Mbaʼéichapa opa mbaʼe ikatu osẽ porã ndéve

“TOSẼ porãmba ndéve!” Ajépa igústo ojeʼe jave ñandéve péicha. Umi opensáva itraváhorente oimoʼã opa mbaʼe osẽ porã hag̃ua chupe tekotevẽha ombaʼapo porã ha ipláta heta, upévare oñehaʼãmbaite irríko ha oipota oñemombaʼe chupe. Jaikuaaháicha heta oĩ ohupytyséva upéva, péro naentéroi ohupyty.

Opa mbaʼe osẽ porã hag̃ua ñandéve odepende koʼã mbohapy mbaʼére: jaiporavo porã mbaʼépa jahupytyse ñande rekovépe, jaiporu porã ñane tiémpo ha ñane mbaretekue, ha jadesidi ñandete voi jajapo peteĩ mbaʼe.

Heta kristiáno ovyʼaiterei kyreʼỹme opredika meme rupi. Tahaʼe imitãva térã ijedáva ohechakuaa osẽ porãha chupekuéra opa mbaʼe oiporupaitégui itiémpo Jehová servísiope. Péro oĩ opensáva ndovyʼamoʼãiha omotenondéramo Ñandejára Rréino ha upévare oñehaʼã ohupyty ambue mbaʼe. Mbaʼérepa oĩ opensáva upéicha? Ha peẽ mitãrusu ha mitãkuñanguéra, mbaʼépa ikatu pejapo ani hag̃ua pembotapykue umi mbaʼe iñimportantevéva? Mbaʼéichapa ikatu ‘opa mbaʼe osẽ porã ndéve’? (Jos. 1:8, ÑÑB.)

Umi mbaʼe rejapóva kláse rire

Umi kristiáno imitãva tekotevẽ omohenda porã itiémpo ani hag̃ua ombotapykue Jehová servísio ojapo rupi ambue mbaʼe. Reikuaámapa mbaʼéichapa ikatu rejapo upéva? Oimérõ reikuaáma, roguerohoryeterei, katuete osẽ porãta ndéve opa mbaʼe rejapóva.

Péro heta oĩ omotenondéva umi mbaʼe ojejapóva kláse rire, tahaʼe koléhiope térã ambue hendápe. Ndaivaíriramo jepe umíva, iporãta oñeporandu hikuái: “Mboy tiémpopa oiporu chehegui? Mbaʼeichaguárepa ajeheʼáta ha mbaʼeichahápepa? Amotenondétapa upévantema voi?”. Pór ehémplo, ikatu oĩ peteĩ mbaʼe rejaposetereíva ha upéi nanekyreʼỹvéima ha nanetiempovéima Jehovápe g̃uarã. Upévare iñimportanteterei reikuaa porã mbaʼépa remotenondéta nde rekovépe (Efe. 5:15-17).

Jahechamína mbaʼépa oikovaʼekue Stefan rehe. * Haʼe heʼi: “Arekórõ guare 12 áño, añepyrũ ahuga vólei peteĩ ekípope. Agana heta medálla ha prémio, ha ikatúkuri chefamóso”. Upéicharõ jepe, Stefan ohechakuaa upéva omomombyrytaha chupe Jehovágui. Pór ehémplo, ikaneʼõieterei rupi oke oleehápe la Biblia, ha naikyreʼỹguasuvéi predikasiónpe. Haʼe omombeʼu: “Umi huégo rire chekaneʼõitereíma ha ahechakuaa ambotapykuemaha ahávo Jehovápe ameʼẽ rupi chupe che tiémpo hembývantema”.

Rehovaʼerãpa universidápe?

La Biblia ohechauka porã kristianokuéra oñangareko ha omantenevaʼerãha ifamíliape (1 Tim. 5:8). Péro, tekotevẽ piko katuete reho universidápe rejapo hag̃ua upéva?

Tekotevẽ rejepyʼamongeta umi mbaʼe ikatúvare oiko rehóramo universidápe ha mbaʼéichapa Jehová ohecháta upéva. La Bíbliape oĩ peteĩ ehémplo nepytyvõtava upearã.

Baruc ningo ombaʼapovaʼekue Jehová servísiope, proféta Jeremías sekretárioramo.  Upéicharõ jepe, haʼe ou nomombaʼevéi upéva ha oipota potave heta mbaʼe. Jehová ohechakuaa upéva ha oñemoñeʼẽ chupe proféta Jeremías rupive: ‘Nde reheka ndejupe g̃uarãnte umi mbaʼe tuichaitereíva, anive reheka’ (Jer. 45:5, ÑÑB).

Mbaʼe ‘tuichaitereívapa’ ohekarakaʼe oikóvo Baruc? Ikatu haʼe oipota omombaʼe chupe umi hudío térã ipláta hetaseve. Upéicha, Baruc hesarái pe mbaʼe iñimportantevévagui: omotenondevaʼerãha Jehová servísio (Fili. 1:10). Péro upéi Jehová oñemoñeʼẽrõ guare Barúcpe, haʼe iñeʼẽrendu ha upévare ojesalva oñehundírõ guare Jerusalén (Jer. 43:6).

Mbaʼépa ñanemboʼe pe konsého Jehová omeʼẽvaʼekue Barúcpe? Haʼe ojavy ohekárõ guare umi mbaʼe tuichaitereíva ijupe g̃uarãnte. Upévare, iporã reñeporandu koʼã mbaʼe: “Astudiámarõ voi ambaʼapo ha añemantene hag̃ua, tekotevẽta piko aiporuve che tiémpo, pláta ha che mbaretekue umi estúdio ijyvatevéva rapykuéri? Oĩ porãtapa astudiavéramo apenságui chejehénte térã ambovyʼa hag̃ua che tuvakuéra ha che hentekuérape?”.

Ñapensamína oikovaʼekue Aleksander rehe, haʼe ningo programadór informático ha iñirũnguéra omboliga rupi chupe ostudiave. Upéi ohechakuaa naitiempoveimaha Jehovápe g̃uarã. Haʼe heʼi: “Chekaneʼõháre ningo aiko ha che konsiénsia chejopýma ndaikatúi haguére ahupyty umi méta amoĩvaʼekue Jehová servísiope”.

Ñañemeʼẽ traváhope

Ñandejára Ñeʼẽ omokyreʼỹ umi patrón ha umi ombaʼapóvape iguápo ha ojapo hag̃ua hekoitépe oñehaʼarõva chuguikuéra. Apóstol Pablo ohaivaʼekue: ‘Oimeraẽ mbaʼe pejapóva, pejapo pende pyʼaite guive pembaʼaporamoguáicha Ñandejárape g̃uarã, ha ndahaʼéi yvypórape’ (Col. 3:22, 23). Iñimportánteramo jepe ñañemeʼẽmbaite ñande traváhope, iñimportanteve ñaime porã ñande Apohare ndive (Ecl. 12:13). Upévare, ñañangarekovaʼerã ñandejehe ani hag̃ua ñambotapykue Jehová servísio ñañemeʼẽtereígui ñande traváhope.

Ikatu voi ñaneateʼỹma jajapo porã hag̃ua ñanerembiapo kongregasiónpe ha ñande rógape. Rréi Salomón heʼivaʼekue ani hag̃ua ñañemeʼẽterei traváhope, upéicha jajapóramo haʼetéta ‘jajokoséva yvytu’. Umi kristiáno oikóva péicha ikaneʼõ ha inerviosoháre oiko. Oĩ voi umi itraváho omaneháva chupe ha amo ipahápe upévare oñeñanduvaíma. Upéicha oikóva, hasy ‘ovyʼa hag̃ua ohechávo hembiapokue’ (Ecl. 3:12, 13; 4:6). Ha ijetuʼuveha, ikaneʼõta ha naikyreʼỹmoʼãi oñangareko hag̃ua ifamíliare ha omotenonde hag̃ua Jehová servísio.

 Jahechami Janusz ehémplo, haʼe ningo oiko Europa orientálpe ha ojededika plánta ñevendépe. Haʼe imanduʼávo heʼi: “Heta oĩvaʼekue cheguerohorýva akumpli rupi che traváhope ha ajapokuaágui heta mbaʼe, péro che jerovia Jehováre ikangyeterei. Ñepyrũrã aju ndapredikavéi ha mbeguekatúpe ndahavéima avei rreunionhápe. Umi ansiáno oñemoñeʼẽramo jepe chéve heta vése, nahendúi chupekuéra añemombaʼeguasueterei rupi. Ha amo ipahápe añemomombyrýma kongregasióngui”.

Opa mbaʼe ikatu osẽ porã ndéve

Jahecháma mbohapy mbaʼe ikatúva ñanemomombyry Jehovágui. Koʼãva apytégui, mbaʼépa ijetuʼuve ndéve? Pomokyreʼỹ pejepyʼamongeta hag̃ua umi téysto, porandu ha  komentário oñemoĩvare. Koʼãva penepytyvõta pehechakuaa hag̃ua osẽ porãtapa peẽme opa mbaʼe.

Umi mbaʼe rejapóva kláse rire. Oiporupaitépa ndehegui ne tiémpo? Oiporúpa avei ndehegui ne tiémpo remboykevaʼekue Jehovápe g̃uarã? Nderevyʼavéipa ermanokuérandi? Oiméramo upéicha, iporãta rejapo rréi David ojapo haguéicha, haʼe oñemboʼe Jehovápe: “Ehechauka chéve mbaʼéichapa aikovaʼerã” (Sal. 143:8).

Mbaʼépa oikovaʼekue Stefan rehe? Peteĩ superintendénte de sirkuíto heʼi chupe: “Ne ñeʼẽre ojekuaa neakãrakuetereiha vóleire”. Ha Stefan imanduʼávo upévare, heʼi: “Upe heʼivaʼekue opokoiterei cherehe. Ahechakuaa ahasamaha la rrája. Upévare añepyrũ aheka che amigorã kongregasiónpe ha ndajeheʼavéi umi che irũnguéra voleihapeguáre”. Stefan koʼág̃a oñehaʼãmbaite Jehová servísiope ha omeʼẽ ko konsého: “Eporandu ne amigokuérape, umi ansiánope térã nde sy ha nde túvape ohechakuaápa reñemomombyryhareína Jehovágui reiko rupi depórte terã ambue mbaʼe rapykuéri”.

Mbaʼérepa nereñemongetái umi ansiáno ne kongregasiongua ndive? Emombeʼu chupekuéra ikatuha reipytyvõ ermanokuérape. Pór ehémplo ikatu reipytyvõ umi ijedávape, tahaʼe remoirũ, rembaʼejogua térã rejapóvo ambue mbaʼe oikotevẽva hogapýpe. Upéicha avei, nemitã aja ikatu reservi de prekursór ha revyʼáta reguerahávo pe marandu porã nde rapichakuérape.

Universida. Jesús heʼivaʼekue tuicha ojavyha ‘umi ohekáva oñemombaʼeguasu chupe’ (Juan 7:18). Upévare, redesidi mboyve resegítapa restudiave, nemanduʼavaʼerã Ñandejára oipotaha isiervokuéra omotenonde umi mbaʼe iñimportantevéva (Fili. 1:9, 10). Rejapopareína nde upéva?

Aleksander okambiavaʼekue avei heta mbaʼépe, haʼe omombeʼu: “Ajapo umi ansiáno heʼivaʼekue chéve ha amboyke umi mbaʼe naiñimportanteguasúiva. Ahechakuaa natekotevẽiha astudiave, hoʼu reíta rupi chehegui che tiémpo ha chemokaneʼõtagui”. Upe guive, ko ermáno ombaʼapo kyreʼỹ kongregasiónpe. Ha oho avei pe eskuéla koʼág̃a héravape Escuela Bíblica para Varones Solteros. Añetehápe haʼe ‘oiporu porã umi oportunida oĩva ko ára kóvape’ oñembokatupyryve hag̃ua Jehová servísiope (Efe. 5:16, ÑÑB).

Traváho. Reñemeʼẽtereipareína nde traváhope? Saʼípa reñemotiémpo ne famíliape g̃uarã rembaʼapoiterei rupi? Nepytyvõpa remotenonde hag̃ua Jehová rembipota? Reñehaʼãpa rejapo porãve nde párte rreunionhápe? Omokyreʼỹpa nde rapichakuérape umi mbaʼe eréva? Aníkena nderesarái ko konséhogui: ‘Ekyhyje Ñandejáragui ha ejapo heʼíva ndéve’. Rejapóramo péicha katuete Jehová nderovasáta ha ‘revyʼáta rehechávo ne rembiapokue’ (Ecl. 2:24; 12:13).

Osẽ porãpa rakaʼe Janusz inegósiope ohaʼarõ haguéicha? Nahaniriete katu. Haʼe opyta isogue ha odeve ápe ha pépe. Upémarõ oñemoag̃ui jey Jehováre, osolusiona iprovlemakuéra ha koʼág̃a oservi de prekursór ha ansiáno. Haʼe heʼi: “Che ningo koʼág̃a aiko pyʼaguapýpe añekontenta rupi che remikotevẽ ahupytývare, ha añehaʼãmbaite rupi aipytyvõ che rapichakuérape oñemoag̃ui hag̃ua avei Jehováre” (Fili. 4:6, 7).

Mitãrusu ha mitãkuña, ejepyʼamongetamína umi mbaʼe rejaposévare ha umi mbaʼe remotenodéva rehe. Nemanduʼákena mbaʼépa rejapovaʼerã opa mbaʼe osẽ porã hag̃ua ndéve. Jehová servísio iñimportantevevaʼerã nde rekovépe.

Oiméne rehechakuaáma tekotevẽha rekambia térã remboyke umi mbaʼe naiñimportanteguasúiva. Rejapóramo upéicha rehupytýta heta mbaʼe porã remotenondégui ‘Ñandejára rembipota’ (Rom. 12:2). Reservíramo Jehovápe nde pyʼaite guive, ‘opa mbaʼe rejapóva osẽ porãta ndéve’.

[Nóta]

[Nóta oĩva taʼanga ha rrekuádro ndive páhina 31]

Mbaʼépa nepytyvõta ‘opa mbaʼe osẽ porã hag̃ua ndéve’

Nerembiapoitereíramo jepe, mbaʼépa ikatu rejapo ani hag̃ua rembotapykue umi mbaʼe iñimportantevéva? Reñemotiempovaʼerã rejepyʼamongeta hag̃ua umi mbaʼe rejaposévare ha remotenondévare. Upearã iporãta reñeporandu:

UMI MBAʼE AJAPÓVA KLÁSE RIRE

▪ Chepytyvõtapa umi mbaʼe ajapóva kláse rire?

▪ Mboy tiémpopa oiporúta chehegui?

▪ Amotenondétapa upévantema voi?

▪ Oiporútapa chehegui che tiémpo amboykevaʼekue Jehovápe g̃uarã?

▪ Mbaʼeichaguárepa ajeheʼáta?

▪ Ajeheʼasevépa che kompañerokuérare, ajeheʼa rangue ermanokuérare?

UNIVERSIDA

▪ Astudiámarõ voi ambaʼapo ha añemantenemi hag̃ua, tekotevẽta piko aiporuve che tiémpo, pláta ha che mbaretekue umi estúdio ijyvatevéva rapykuéri?

▪ Tekotevẽ piko areko peteĩ título añemantene hag̃ua?

▪ Afaltánepa rreunionhápe aha rupi universidápe?

▪ Amotenondépa umi mbaʼe iñimportantevéva?

▪ Añehaʼãvaʼerãpa ajeroviave Jehová ndacherejareimoʼãiha?

TRAVÁHO

▪ Avyʼápa ahechávo che rembiapokue?

▪ Ambaʼapo rire, chekyreʼỹpa ajapo porã hag̃ua che rembiapo kongregasiónpe ha che rógape?

▪ Saʼípa añemotiémpo che famíliape g̃uarã ambaʼapoiterei rupi?

▪ Añemeʼẽtereípa che traváhope ha ambotapykue Jehovápe?

▪ Nachetiempovéipa aprepara porã hag̃ua umi asiknasión oñemeʼẽva chéve rreunionrã?

[Nóta oĩva taʼanga ndive páhina 30]

Jehová heʼi Barúcpe anive hag̃ua oheka heta mbaʼe ijupe g̃uarãnte