Familiakuéra, peñatende porãke

“Japáyke ha jaiko hekópe opa mbaʼépe.” (1 TES. 5:6, JMP)

1, 2. Mbaʼépa ojapovaʼerã familiakuéra oñatende porã hag̃ua ohaʼarõ aja Jehová ára?

APÓSTOL Pablo oñeʼẽrõ guare Ñandejára “ára guasuete ha oporomongyhyjetéva” rehe, ohai umi Tesalonicayguápe: ‘Peẽ katu che pehẽnguekuéra ndapeikói pytũmbýpe umi mondaha oikoháicha, upéicha rupi upe ára nog̃uahẽmoʼãi pehaʼarõʼỹre. Opaite peẽ tesapehára ha ára sakã raʼykuéra. Ñande ndahaʼéi pyharekuegua téra pytũmbypegua’. Upéi Pablo heʼi jey: “Aníke japyta jakehápe umi ambue yvypóraicha, japáyke ha jaiko hekópe opa mbaʼépe” (Joel 2:31, ÑÑB; 1 Tes. 5:4-6, JMP).

² Koʼã mbaʼe Pablo heʼivaʼekue ou porãiterei ñandéve jaiko rupi ‘umi ára pahápe’ (Dan. 12:4, ÑÑB). Upévare tekotevẽ ñaneñeʼẽrendu ha ñañatende porã. Ko múndo oñehundi potaitéma ha Satanás ojuhuseveseve kristiáno oguenohẽvaʼerã Jehová rapégui. Mbaʼépa ikatu ojapo umi família oñatende porã hag̃ua? Káda uno okumplivaʼerã Jehová ohaʼarõva chuguikuéra. Jahechamína mbaʼépa ikatu ojapo ména, tembireko ha taʼyrakuéra oñatende porã hag̃ua oñondivepa ohaʼarõ aja Jehová ára.

Menakuéra, pehaʼangákena ‘pe Ovecharerekua Imbaʼeporãvape’

3. Heʼiháicha 1 Timoteo 5:8, mbaʼépa ojapovaʼerã menakuéra?

³ Ñandejára Ñeʼẽ heʼi porã “kuña akã haʼeha pe kuimbaʼe” (1 Cor. 11:3, JMP). Mbaʼépa ojapovaʼerã peteĩ kuimbaʼe omoakã porã hag̃ua hogapy? La Biblia heʼi: “Pe oñangarekoʼỹva umi hogayguakuéra rehe omboyke ijerovia ha ivaive umi [...] ojeroviaʼỹvagui” (1 Tim. 5:8, JMP). Upéicha jahecha Jehová oipotaha menakuéra omoĩ ifamíliape hemikotevẽ. Péro oĩ ambue mbaʼe iñimportantevéva. Oipotáramo hogayguakuéra oñatende porã, oipytyvõvaʼerã enterovévape omombarete hag̃ua ijerovia ha oĩ porã hag̃ua Ñandejára ndive (Pro. 24:3, 4). Mbaʼéichapa ojapokuaa upéva?

4. Mbaʼépa tekotevẽ ojapo menakuéra omombarete hag̃ua ifamília jerovia?

⁴ “Menakuéra niko tembireko akã hína, Cristo haʼeháicha pe [kongregasión] akã.” Upévare ohechavaʼerã mbaʼéichapa Jesús omoakã kongregasión ha ohaʼanga chupe oisãmbyhy porã hag̃ua hogapy (Efe. 5:23). Jesús oñembojojavaʼekue peteĩ ovecharerekua rehe ohechauka hag̃ua otrata porãha hemimboʼekuérape (elee Juan 10:14, 15). Añetehápe haʼehína pe “Ovecharerekua Imbaʼeporãva”. Upévare ména omombareteséva ifamília jerovia, tekotevẽ ojesareko Cristo heʼi ha ojapovaʼekuére ha ‘oguatavaʼerã ipyporére’ (1 Ped. 2:21, ÑÑB).

5. Mbaʼeichaite pevépa pe Ovecharerekua Imbaʼeporãva oikuaa káda kongregasión?

⁵ Pe ehémplo Jesús omoĩvaʼekue ohechauka pe ovecharerekua ha ijovechakuéra ojepokuaaha ojuehe. Peteĩ ovecharerekua oikuaa porã ijovechakuérape ha umi ovecha avei oikuaa porã chupe ha ojerovia hese; haʼekuéra oikuaa iñeʼẽ ha ojapo heʼíva. Ndareíri Jesús heʼi: “Che aikuaaháicha che ovechakuérape, haʼekuéra chekuaa chéve”. Upévare ikatu jaʼe Jesús oikuaa  porãha káda kongregasión. Griégo ñeʼẽme “kuaa” heʼise “oporokuaa porãitereíva”. Pe Ovecharerekua Imbaʼeporãva oikuaapaite mbaʼépa oikotevẽ ijovechakuéra, mbaʼépa ojapo porã térã mbaʼépa ojapo vai. Mbaʼevete ndojehasái chugui. Umi ovecha katu oikuaa porã herekuápe ha ojerovia oisãmbyhy porãtaha chupekuéra.

6. Mbaʼéichapa menakuéra ikatu ohaʼanga pe Ovecharerekua Imbaʼeporãvape?

⁶ Mbaʼéichapa pe ména ikatu ohaʼanga Jesúspe omoakã hag̃ua hogapy? Oñembojojavaʼerã avei peteĩ ovecharerekuáre ha oñangareko hogayguakuérare haʼerõguáicha ovecha mimi. Oñehaʼãvaʼerã oikuaa porã chupekuéra. Mbaʼéichapa ikatu ojapo upéva? Oñemongeta meme vaʼerã peteĩteĩ ndive ha ohendu chupekuéra, koʼýte ojepyʼapy jave hikuái. Avei omoĩvaʼerã ehémplo neporãva ha odesidi hekoitépe umi mbaʼe ojapótava oñondivepa. Pór ehémplo, katuete ojapovaʼerã pe Aty Jastudia Hag̃ua Ñande Rogayguándi, ohovaʼerã hikuái rreunionhápe ha predikasiónpe, ha oiporavovaʼerã umi vyʼarã ou porãtava enterovévape. Menakuéra, pehejáramo la Biblia penepytyvõ pedesidi porã hag̃ua ha peikuaa porãramo pene famíliape, haʼekuéra ojeroviavéta penderehe ha vyʼápe peservíta oñondivepa Jehovápe.

7, 8. Mbaʼéichapa ména ikatu ohaʼanga pe Ovecharerekua Imbaʼeporãvape ohekomboʼe jave ifamíliape?

⁷ Pe ovecharerekua ikatupyrýva oikuaa porã ha ohayhueterei ijovechakuérape. Pór ehémplo, Jesús otrata mborayhúpe hemimboʼekuérape, ‘omeʼẽ hekove jepe hesehapekuéra’. Upéicha avei umi ména oĩ porãséva Jehová ndive ohaʼangavaʼerã Jesúspe ha mborayhúpe otrata ifamíliape. Oiko rangue oñemombarete ha ijarhél hembirekópe, ohayhuvaʼerã chupe “Cristo ohayhu haguéicha [kongregasión]” (Efe. 5:25). Omombaʼe rupi hembirekópe torýpe oñeʼẽ chupe ha oñehaʼã ontende mbaʼéichapa oñeñandu (1 Ped. 3:7).

⁸ Túva ohekomboʼevaʼerã ifamíliape ha ndohejaivaʼerã omboyke Ñandejára Ñeʼẽ, upévare mborayhúpe oñemoñeʼẽ ha okorrehi chupekuéra tekotevẽramo. Sapyʼánte oĩ mitã imbeguéva ontende hag̃ua ojeʼéva chupe, upéicha jave túva ipasiensiavaʼerã hese. Oñehaʼãmbaitéramo ohaʼanga Jesúspe opa mbaʼépe, ifamiliakuéra oñeñandu porãta, oikóta pyʼaguapýpe ha heʼi haguéicha pe salmísta, oñemoag̃uivéta Jehováre (elee Salmo 23:1-6).

9. Noé ojapo haguéicha, mbaʼépa ojapovaʼerã ména ha mbaʼépa oipytyvõta chupe upearã?

⁹ Ñapensamína Noé ohasavaʼekuére. Itiémpope Ñandejára ‘ombou ama guasu umi tekove aña ári, péro osalva chupe ha siétepe hendive’ (2 Ped. 2:5, BNP). Noé omoakãvaʼekue hogapy ha upévare oipytyvõ ifamíliape ani hag̃ua oñehundi umi hénte aña ndive. Upéicha avei ména oñangarekovaʼerã hogayguakuérare koʼã ára pahápe (Mat. 24:37). Mbaʼépa oipytyvõta chupe ojapo hag̃ua upéva? Ostudiavaʼerã pe Ovecharerekua Imbaʼeporãva rembiasakue ha oñehaʼãmbaite ojapo haʼe ojapo haguéicha.

Tembirekokuéra, ‘pemopuʼã pende rogapy’

10. Mbaʼépa heʼise: “Kuñakaraikuéra, peikóke pene menakuéra poguýpe”?

¹⁰ Apóstol Pablo heʼi: “Peẽ kuñakaraikuéra, peikóke pene menakuéra poguýpe” (Efe. 5:22, ÑÑB). Ko téystope heʼíva ndoapoʼíri kuñanguérape. Jehová ojapo mboyve Évape heʼi: “Kuimbaʼe naiporãi oiko haʼeño. Ajapóta chupe iñirũrã, peteĩ oipytyvõvaʼerã chupe” (Gén. 2:18). Jehová ojapo kuñáme oipytyvõ hag̃ua iménape, péicha pe ména ikatúta omoakã porã hogapy, ha upéva tuichaiterei mbaʼe.

11. Mbaʼéichapa pe kuña iñarandúva ‘omopuʼã hogapy’?

 ¹¹ Tembireko ojapo porãva hembiapo, tuicha oipytyvõ hogayguakuérape (elee Proverbios 14:1). Kuña iñarandúva oñemoĩ pe omoakãva poguýpe ha omombaʼe chupe ipyʼaite guive. Nopuʼãi hese ha ndoikói iñakãre ko múndope ojeikoháicha, upéva rangue ojerovia iménare. Ndojoguaiete kuña iñembotavývape (Efe. 2:2). Peichagua ningo ni ndojeréi okopi hag̃ua iménare. Tembireko iñarandúva katu ojapo ikatúva guive imembykuéra ha ambue tapicha orrespeta hag̃ua iménape. Ndotakýi hese ni ndoikói odiskuti mante chupe, péicha ohechauka omombaʼeha pe omoakãvape. Ha mbaʼéichapa oiporu pe pláta? Kuña iñembotavýva omombopa rei pe traváho repykue. Péro iñarandúva katu oiporu pe pláta hekopete ha ndojopýi iménape ombaʼapove hag̃ua.

12. Mbaʼépa ojapovaʼerã tembireko hogayguakuéra ojerovia mbarete ha oñatende porã hag̃ua?

¹² Tembireko ojapo porãva hembiapo oipytyvõ iménape ohekomboʼe hag̃ua ifamíliape Jehová rapére. Upéicha hogayguakuéra ojerovia mbarete ha oñatende porã (Pro. 1:8). Katuete ojeprepara ojejapo hag̃ua pe Aty Jastudia Hag̃ua Ñande Rogayguándi. Avei sapyʼánte iména oñemoñeʼẽ térã okorrehivaʼerã ifamíliape, upéicha jave noñemoĩri hese. Ajépa idiferentete pe tembireko iñembotavývagui, operhudikáva ifamíliape ha noipytyvõiva chupekuéra oĩ porã hag̃ua Jehovándi!

13. Mbaʼérepa tembireko oipytyvõvaʼerã iménape okumpli porã hag̃ua hembiapo kongregasiónpe?

¹³ Mbaʼéichapa oñeñandu peteĩ tembireko imarangatúva iména ombaʼapo kyreʼỹramo kongregasiónpe? Ovyʼaiterei ohechávo oñemeʼẽmbaiteha ermanokuéra rehehápe. Pór ehémplo, omombaʼeterei iména oservívo siérvo ministeriál térã ansiánoramo, Comité de Enlace con los Hospitales, Comité Regional de Construcción térã ambue tembiapópe. Tembireko tekotevẽmante ojesakrifikaʼimi oipytyvõ hag̃ua iménape koʼã mbaʼépe, tahaʼe heʼi térã ojapóva rupive. Oikuaa porã upéva ideprovechotaha ifamíliape g̃uarã. Iména hembiapo hetáramo kongregasiónpe, hogayguakuéra oñatende porãvéta ha ojerovia mbaretevéta.

14. a) Mbaʼépa sapyʼánte ijetuʼu tembirekópe, ha mbaʼéichapa ombohovaikuaa? b) Mbaʼépa ikatu ojapo tembireko enterovéva oñeñandu porã hag̃ua hogapýpe?

¹⁴ Heta vése ijetuʼu tembirekópe oipytyvõ hag̃ua iménape ndogustáiramo chupe umi mbaʼe odesidíva. Upéicharõ jepe ‘hekokirirĩ’ ha ipyʼaguapy ha oñehaʼãmbaite ikatu hag̃uáicha osẽ porã opa mbaʼe (1 Ped. 3:4, BNP). Avei osegi umi kuña iñeʼẽrendúva ehémplo, umíva apytépe Sara, Rut, Abigail  ha María, Jesús sy (1 Ped. 3:5, 6). Oñehaʼã oiko umi ermána ‘hekomarangatúva’ koʼag̃agua oikoháicha (Tito 2:3, 4, JMP). Ohayhu ha omombaʼe rupi iménape ojogueraha porã hikuái, oĩ pyʼaguapy hogapýpe ha enterovéva oñeñandu porã. Peteĩ kuimbaʼe omotenondéva Ñandejára rembipota omombaʼeterei peichagua tembireko ha ndaijojahái chupe g̃uarã (Pro. 18:22).

Taʼyrakuéra, pejesareko umi mbaʼe “ojehechaʼỹva” rehe

15. Mbaʼéichapa mitãrusu térã mitãkuña ikatu oipytyvõ oñatende porã hag̃ua Jehová servísiope hogayguakuéra ndive?

¹⁵ Oiméramo nde peteĩ mitãrusu térã mitãkuña, mbaʼéichapa ikatu avei reipytyvõ peñatende porã hag̃ua Jehová servísiope pende rogayguakuéra ndive? Epensamína pe jopói Jehová omeʼẽsévare ndéve. Katuete nemitã guive nde tuvakuéra ohechaukáneraʼe ndéve umi taʼanga rupive mbaʼeichaitépa iporãta Ñandejára múndo pyahu. Upéi rekakuaavévo rehóvo, oiporúma la Biblia ha umi puvlikasión ikatu hag̃uáicha rehechakuaa mbaʼéichapa ojeikóta opa ára g̃uarã upépe. Rejesareko meméramo Jehová rembipotáre ha remotenondéramo nde rekovépe, ndahasymoʼãi reñatende porã hag̃ua.

16, 17. Mbaʼépa ikatu ojapo mitãrusukuéra ogana hag̃ua pe karréra Jehová omoĩva henonderãme?

¹⁶ Ejapókena Pablo heʼíva 1 Corintios 9:24-pe (elee). Reñanivaʼerã regana hag̃uáicha pe karréra Jehová omoĩva ne renonderãme. Eiporavo pe tape ndeguerahátava jeikove opaʼỹvape. Heta imitãva ndojesarekovéi koʼa mbaʼe iñimportantetévare ha oñemoĩ oheka mbaʼerepy. Ajépa ivyroite hikuái! Umi oikóva pláta rapykuérinte ndovyʼapái, hiʼarive umi mbaʼerepy katuete opa rei. Iporãve rejesareko umi mbaʼe “ojehechaʼỹvare”. Mbaʼérepa? Umíva ningo “opa árape g̃uarã” (2 Cor. 4:18).

¹⁷ Umi mbaʼe “ojehechaʼỹva” apytépe oĩ avei heta mbaʼe porã jahupytýtava Ñandejára Rréino rupive. Ehechamavaʼerã mbaʼépa rejapóta ikatu hag̃uáicha rehupyty umíva. Añetehápe revyʼaséramo reñemeʼẽmbaitevaʼerã reservi hag̃ua Jehovápe. Mbaʼépa rehupytyse iservísiope? Oĩ heta mbaʼe ikatúva rehupyty koʼág̃ama voi térã amo gotyomie. * Reñehaʼãramo peteĩ mbaʼe ikatútavare rehupyty, rejesareko porãta nde servísiore ha pe jeikove opaveʼỹvare (1 Juan 2:17).

18, 19. Mbaʼe mbaʼérepa ojepyʼamongetavaʼerã peteĩ mitãrusu oikuaa hag̃ua oservi porãpa Jehovápe?

¹⁸ Reikove hag̃ua opa ára g̃uarã, tekotevẽ reservi Jehovápe nde pyʼaite guive. Rejapopareína upéva? Eñeporandumína: “Chekyreʼỹpa ajapo hag̃ua umi tembiapo oñemeʼẽva chéve kongregasiónpe térãpa akumpli che tuvakuéra heʼíguinte chéve? Añehaʼãpa aiko Ñandejára cheguerohory hag̃uáicha? Amohendápa che tiémpo ajapo hag̃ua che rembiapo Jehovápe g̃uarã ha añehaʼã akumpli? Ajepokuaápa añemboʼe, ahesaʼỹijo la Biblia, aha rreunionhápe ha apredika? Arekópa Jehovápe che amígoramo?” (Sant. 4:8).

 ¹⁹ Epensamína Moisés ehémplore, haʼe okakuaáramo jepe faraón rógape, ndoipotái umi hénte oikuaa chupe faraón rajy membýramo síno Jehová rembiguáiramo (elee Hebreos 11:24-27). Nde avei rejedesidivaʼerã reservi Jehovápe nde pyʼaite guive. Rejapóramo upéicha reiko porãvéta, revyʼavéta ha ikatúta ‘rehupyty jeikove añeteguáva’ (1 Tim. 6:19).

20. Máva mávapa ohupytýta pe prémio?

²⁰ Pablo ombojojavaʼekue ñande servísio peteĩ karrérare. Jaikuaaháicha peteĩ karrérape peteĩnte ogana, péro jaservíramo Jehovápe enterovéva ikatu ñagana. Mbaʼéicha rupípa upéva? Ñandejára “oipota opavave ojesalva ha oikuaa pe añetegua” (1 Tim. 2:3, 4, ÑÑB). Heta oĩ oganámava upe karréra ha oĩ avei umi oñaníva nde ykére (Heb. 12:1, 2). Nemanduʼákena umi ndopytáiva tapére añoite ohupytytaha pe prémio. Ha nde ikatuhína rehupyty.

21. Mbaʼépa jahecháta pe artíkulo oúvape?

²¹ Jehová “ára guasuete ha oporomongyhyjetéva” og̃uahẽtante voi, ndaipóri ojokovaʼerã (Mal. 4:5). Umi família oservíva Ñandejárape oñatende porã vaʼerã ohaʼarõ aja upe ára. Upearã tekotevẽterei ména, tembireko ha taʼyrakuéra okumpli Jehová ohaʼarõva chuguikuéra. Péro mbaʼépa ikatu jajapove ñañatende porã ha ñamombarete hag̃ua ñande jerovia Jehováre? Pe artíkulo oúvape oñemombeʼúta mbohapy mbaʼe ñanepytyvõtava ñaime porã joaite hag̃ua Jehová renondépe.

[Nóta]

Nemanduʼápa?

• Mbaʼérepa familiakuéra tekotevẽ oñatende porã?

• Mbaʼéichapa ména ikatu ohaʼanga pe Ovecharerekua Imbaʼeporãvape?

• Mbaʼéichapa pe tembireko ojapo porãva hembiapo oipytyvõ iménape?

• Mbaʼéichapa taʼyrakuéra ikatu oipytyvõ hogayguakuéra oñatende porã ha ojerovia mbarete hag̃ua?

[Porandu ñahesaʼỹijóva]

[Nóta oĩva taʼanga ndive páhina 9]

Tembireko oipytyvõva iménape ndaijojahái