Mbaʼépa Jehová oiporu ñanesãmbyhy hag̃ua?

UMI isrraelíta osẽrõ guare Egíptogui henonderãmekuéra ohovaʼekue peteĩ arai guasu, pyharekue oikóva chugui tatarendy tuicháva. Haʼekuéra ni umi egipcio ndohecháiva gueteri peichagua mbaʼe guasuete! Péro, moõgui piko osẽ? Maʼerãpa ojeporúraʼe? Omombaʼépa umi isrraelíta upéva? Ha mbaʼépa ñanemboʼe koʼág̃a ohasa rire 3.500 áño? (Éxo. 14:24.)

La Biblia omombeʼu maʼerãpa ojejapo ha mávapa omoĩ ko mbaʼe guasuete. Éxodo 13:21, 22 heʼi: ‘Jehová oho henonderãmekuéra arakuépe peteĩ arai guasu rupive, pyharekue oikóva chugui peteĩ tatarendy tuicháva ohesape ha ohechauka hag̃ua chupekuéra haperã, ikatu hag̃uáicha oguata ára ha pyhare’. Péicha jahecha Jehová oiporu hague ko arai térã tatarendy ohechauka hag̃ua umi isrraelítape haperã osẽ ypy guive Egíptogui. Haʼekuéra ohovaʼerã upéva rapykuéri pe desiértore, toho ohoha gotyo. Jehová oiporu avei ko mbaʼe oñangareko hag̃ua hesekuéra, Faraón ha ijehérsito omuñárõ guare chupekuéra (Éxo. 14:19, 20). Ko arai térã tatarendy ndohóiramo jepe hiʼag̃uiveha rupi, umi isrraelíta ohomantevaʼerã hapykuéri og̃uahẽséramo pe yvy oñeprometevaʼekuépe.

Ko arai térã tatarendy ohechauka porã umi isrraelítape Ñandejára oĩha hendivekuéra. Orrepresenta voi Jehovápe ha sapyʼánte oñeʼẽ chupekuéra upe guive (Núm. 14:14; Sal. 99:7). Jehová oiporu ko mbaʼe ohechauka hag̃ua oiporavo hague Moiséspe omoakã hag̃ua umi isrraelítape (Éxo. 33:9). Upe rire oiporu avei oiporavo hag̃ua Josuépe Moisés rekovia, ha upérõ ipaha oñeñeʼẽ la Bíbliape ko arai térã tatarendýre (Deu. 31:14, 15). Umi isrraelíta osẽ porãséramo, ohechakuaavaʼerã mbaʼe rupivépa Jehová oisãmbyhy chupekuéra pe desiértore ha oho hapykuéri.

Nomombaʼevéi hikuái pe arai térã tatarendy

Oiméne umi isrraelíta omombaʼete ohecha ypýrõ guare ko milágro tuichaitéva! Péro ohecháramo jepe upéva ára ha pyhare, noipytyvõi chupekuéra ojerovia hag̃ua Jehováre ipyʼaite guive. Ha heta vése otaky hikuái Jehová oisãmbyhy lájare chupekuéra. Pór ehémplo, umi egipcio ohórõ guare hapykuerikuéra, umi isrraelíta ndojeroviái Ñandejára osalvataha chupekuéra. Upéva rangue, otaky Moisés rehe ha heʼi ogueraha hague chupekuéra omanomba hag̃uáme (Éxo. 14:10-12). Ha ohasa rire pe már Rojo katu oñepyrũ jeýma oñeʼẽ vai hikuái Moisés, Aarón ha Jehováre oimoʼãgui ofaltataha chupekuéra tembiʼu ha y (Éxo. 15:22-24; 16:1-3; 17:1-3, 7). Upéi umi isrraelíta ojopy Aarónpe ojapo hag̃ua órogui peteĩ vakaraʼy raʼanga. Ajéiko ivaiete upe ojapóva hikuái! Peteĩ hendápe ojehecha pe arai guasu orrepresentáva Jehovápe, upe omosãsovaʼekue chupekuéra, ha ag̃uieténte upégui umi isrraelíta omombaʼeguasuhína peteĩ taʼanga rei. Ha heʼi hikuái: “Israel, kóva haʼe nde Jára, neguenohẽvaʼekue Egíptogui” (Éxo. 32:4; Neh. 9:18).

Umi isrraelíta naiñeʼẽrendúivo ohechauka ndoipotaveimaha Jehová oisãmbyhy chupekuéra. Ha ohecháramo jepe pe  arai guasu, ijerovia kangy hikuái ha nomombaʼevéima upéva. Umi mbaʼe ‘ombopochy Israel Jára marangatúpe’. Péro amo ipahápe Haʼe oiporiahuvereko ha ohechauka chupekuéra haperã pe arai térã tatarendy rupive, og̃uahẽ meve pe yvy oñeprometevaʼekuépe (Sal. 78:40-42, 52-54; Neh. 9:19).

Mbaʼépa Jehová oiporu koʼág̃a ñanesãmbyhy hag̃ua

Koʼág̃a rupi Jehová oisãmbyhy gueteri hembiguaikuérape. Haʼe nohaʼarõivaʼekue umi isrraelíta oho ijehegui reínte pe desiértore, upéicha avei nohaʼarõi ñandejehegui reínte ñag̃uahẽ pe múndo pyahúpe. Upévare omoĩ Jesucrístope omoakã hag̃ua kongregasión (Mat. 23:10; Efe. 5:23). Jesús katu oiporavo pe tembiguái jeroviahápe, térã umi unhídope, oipytyvõ hag̃ua chupe. Ha koʼãva omoĩ umi ansiánope oñangareko hag̃ua kongregasionkuérare (Mat. 24:45-47; Tito 1:5-9).

Mbaʼépa ñanepytyvõta jahechakuaa hag̃ua mávapa pe tembiguái jeroviaha? Jesús heʼivaʼekue: ‘Mávapa hína pe tembiguái jeroviaha ha iñarandúva, pe ijára omoĩvaʼekue oñangareko hag̃ua hogayguakuérare, omeʼẽ hag̃ua chupekuéra hembiʼurã hiʼoraitépe? Ovyʼaiténe upe tembiguái, og̃uahẽvo pe ijára ha otopa hese ojapohahína upéicha!’ (Luc. 12:42, 43, NM).

Jaʼekuaa koʼã unhído haʼeha tembiguái jeroviaha, akóinte iñeʼẽrendu rupi Jehovápe, iñorganisasión, Jesús ha la Bíbliape. Avei ikatu jaʼe hesekuéra iñaranduha, omoakã porã rupi pe tembiapo iñimportantetéva: ojepredika pe ‘marandu Ñandejára rréino rehegua’ ha ‘oñepytyvõ umi hénte opa tetãyguápe oiko hag̃ua chuguikuéra Jesús remimboʼe’ (Mat. 24:14; 28:19, 20, NM). Avei omeʼẽ ‘hiʼoraitépe’ Ñandejára rembiguaikuérape opa mbaʼe oikotevẽva omombarete hag̃ua ijerovia. Ha Jehová ohovasa rupi pe tembiguái jeroviahápe, umi kongregasión oñakãrapuʼã ohóvo. Jehová oipytyvõ avei hembiguaikuérape odesidi porã ha otendeve hag̃ua koʼẽ koʼẽre la Biblia omboʼéva. Ha ndohejái voi umi iñenemígo ohundiete iñorganisasión, síno ombopyʼaguapy ha oñangareko porã isiervokuéra (Isa. 54:17; Fili. 4:7).

Jaagradesékena Jehovápe ñanesãmbyhy haguére

Mbaʼéichapa ikatu jahechauka jaagradeseha Jehovápe ñanesãmbyhy haguére? Apóstol Pablo heʼi: ‘Peneñeʼẽrendúke umi penemoakãvape ha peñemoĩ ipoguypekuéra’ (Heb. 13:17, ÑÑB). Péro ijetuʼúpa upéva? Ñapensamína ko mbaʼére, ñamoĩ chupe nde reimeha avei Moisés tiémpope umi isrraelítandi. Heta díama reguatareína desiértore pe arai rapykuéri, ha upeichaháguinte opyta sapyʼa. Upémarõ reñeporandu: “Mboy tiémpo piko opytáta koʼápe? Un día? Una semána? Heta mése?”. Nderekuaái voi reguenohẽmbátapa nde kosakuéra, upévare reipeʼa mimi jepi umi mbaʼe reikotevẽvante. Upéi pepyta aréma upépe, ha ndekueráima rejepoyvy hague nde kosakuéra apytépe, upémarõ reguenohẽmbántema. Ha rejapopamíre upéva pe arai okuʼe, ha reñepyrũ jeýma vaʼerã reñongatupa nde kosakuéra. Ajépa ndaigustoieténe upéicha! Péro mbaʼéiko rejapóta, rehomantevaʼerã umi ótro ojapoháicha (Núm. 9:17-22).

Mbaʼépa ñapensa Ñandejára heʼi jave ñandéve jajapo hag̃ua peteĩ mbaʼe? Ñaneñeʼẽrendúpa, térã nañapenáinte hese? Jaikuaapañaína mbaʼéichapa koʼág̃a rupi ojejapovaʼerã umi estúdio vívliko, ojepredika tetã ambueguápe ha pe aty jastudia hag̃ua ñande rogayguándi? Jaikuaápa avei mbaʼéichapa ikatu ñaipytyvõ umi Comité de Enlace con los Hospitales-pe ha mbaʼéichapa jajeportavaʼerã umi aty guasu aja? Ñahendúvo umi konsého oñemeʼẽva ñandéve, jahechaukáta avei jaagradeseha Jehovápe ñanerekomboʼe  haguére. Upévare, jadesidi jave umi mbaʼe iñimportánteva ndajajeroviái ñandejehe, síno jahecha mbaʼépa heʼi Jehová ha iñorganisasión. Ha peteĩ mitã odiparaháicha itúva rendápe ou jave torménta, ñande avei jaha kongregasiónpe ñandejopy jave umi provlemaita oĩva ko múndope.

Jaikuaaháicha umi omoakãva Ñandejára organisasión ko yvy ape ári iñimperfékto. Moisés upéichante vaʼekue avei, péro pe arai guasu térã tatarendy tuicháva ohechauka Jehová oiporavo ha oguerohoryha chupe. Ñanemanduʼavaʼerã umi isrraelíta oñepyrũ hague oho ‘Jehová heʼi jave chupekuéra Moisés rupive’, avave ndohói ohoseha órante (Núm. 9:23).

Koʼág̃a rupi avei pe tembiguái jeroviaha heʼi ñandéve mbaʼépa jajapovaʼerã ñag̃uahẽ hag̃ua pe múndo pyahúpe. Upearã oiporu rrevísta Ñemañaha, Ñane Marandu Porã, umi puvlikasión pyahu ha diskursokuéra ojejapóva umi aty guasuhápe. Avei ojevale umi superintendéntere, térã ojejapo kárta ha kursokuéra ombokatupyrýva umi ansiáno ha siérvo ministeriálpe.

Jahechakuaapañaína mbaʼépa Ñandejára oiporu ñanesãmbyhy hag̃ua ko ára pahápe? Haʼe oiporu iñorganisasión ohechauka hag̃ua ñandéve ñande raperã ko múndo añáme, ojoguáva peteĩ desiértope. Ha oñangareko rupi ñanderehe upéicha, ikatu jaiko peteĩ ñeʼẽme ha mborayhúpe.

Umi isrraelíta oike riréma pe yvy oñeprometevaʼekuépe chupekuéra, Josué heʼi: ‘Peẽ katu peikuaa porã pende pyʼaite guive Ñandejára ojapo hague opa umi mbaʼe porã heʼivaʼekue ojapotaha. Ndaipóri peteĩ mbaʼe ohejavaʼekue ojapoʼỹre’ (Jos. 23:14). Ñande, Jehová rembiguaikuéra koʼag̃agua katuete ñag̃uahẽta avei pe múndo pyahu oñeprometévape, ñañemomirĩ ha ñañemoĩramo Jehová poguýpe. Upévare, ñañehaʼãmbaitékena jahechakuaa mbaʼépa Haʼe oiporu ñanesãmbyhy hag̃ua koʼág̃a rupi.

[Nóta oĩva taʼanga ndive páhina 5]

Jehová oiporu iñorganisasión ñanesãmbyhy hag̃ua

[Nóta oĩva taʼanga ndive páhina 5]

Puvlikasión pyahu

[Nóta oĩva taʼanga ndive páhina 5]

Eskuéla oporombokatupyrýva

[Nóta oĩva taʼanga ndive páhina 5]

Ñanemboʼe mbaʼéichapa japredikavaʼerã