Ipypukuete ningo Ñandejára arandu!

‘Hetaite mbaʼe porã ningo Ñandejára oreko; iñarandu ha imbaʼekuaa katu ipypukueterei. Ndaikatúi avave oipyguara haʼe ojapótava ni oikuaapa hape.’ (ROM. 11:33, NM)

1. Mbaʼépa iñimportanteve kristianokuérape g̃uarã?

MBAʼÉPA pe iporãvéva rehupytyvaʼekue? Ikatu repensa peteĩ rresponsavilida tuichávare, térã rejeguerohory hague rejapo porã rupi peteĩ mbaʼe. Ajépa tuicha mbaʼe upéva! Péro peteĩ kristiánope g̃uarã iñimportanteve hína Jehová ‘oikuaáramo chupe’ ha oñemoag̃uírõ hese (1 Cor. 8:3; Gál. 4:9).

2. Mbaʼérepa tuichaiterei mbaʼe jaikuaa Jehovápe ha haʼe avei ñandekuaáramo?

² Tuichaiterei mbaʼe ningo jaikuaa Jehovápe ha haʼe avei ñandekuaáramo. Mbaʼérepa? Jehová hína pe iñimportantevéva oĩva ko arapýpe ha hiʼarive oñangareko umi ohayhúvare. Proféta Nahúm heʼivaʼekue: “Ñandejára ipyʼaporã umi hese ojeroviáva ndive, ivai jave haʼe oporomoʼã ha ohechakuaa umi hese ojeroviávape” (Nah. 1:7; Sal. 1:6). Añetehápe, jaikoséramo opa ára g̃uarã, tekotevẽterei jaikuaa porã Ñandejára peteĩetépe ha Itaʼýra Jesucrístope (Juan 17:3).

3. Mbaʼépa heʼise jaikuaa Ñandejárape?

³ Mbaʼépa heʼise jaikuaa Ñandejárape? Ndeʼiséi jaikuaanteha héra. Tekotevẽ avei jaiko iñamígoramo ha jaikuaa porã chupe, jahechakuaavaʼerã mbaʼépa oguerohory, mbaʼépa oĩ vai henondépe ha jaiko haʼe oipotaháicha (1 Juan 2:4). Avei jaikuaa porã hag̃ua chupe, tekotevẽ jajesareko opa hembiapóre, ñahesaʼỹijo mbaʼéichapa ojapo ha mbaʼérepa. Ha hesakã porãvévo ñandéve mbaʼépa hembipota, koʼýte jaguerohorýta ‘iñarandu ipypukuetéva’ (Rom. 11:33).

Jehová katuete ojapo hembipota

4, 5. a) Mbaʼéichapa ojeporu la Bíbliape pe ñeʼẽ “tembipota”? b) Emyesakã peteĩ ehémplo rupive ikatuha jajapo heta hendáicha peteĩ mbaʼe jahupytyséva.

⁴ Jehová katuete ojapo opa mbaʼe okumpli hag̃uáicha oipotáva. Iñeʼẽme omombeʼu orekoha ‘hembipota tapia g̃uarãva’ (Efe. 3:10, 11, BNP ). La Bíbliape ojeporu jave pe ñeʼẽ “tembipota” heʼise hína peteĩ mbaʼe ojehupytyséva ha ikatúva ojejapo peteĩ térã heta hendáicha.

⁵ Ñapensamína ko ehémplore. Ñamoĩ chupe oĩha peteĩ tapicha ohoséva ambue távape. Upéva hína “hembipota” térã “ojaposéva”. Katuete ohecháta mbaʼéichapa ohóta ha moõrupipa iporãve. Péro tape kuʼáre ohechakuaa tekotevẽha oho ótro hendárupi, ikatu tiémpo vaígui, oĩ haguére hetaiterei mbaʼyru ohóva upérupi, térã oñembotýgui pe tape. Tahaʼe haʼéva pe tape oiporavóva, okumpli ojaposéva: og̃uahẽ pe távape okambiáramo jepe hape.

6. Mbaʼérepa jaʼekuaa Jehová okambianteha tekotevẽhápe okumpli hag̃ua hembipota?

⁶ Upeichaite avei Jehová naiprovlémai ojapónte hag̃ua ambue hendáicha peteĩ mbaʼe okumpli hag̃ua hembipota, ha ndojopýi avavépe upearã. Ñandejára okambiánte tekotevẽhápe umi mbaʼe ojapótava ohupyty hag̃ua oipotáva. Jahechamína mbaʼéichapa  okumpli oúvo hembipota pe Ñemoñare Oñeprometevaʼekue rupive. Jehová ojapo rire Adán ha Évape omanda chupekuéra: “Peñemoña ha peñemboheta pemyenyhẽ meve ko yvy, ha pemoĩ pende poguýpe” (Gén. 1:28, ÑÑB). Péro upéi haʼekuéra opuʼã hese. Heʼisépa upéva opyta rei hague Jehová rembipota? Nahániri. Oikómarõ upéva, haʼe upepete ohecháma mbaʼépa ojapóta, haʼete ku ojagarránteva ótro “tape” ohupyty hag̃ua oipotáva. Heʼi outaha peteĩ “ñemoñare” omyatyrõtava opa mbaʼe vai omoñepyrũvaʼekue umi oñemoĩva hese (Gén. 3:15; Heb. 2:14-17; 1 Juan 3:8).

7. Mbaʼépa ñanemboʼe Jehovágui Éxodo 3:14?

⁷ Jehová ohechauka ikatuha okumpli hembipota heta hendáicha. Upéva ojekuaa omeʼẽrõ guare Moiséspe hembiaporã ha omombeʼúvo chupe mávapa haʼe. Ñepyrũrã Moisés heʼi ndaikatumoʼãiha okumpli upe tembiapo. Upémarõ Jehová ombopyʼaguapy chupe heʼívo: ‘“Chehegui oikóta tekotevẽva”. Ha upéi heʼi: “Péicha eréta Israel raʼykuérape: ‘Chehegui oikóta tekotevẽva chembou penerendápe’”’ (Éxo. 3:14, NM). Jahechaháicha ko téystope Jehová ikatu ojapo tekotevẽva guive omohuʼã hag̃ua hembipota. Romanos kapítulo 11-pe Pablo omoĩ peteĩ ehémplo omyesakãva upéva. Upépe oñeʼẽ peteĩ olívo mátare. Enterove kristiáno, tahaʼe ohótava yvágape térã opytátava ko yvy ape ári, ñahesaʼỹijovaʼerã ko ehémplo jahechakuaa hag̃ua mbaʼeichaitépa ipypuku Ñandejára arandu.

Ñandejára rembipota ha pe Ñemoñare Oñeprometevaʼekue

8, 9. a) Mbaʼe mbaʼépa ñanepytyvõta ñantende porãve hag̃ua pe ehémplo oñeʼẽva olívo mátare? b) Mbaʼe porandúpa ñambohováita ha mbaʼépa ohechaukáta upéva Jehovágui?

⁸ Hesakã porãve hag̃ua ñandéve pe ehémplo oñeʼẽva olívo mátare, ñanemanduʼavaʼerã mbaʼéichapa Jehová okumpli oúvo hembipota pe Ñemoñare Oñeprometevaʼekue rupive. Koʼã irundy mbaʼe ñanepytyvõta upearã: Primero, Ñandejára opromete Abrahánpe: “Opa tetã ko yvy arigua [oñevendesíta] ne ñemoñare rupive” (Gén. 22:17, 18). Segundo, Jehová oiporavótakuri tetã Israel apytégui umi oservivaʼerã ‘rréi ha saserdóteramo’ (Éxo. 19:5, 6, NM). Tercero, Ñandejára ohechámarõ hetaiterei isrraelíta omboykeha pe Mesíaspe, ojapónte ambue mbaʼe oiporavo jey hag̃ua umi oservítava ‘rréi ha saserdóteramo’ (Mat. 21:43; Rom. 9:27-29). Ha cuarto, Jesús hína pe iñimportantevéva ‘Abrahán ñemoñare’ apytégui, upéicharamo jepe Jehová omombaʼe avei ambue yvypórape ohejávo oike ko ñemoñare apytépe (Gál. 3:16, 29).

⁹ Oĩ avei ambue mbaʼe omyesakãva ñandéve ko ehémplo. Revelación omombeʼu 144.000 yvypóra ohotaha yvágape oisãmbyhy hag̃ua Jesucristo ndive rréi ha saserdóteramo (Rev. 14:1-4). Upe lívrope oñehenói chupekuéra “Israelgua ñemoñare” (Rev. 7:4-8). Péro, heʼisépa upéva isrraelíta térã hudío memetetaha umi 144.000? Pe kuatiañeʼẽ Pablo ohaivaʼekue umi Romayguápe ombohováita ñandéve ko porandu ha ohechaukáta avei Jehová naiprovlemaiha okambiánte hag̃ua pe tape okumpli hag̃ua hembipota.

Oservi hag̃ua ‘rréi ha saserdóteramo’

10. Mbaʼe ijojahaʼỹvapa ikatuvaʼekue ohupyty tetã Israel?

¹⁰ Jahecháma haguéicha, ñepyrũrã Ñandejára oiporavovaʼekue tetã Israelguápe añoite oiko hag̃ua ‘rréi ha saserdóteramo ha hetã marangatúramo’ (elee Romanos 9:4, 5). Péro mbaʼépa oikóne ou vove pe Ñemoñare Oñeprometevaʼekue? Oiporavótapa Jehová hudiokuéra apytéguinte umi 144.000 oĩtava Abrahán ñemoñare apytépe?

11, 12. a) Arakaʼe guivépa oñembyaty umi oisãmbyhýtava Ñandejára Rréinope, ha oĩpa heta hudío umíva apytépe? b)  Mbaʼéichapa Jehová ombyatypáta umi Abrahán ñemoñare “ohupyty” hag̃ua 144.000?

 ¹¹ (Elee Romanos 11:7-10.) Síglo primérope tetã Israel omboyke Jesúspe, upévare ndahaʼevéima chuguikuérante oúva Abrahán ñemoñare. Upémarõ Pentecostés áño 33-pe oñepyrũ oñembyaty umi oisãmbyhýtava Ñandejára Rréinope yvága guive ‘rréi ha saserdóteramo’. Ha ojeporavo umi hudío ojeroviáva Jesús rehe ha iñeʼẽrendúva, péro ‘hembyremíntema’ ñambojojátaramo pe tetã Israel tuichakuére, ni mbaʼevéicharõ ndohupytýi hikuái 144.000 (Rom. 11:5).

¹² Mbaʼéichapa upéicharõ Jehová ombyatypáta umi Abrahán ñemoñare “ohupyty” hag̃ua 144.000? (Rom. 11:12, 25.) Jahechamína mbaʼépa heʼi Pablo: ‘Ndaikatúi jaʼe Ñandejára ñeʼẽ ndoikói hague, ndahaʼéigui opa isrraelíta Israel ñemoñare. Upéicha avei, ndahaʼéi opavave Abrahán raʼy Abrahán ñemoñare [...]. Péicha jaikuaa ndahaʼeiha Ñandejára raʼy Abrahán familiare añónte: Abrahán ñemoñare haʼe umi onasevaʼekue Ñandejára promésa rupínte’ (Rom. 9:6-8, JMP). Koʼã mbaʼe ohechauka Jehová ndoiporavoveimaha Abrahán familiarégui añónte umi 144.000 oĩtava pe ñemoñare oñeprometevaʼekue apytépe.

Mbaʼépa heʼise pe olívo máta

13. a) Mbaʼépa orrepresenta pe olívo máta? b) Mbaʼépa orrepresenta hapo? c) Mávapa pe imatakue? d) Ha mávapa hakãnguéra?

¹³ Pablo oñeʼẽ peteĩ olívo oñeñotỹpyrévare ha ombojoja hakãnguéra Abrahán ñemoñare rehe * (Rom. 11:21). Ko olívo máta orrepresenta mbaʼéichapa Jehová okumpli hembipota ojapo hag̃ua oprometevaʼekue Abrahánpe. Pe yvyramáta rapo ningo peteĩ mbaʼe imarangatuetereíva ha orrepresenta Jehovápe. Mbaʼérepa? Haʼete omopuʼã rupi pe Israel pyahu (Isa. 10:20; Rom. 11:16). Imatakue orrepresenta Jesúspe, upe iñimportantevéva Abrahán ñemoñare apytépe. Ha hakãnguéra katu haʼehína kristianokuéra ohótava yvágape, ‘ohupytýva’ 144.000 ha omoirũtava Abrahán ñemoñare iñimportantevévape.

14, 15. Mávapa hína umi olívo rakã ojepeʼavaʼekue, ha mávapepa oñeinherta hekovia?

¹⁴ Ko ehémplope jahecha avei pe olívo máta oñehakãʼo hague. Mbaʼéichapa oiko  upéva? Umi hudío omboykévo Jesúspe “oñekytĩ” térã ojepeʼa Abrahán ñemoñarégui (Rom. 11:17). Mávapa oñemoĩta hendaguepekuéra? Hudiokuéra ningo oiko oñemombaʼeterei ou haguére Abrahán familiarégui, péro ojeporavo umi haʼekuéra oimoʼãʼỹvévape. Juan el Bautista heʼimavaʼekue voi chupekuéra, Jehová oipotáramo, itágui jepe ikatuha ojapo Abrahán ñemoñare (Luc. 3:8).

¹⁵ Upéicharõ, mbaʼépa ojapo Jehová okumpli hag̃ua hembipota? Pablo ohechauka ojapo hague peteĩ inhérto pe olívo oñehakãʼovaʼekuére. Haʼete ku oguerúva peteĩ olívo kaʼaguy rakãngue ha oinherta pe olívo oñeñotỹpyrévare (elee Romanos 11:17, 18). Péicha jahecha umi kristiáno ndahaʼéiva hudío, umíva apytépe kongregasión Romapegua, ojeporavo hague oñeinherta hag̃ua pe olívo mátare. Upéicha oiko avei chuguikuéra Abrahán ñemoñare. Ñepyrũrã haʼekuéra noĩrivaʼekue pe kompromíso Jehová ojapovaʼekuépe Abrahán ndive, haʼete pe olívo kaʼaguy. Péro upéi Jehová oiporavo chupekuéra oĩ hag̃ua umi 144.000 apytépe (Rom. 2:28, 29).

16. Mbaʼépa heʼi Pedro pe tetã Ñandejára mbaʼévare?

¹⁶ Apóstol Pedro ohaivaʼekue peteĩ kuatiañeʼẽ umi unhídope, umíva apytépe umi ndahaʼéiva hudío, ha omyesakã chupekuéra: ‘Peẽ pemombaʼeterei [Jesucrístope] pejerovia rupi hese; haʼe hína pe “ita umi óga apoha omboykevaʼekue, ha koʼág̃a oiko chugui pe ita guasu iñimportantevéva”. Umi ojeroviaʼỹva katu “oñepysanga ha ndaijaʼéi ko itáre”. [...] Peẽ katu peteĩ ñemoñare ojeporavopyre, saserdóte tee, peteĩ tetã marangatu, Ñandejára mbaʼe teéva, pemombeʼu hag̃ua enterovépe umi mbaʼe porãita haʼe orekóva. Haʼe penerenohẽ pytũmbýgui, ha penderesape imbaʼe rendy ijojahaʼỹvape. Yma peẽ  ndahaʼeivaʼekue peteĩ tetã, koʼág̃a katu oiko pendehegui Ñandejára retã, yma avave napendeporiahuverekói, koʼág̃a katu oĩ pendeporiahuverekóva’ (1 Ped. 2:7-10, NM).

17. Mbaʼérepa ojeʼe Jehová ojapo hague peteĩ mbaʼe ‘ojejapoʼỹháicha jepi’?

¹⁷ Jehová ojapo peteĩ mbaʼe avave oimoʼãʼỹva. Pablo oñeʼẽvo upe inhértore heʼi Ñandejára ojapo hague peteĩ mbaʼe ‘ojejapoʼỹháicha jepi’ (Rom. 11:24, NM). Mbaʼépa heʼise upéva? Heʼise oipeʼaha peteĩ yvyramáta kaʼaguy rakã ha omoĩ peteĩ yvyramáta oñeñotỹpyrévare. (Upéva ndojejapoguasuivaʼekue, péro síglo primérope oĩ mimi chokokue ojapóva.) * Upéicha avei Jehová ojapo peteĩ mbaʼe oñeimoʼãʼỹva. Oiporavo umi ndahaʼéivape hudío oiko hag̃ua chuguikuéra ‘peteĩ tetã’ ojapótava hembipota, jepeve hudiokuéra oapoʼieterei umi tetã ambueguápe ha heʼi mbaʼeve iporãva nosẽmoʼãiha chuguikuéra (Mat. 21:43, NM). Pór ehémplo umi ndahaʼéiva hudío apytégui Cornéliogui raẽvete oiko kristiáno año 36-pe ha espíritu sánto rupive oiko chugui unhído. Upe guive ikatumavaʼekue oike Abrahán ñemoñarépe umi ndahaʼéiva hudío ha noñesirkunsidáiva (Hech. 10:44-48). *

18. Mbaʼe oportunidápa oñemeʼẽ jey umi hudíope áño 36 rire?

¹⁸ Upéicharõ, jaʼekuaápa áño 36 guive umi hudío ndaikatuveimaha oike Abrahán ñemoñare apytépe? Nahániri. Pablo heʼi: ‘Haʼekuéra ojerovia jeýramo oñeinherta jeýta, Ñandejára ikatúgui ojapo upéva. Nde [ndahaʼéiva hudío] reñekytĩvaʼekue olívo kaʼaguýgui, ha ojejapoʼỹháicha jepi reñeinherta peteĩ olívo oñeñotỹpyrévare. Koʼýte umi isrraelíta oñeinherta jey vaʼerã imáta tee rehe!’ (Rom. 11:23, 24, NM).

“Opa Israelpegua ojesalvavaʼerã”

19, 20. Mbaʼépa ojapóta Jehová Abrahán “ñemoñare” rupive?

¹⁹ Añetehápe, oñekumpli porãmbaite ohóvo Jehová rembipota ‘Israel Ñandejára mbaʼévape’ g̃uarã (Gál. 6:16, JMP). Heʼi haguéicha Pablo, “opa Israelpegua ojesalvavaʼerã” (Rom. 11:26). Og̃uahẽ vove pe ára Jehová omoĩvaʼekue, “opa Israelpegua” térã enterove umi unhído, oservíta rréi ha saserdóteramo yvágape. Ndaiporivéima ojokovaʼerã Ñandejára rembipota!

²⁰ Abrahán “ñemoñare” térã Jesucristo ha umi 144.000 rupive, “yvyporakuéra” tuicha oñevendesíta ha upéicha oñekumplíta Ñandejára promésa (Rom. 11:12; Gén. 22:18). Opavave Ñandejára rembiguái ohupytýta hetaiterei mbaʼe porã. Jahechávo mbaʼéichapa oñekumpli ohóvo Jehová rembipota tapia g̃uarãva katuete jaʼéta avei: ‘Hetaite mbaʼe porã ningo Ñandejára oreko; iñarandu ha imbaʼekuaa katu ipypukueterei’ (Rom. 11:33, NM).

[Nóta]

Hesakã porãpa ndéve?

• Mbaʼépa ñaaprende Jehovágui ñahesaʼỹijóvo mbaʼéichapa okumpli hembipota?

• Mbaʼépa orrepresenta koʼã mbaʼe oĩva Romanos 11-pe?

Olívo máta

Hapo

Imatakue

Hakãnguéra

• Mbaʼérepa ojeʼe Jehová ojapo hague peteĩ mbaʼe ‘ojejapoʼỹháicha jepi’?

[Porandu ñahesaʼỹijóva]

[Nóta oĩva taʼanga ndive páhina 24]

Maʼerãpa ojejapo pe inhérto?

▪ Síglo primérope peteĩ kuimbaʼe haʼéva soldádo ha chokokue hérava Lucio Junio Moderato Columela, ifamosovaʼekue ohai rupi doce lívro hérava La Labranza.

Pe lívro número cíncope omombeʼu peteĩ ñeʼẽnga yma guare heʼíva: “Omopotĩva ijolivoty ojerure chupe hiʼa hag̃ua; oavonáva ojerure asyvéntema chupe; ha pe ohakãʼóva katu haʼete ku ojopýva chupe hiʼa hag̃ua”.

Upéi heʼi: “Sapyʼánte [...] ojehecha olívo máta iporãva, péro ndahiʼái. Umívare ojapo porã oñembokua ha oñeinhertáramo hese olívo kaʼaguy rakãngue ipyahúva ha ojejokua hatã hese. Upéicha oprende vove, pe yvyramáta hiʼa porãve”.

[Nóta oĩva taʼanga ndive páhina 23]

Ñantendépa mbaʼépa orrepresenta pe olívo máta?