Ndépa revyʼa releévo Ñandejára Ñeʼẽ?

PETEĨ ermána hérava Lorraine heʼi: “Añepyrũrõ guare alee ára ha ára la Biblia pyaʼeterei chembyaju. Ijetuʼuetereími chéve antende hag̃ua upe aleéva, ha añatenderangue apensa ambue mbaʼére”.

Heta kristiánore oiko avei péicha. Péro haʼekuéra oñehaʼãmbaite olee la Biblia, oikuaágui upéva iporãha. Marc omombeʼu: “Ndahasyiete ningo ñamotenonde hag̃ua ambue mbaʼe ha upéinte jalee ha jastudia ñaneañohápe. Che heta añemboʼémi ha añehaʼãmbaite ajepokuaa hag̃ua alee ára ha ára Ñandejára Ñeʼẽ”.

Mbaʼépa nde ikatu rejapo remombaʼeve hag̃ua Ñandejára Ñeʼẽ? Mbaʼépa nepytyvõta releese hag̃ua la Biblia? Jahechamína.

Umi mbaʼe ikatúva rejapo

Eñemboʼe reñepyrũ mboyve ha eñatende porã. Ejerure Jehovápe tanepytyvõ restudiase hag̃ua la Biblia, upéicharõ opytáta ne akãme umi mbaʼe releéva, og̃uahẽta ne korasõme ha avei rehechakuaáta Ñandejára iñaranduetereiha (Sal. 119:34). Nderejapóiramo koʼã mbaʼe pyaʼeterei ndekuerái ha ndekaiguéta. Lynn heʼi: “Sapyʼánte pyaʼeterei alee ha ojehasa chehegui heta mbaʼe, upévare nantendeporãi jepi umi mbaʼe iñimportánteva. Upéicha rupi ajerure Jehovápe tachepytyvõmi ajepokuaa hag̃ua alee Iñeʼẽ ha anivéma hag̃ua apensa ambue mbaʼére upe aja”.

Emombaʼe upe reaprendéva. Nemanduʼákena rentende porã vaʼerãha la Biblia ha rejapo upépe heʼíva, upéicharõ añoite ikatúta rejesalva. Upévare, tekotevẽ reñehaʼãmbaite rejuhu umi mbaʼe nepytyvõtava nde rekovépe. Chris omombeʼu: “Ajesareko umi mbaʼe chepytyvõtavare akambia hag̃ua che lája ha umi mbaʼe vai ajaposéva. Avyʼaiterei voi ningo atopa jave la Biblia ha puvlikasionkuérape informasión chepytyvõtava, haʼete ku chéve g̃uarãite ojejapovaʼekue. Ha hiʼarive umi ohaivaʼekue ndachekuaái!”.

Eñehaʼã ehupyty hetave mbaʼe. Reikuaave hag̃ua umi kuimbaʼe ha kuña rembiasakue oĩva la Bíbliape ikatu reiporu lívro Perspicacia para comprender las Escrituras térã Índice de las publicaciones Watch Tower. Rejapóramo upéicha, reikuaa porãvéta chupekuéra ha rehechapátavaicha umi mbaʼe ohasavaʼekue hikuái.

Eheka informasión ipyahuvéva omopensátava umi héntepe (Hech. 17:2, 3). Upéicha ojapo Sophia, haʼe omombeʼu: “Aheka informasión pyahu ikatuvaʼerãichagua aiporu predikasiónpe térã ambue hendápe, ha péicha amyesakã porãve Ñandejára Ñeʼẽ umi héntepe. Pe rrevísta Ñemañaha chepytyvõiterei ajapo hag̃ua upéva” (2 Tim. 2:15).

Epensa reimeha voi upépe. Hebreos 4:12 heʼi ‘Ñandejára Ñeʼẽ oikoveha’. Upévare releevaʼerã rehechaparamoguáicha la Biblia omombeʼúva. Eñehaʼã ehecha, ehendu ha eñandu umi hénte ohasavaʼekue. Avei reñeporandukuaa: “Ahasapaʼaína umi mbaʼe haʼekuéra ohasavaʼekue? Mbaʼéichapa ikatu asegi iñehemplokuéra ambohováivo  umi situasión ijetuʼúva?”. Repensáramo koʼã mbaʼére rentende ha nemanduʼa porãvéta umi mbaʼe releevaʼekuére Ñandejára Ñeʼẽme.

Eiporu umi puvlikasión rehesaʼỹijo hag̃ua umi mbaʼe hypyʼũvéva. Eñemotiémpokena restudia porã hag̃ua neañohápe. Ehesaʼỹijo umi informasión iñimportantevéva, eheka mbaʼépa heʼise umi ñeʼẽ ndereikuaáiva ha ehecha mbaʼépa heʼi umi nóta ha rreferénsia oĩva la Bíbliape. Reikuaávo hetave mbaʼe ha rejapóvo umi mbaʼe reaprendéva, revyʼáta restudiávo Ñandejára Ñeʼẽ. Ha ikatúta ere pe salmísta heʼi haguéicha Jehovápe: ‘Ne rembiapoukapy opytáta chembaʼerã opa ára g̃uarã, umíva ningo chembopyʼarory’ (Sal. 119:111, ÑÑB).

Ani restudia pyaʼe pyaʼe, síno trankílo porãnte. Péro nemanduʼavaʼerã tekotevẽha avei rejeprepara rreunionrã. Raquel heʼi: “Sapyʼánte aguereko hetaiterei mbaʼe astudiavaʼerã ha ijetuʼu ajapopa hag̃ua. Upévare ideprovechove chéve astudiáramo mbyky mimi”. Chris katu omombeʼu: “Astudiáramo pyaʼe pyaʼe, añeñandu vai ndopytáigui mbaʼeve che akãme ha nog̃uahẽigui che korasõme”. Ha nde, mbaʼépa tekotevẽ rejapo ani ág̃a oiko avei nderehe upéicha? Reñemotiempovaʼerã restudia hag̃ua.

Ehayhu Ñandejára Ñeʼẽ. Apóstol Pedro heʼivaʼekue: ‘Mitãkambúicha peheka kamby oñembojeheʼaʼỹva, upéva ningo Ñandejára ñeʼẽ, ha péicha pende jerovia okakuaa porãvéta pejesalva peve’ (1 Ped. 2:2 ÑÑB). Umi mitã onase ramóva ningo okambuseterei voi, péro ñande jajepokuaa hag̃ua jastudia Ñandejára Ñeʼẽ ñañehaʼã raẽ mante vaʼerã. Upévare iporãta releéramo la Biblia una páhina jepe káda día, ha péicha mbeguekatúpe nekyreʼỹta restudiaseveseve hag̃ua. Ñepyrũrã ikatu ijetuʼu, péro upéi igustoitereítama ndéve.

Ejepyʼamongeta releévare. Iporã ningo rejepyʼamongeta restudia rire Ñandejára Ñeʼẽ, ikatu hag̃uáicha hesakãve ndéve umi mbaʼe restudiáva ha péicha sapyʼaitérõ g̃uarã reikuaátama heta mbaʼe iporãitereíva (Sal. 19:14; Pro. 3:3).

Ikatu reaprovecha porã ne tiémpo

Ijetuʼu ningo añete rejepokuaa hag̃ua restudia la Biblia, péro rejapóramo upéicha  reiporu porãta ne tiémpo. Pór ehémplo, hesakãvéta ndéve heta mbaʼe Ñandejára Ñeʼẽme oĩva (Heb. 5:12-14). Rehechakuaáta mbaʼépa oĩ porã térã oĩ vai, ha reikuaáta avei mbaʼépa rejapovaʼerã ikatu hag̃uáicha reñeñandu porã, revyʼa ha reiko pyʼaguapýpe. Nemanduʼavaʼerã umi ojapo ha ojeroviáva la Biblia heʼívare ikatuha oiko opa ára g̃uarã (Pro. 3:13-18).

Rehesaʼỹijo porã vaʼerã Ñandejára Ñeʼẽ ikatu hag̃uáicha nearanduve (Pro. 15:14). Ha péicha reiporukuaavéta la Biblia reñemoñeʼẽ hag̃ua nde rapichakuérape. Avei redesidíta jave peteĩ mbaʼe, rejapovaʼerã Ñandejára Ñeʼẽ ha umi puvlikasión omeʼẽva “tembiguái jeroviaha ha iñarandúva” heʼiháicha, péicharõmante reñeñandu porãta ha reikóta pyʼaguapýpe (Mat. 24:45). Avei ikatúta nekyreʼỹ, imbareteve nde jerovia ha, iporãveha, reservi porãvéta Jehovápe (Sal. 1:2, 3).

Rehayhúramo Ñandejára Jehovápe nde pyʼaite guive reñeʼẽséta nde rapichakuérape hese, ha upéva katuete nembovyʼáta. Pór ehémplo Sophia oñehaʼã imanduʼa ha oiporu heta téysto vívliko oipytyvõtava umi hénte opredikávape, upéicha rupi haʼekuéra oñatende porãve hese, ha haʼe ohupyty hetave mbaʼe porã iservísiope. Sophia omombeʼu: “Igustoiterei ningo jahecha mbaʼéichapa umi hénte omombaʼe Ñandejára Ñeʼẽ heʼíva”.

Ha iporãveha, ikatu oiko ndehegui Jehová amígo releéramo la Biblia ára ha ára. Avei restudiáramo rentende porãvéta umi mbaʼe Ñandejára ojeruréva ha rehechakuaáta mbaʼeichaitépa haʼe nderayhu, imbaʼeporã ha hekojoja. Ndaipóri mbaʼeve peichaite peve iñimportánteva ha ikatúva nembovyʼa. Upévare, eñemotiémpokena restudia hag̃ua Ñandejára Ñeʼẽ. Upéicha rejapóramo reaprovecha porã reína ne tiémpo (Sal. 19:7-11).

[Nóta oĩva taʼanga ndive páhina 5]

UMI MBAʼE IKATÚVA REJAPO RELEE HAG̃UA LA BIBLIA

▪ Eñemboʼe reñepyrũ mboyve ha eñatende porã

▪ Emombaʼe upe reaprendéva

▪ Eñehaʼã ehupyty hetave mbaʼe

▪ Eheka informasión ipyahuvéva omopensátava umi héntepe

▪ Epensa reimeha voi upépe

▪ Eiporu umi puvlikasión rehesaʼỹijo hag̃ua umi mbaʼe hypyʼũvéva

▪ Ani restudia pyaʼe pyaʼe, síno trankílo porãnte

▪ Ehayhu Ñandejára Ñeʼẽ

▪ Ejepyʼamongeta releévare

[Nóta oĩva taʼanga ndive páhina 4]

Releévo la Biblia, epensa rehasaha umi mbaʼe ohasavaʼekue Ñandejára siervokuéra