaporã” (bondad) heʼise ñanembaʼerechakuaa ha ñandepojera ñaporopytyvõ  hag̃ua (Hech. 9:36, 39; 16:14, 15). Péro pyʼaporã ndeʼiséi upévante.

⁹ Pyʼaporã heʼise avei jajapovaʼerãha opa mbaʼe hekopete ha upéva ojekuaáta jaiko lájare. Ñamoĩmína peteĩ ehémplo. Ikatu hag̃uáicha jaʼu peteĩ yva tekotevẽ hiʼaju, heʼẽ, iporã ha noñembyairivaʼerã hyepýpe. Upéicha avei ñandepyʼaporãramo opa mbaʼe jaʼe ha jajapóva osẽta ñande pyʼaite guive ha opavave ohechakuaáta ñanderehe.

10. Mbaʼépa ñanepytyvõta ñanembaʼeporã ha ñandepyʼaporã hag̃ua ñande rogapýpe?

¹⁰ Mbaʼépa ñanepytyvõta ñanembaʼeporã ha ñandepyʼaporã hag̃ua ñande rogapýpe? Upearã tekotevẽ jaikuaa porã la Biblia heʼíva (Col. 3:9, 10). Oĩ túva oaprovecháva pe Aty Jastudia Hag̃ua Ñande Rogayguándi ohesaʼỹijo hag̃ua peteĩteĩ umi mbaʼe porã oúva Ñandejára espíritugui. Ndépa ikatu avei rejapo upéicha? Ndahasyiete ningo. Pór ehémplo rehekakuaa ‘mborayhu’ ñane puvlikasionkuérape ha pehesaʼỹijo porã, mbykymi jepe káda semána ha upéicha peho hese. Pestudia jave pehekavaʼerã umi téysto ha pekomenta. Upéi pehecha mbaʼéichapa ikatu pejapo umi mbaʼe peaprendéva ha pejerure Jehovápe tapenepytyvõ upearã (1 Tim. 4:15; 1 Juan 5:14, 15). Ikatútapa upéicha pejogueraha porãve pende rogapýpe?

11, 12. Mbaʼépa ohupyty umi ermáno ohesaʼỹijo rire mbaʼépa heʼise pyʼaporã ha mbaʼeporã?

¹¹ Peteĩ ermáno ha hembireko odesidi ostudia koʼã mbaʼe oúva espíritu sántogui ikatu hag̃uáicha akóinte ojogueraha porã. Mbaʼéichapa oipytyvõ chupekuéra? Pe ermána omombeʼu: “Rontende porãve mbaʼépa heʼise pyʼaporã ha mbaʼéichapa ikatu rohechauka ojupe. Rohechakuaa rojoayhuvaʼerãha ore pyʼaite guive ha upéva orepytyvõ rojotrata porãve hag̃ua. Roaprende ndovaleiha roñemohatã roʼévapente, ha iporãveha roagradesekuaa, roñoperdona ha rojerure diskúlpa tekotevẽramo”.

¹² Ambue ermáno ha hembireko iprovlémava hogapýpe ohechakuaa tekotevẽha imbaʼeporãve oñondive ha upémarõ ohesaʼỹijo mbaʼépa heʼise mbaʼeporã. Mbaʼépa ohupyty hikuái? Pe ermáno omombeʼu: “Roñehaʼã rohechakuaave umi mbaʼe porã rojapóva, ha rojeroviave ojuehe rojesareko rangue ivaívarente. Avei orembaʼerechakuaa ha rojepyʼapyve ojuehe. Che katu ahechakuaa tekotevẽha añemomirĩ ha amokyreʼỹve che rembirekópe omombeʼu hag̃ua mbaʼépa opensa, ha heʼíramo peteĩ mbaʼe ndachegustáiva añehaʼãmbaite ajejoko ani  hag̃ua chepochy. Upéicha saʼi saʼípe rojogueraha porãvéma ha ndoroikovéima rojagarra vai ojuehegui roʼéva guive. Tuicha ningo orepyʼaguapyve upe rire”. Mbaʼépa nde ere, penepytyvõtapa avei pende rogapýpe pehesaʼỹijóramo umi mbaʼe porã oúva espíritu sántogui?

Jahechauka ñande jerovia ñaneañohápe ha opavave renondépe

13. Mbaʼépa ikatu ñandegueraha vai ha ñanemomombyry Jehovágui?

¹³ Ñande jaservíva Jehovápe jahejavaʼerã akóinte pe espíritu sánto ñanesãmbyhy, ñaime jave ñaneaño jepe. Umi vyʼarã ko mundopegua ivaipaite ha oñemosarambi opárupi umi mbaʼe ndovaléiva jahecha. Koʼã mbaʼe ikatu ñandegueraha vai ha ñanemomombyry Jehovágui. Mbaʼépa jajapovaʼerã ani hag̃ua jaʼa ko ñuhãme? Tekotevẽ jasegi ko konsého: ‘Peipeʼa opa mbaʼe kyʼa ha ñaña, ha perohory pyʼaporãme upe ñeʼẽ oñeñotỹvaʼekue pende pyʼapýpe ha ikatúva pendepeʼa ivaívagui’ (Sant. 1:21). Jahechamína mbaʼéichapa pe jerovia oúva espíritu sántogui ñanepytyvõta ñanepotĩ hag̃ua Jehová renondépe.

14. Mbaʼérepa iñimportánte ñande jerovia?

¹⁴ Mbaʼépa heʼise jerovia? Heʼise jaikuaa porãha oĩha Ñandejára. Ndajajeroviáiramo pyaʼeterei jaʼáta tembiapo vaípe. Upéva oikovaʼekue Ezequiel tiémpope. Jehová ohechauka chupe mbaʼeichaitépa heta Israelgua hembiapo vai ñemiháme ha heʼi: “Kuimbaʼe raʼy, rehecha piko mbaʼépa umi omoakãva Israélpe ojapo pytũmbýpe, ikotykuéra henyhẽ taʼangágui. Haʼekuéra ningo heʼi voi: ‘[Ñandejára] nañanderechái, [Ñandejára] opoíma hetãgui’” (Eze. 8:12, ÑÑB). Jahechakuaa piko mbaʼérepa koʼã kuimbaʼe hembiapo vai? Haʼekuéra oimoʼã Ñandejára ndohechaiha chupekuéra, opensa noĩriha upépe.

15. Mbaʼéichapa ñanepytyvõ jaikuaáramo Jehová ñanderechaha?

¹⁵ Ajépa tuichaite idiferénte chuguikuéra José! Oĩramo jepe mombyry ihentekuéragui, nopenái Potifar rembirekóre heʼírõ guare chupe oñeno hag̃ua hendive. Haʼe omombeʼu mbaʼérepa: “Mbaʼéicha piko che ajapóta ko mbaʼe vai tuichaitéva, ha añembohekovaíta [Ñandejára] renondépe?” (Gén. 39:7-9, ÑÑB). José oikuaa porã Jehová oikoveha ha ohechaha chupe. Ñande avei ñapensáramo péicha, arakaʼeve ndajajapomoʼãi mbaʼeve ivaíva ha ndajaikomoʼãi ñamaña mbaʼeveichagua mbaʼe ikyʼávare, ñaiméramo jepe ñaneaño. Ñapensáta David opensa haguéicha: ‘Aikose pyʼapy potĩme che róga ryepýpe. Che resa nomañamoʼãi mbaʼeve ivaíva rehe’ (Sal. 101:2, 3, ÑÑB).

 Jajejokokuaáramo ñañangarekóta ñande pyʼapýre

16, 17. a) Omombeʼuháicha Proverbios, mbaʼéicha rupípa peteĩ ‘mitãrusu ivýrova’ hoʼa mbaʼe vaípe? b) Jahechaháicha páhina 26-pe, mbaʼépa ikatu oiko ñanderehe ñanemitã térã jakakuaapámaramo jepe?

¹⁶ Pe espíritu sánto ñanepytyvõ avei jajejokokuaa hag̃ua, ha jajejokokuaáramo ñamboykéta opa mbaʼe Jehovápe ndogustáiva ha ñañangarekóta ñande pyʼapýre (Pro. 4:23). Proverbios 7:6-23 omombeʼu mbaʼéichapa ‘peteĩ mitãrusu ivýrova’ hoʼa peteĩ kuña rekovai pópe. Pe mitãrusu voi oho ‘ohasa hag̃uáicha pe kuña’ oĩhárupi ha upépe hoʼa iñuháme. Mbaʼére piko haʼe oho upérupi? Oiméne okurioseasevéraʼe, péro oimoʼãʼỹre ojapóma katu peteĩ mbaʼe ikatúva ohundi chupe, ‘oipeʼátava chugui hekove’.

¹⁷ Mbaʼépa tekotevẽ kuri ojapo pe mitãrusu ani hag̃ua hekokyʼa? Ohenduvaʼerãmoʼã ko konsého: ‘Ani reho hapérupi’ (Pro. 7:25). Mbaʼépa ñanemboʼe ko ehémplo? Jaipotáramo Ñandejára espíritu ñanesãmbyhy, jajesareko porã vaʼerã, ndovaléi ñande voi jaheka mbarakaja kupy. Oimeraẽva ikatu oñembotavy ha hoʼa, ‘pe mitãrusu ivýrova’ rehe oiko haguéicha. Pór ehémplo, ikatu ñañemoĩ jahecha téle ha ndajaikuaáigui rei mbaʼépa jahecháta jarova ha jarova umi kanál, térã jaiporu jave Internet jaike opa gotyo rei, peichaháguinte ikatu osẽ mbaʼe tieʼỹ ha ñaimoʼãʼỹre jajepokuaáma katu jahecha pornografía. Upéva katuete omongyʼáta ñane konsiénsia ha ñanemomombyrýta Jehovágui, hiʼarive ikatu ñanerundi (elee Romanos 8:5-8).

18. Mbaʼépa jajapovaʼerã ñañangareko hag̃ua ñande pyʼapýre? Ha mbaʼéichapa ñanepytyvõta upearã jajejokokuaáramo?

¹⁸ Jahecha jave téle térã jaiporúvo Internet osẽramo peteĩ taʼanga tieỹ, aníkena japyta ñamaña hese. Jajejokokuaavaʼerã ha pyaʼe jarova térã ñamboty. Péro iporãve ñamboykéma koʼã mbaʼe jahecha mboyve voi (Pro. 22:3). Jaikuaamavaʼerã mbaʼépa jajapóta sapyʼa rei oĩramo peteĩ mbaʼe ñanepyʼaraʼãva. Pór ehémplo, oĩ omoĩva ikomputadóra enterovéva ohechatahápe oiporu jave. Ambue katu oiporu Internet térã ohecha téle oĩ jave ótrondi, térã odesidi ndoiporuieténte voi Internet (elee Mateo 5:27-30). Upéicharõ, maymáva jaikuaavaʼerã mbaʼépa jajapóta ñañangareko hag̃ua ñandejehe ha ñande rogayguáre ikatu hag̃uáicha ‘ñandepyʼapotĩ, ñane konsiénsia porã ha jajerovia añete’ (1 Tim. 1:5, ÑÑB).

19. Mbaʼéichapa ñanepytyvõ umi mbaʼe porã oúva espíritu sántogui?

¹⁹ Añetehápe umi mbaʼe porã oúva espíritu sántogui tuichaiterei ñanepytyvõ. Ñanepasiénsia ha nañandepochyreíriramo akóinte jaiko pyʼaguapýpe kongregasiónpe. Ñanembaʼeporã ha ñandepyʼaporãramo javyʼa ñande rogapýpe. Jajerovia ha jajejokokuaáramo katu ñanepotĩ Ñandejára renondépe ha ñañemoag̃ui hese. Gálatas 6:8 opromete: “Oñemitỹva espíritupe, upe espíritugui omonoʼõne jeikove opaveʼỹva”. Jesucristo sakrifísio rupive, Jehová oiporúta ipytu marangatu omeʼẽ hag̃ua tekove opaveʼỹva yvypórape. Péro upearã jahejavaʼerã espíritu sánto ñanesãmbyhy.

Ñanemanduʼa hag̃ua

• Mbaʼérepa ñanepasiénsia ha nañandepochyreírirõ ojeikóta pyʼaguapýpe kongregasiónpe?

• Mbaʼépa ñanepytyvõta ñanembaʼeporã ha ñandepyʼaporã hag̃ua ñande rogapýpe?

• Mbaʼéichapa ñanepytyvõ jajerovia ha jajejokokuaáramo ñañangareko hag̃ua ñande pyʼapýre?

[Porandu ñahesaʼỹijóva]

[Nóta oĩva taʼanga ndive páhina 24]

Mbaʼépa ikatu jajapo ani hag̃ua ñanderuguyraku ha jaiko vai?

[Nóta oĩva taʼanga ndive páhina 25]

Ñahesaʼỹijóramo umi mbaʼe porã oúva espíritu sántogui ñanepytyvõta ñande rogapýpe

[Nóta oĩva taʼanga ndive páhina 26]

Mbaʼéguipa jajehekýi jajerovia ha jajejokokuaáramo?