Jahejátapa Jehová ohechauka ñandéve ñande raperã?
Jahejátapa Jehová ohechauka ñandéve ñande raperã?
“Añemomombyry opaichagua japu rapégui.” (SAL. 119:128, ÑÑB)
1, 2. a) Mbaʼépa jaipota oñemombeʼu ñandéve javiaha mboyve, ha mbaʼérepa? b) Mbaʼépa heʼi Jehová ikatuha ñandegueraha tape vaíre, ha mbaʼérepa ñandeavisa?
ÑAPENSAMÍNA ko situasiónre: ñamoĩ chupe javiahaseha peteĩ lugárpe péro ndajaikuaaporãi mbaʼéichapa ñag̃uahẽta. Upémarõ jajerure peteĩ ñane amígo oikuaávape pe tape ñanepytyvõ hag̃ua. Haʼe omombeʼu ñandéve moõ rupípa jahavaʼerã, péro heʼi avei ñañatendevaʼerãha pono ñanembotavy umi señál oñemoĩva tape yképe ha hetápema omodesatináva. Ajépa javyʼaitéta péicha ojepyʼapýramo ñanderehe ha ñandeavisa! Katuete jajapóta opa mbaʼe heʼíva ñandéve. Jehová ningo upéicha avei heʼi ñandéve mbaʼe tapérepa jahavaʼerã ñag̃uahẽ hag̃ua pe jeikove opaveʼỹvape. Péro heʼi avei mbaʼépa ikatu ñanemombía pe tape porãgui (Deu. 5:32; Isa. 30:21).
2 Ko artíkulo ha pe oúvape jahecháta umi mbaʼe ikatúva ñaneguenohẽ tape porãgui. Ha ñane Amígo Jehová ñanderayhueterei ha oipotágui ñag̃uahẽ porã pe múndo pyahúpe, ñandeavisa mbaʼe mbaʼépa hína umíva. Haʼe ombyasyetereíta ohecháramo umi mbaʼe vai ñanemombiaha hapégui (Eze. 33:11). Koʼág̃a jahecháta mbohapy mbaʼe ikatúva ñandegueraha tape vaíre. Primero, umi hénte; segundo, ñane korasõ; ha tercero jaha umi mbaʼe guaʼu rapykuéri. Jaikuaa porã vaʼerã koʼã mbaʼe vai ha avei mbaʼéichapa Jehová ñanepytyvõ jajehekýi hag̃ua chuguikuéra. Pe salmísta ohaivaʼekue voi: “Añemomombyry opaichagua japu rapégui” (Sal. 119:128, ÑÑB). Ñandépa ñapensa avei upéicha? Mbaʼépa ñanepytyvõta ñamboykete hag̃ua umi mbaʼe vai?
‘Ani rejapo umi hembiapo vaíva ojapoháicha’
3. a) Mbaʼérepa naiporãi jahánte peteĩ tapére jahechágui heta ohoha upérupi? b) Mbaʼépa ndajajapoivaʼerã, heʼiháicha Éxodo 23:2?
3 Koʼág̃a ñapensami javiahamaha jahávo, péro ndajaikuaaporãi moõ rupípa jahavaʼerã. Ikatu jahecha oĩha ohóva peteĩ tapére ha jasegise lénto chupekuéra, péro naiporãmoʼãi jaha upérupi jahecháguinte heta ohoha upe tapére. Mbaʼérepa? Ikatúgui ndohoihína ñande jahasehápe, térã oñedesatina avei hikuái. Ko ehémplo ñanepytyvõ ñantende porãve hag̃ua peteĩ léi Jehová omeʼẽvaʼekue umi isrraelítape. Upérõ Haʼe heʼi umi oporohusgátava térã osẽtavape de testígo peteĩ trivunálpe: ‘Ani rejapo umi hembiapo vaíva ojapoháicha’ (elee Éxodo 23:2). Heʼi chupekuéra upéicha oikuaágui yvypóra iñimperfektoha, ha ikatuha ojapo peteĩ mbaʼe noĩporãiva hapichakuéra ojopýramo chupe. Péro ko téysto heʼíva ndahaʼéi umi ohóva trivunálpe g̃uarãnte, jaiporukuaa avei opa situasión jahasávape.
4, 5. Mbaʼéichapa ojejopyvaʼekue Josué ha Calébpe, ha mbaʼépa oipytyvõ chupekuéra ombohovái hag̃ua?
4 Sapyʼánte ñande rapichakuéra ikatu ñandejopy jajapo hag̃ua umi ‘hembiapo vaíva ojapoháicha’. Upéva oikokuaa ñaimoʼãʼỹve jave, ha ijetuʼu jepi ñambohovái hag̃ua. Ñanemanduʼamína mbaʼéichapa umi isrraelíta ojopyvaʼekue Josué ha Calébpe. Koʼã mokõi isrraelíta ohovaʼekue diez kuimbaʼéndi ohechávo pe yvy Jehová oprometevaʼekue tetã Israélpe. Umi diez oñeʼẽ vai opa mbaʼe ohechavaʼekuére ha péicha omongyhyje hapichakuérape. Omombeʼu hikuái ohecha hague kuimbaʼe tuichaicháva ha heʼi voi hesekuéra haʼeha umi nefilim raʼyre (Gén. 6:4). Ajépa ijapuete koʼã diez kuimbaʼe! Umi nefilim ningo ndaikatuivaʼekue ifamília haʼégui umi ánhel naiñeʼẽrendúiva raʼyre, ha pe Dilúviorõ guare omanombámakuri hikuái. Umi isrraelíta ijerovia kangýva oguerovia koʼã vyrorei ha oñepyrũ okyhyje. Ha amo ipahápe heʼíma hikuái iporãvetaha ndoikéinte pe yvy Jehová oprometevaʼekuépe chupekuéra. Mbaʼépa ojapo Josué ha Caleb upémarõ? (Núm. 13:25-33.)
5 Koʼã mokõi kuimbaʼe ndojapói umi ‘hembiapo vaíva ojapoháicha’. Ha umi isrraelíta nohenduséi ha ojukaséramo jepe chupekuéra, ndokyhyjéi heʼi hag̃ua pe añetegua. Mbaʼérepa ipyʼaguasuete hikuái? Ojerovia rupi Jehováre. Haʼekuéra ohechakuaa iporãveha oguerovia Jehová oprometéva, umi diez kuimbaʼépe rangue. Ha ovyʼaiterei voi ohechárõ guare Ñandejára okumpliha opa mbaʼe oprometéva (elee Josué 14:6, 8 ha 23:2, 14). Koʼã mokõi kuimbaʼe ohayhu Jehovápe ha ojerovia hese, upévare ni nopensái ojapóvo peteĩ mbaʼe ombopochýtava Chupe opyta porãséguinte umi hénte renondépe. Haʼekuéra ndojapói umi ‘hembiapo vaíva ojapoháicha’, ha péicha oheja ñandéve peteĩ ehémplo neporãva (Núm. 14:1-10).
6. Mbaʼéicha javépa ikatuhína jajapo umi ‘hembiapo vaíva ojapoháicha’?
6 Ndépa sapyʼánte rejapose avei umi mbaʼe vai nde rapichakuéra ojapóva? Koʼág̃a rupi oĩ hetaiterei hénte nomombaʼéiva Jehovápe ni umi mbaʼe heʼíva, ha oiporu umi vyʼarã ojeho hag̃ua vyrorei rapykuéri. Pór ehémplo, heʼi hikuái ndaivairiha pe tekokyʼa, ñorairõ ha espiritísmo ojehechaukáva téle, síne ha videohuégope (2 Tim. 3:1-5). Upévare iporã ñañeporandumi: “Aiporavópa oimehaichagua depórte ha ambue vyʼarã chéve térã che famíliape g̃uarã? Ajapópa peteĩ mbaʼe umi hénte heʼíguinte iporãha?”. Oiméramo upéicha nañahenduiñaína pe konsého heʼíva: ‘Ani rejapo umi hembiapo vaíva ojapoháicha’.
7, 8. a) Mbaʼépa jajapovaʼerã jadesidi porã hag̃ua, ha mbaʼérepa nañanepytyvõmoʼãi jarekóramo peteĩ lísta? b) Mbaʼe ehémplo iporãvapa omoĩ umi kristiáno imitãva?
7 Jehová omeʼẽ ñandéve peteĩ jopói iporãitereíva, upéva hína pe ‘katupyry jahechakuaa hag̃ua mbaʼépa oĩ porã ha oĩ vai’. Ha jadesidi porã hag̃ua tekotevẽ ‘jajepokuaa’ jaiporu ko jopói (Heb. 5:14). Upéva heʼise káda uno jadesidivaʼerãha ñane konsiénsia heʼiháicha, ndajaikoivaʼerã jajapo peteĩ mbaʼe ótro ojapóguinte. Upévare testígo de Jehová nombohysýiri peteĩ lístape mbaʼe pelíkula, lívro térã páhina de Internet ndovaléi ojehecha. Avei ko múndo pyaʼeterei okambia, upévare ojejapóramo peteĩ lísta manterei oñembopyahuvaʼerã (1 Cor. 7:31). Ha ivaiveha ojeʼéramo ñandéve mbaʼéichapa jajapovaʼerã opa mbaʼe, nañanepytyvõmoʼãi jahecha hag̃ua mbaʼépa heʼi la Biblia ha jajerure hag̃ua Ñandejárape tañanepytyvõ jadesidi mboyve peteĩ mbaʼe (Efe. 5:10).
8 Jaikuaaháicha hetápe ndogustamoʼãi jadesidíramo la Biblia heʼiháicha ha ikatu voi ñandejopy ñapensa ha jajapo hag̃ua haʼekuéra heʼíva. Pór ehémplo, umi kristiáno imitãva ohasa asy eskuéla térã koléhiope ojejopy rupi chupekuéra ojeporta térã ovyʼa hag̃ua ikompañerokuéraicha (1 Ped. 4:4). Péro ajépa javyʼaite jahechávo ñane ermanokuéra, imitãva ha ijedáva, ojeroviaha Jehováre ojapo haguéicha Josué ha Caleb! Haʼekuéra iñeʼẽrendu avei pe téysto heʼívape: ‘Ani rejapo umi hembiapo vaíva ojapoháicha’.
‘Ani pejapo pene korasõ térã pende resa oipotávante’
9. a) Mbaʼérepa noĩporãi jaha ótro tapére ñaimoʼãgui jahechataha hetave mbaʼe porã upérupi? b) Mbaʼépepa ideprovechovaʼekue umi isrraelítape Números 15:37-39 heʼíva?
9 Pe segundo mbaʼe ikatúva ñandegueraha tape vaíre haʼehína ñane korasõ. Ñapensami jeýna javiahahañaína, mbaʼépa oikóta nañamañavéiramo ñane mápare ha jaha ótro tapére ñaimoʼãgui jahechataha hetave mbaʼe porã upérupi? Nañag̃uahẽmoʼãi asy pe jahasehápe. Ko ehémplo ñanepytyvõ ñantende hag̃ua mbaʼérepa Jehová heʼivaʼekue umi isrraelítape ombofléko hag̃ua ijao ruguái ha omoĩ hese peteĩ sínta hovy (elee Números 15:37-39). Koʼág̃a rupi heta hénte nontendéi mbaʼérepa oñemoĩvaʼekue ko léi, péro upe tiémpope ideprovechovaʼekue oipytyvõgui umi isrraelítape idiferénte hag̃ua ambue tetãgui, ha péicha Jehová oguerohory chupekuéra (Lev. 18:24, 25). Ko léi ontendeuka ñandéve entéro jaguerekoha peteĩ mbaʼe ikatúva ñaneguenohẽ Jehová rapégui. Mbaʼépa hína upéva?
10. Mbaʼéichapa Jehová ohechauka oikuaa porãha yvyporakuérape?
10 Umi isrraelítape ojeʼevaʼekue: ‘Ani pejapo pene korasõ térã pende resa oipotávante’. Mbaʼérepa Jehová heʼi chupekuéra upéicha? Haʼe ningo oikuaa porã ñane korasõ ojaposeha umi mbaʼe ñande resa ohecháva. Upévare heʼi: ‘Yvyporakuéra korasõ hovamokõi ha iñaña; máva piko ikatu oikuaa porã?’ (Jer. 17:9, ÑÑB). Jahechakuaápa upéicharõ mbaʼérepa Jehová heʼi umi isrraelítape ani hag̃ua ojapo ikorasõ ha hesa oipotávante? Haʼe oikuaa porã umi isrraelíta oguerohoryetereitaha umi tetã ambueguápe, ha mbeguekatúpe oñemonde, opensa ha ojapotaha heta mbaʼe vai haʼekuéraicha (Pro. 13:20).
11. Mbaʼéichapa umi mbaʼe jahecháva ikatu ombotavy ñane korasõme?
11 Koʼág̃a rupi ko múndo henyhẽ mbaʼe vai apohágui, ha koʼýte ñane korasõ ojapose umi mbaʼe vai ñande resa ohecháva. Upévare iporã ñañeporandumi: “Amondesépa umi ao mbyky, hesakã térã chejopyetereíva ojapoháicha umi hénte mundopegua? Amañaitereípa hesekuéra ha chestiráma oiko ha oñemonde lája hikuái? Aikosépa haʼekuéraicha ha napenavéi la Biblia heʼívare?”. Umícha jave ñanemanduʼavaʼerã Números 15:39 heʼívare (Rom. 12:1, 2).
12, 13. a) Mbaʼépa jajapovaʼerã ñamañaséramo umi mbaʼe ndovaléivare mbaʼeverã? b) Mbaʼérepa ñañehaʼãvaʼerã ani ñamopensa vai ñande rapichakuérape?
12 Ñamañaséramo umi mbaʼe ndovaléivare mbaʼeverã, jajejokokuaavaʼerã ha jajapo Job ojapo haguéicha. Haʼe ojedesidivaʼekue ipyʼaite guive omañataha hembirekóre añoite ha nomañamoʼãiha hendapeʼỹ ambue kuñáre (Job 31:1). Upéicha avei rréi David ojedesidivaʼekue: ‘Che resa nomañamoʼãi peteĩ mbaʼe ndovaléivare mbaʼeverã’ (Sal. 101:3, ÑÑB). Opa mbaʼe ikatúva ombyai ñane konsiénsia ha ñanemomombyry Jehovágui ndovaléi mbaʼeverã. Upévare nañamañaivaʼerã mbaʼeve ikatúvare oike ñane korasõme ñanemopensa vai hag̃ua ha ojapoukátava ñandéve umi mbaʼe Jehová ndoguerohorýiva.
13 Nañañatendéiramo ikatu ñande voi jajapo ñandejehegui ‘peteĩ mbaʼe ndovaléiva mbaʼeverã’, mbaʼéichapa? Ñande rapicha ohecháramo ñanderehe peteĩ mbaʼe omopensa vaítava chupe. Pór ehémplo, ñañemondéramo hekopeʼỹ ha nañapenái pe konsého heʼívare ñañemonde hag̃ua ‘hekópe ha ñaporomotĩʼỹ hag̃uáicha’ (1 Tim. 2:9). Mbaʼéichapa jaikuaáta ñañemondeha hekopete? Jahechavaʼerã noiméipa ñande ao omolesta térã omopensa vaíta ñande rapichápe. Ñambotapykuevaʼerã umi mbaʼe ñandegustáva ha ñamotenonde ñande rapichápe, ikatu hag̃uáicha oñeñandu porã ha ipyʼaguapy hikuái (Rom. 15:1, 2). Ha javyʼaite ningo oĩ rupi kongregasiónpe hetaiterei mitãrusu ha mitãkuña oñemondéva ‘hekópe ha oporomotĩʼỹ hag̃uáicha’. Péicha ohechauka hikuái ndojapoiha ‘ikorasõ térã hesa oipotávante’, síno oñehaʼãha ojapo opa mbaʼe Jehová oipotaháicha.
‘Aníke peho umi mbaʼe guaʼu rapykuéri’
14. Mbaʼépa heʼivaʼekue Jehová umi isrraelítape Samuel rupive?
14 Ñapensami jeýna ñande viáhere. Mbaʼépa oikóta jaháramo peteĩ desiértore ha, ñande yuheietereígui, ñaimoʼã jahechaha peteĩ ysyry neporãva ha ñasẽ ñande rapégui? Jaháramo upe mbaʼe guaʼu jahecháva rapykuéri ikatuhína ñamano. Jehová ningo oikuaa porã upéva, upéicha rupi oñemoñeʼẽ isiervokuérape. Pór ehémplo, umi isrraelíta oipotárõ guare peteĩ rréi umi ótro tetãygua oguerekoháicha Jehová ipochyeterei, ohechakuaágui omboykeha chupe rréiramo. Ha ohejáramo jepe oisãmbyhy chupekuéra peteĩ yvypóra, proféta Samuel rupive heʼi upéicha ojapo rupi ikatuha oho hikuái ‘umi mbaʼe guaʼu rapykuéri’ (elee 1 Samuel 12:21).
15. Mbaʼéichapa umi isrraelíta ohechauka oikoha ‘umi mbaʼe guaʼu rapykuéri’?
15 Oiméne umi isrraelíta oimoʼã peteĩ yvypóra oisãmbyhy ha oipytyvõ porãvetaha chupekuéra Jehovágui. Péro opensávo upéicha ohóma hikuái ‘umi mbaʼe guaʼu rapykuéri’ ha ndahasyive hoʼa hag̃ua ambue ñuhã Satanás omoĩvape. Pór ehémplo, umi rréi ikatu ojopy chupekuéra omombaʼeguasu hag̃ua umi ñandejára guaʼúpe. Péro tuichaiterei ojavy hikuái ojeroviavévo koʼã taʼangáre, ojejapóva yvyra térã itágui, ojeroviarangue Ñandejára añeteguáre. Haʼe hína upe ojapovaʼekue opa mbaʼe, ‘umi taʼanga katu ndahaʼéi mbaʼeve’, heʼi haguéicha Pablo (1 Cor. 8:4). Ha upeichaite ningo, umi taʼanga ndovaléi mbaʼeverã ndaikatúigui ñanderecha, ñanerendu, oñeʼẽ ni ojapo mbaʼeve. Ha ñamombaʼeguasúramo koʼãvape jahechaukáta jahaha ‘umi mbaʼe guaʼu rapykuéri’ ha katuete ñasẽ vaíta (Sal. 115:4-8).
16. a) Mbaʼéichapa Satanás ombotavy umi héntepe oho hag̃ua ‘umi mbaʼe guaʼu rapykuéri’? b) Mbaʼérepa jaʼekuaa umi mbaʼerepy ndovaleiha mbaʼeverã ñambojojáramo Jehováre?
16 Satanás ningo ymaite guive koʼág̃a peve ombotavykuaa umi héntepe oho hag̃ua ‘umi mbaʼe guaʼu rapykuéri’. Pór ehémplo, hetápe ogueroviauka oguerekomantevaʼerãha heta mbaʼerepy oikoséramo pyʼaguapýpe. Ha ñapensa porãramo ikatu ñanepytyvõ pe pláta, umi mbaʼerepy ha peteĩ traváho porã. Péro, añetehápe piko ideprovechoiterei umíva ñanderasyete ha ijetuʼu jave la situasión opa tetã rupi, térã ou jave ama guasu, yvyryrýi ha umícha? Ikatu piko ñanepytyvõ javyʼa ha jaikuaa hag̃ua mbaʼe tape rehépa jahavaʼerã? Omyesakãpa maʼerãpa jaikove? Ikatúpa ñanembopyʼaguapy ñamanombota jave? Ñaimoʼãramo ñañemoag̃uivetaha Ñandejárare ñambyatývo mbaʼerepy, tuichaiterei jajavyñaína; koʼãva ningo ‘umi mbaʼe guaʼu’ heʼíva la Biblia. Ñande rekove mbykyeterei ha umi mbaʼerepy nañandepeʼamoʼãi mbaʼasy ni ñemanógui (Pro. 23:4, 5). Jehová katu ndaupeichaiete, haʼe oñangareko ñanderehe ha ñanembopyʼaguapy, jaikóma guive iñamígoramo. Ajépa javyʼaite ikatu haguére ñañemoag̃ui hese! Upévare aníkena ñamboyke chupe jaha hag̃ua ‘umi mbaʼe guaʼu rapykuéri’.
17. Mbaʼépa jahupytýta ñaneñeʼẽrendúramo umi konsého jahechavaʼekuépe?
17 Javyʼaite ningo jareko rupi Jehovápe ñane amígoramo ha ñanepytyvõ haguére jaha hag̃ua tape porãre! Ñaneñeʼẽrendúramo chupe ndajaʼamoʼãi koʼã mbohapy ñuhã jahechavaʼekuépe: jajapo umi hénte hembiapo vaíva ojapoháicha, jajapo ñane korasõ oipotáva ha jaha ‘umi mbaʼe guaʼu rapykuéri’. Jajeíramo koʼã mbaʼégui añoite jahupytýta pe jeikove opaʼỹva. Pe artíkulo oúvape ñahesaʼỹijovéta mbohapy ñuhã oitýmava hetápe. Ñañatendéramo Jehová heʼívare jahechakuaáta ipeligrosoha umi tape vai ha ñañehaʼãmbaitéta jajei chuguikuéra (Sal. 119:128).
Mbaʼépa repensa?
Mbaʼéichapa ikatu rejapo koʼã téysto heʼíva?
[Porandu ñahesaʼỹijóva]
[Nóta oĩva taʼanga ndive páhina 11]
Jajaposépa umi hembiapo vaíva ojapóva?
[Nóta oĩva taʼanga ndive páhina 13]
Mbaʼérepa noĩporãi jajapo ñane korasõ térã ñande resa oipotávante?
[Nóta oĩva taʼanga ndive páhina 14]
Jahápa ‘umi mbaʼe guaʼu rapykuéri’?
