Mávapa upe iñimportantevéva ñandéve g̃uarã?
Mávapa upe iñimportantevéva ñandéve g̃uarã?
“Nde añoite pe Jára Ijyvatevéva oĩva ko yvy apére.” (SAL. 83:18, ÑÑB)
1, 2. Ikatúpa jaʼe jajesalvatamaha jaikuaa rupínte Ñandejára réra? Emyesakã.
OIMÉNE ñande jaikuaa ypy rakaʼe Ñandejára réra ojehechaukárõ guare ñandéve la Bíbliape, ha ñamombaʼeterei voi jaleévo pe téysto heʼíva: “Ha toikuaa hikuái nde haʼeha [Jehová], nde añoite pe Jára Ijyvatevéva oĩva ko yvy apére” (Sal. 83:18, ÑÑB). Upe guive katuete heta vésema jaiporu ko téysto jaikuaauka hag̃ua ñande rapichakuérape mávapa Jehová, upe ñanderayhuetéva (Rom. 10:12, 13).
2 Péro, iñimportánteramo jepe jaikuaa Ñandejára réra, upévante nañandesalvamoʼãi. Ñanemanduʼami jeýna pe salmísta heʼivaʼekuére: “Nde añoite pe Jára Ijyvatevéva oĩva ko yvy apére”. Upéva heʼise Jehová iñimportanteveha opa mbaʼégui, Haʼe ningo ko univérso Apohare. Upévare enterove yvypóra oñemoĩvaʼerã ipoguýpe ha omombaʼeguasu chupe (Rev. 4:11). Upéicharõ iporã ñañeporandumi: “Mávapa upe iñimportantevéva chéve g̃uarã?”. Tekotevẽterei káda uno jajepyʼamongeta ko mbaʼére.
Mbaʼe provlémapa oñepyrũvaʼekue hardín de Edénpe?
3, 4. Mbaʼe mbaʼépa oiporu Satanás ombotavy hag̃ua Évape, ha mbaʼépa ohupyty upe haguére?
3 Umi mbaʼe oikovaʼekue Edénpe ohechauka jaikuaa porã vaʼerãha mávapa iñimportanteve ñandéve g̃uarã. Upépe ningo peteĩ ánhel aña ombotavyvaʼekue Évape ha upévare pe kuña ou ojepyʼapyve ijehe ojaporangue Ñandejára rembipota (Gén. 2:17; 2 Cor. 11:3). Eva hoʼa Satanás ñuhãme ha hoʼu pe yva Jehová oproivivaʼekue. Péicha ohechauka Ñandejára ndahaʼeiha upe iñimportantevéva chupe g̃uarã ha ndoipotaiha oisãmbyhy chupe. Péro mbaʼe mbaʼépa oiporu Satanás ombotavy hag̃ua Évape?
4 Satanás oñemongetárõ guare Évandi ojekuaa hese oporombotavykuaaitereiha (elee Génesis 3:1-5). Primero, oiporurangue Ñandejára réra tee Jehová, heʼínte “Ñandejára”. Ndojoguaiete pe ohaivaʼekuépe Génesis, haʼe oiporu Jehová réra kapítulo 3, versíkulo 1-pe. Segundo, Satanás oporandu mbaʼépa “heʼi” Ñandejára, noporandúi mbaʼépa “omanda” chupekuéra (Gén. 2:16). Oiméne ojapo upéicha ani hag̃ua Eva omombaʼeterei Jehová oipotáva ojapo. Tercero, pe kuña oĩramo jepe haʼeño Satanás oñeʼẽ chupe oĩramoguáicha iménandi, ha heʼi “peẽ”. Oiméne ojapo upéicha oipotágui Eva opensa haʼe iñimportanteveha ha ikatuha odesidi iména rekovia. Ha ojekuaa hese hoʼa hague iñuhãme, upévare heʼi: ‘Ore ikatu roʼu yva koʼapegua’.
5. a) Mbaʼépa Satanás omokyreʼỹ Évape ojapo hag̃ua? b) Mbaʼépa ohechauka Eva hoʼúvo pe yva?
5 Satanás avei okambia ogustahaichaite Ñandejára omandavaʼekue Adán ha Évape. Oipota opensa Jehová ndahekojojaiha, upévare heʼi Évape: ‘Añete piko Ñandejára heʼi peẽme ani hag̃ua peʼu mbaʼeveichagua yva koʼapegua?’. Upéi omokyreʼỹ chupe opensa hag̃ua ijehénte ha péicha oiko porãvetaha, heʼi voi chupe ikatuha ‘oiko Ñandejáraicha’. Amo ipahápe Eva ohendu Satanáspe ha ojesarekóntema pe yva rehe ha ombotapykue Itúva yvagapeguápe, upe omeʼẽvaʼekue chupe opa mbaʼe (elee Génesis 3:6). Ñambyasýramo jepe Eva hoʼu pe yva, ha upéicha ohechauka Jehová ndahaʼeiha pe iñimportantevéva chupe g̃uarã.
Mbaʼépa oikovaʼekue Job tiémpope?
6. Mbaʼépa Satanás heʼi Job rehe, ha mbaʼépa Jehová oheja Jóbpe ohechauka?
6 Tiémpo rire Job ohechauka porã mávapa pe iñimportantevéva chupe g̃uarã. Jehová heʼírõ guare ndaiporiha ko kuimbaʼéicha imarangatu ha ijoheipyréva, Satanás ombohovái chupe: ‘Job piko okyhyje rei mbaʼe ndehegui?’ (elee Job 1:7-10). Satanás ningo noñeʼẽvaíri Job ojapóvare, síno mbaʼérepa ojapo. Heʼi hese oserviha Jehovápe oipotáguinte heta mbaʼe, ndahaʼéi ohayhúgui chupe. Péro, mávapa ikatu ohechauka Satanás ijapuha? Job añoite ikatu, ha Jehová oheja chupe ohechauka upéva.
7, 8. Mbaʼe mbaʼépa ohasavaʼekue Job, ha mbaʼépa ohechauka iñeʼẽrendu ha ogueropuʼakávo heta mbaʼe?
7 Jehová oheja Satanás ojopy vai Jóbpe heta vése (Job 1:12-19). Mbaʼéichapa ombohovái ko kuimbaʼe jeroviapy umi mbaʼe vai ohasáva? La Biblia omombeʼu: ‘Job ndojapói ivaíva ha noñeʼẽvaíri Ñandejárare’ (Job 1:22). Péro upéva ndojurumbotýi Satanáspe, ha ombohovái jey voi: ‘Yvypóra oĩ omeʼẽ hag̃uáicha oimeraẽ mbaʼe hekove rehehápe’ (Job 2:4). * Péicha haʼe heʼi Job ohasa asýramo ohechaukataha Jehová ndahaʼeiha upe iñimportantevéva chupe g̃uarã.
8 Jóbpe ojagarra peteĩ mbaʼasy vai oporombojeguarúva, ha hiʼarive hembireko heʼi chupe: ‘Emaldesi Ñandejárape ha emano!’. Amo ipahápe mbohapy iñamígo guaʼu heʼi hese oiméne hag̃ua ojapóraʼe peteĩ mbaʼe ivaietereíva (Job 2:11-13; 8:2-6; 22:2, 3). Péro heta ohasa asýramo jepe, Job akóinte hekomarangatu ha ijoheipyre (elee Job 2:9, 10). Haʼe iñeʼẽrendu ha ogueropuʼaka heta mbaʼe. Upéicha ohechauka Jehová haʼeha pe iñimportantevéva chupe g̃uarã ha avei peteĩ yvypóra iñimperféktova ikatuha ombohovái umi mbaʼe vai Satanás heʼíva (embojoja Proverbios 27:11 rehe).
Jesús ombohovái hekopete
9. a) Mbaʼépa oiporu Satanás omoñuhã hag̃ua Jesúspe? b) Mbaʼépa Jesús ojapo Satanás omoñuhãsérõ guare chupe?
9 Jesús ojevautisa riremi, Satanás oipota haʼe opensa ijehénte ha omboyke Jehovápe. Upearã omoĩ chupe mbohapy ñuhã. Ñepyrũrã, Jesús iñembyahyietereírõ guare, heʼi chupe ojapo hag̃ua umi itágui pán (Mat. 4:2, 3). Ñanemanduʼavaʼerã upérõ Jesús cuarenta díama ndoʼuvéi hague mbaʼeve, ha upévare katuete iñembyahyietereímane. Mbaʼépa Jesús ojapo Satanás omoñuhãsérõ guare chupe? Upepete ombohovái ndojapomoʼãiha, ha imanduʼa Jehová Ñeʼẽre. Ajéiko ndojoguaiete Évape (elee Mateo 4:4).
10. Mbaʼérepa Satanás omboliga Jesúspe ojepoi hag̃ua pe témplo árigui?
10 Upéi Satanás oipota jey Jesús opensa ijehénte, upévare omboliga chupe ojepoi hag̃ua pe témplo árigui (Mat. 4:5, 6). Mbaʼépa haʼe ohupytyse upérõ? Satanás heʼi Jesúspe ojepoíramo pe yvatégui ha ndojehúi chupe mbaʼeve, ohechaukataha haʼeha ‘Ñandejára raʼy’. Haʼe ningo oipota Jesús oñemombaʼeguasu ha ojechauka umi héntepe ojapóvo peteĩ mbaʼe ijojahaʼỹva. Satanás oikuaa heta yvypóra ojapoha oimeraẽ mbaʼe oipotágui oñemombaʼeguasu chupekuéra ha opyta porãségui hapicha renondépe. Upévare Satanás oityse Jesúspe ko ñuhãme, ha oiporu vai peteĩ téysto ojopy hag̃ua chupe, péro haʼe oikuaa porã Ñandejára Ñeʼẽ heʼíva ha ndoʼái iñuhãme (elee Mateo 4:7). Péicha ohechauka porã jey Jehová haʼeha pe iñimportantevéva chupe g̃uarã.
11. Mbaʼérepa Jesús ndoipotái umi rréino Satanás oikuaveʼẽvaʼekue chupe?
11 Ipahápe katu Satanás ndoikuaavéima mbaʼéichapa omoñuhãta Ñandejára Raʼýpe, upémarõ oikuaveʼẽ chupe opa rréino oĩva ko múndope (Mat. 4:8, 9). Péro Jesús heʼi chupe ndoipotaiha, oikuaágui ojapóramo upéicha omboyketaha Jehová sãmbyhy (elee Mateo 4:10). Jahechakuaa umi tres vése Jesús ombohováirõ guare Satanáspe oiporu hague umi téysto oĩháme Ñandejára réra.
12. Mbaʼe situasión ijetuʼúvapa ombohovái Jesús omano mboyve, ha mbaʼépa ñanemboʼe upéva?
12 Jesús omano mboyve ombohovái peteĩ mbaʼe ijetuʼúva. Haʼe ohechauka porã umi mbaʼe ojapovaʼekuére omeʼẽtaha hekove opavave rehehápe omeʼẽséguinte, ndahaʼéi ojejopýgui chupe (Mat. 20:17-19, 28; Luc. 12:50; Juan 16:28). Péro oikuaa avei amo ipahápe ojehusgataha umi hudío léipe heʼiháicha ha ojeʼetaha hese oñeʼẽ vai hague Ñandejárare. Haʼe otĩeterei ha oñeñandu vai péicha ojejukáta haguére, upévare oñemboʼe Itúvape, ha heʼi: ‘Che Ru, ikatúramona eipeʼami chehegui ko kópa. Péro ani oikótei pe che aipotáva, toiko guei pe nde reipotáva’ (Mat. 26:39, NM). Jesús iñeʼẽrendu omanoite peve, ha upéicha ohechauka porã Jehová haʼeha pe iñimportantevéva chupe g̃uarã.
Mbaʼéichapa ñande ñambohováita?
13. Mbaʼépa ñanemboʼe Eva, Job ha Jesucristo ehémplo?
13 Mbaʼépa ñanemboʼe umi párrafo ñahesaʼỹijómava? Eva ojapovaʼekue ñanemboʼe oiméramo ñañemombaʼeguasu ha jajepyʼapy ñandejehénte, jahechaukataha Jehová ndahaʼeiha pe iñimportantevéva ñandéve g̃uarã. Job katu ndojoguaiete chupe, haʼe ñanemboʼe ñande yvypóra imperfékto ikatuha jagueropuʼaka umi mbaʼe ijetuʼúva, oĩramo jepe heta mbaʼe nañantendéiva mbaʼérepa oiko. Jajapóramo Job ojapo haguéicha jahechaukáta akóinte ñamotenondeha Jehovápe (Sant. 5:11). Jesús ehémplo katu ñanemokyreʼỹ jajapo hag̃ua Jehová heʼíva ñañemotĩtaramo jepe sapyʼánte, ha avei pono jajepyʼapyeterei japyta vaíramo g̃uarã ñande rapicha renondépe (Heb. 12:2). Péro, mbaʼéichapa ikatu jajapo koʼã mbaʼe?
14, 15. Mbaʼépepa ojoavy Eva ha Jesús ombohovái lája Satanáspe, ha mbaʼéichapa ikatu jajapo Ñandejára Raʼy ojapo haguéicha? (Ehecha pe taʼanga oĩva páhina 18-pe.)
14 Aníkena jaʼa Satanás ñuhãme ha ñanderesarái Jehovágui. Eva ojapo Satanás heʼíva ha ojesareko upe oikuaveʼẽvare chupe. ‘Omaʼẽvo upe yva iporãitévare, ohecha iporãha ojeʼu hag̃ua.’ (Gén. 3:6.) Jesús katu ndaupeichaietevaʼekue! Haʼe ndoʼái umi mbohapy ñuhã Satanás omoĩvaʼekuépe chupe. Mbaʼérepa? Ndojesarekói rupi Satanás oikuaveʼẽvare chupe, ha opensa mbaʼépa ikatu oiko ojapóramo umi mbaʼe vai. Avei oiporu Ñandejára réra ha Iñeʼẽ.
15 Ha ñande, mbaʼe rehépa jajesarekovaʼerã jajapose jave peteĩ mbaʼe Jehovápe ndogustáiva? Jasegíramo ñapensa upe mbaʼe vaíre, koʼýte jajaposevéta (Sant. 1:14, 15). Upévare ijetuʼúramo jepe, pyaʼe jaipeʼavaʼerã ñane korasõgui umi mbaʼe vai, ku jaipeʼaramoguáicha ñande resa térã ñande jyva (Mat. 5:29, 30). Avei tekotevẽ jajapo Jesús ojapo haguéicha ha ñapensa mbaʼépa ikatu oiko jajapóramo umi mbaʼe vai ha mbaʼéichapa japytáta ñande Ru yvagapegua renondépe. Ñanemanduʼavaʼerã mbaʼépa heʼi la Biblia upévare, upéicharõ añoite jahechaukáta Jehová iñimportanteveha ñandéve g̃uarã opa mbaʼégui.
16-18. a) Mbaʼe situasión ijetuʼúvapa ñambohovái jepi? b) Mbaʼépa ñanepytyvõta jagueropuʼaka hag̃ua umi provléma?
16 Aníkena ñandepochy Jehováre jahasa asy jave (Pro. 19:3). Og̃uahẽmbotávo huʼãme ko múndo aña, Ñandejára siervokuéra ñambohovái heta mbaʼe ñanembohasa asýva. Jaikuaa ningo Jehová koʼág̃a rupi ndaikatumoʼãiha oñangareko ñanderehe peteĩ milágro rupive. Upévare ikatu oiko ñanderehe Job rehe oiko haguéicha: omano peteĩ jahayhúva térã ñanembohasa asy umi provléma ijetuʼúva.
17 Job nontendeivaʼekue mbaʼérepa Ñandejára oheja oiko hese umi mbaʼe vai. Upéicha avei ñande sapyʼánte ndajaikuaái mbaʼérepa oiko umi desgrásia. Pór ehémplo ikatu ñahendu omano hague heta ermáno oiko rupi peteĩ yvyryrýi, ojehu haguéicha Haitípe. Térã oñemombeʼu ñandéve peteĩ ermáno oñembyepoti vaipa hague ỹrõ omano hague peteĩ aksidéntepe. Ha ikatu ñande voi jahasañaína peteĩ mbaʼe ijetuʼúva, ha jajepyʼapyetereígui ñañeporandu: “Mbaʼére piko Jehová? Mbaʼéreiko chévente ojehu péicha? Mbaʼe piko ajapo vai raʼe?” (Hab. 1:2, 3). Mbaʼépa ikatu ñanepytyvõ umícha jave?
18 Ñaneprovléma heta jave ndovaléi ñapensa Jehová ipochýgui ñanderehe jahasaha umi mbaʼe. Jesús ohechaukavaʼekue noĩporãiha ñapensa upéicha oñeʼẽrõ guare mokõi desgrásia oikovaʼekuére (elee Lucas 13:1-5). Sapyʼánte ningo oiko heta mbaʼe vai ‘pe tiémpo ha umi mbaʼe ñahaʼarõʼỹva ohupytýgui opavavépe’ (Ecl. 9:11, NM). Péro tou ouhágui umi provléma, Ñandejára ñanemombaretéta jagueropuʼaka hag̃ua. “Haʼe niko ñandeporiahuvereko ha ñanembovyʼa.” (2 Cor. 1:3-6.)
19, 20. Mbaʼéichapa Jesús ogueropuʼaka oĩramo oñembohorýva hese, ha mbaʼépa ñanepytyvõta ñande avei jajapo hag̃ua upéicha?
19 Aníkena ñamboyke Jehovápe ñañemombaʼeguasuségui térã jakyhyjégui ñañemotĩrõ g̃uarã. Jesús hekomirĩ rupi ‘ohejavaʼekue opa mbaʼe oguerekóva ha oiko tembiguáiramo’ (Fili. 2:5-8, BNP). Oĩramo jepe heta oñembohorýva hese, haʼe ogueropuʼaka umi mbaʼe ojepytaso rupi Itúva ykére (1 Ped. 2:23, 24). Péicha omotenonde Jehová rembipota, ha upévare Haʼe omeʼẽ chupe peteĩ puésto ijyvatéva amo yvágape (Fili. 2:9). Jesús ñanemokyreʼỹ ñanderekomirĩ ha jasegi hag̃ua iñehémplo (Mat. 23:11, 12; Luc. 9:26).
20 Ñande ningo sapyʼánte jahasa avei heta situasión ikatuhápe ñañemotĩ. Péro umícha jave tekotevẽ jajerovia Pablo ojerovia haguéicha. Haʼe heʼi: ‘Ahasaʼaína koʼã mbaʼe rehe, ha upéicharõ jepe natĩri. Che aikuaa porã mávarepa ajerovia, ha aikuaa porã haʼe oñangarekotaha opa mbaʼe amoĩvare ipoguýpe’ (2 Tim. 1:12).
21. Mbaʼépa jajapovaʼerã oĩramo jepe heta hénte opensáva ijehénte?
21 La Biblia heʼi voi ñane tiémpope ‘opavave imbaʼerãnte oipotataha opa mbaʼe’ (2 Tim. 3:2). Upévare ndajahecharamói koʼág̃a rupi oĩha heta hénte opensáva ijehénte, péro aníkena ñande avei jajapo upéicha. Jajepytasovaʼerã Jehová ykére oĩ jave ñandejopýva jajapo hag̃ua mbaʼe vai, jahasa peteĩ mbaʼe ijetuʼúva térã oĩ jave ñanemotĩséva. Upéicha jahechaukatañaína Jehová iñimportanteveha ñandéve g̃uarã.
[Nóta]
^ párr. 7 Umi karai arandu oñeʼẽva la Bíbliare, omombeʼu mbaʼépa heʼise: “Yvypóra oĩ omeʼẽ hag̃uáicha oimeraẽ mbaʼe hekove rehehápe”. Haʼekuéra heʼi ko téysto ohechaukaha Job opensaha ijehénte, ha nomanoséigui ohejatanteha omano hymbakuéra ha ifamiliakuéra jepe.
Emyesakãmi koʼã mbaʼe
• Mbaʼépa oiporu Satanás ombotavy hag̃ua Évape?
• Mbaʼépa ojapo Job nontendéiramo jepe mbaʼérepa ohasa umi mbaʼe vai?
• Mbaʼépa omotenonde Jesús?
[Porandu ñahesaʼỹijóva]
[Nóta oĩva taʼanga ndive páhina 17]
Eva ojepyʼapyve ijehe ojaporangue Jehová rembipota
[Nóta oĩva taʼanga ndive páhina 18]
Jesús omboyke umi mbaʼe Satanás oikuaveʼẽva chupe ha omotenonde Jehová rembipota
[Nóta oĩva taʼanga ndive páhina 20]
Ojepredika Haitípe opa rire pe yvyryrýi
Ñandejára ‘ñandeporiahuvereko ha ñanembovyʼáta’ ñambohovái jave umi provléma ijetuʼúva
