‘Peñangarekókena Ñandejára ovechakuérare’

‘Peñangarekókena Ñandejára ovechakuérare oĩva pende poguýpe, pejapókena pende pyʼaite guive ha ani ojeʼéguinte peẽme.’ (1 PED. 5:2, NM)

1. Mbaʼérepa Pedro omombaretese iñermanokuérape ohaírõ guare ikuatiañeʼẽ peteĩha?

PE MBURUVICHA Nerón oñepyrũ mboyvemi opersegi kristianokuérape, Pedro ohai ikuatiañeʼẽ peteĩha. Maʼerãpa? Omombareteségui iñermanokuéra jerovia. Satanás ningo peteĩ león vareʼáicha, ojere oikóvo upérupi ojagarra hag̃ua oimeraẽvape. Ha ikatu hag̃uáicha umi kristiáno ogueropuʼaka, ‘ojererekokuaa’ ha ‘oñemomirĩvaʼerã Ñandejára po mbarete guýpe’ (1 Ped. 5:6, 8). Tekotevẽ avei oiko porãmba oñondive, ani oiko ‘ojosuʼu oñomokõmba hag̃uáicha, cháke péicha oñohundipáne’ hikuái (Gál. 5:15, JMP).

2, 3. Mávandipa ñañorairõvaʼerã, ha mbaʼépa ñambohováita ko artíkulope ha pe ótro oúvape?

² Koʼág̃a rupi avei Satanás oheka oikóvo juruja ñandereity hag̃ua (Rev. 12:12). Hiʼag̃uimbaitéma avei pe ‘jehasa asy guasu arakaʼeve oikoʼỹ haguéicha ko múndo ñepyrũmby guive’ (Mat. 24:21, NM). Umi kristiáno síglo primérope guaréicha, ñande avei ñañehaʼãvaʼerã ani jaiko vai oñondive. Upearã pyʼỹinte ñaikotevẽ ansianokuéra ñanepytyvõ.

³ Mbaʼépa oipytyvõta umi ansiánope omombaʼeve hag̃ua hembiapo oñangarekóvo ‘umi ovecha Ñandejára omoĩvare ipoguypekuéra’? (1 Ped. 5:2.) Ha mbaʼéichapa ojapovaʼerã hikuái hembiapo? Ko artíkulope oñembohováita koʼã porandu. Pe ótrope katu jahecháta mbaʼéichapa ermanokuéra ojapovaʼerã ko konsého heʼíva: ‘Pemombaʼe umi ombaʼapo jejopývape pende apytépe ha penesãmbyhývape’ (1 Tes. 5:12, BNP). Koʼã mbaʼe ñanepytyvõta ñandepuʼaka hag̃ua ñane Enemígore ha ani hag̃ua ñanderesarái ñañorairõhañaína hendive (Efe. 6:12).

‘Peñangarekókena umi ovecha Ñandejára omoĩvare pende poguýpe’

4, 5. Mbaʼéichapa ansianokuéra ohechavaʼerã umi ovecha oĩvape ipoguypekuéra? Emombeʼu peteĩ ehémplo.

⁴ Pedro oñemoñeʼẽvaʼekue umi ansiánope síglo primérope ha heʼi chupekuéra mbaʼéichapa ohechavaʼerã umi ovecha Ñandejára omoĩvape ipoguypekuéra (elee 1 Pedro 5:1, 2). Pedro ningo peteĩ omotenondéva kongregasión, upéicharamo jepe noñemoñeʼẽi umi ansiánope tuichave mbaʼerõguáicha (Gál. 2:9). Upéicha avei koʼág̃a pe Cuerpo Gobernante ojerure ansianokuérape ojapo porã hag̃ua hembiapo oñangarekóvo Ñandejára ovechakuérare.

⁵ Pedro heʼi porã umi ansiáno orekoha ipoguýpe ‘Ñandejára ovechakuéra’. Ohechakuaavaʼerã hikuái Jehová ha Jesús mbaʼeha umi ovecha, ha ojechataha hendivekuéra ojapo vaíramo hembiapo. Pór ehémplo, ñamoĩ chupe peteĩ ñane amígo oviahataha ha oheja ñandéve ifamília ñañangareko hag̃ua hesekuéra. Ajépa ñañehaʼãta ñañatende ha ñamongaru porã umi mitã. Ha hasýramo peteĩva katu pyaʼe jagueraháta doktórpe. Upéicha avei umi ansiáno oikuaa orekoha ipoguýpe ‘Ñandejára kongregasión, haʼe ojoguavaʼekue itaʼýra ruguýre’ (Hech. 20:28, NM). Ndahesaráiri hikuái peteĩteĩme Jesucristo ojogua hague huguy repykuére. Avei ojechataha hendive otrata lájare ijovechakuérape. Upévare umi ansiáno  oñehaʼã omongaru porã, oipytyvõ ha oñangareko kongregasiónre.

6. Mbaʼe mbaʼépa ojapovaʼekue umi ovecharerekua yma guare?

⁶ Umi ansiáno rembiapo ojogua umi ovecharerekua yma guare ojapóvape. Umíva ogueraha jave ijovechakuérape okaru hag̃ua, ohasavaʼerã ára haku ha tiémpo roʼy pyharekue (Gén. 31:40). Sapyʼánte katu ojeapeligra ijovechakuéra rehehápe. Upéicha vaʼekue David, imitã guive oñangareko umi ovecháre ha osalva chupekuéra león ha ósogui. Peteĩ jey omombeʼu mbaʼéichapa ojapo upéva: ‘Ajagarra hañykãgui ha agarrotea heta porã ajuka peve’ (1 Sam. 17:34, 35). Ajépa ipyʼaguasuete oñemoĩ hag̃ua umichagua mymbáre! Haʼe ndaipyʼajúi ojapo hag̃ua oimeraẽ mbaʼe ijovechakuéra rehehápe.

7. Mbaʼépa ojapo umi ansiáno peteĩ ovecha hoʼáramo Satanás jurúpe?

⁷ Koʼág̃a avei umi ansiáno oñatende porã ani hag̃ua Satanás oity ermanokuérape. Oĩramo hoʼáva ko león pochy jurúpe, umi ansiáno pyaʼe oñehaʼã oguenohẽ chupekuéra upégui, David ojapo haguéicha. Ohechakuaáramo oĩha peteĩ ermáno oho vaíva ha hoʼa potaitéva Satanás ñuhãme, oñemboja hendápe ha oñemongeta porã hendive (elee Judas 22, 23). Peteĩ ovecha ojegolpeáramo, herekua oipohãno, omoĩ hese aséite ha ojokua okuera hag̃ua. Upéicha avei umi ansiáno oñangareko porã umi ovecha hasykatúvare ha oipohãno Ñandejára Ñeʼẽ rupive. Koʼã mbaʼe ikatu ojapo hikuái Jehová oipytyvõgui chupekuéra.

8. Moõ gotyopa umi ansiáno oisãmbyhy ermanokuérape, ha mbaʼéichapa ojapo upéva?

⁸ Umi ovecharerekua katuete ogueraha ijovechakuéra umi pásto iporãvehápe ha oĩhápe y. Upéicha avei umi ansiáno oisãmbyhy ermanokuérape oho hag̃ua kongregasiónpe. Mbaʼéichapa ojapo upéva? Omokyreʼỹvo umi ermánope ani hag̃ua ofalta rreunionhápe. Upépe ‘oñemeʼẽ chupekuéra hembiʼurã hiʼoraitépe’ ha okaru porã hikuái (Mat. 24:45, NM). Avei ansianokuéra oñemotiémpo umi ovecha hasykatúvape g̃uarã ha pyʼaguapýpe omokyreʼỹ chupekuéra ojepyʼamongeta  hag̃ua Ñandejára Ñeʼẽre. Péro mbaʼépa ojapo hikuái peteĩ ovecha osẽvaʼekue oikese jeýramo kongregasiónpe? Omongyhyje rangue chupe, ipyʼaporã hendive hikuái ha oipytyvõ chupe ojapo hag̃ua la Biblia heʼíva.

9, 10. Mbaʼéichapa oñangarekovaʼerã ansianokuéra umi ovecha hasykatúvare?

⁹ Ñanderasykatu jave, mbaʼeichagua doktórpa jaipota oñatende ñanderehe? Jaipotápa peteĩ vai vaínte ñanerendúva ha omeʼẽmava ñandéve pohã ojapurágui oñatende hag̃ua ambuére? Térãpa peteĩ ñanerendu porãva ha omombeʼu ñandéve mbaʼépa jareko ha mbaʼéichapa ñañepohãnóta?

¹⁰ Ko ehémplo omboʼe peteĩ mbaʼe iñimportánteva ansianokuérape. Oñatende jave peteĩ ermáno ikangývare ijeroviápe, ohendu porã vaʼerã chupe ha “omona [...] hese aséite Ñandejára rérape” oĩ porã jey hag̃ua Jehová renondépe (elee Santiago 5:14, 15). Péicha umi konsého porãita oĩva Ñandejára Ñeʼẽme omombytuʼúta pe hasývape, oñemonarõguáicha hese aséite pohãrã (Jer. 8:22; Eze. 34:16). Ojapóramo la Biblia heʼíva katuete imbarete jeýta ijerovia. Ajépa ojapo porãite umi ansiáno ohendúvo umi ovecha hasykatumívape ha oñemboʼe hendivekuéra!

‘Pejapókena pende pyʼaite guive ha ani ojeʼéguinte peẽme’

11. Mbaʼépa omomýi ansianokuérape oipytyvõ hag̃ua kyreʼỹme Ñandejára ovechakuérape?

¹¹ Upe rire Pedro omomanduʼa umi ansiánope mbaʼépa ojapovaʼerã ha mbaʼépa ndovaléi ojapo oñangareko jave Ñandejára ovechakuérare. Ñepyrũrã heʼi ombaʼapo hag̃ua hikuái ‘ipyʼaite guive ha ani ojeʼéguinte chupekuéra’. Mbaʼépa omomyivaʼerã umi ansiánope oipytyvõ hag̃ua kyreʼỹme ermanokuérape? Mbaʼépa omokyreʼỹvaʼekue Pédrope oñangareko ha omongaru hag̃ua Jesús ovechakuérape? Ohayhu ha omombaʼégui Jesúspe ipyʼaite guive (Juan 21:15-17). Upéicha avei, umi ansiáno ohayhúgui Crístope ‘ndoikovéima ijupe g̃uarã, oikove uvei upe hesehapekuéra omanovaʼekuépe g̃uarã’ (2 Cor. 5:14, 15). Umi ansiáno ohayhúgui Jesús, Jehová ha iñermanokuérape, oñemeʼẽmbaite ombaʼapo hag̃ua umi ovechakuéra rehehápe, ha oiporu upearã itiémpo, imbaretekue ha opa mbaʼe orekóva (Mat. 22:37-39). Ojapo koʼã mbaʼe ipyʼaite guive ha ndahaʼéi ojeʼéguinte chupekuéra.

12. Mbaʼéichapa Pablo oñangarekovaʼekue iñermanokuérare?

¹² Mbaʼeichaite pevépa ojesakrifika ansianokuéra? Haʼekuéra oñehaʼãmbaite umi ovecha rehehápe, Pablo ojapo haguéicha. Haʼe ningo ohaʼangavaʼekue Jesúspe (1 Cor. 11:1). Pablo ha iñirũnguéra ohayhueterei umi ermáno Tesalonicayguápe ha vyʼápe ‘omyasãi Ñandejára ñeʼẽ porãite ijapytepekuéra ha hiʼári hekove jepe omeʼẽse hesehapekuéra’. Avei akóinte otrata porã chupekuéra peteĩ sy “oñangareko porãháicha imemby rehe” (1 Tes. 2:7, 8). Pablo oikuaa porã peteĩ sy ohayhuetereiha imembyʼípe ha ndahaʼéi mbaʼeve chupe g̃uarã ojesakrifika hesehápe, ndojeplageái opuʼã hag̃ua pyharekue jepe omokambu imemby.

13. Mbaʼérepa umi ansiáno omohenda porã vaʼerã hembiapokuéra?

¹³ Tekotevẽ avei umi ansiáno omohenda porã hembiapokuéra oñatende hag̃ua kongregasión rehe ha avei hogayguakuérare (1 Tim. 5:8). Ñanemanduʼavaʼerã pe tiémpo oiporúva ermanokuéra rehehápe ikatu hague oiporu oĩ hag̃ua hembireko ha ifamiliakuéra ndive. Mbaʼépa oipytyvõta chupekuéra ojapo hag̃ua hendaitépe koʼã mbaʼe? Ikatu oinvita sapyʼapyʼa ambue ermánope oĩ hag̃ua hendivekuéra ojapo jave Aty Jastudia Hag̃ua Ñande Rogayguándi. Upéicha ojapo peteĩ ermáno hérava Masanao ha ifamiliakuéra. Haʼekuéra oiko Japónpe, ha heta áñorema oinvita jepi hógape umi ermáno ituvakuéra ndahaʼéivape Testigo ha umi soltérope. Umíva apytépe oĩ avei  oikómava chugui ansiáno ha ojapóma Masanao ojapo haguéicha.

‘Ani pláta rehehápe, kyreʼỹme uvei’

14, 15. Mbaʼérepa umi ansiáno ndovaléi ojapo hembiapo ‘pláta rehehápe’, ha mbaʼéichapa ikatu ohaʼanga Páblope?

¹⁴ Pedro heʼi avei umi ansiáno ndovaleiha ojapo hembiapo ‘pláta rehehápe’, ojapovaʼerã ‘kyreʼỹme uvei’. Oiporúramo jepe heta itiémpo upearã, nohaʼarõi ojepaga chupekuéra. Péro Pedro ohechakuaa tekotevẽha oñemoñeʼẽ ansianokuérape ani hag̃ua ‘pláta rehehápe’ oñangareko Ñandejára ovechakuérare. Upévare oñatende porã vaʼerã hikuái. Oĩ heta tapicha omotenondéva rrelihión ombyaty hag̃ua plátante. Pór ehémplo, ‘Babilonia Guasúpe’ umi omoakãva ipláta heta, hóga porã porã ha oreko orekoséva, ha umi hénte irrelihionpegua isogue ha oiko asy (Rev. 18:2, 3). Ansianokuéra ni mbaʼevéicharõ ndoikoivaʼerã upéicha.

¹⁵ Umi ansiáno oñehaʼãvaʼerã ohaʼanga Páblope. Haʼe ningo apóstol ha ikatúkuri ‘osaingo’ iñermanokuéra Tesalonicayguáre. Péro haʼe ndojapói péicha, upéva rangue ‘ára ha pyhare ombaʼapo jejopy’ ani hag̃ua ‘ojerure avavépe tembiʼu ndahaʼéiva haʼe ohupytyvaʼekue’ (2 Tes. 3:8, JMP). Koʼág̃a rupi heta ansiáno, umíva apytépe superintendénte viahánte, ehémplo porã avei enterovépe. Haʼekuéra oagradeseterei umi ermáno omog̃uahẽ haguére chupekuéra hógape, péro ‘noñasaingói’ avavére (1 Tes. 2:9, BNP).

16. Mbaʼéichapa umi ansiáno oñangareko ‘kyreʼỹme’ Ñandejára ovechakuérare?

¹⁶ Ansianokuéra ojapo avei hembiapo ‘kyreʼỹme’. Vyʼapópe ombaʼapo ha ojesakrifika ermanokuéra rehehápe. Péro upéva ndeʼiséi ojopyha avavépe oservi hag̃ua Jehovápe ni ohaʼã hag̃ua ambue ermánondi jahecha mávapa ojapo hetave (Gál. 5:26). Umi ansiáno oikuaa porã káda ovecha idiferenteha ha oñehaʼã oipytyvõ chupekuéra vyʼápe oservi hag̃ua Jehovápe.

‘Ani peñemombaʼe Ñandejára omeʼẽvare peẽme, pemoĩ uvei ehémplo’

17, 18.a) Mbaʼérepa hasyvaʼekue umi apóstolpe oñemomirĩ? b) Mbaʼépa ñanemboʼe upéva?

¹⁷ Jahecháma haguéicha, umi ansiáno akóinte imanduʼavaʼerã umi ovecha ndahaʼeiha imbaʼe, síno Jehová mbaʼe. Upévare ndoikoivaʼerã mbaretépe otrata umi ‘Ñandejára omeʼẽvare chupekuéra oñangareko hag̃ua’ (elee 1 Pedro 5:3). Yma oĩvaʼekue Jesús apostolkuéra apytépe sapyʼánte ohupytyséva puésto ijyvatevéva openságui ijehénte. Umi mburuvicha itiempopegua upéicha vaʼekue ha oiméne ova hesekuéra ilája (elee Marcos 10:42-45).

¹⁸ Ñane tiémpope umi ermáno “omotenondeséva peteĩ [kongregasión]” ojepyʼamongeta porã vaʼerã oikuaa hag̃ua mbaʼépa omomýi chupe (1 Tim. 3:1, ÑÑB). Péicha avei umi haʼémava ansiáno oñeporanduvaʼerã: “Noiméipa cherehe oiko avei hína Jesús apostolkuérare oikovaʼekue?”. Chupekuéra jepe hasyvaʼekue oñemomirĩ ani hag̃ua oiko puésto rehehápente. Ikatu avei péicha ijetuʼu heta ansiáno koʼag̃aguápe ha upévare oñeñangareko porã vaʼerã hikuái.

19. Mbaʼérepa imanduʼavaʼerã ansianokuéra oñangareko jave umi ovecháre?

¹⁹ Péro oĩ avei peteĩ mbaʼe imanduʼavaʼerã hikuái. Sapyʼánte umi ansiáno omeʼẽmantevaʼerã konsého imbaretéva umi ‘lóvo ñarõ’ oapeligráramo Ñandejára ovechakuérape (Hech. 20:28-30, NM). Avei tekotevẽ imbarete  hikuái ojapo hag̃ua Pablo heʼivaʼekue Títope: ‘Reñemoñeʼẽ ha reporokorrehi tekotevẽramo’ (Tito 2:15). Upéicha jave jepe otratakuaa ha omombaʼevaʼerã umi ovechápe. Ndovaléi okopi hesekuéra. Upéva rangue oñemoñeʼẽ porãnte vaʼerã. Upéicha og̃uahẽvéta umi ermáno korasõme ha omokyreʼỹvéta chupekuéra oguata porã jey hag̃ua Jehová rapére.

20. Mbaʼéichapa oipytyvõ umi ansiánope ohaʼangáramo Jesúspe omoĩ hag̃ua ehémplo ovechakuérape?

²⁰ Jesús ehémplo omokyreʼỹ ansianokuérape ohayhu hag̃ua ovechakuérape (Juan 13:12-15). Ajépa ñanemopirĩ jaleévo mbaʼéichapa Jesús omboʼe hemimboʼekuérape predikasiónpe oikórõ guare ko yvy ape ári! Opokoiterei hesekuéra ohechávo mbaʼeichaitépa haʼe hekomirĩ ha upévare ohaʼanga chupe hikuái. Oñepyrũma avei haʼekuéra oreko “hapichápe tuichaveramoguáicha chugui” (Fili. 2:3). Koʼág̃a rupi avei Jesús ehémplo omomýi ansianokuérape ojapo hag̃ua haʼéicha ha péicha ‘omoĩ ehémplo ovechakuérape’.

21. Mbaʼépa ohupytýta umi ansiáno?

²¹ Pedro omohuʼã hag̃ua umi konsého imanduʼa mbaʼépa ohupytýta umi ansiáno (elee 1 Pedro 5:4). Umi ansiáno unhídope ‘oñemeʼẽvaʼerã peteĩ prémio ijojahaʼỹva oñembyaiʼỹva arakaʼeve’. Haʼekuéra oikovéta opa ára g̃uarã Jesucristo ndive yvágape. Ha umi oĩva “ambue ovechakuéra” apytépe opytáta ko yvy ape ári oñangareko hag̃ua Ñandejára rembiguaikuérare ‘umi ovecharerekua Ruvicha’ poguýpe (Juan 10:16). Pe artíkulo oúvape jahecháta mbaʼéichapa enterovéva ikatu ñaipytyvõ umi kongregasión omotenondévape.

Ñanemanduʼa hag̃ua

• Mbaʼérepa Pedro oñemoñeʼẽvaʼekue ansianokuérape oñangareko porã hag̃ua Ñandejára ovechakuérare?

• Mbaʼéichapa ansianokuéra oñangarekovaʼerã umi ovecha hasykatúvare?

• Mbaʼépa omomýi umi ansiánope oñangareko hag̃ua Ñandejára ovechakuérare?

[Porandu ñahesaʼỹijóva]

[Nóta oĩva taʼanga ndive páhina 21]

Umi ovecharerekua yma guaréicha, ansianokuéra oñangareko Ñandejára ovechakuérare