Jajapótapa umi mbaʼe Jehová heʼíva?

“Kóva hína pe tape, tapeho koʼárupi.” (ISA. 30:21)

1, 2. Mbaʼépa ojaposeterei Satanás ñanderehe, ha mbaʼéichapa ñanepytyvõ la Biblia?

ÑAPENSAMÍNA jahahañaína rrútare ha jatopa peteĩ señál oĩ vaíva ha ohechaukáva jaha hag̃ua ótro tapére. Japiáramo upe gotyo japerde reíta ñane tiémpo ha avei jajeapeligráta. Péro haʼetépe peteĩ ñane amígo ñandeavisáma oĩha peteĩ kuimbaʼe aña okambiapáva umi señál operhudikaségui umi oviahávape, ha heʼi nañapenaivaʼerãha umívare. Katuete ningo jajapóta upe heʼivaʼekue ñandéve, ajépa?

² Mávapa ojogua ko kuimbaʼe añáme? Satanás; haʼe ñandeguerahaseterei tape vaíre (Rev. 12:9). Ñaneguenohẽse katuete pe tape oporoguerahávagui jeikove opaveʼỹvape. Ha ñanedesatina hag̃ua okambia umi señál oĩva tapére, umíva apytépe umi mbohapy ñuhã jahechavaʼekue pe ótro artíkulope (Mat. 7:13, 14). Haʼetépe ningo ñane Amígo Jehová ñandeavisáma ñañeñangareko hag̃ua umívagui. Péro Satanás oreko hetave ñuhã ikatúva ñandereity, jahechavemína mbohapy ha avei mbaʼéichapa la Biblia ñanepytyvõ ani hag̃ua jaʼa umívape. Ñahesaʼỹijóvo koʼã mbaʼe ñapensa Jehová oĩha ñande kupépe ha heʼi: “Kóva hína pe tape, tapeho koʼárupi” (Isa. 30:21). Jajepyʼamongetáramo umi konséhore, ñanekyreʼỹvéta jajapo hag̃ua Ñandejára heʼíva.

Aníkena ñahendu umi ‘mboʼehára japúpe’

3, 4. a) Mbaʼérepa jaʼekuaa umi mboʼehára japu ojoguaha peteĩ póso hypávape? b) Moõguipa osẽ jepi umi mboʼehára japu, ha mbaʼépa ojapose hikuái?

³ Ñapensami jeýna pe viáhere, ñamoĩ chupe jahasaha jahávo peteĩ desiértore ha peichahágui jahecha mombyrymi peteĩ póso. Upéi jaha jayʼu hag̃ua upépe, péro ñag̃uahẽvo jatopa hypaiteha. Ajépa jajepichaitéta! Upeichaite avei oñeñandu mayma ohóva umi mboʼehára japu rendápe oikuaaségui Ñandejárape. Upévare Jehová heʼi voi, apóstol Pedro ha Pablo rupive, ñañeñangareko hag̃ua koʼãichagua mboʼeháragui (elee Hechos 20:29, 30 ha 2 Pedro 2:1-3). Iporãta ñahesaʼỹijóramo koʼã apóstol heʼivaʼekue jaikuaa hag̃ua mávapa umi mboʼehára japu, moõguipa osẽ ha mbaʼépa ojapo.

⁴ Pablo heʼivaʼekue umi ansiáno Efesoyguápe: ‘Pende apytégui voi opuʼãta kuimbaʼe omboʼéva heta mbaʼe hekopeguaʼỹ’. Ha Pedro katu heʼi kóicha ermanokuérape: ‘Pende apytépe opuʼãne mboʼehára japu’. Upéicharõ jahechakuaa umi mboʼehára japu osẽha jepi kongregasióngui voi, ha oñehenói chupekuéra apóstata. * Ha ndahaʼéi ohejánteva hikuái Jehová organisasión síno, heʼi haguéicha Pablo, ‘oguerahase hapykuéri Jesús remimboʼekuérape’. Jahechaháicha, umi apóstata oheka hemimboʼerã kongregasiónpe, ndahaʼéi okápe. Umi ‘lóvo ñembyahýicha’ ojagarrase umi kristiáno ijerovia kangývape ha oguenohẽse chupekuéra Jehová rapégui (Mat. 7:15, NM; 2 Tim. 2:18).

5. Mbaʼépa ojapo umi mboʼehára japu oporombotavy hag̃ua?

⁵ Umi mboʼehára japu ningo ivaleterei oporombotavy hag̃ua. Ñanderára Ñeʼẽ heʼi voi  “ñemiháme” omoingetaha hikuái kongregasiónpe umi mbaʼe opensáva. Kontravandísta omoingeháicha ñemiháme merkadería peteĩ tetãme, umi mboʼehára japu omoingese kongregasiónpe umi mbaʼe ogueroviáva. Ha umi ojapóva pláta falsifikádo ombohasaseháicha ñanderehe ipláta, umi mboʼehára japu ombohasase ñanderehe ‘ñeʼẽ rei’ omboʼéva. Haʼekuéra ‘oporombotavy’ omboʼéva rupive ha oiporu Ñandejára Ñeʼẽ ogustaháicha chupekuéra (2 Ped. 2:1, 3, 13; 3:16). Umi apóstata ndojepyʼapýi ñanderehe, upévare ñandevyroitereíta jaháramo hapykuerikuéra, ha katuete ñasẽta pe tape oporoguerahávagui jeikove opaveʼỹvape.

6. Mbaʼépa heʼi la Biblia umi mboʼehára japúre?

⁶ Mbaʼépa jajapovaʼerã pono ñanembotavy umi mboʼehára japu? Tekotevẽ jajapo Jehová heʼíva (elee Romanos 16:17 ha 2 Juan 9-11). La Biblia heʼi ‘jajei hag̃ua chuguikuéra’, upéva heʼise jajehekýi, ñañemomombyry ha jajerevaʼerãha chuguikuéra. Mbaʼépa jajapóta peteĩ doktór heʼíramo ñandéve ñañemomombyryvaʼerãha peteĩ hasy vaívagui pono oguerova ñanderehe imbaʼasy? Katuete jajapóta heʼihaichaite ñandéve. Upéicha avei Jehová, pe Doktór Ijojahaʼỹva, heʼi ñandéve ñañemomombyryvaʼerãha umi apóstatagui, haʼekuéra “itarova” ha omoingese ñane akãme umi japu omboʼéva (1 Tim. 6:3, 4, ÑÑB). Jehová ningo heʼi porã mbaʼépa jajapovaʼerã, péro jajapótapa heʼíva ñandéve toiko la oikóva?

7, 8. a) Mbaʼéichapa ikatu jajehekýi umi mboʼehára japúgui? b) Mbaʼérepa nde ndereikuaaséi mbaʼeve umi mboʼehára japu heʼívagui?

⁷ Mbaʼéichapa ñande jajehekýi umi mboʼehára japúgui? Nañañeʼẽi ni nañamog̃uahẽi chupekuéra ñande rógape; ndajaikói jalee térã ñahendu umi mbaʼe heʼíva hikuái téle, rrevísta, lívro térã Internétpe ha nañamoĩri ñane komentário upépe. Mbaʼérepa ndajajapói koʼã mbaʼe? Primero, jahayhúgui ‘Ñandejára añeteguápe’. Ñande ndajaikuaaséi mbaʼeve umi mboʼehára japúgui otaky rupi Ñandejára Ñeʼẽre (Sal. 31:5; Juan 17:17). Ha segundo, jahayhúgui Jehová organisasión ñanemboʼémava hetaite mbaʼe. Umíva apytépe, ñanemboʼe Ñandejára réra ha mbaʼépa heʼise, maʼerãpa ojejapo ko yvy, mbaʼéichapa oĩ umi omanovaʼekue ha oñemoingove jeytaha chupekuéra. Ñanemanduʼápa mbaʼeichaitépa javyʼa jaikuaa ypýrõ guare koʼã mbaʼe porãite? Ha maʼerã piko upéicharõ ñahendúta umi apóstatape otakýva Jehová organisasiónre? Jaikóramo ñahendu umi mbaʼe heʼíva hikuái, ñañeamargáta avei haʼekuéraicha (Juan 6:66-69).

⁸ Teʼi la heʼiséva umi mboʼehára japu, ñande nañapenamoʼãi hesekuéra! Natekotevẽi voi ningo. Haʼekuéra ojogua umi póso hypávape, ñanembotavy ha ñandepicháva. Ñande jajedesidíma ñaneñeʼẽrendutaha Jehová ha iñorganisasiónpe, omeʼẽva ñandéve hetaite tiémporema y potĩ asy oúva Iñeʼẽgui (Isa. 55:1-3; Mat. 24:45-47).

 Aníkena ñahendu “umi ñeʼẽ rei”

9, 10. Mbaʼépa Pablo ohaivaʼekue Timotéope, ha mbaʼe rehépa oiméne opensáraʼe pe apóstol heʼírõ guare chupe oñatendevaʼerãha umi ñeʼẽ reíre? (Ehecha avei pe nóta.)

⁹ Javiaha jave peteĩ rrútare, sapyʼánte jahechakuaa oñekambia hague umi señál ha oñemoĩ ñanemondo hag̃uáicha ótro ládo. Péro oĩ avei umi hasýva japilla hag̃ua ojepoko hague hese. Satanás ningo oiporu avei koʼãichagua “señál”, oĩ umi pyaʼe jahechakuaáva oñekambia hague ha oĩ umi hasýva japilla hag̃ua, pór ehémplo “umi ñeʼẽ rei” (elee 1 Timoteo 1:3, 4). Upévare, nañasẽséiramo pe tape porãgui, jaikuaavaʼerã mbaʼépa “umi ñeʼẽ rei” ha mbaʼépa jajapovaʼerã pono umíva ñanembotavy.

¹⁰ Pablo ohaivaʼekue Timotéope peteĩ kárta heʼihápe oñatendevaʼerãha umi ñeʼẽ reíre ha oipytyvõ hag̃ua ermanokuérape hekopotĩ ha ijerovia mbarete hag̃ua (1 Tim. 1:18, 19). Griégope “ñeʼẽ rei” heʼise ñemombeʼu guaʼu térã japu. Peteĩ lívro heʼi voi haʼeha “opaichagua káso térã istória guaʼu oñemombeʼúva” (Diccionario exegético del Nuevo Testamento). Oiméne Pablo heʼírõ guare upéva opensa umi japu omboʼévare rrelihionkuéra ha oñemombeʼúva umi istória guaʼúpe siertoramoguáicha. * Koʼã istória ningo “oporomoingovai rei ha noporopytyvõi” mbaʼevépe omboʼégui vyrorei ha omboperde rupi itiémpo umi ostudiávape koʼã mbaʼe. Satanáspe katu ogustaiterei ko ñuhã, upévare oiporu heta japu térã ñemombeʼu ha istória guaʼu ombotavy hag̃ua umi ikangyvévape. Ajeve voi Pablo heʼíraʼe jajehekyiete hag̃ua koʼã ñeʼẽ reígui.

11. Mbaʼéichapa Satanás oiporu pe rrelihión japu oporombotavy hag̃ua, ha mbaʼépa ñanepytyvõta pono jaʼa upe ñuhãme?

¹¹ Umi ijerovia kangýva ikatu oguerovia oimehaichagua “ñeʼẽ rei”, pór ehémplo, umi kuénto rei térã japu omboʼéva ambue rrelihión. Péro mbaʼépa oikóta umi ogueroviávare koʼã japu? La Biblia heʼi ‘omboyketaha pe añetegua ha ogueroviataha vyrorei’ (2 Tim. 4:3, 4). Satanás ningo oiporu pe rrelihión japu ombotavy hag̃ua la héntepe, ha heʼi haʼeha ‘peteĩ ánhel omimbipáva’ (2 Cor. 11:14). Heta rrelihión omboʼe japu ouramoguáicha Ñandejáragui, pór ehémplo omboʼe Túva, Taʼýra ha espíritu sánto peteĩnteha, ñane álma nomanoiha ha umi omanóva ohasa asyha tata rendýpe. Avei heʼi oñemboaretevaʼerãha Navidad ha Semana Santa, koʼã arete haʼetévaicha iporãva péro añetehápe ou umi rrelihión japu yma guarégui ha heta ñemombeʼu guaʼúgui. Ha ndajaipotáiramo ñanembotavy hikuái koʼã mbaʼépe, akóinte jajapovaʼerã koʼápe heʼíva: ‘Pejei chuguikuéra, heʼi Ñandejára, ha anive pepoko mbaʼe kyʼáre’ (2 Cor. 6:14-17).

12, 13. a) Emombeʼu mbohapy japu oiporu meméva Satanás ha mbaʼépa la Biblia omboʼe umívagui. b) Mbaʼépa ikatu jajapo ani hag̃ua Satanás ñanembotavy?

¹² Satanás oiporu hetave mbaʼe ñanembotavy hag̃ua, ha nañañatendéiramo ikatu ñandereity iñuhãme. Jahechamína mbohapy japu oiporu meméva. Primero: Nde rejapovaʼerã rejaposéva, ndaipóri heʼivaʼerã ndéve oĩ vaiha upe redesidíva. Téle, rrádio térã rrevistakuérape pyʼỹinte ñanemokyreʼỹ jajapo hag̃ua upéicha ha ñamboyke la Biblia heʼíva. Péro ñande jaikuaa ñaikotevẽha ojeʼe ñandéve mbaʼépa oĩ porã ha oĩ vai, ha Jehová añoite ikatu heʼi ñandéve upéva (Jer. 10:23). Segundo: Ñandejára arakaʼeve nosolusionamoʼãi yvyporakuéra provléma. Upévare heta hénte opensa ijehénte, ha heʼi jajapontemavaʼerãha jajaposéva ndajaikuaáigui arakaʼe pevépa jaikovéta. Ñande ñapensáramo avei upéicha ndajajapomoʼãvéima mbaʼeve Ñandejára servísiope (2 Ped. 1:8). Péro jaikuaa Jehová ára hiʼag̃uimbaitemaha ha ñañatendevaʼerãha ñahaʼarõ aja (Mat. 24:44). Tercero: Ñandejára ndojepyʼapýi nderehe. Satanás ogueroviaukase  ñandéve nañamereseiha Jehová ñanderayhu ha péicha jaju hag̃ua ñanekangy. Péro añetehápe Ñandejára ohayhu ha omombaʼeterei káda únope (Mat. 10:29-31).

¹³ Koʼág̃a rupi ñañatende porã vaʼerã, ikatúgui ñaimoʼã oĩ porãha umi mbaʼe ko múndo opensáva ha ojapóva. Upévare koʼýte ñahenduvaʼerã umi konsého ha opa mbaʼe Jehová heʼíva. Péicharõ añoite nañanembotavymoʼãi umi ‘ñeʼẽ rei onohẽva iñakãgui’ pe japu ruvicha (2 Ped. 1:16).

Aníkena ‘jaha Satanás rapykuéri’

14. Mbaʼépa heʼivaʼekue Pablo umi viúda imitãvape, ha mbaʼérepa ñanepytyvõta avei ñandéve?

¹⁴ Ñapensami jey javiahaha jahávo peteĩ rrútare ha peichahágui jahecha peteĩ letréro heʼíva: “Ágotyo retopáta Satanás rembiguaikuéra”. Ni mbaʼevéicharõ ndajahamoʼãi upérupi, ajépa? Péro Pablo heʼi Jehová siervokuéra oimoʼãʼỹre ikatuhahína ‘oho Satanás rapykuéri’ (elee 1 Timoteo 5:11-15). Ha heʼíramo jepe upéva umi viúda imitãvape, ñandéve avei ñanepytyvõkuaa. Koʼã kristiána síglo primeropegua ndohechakuaái ohoha Satanás rapykuéri, péro umi mbaʼe heʼi ha ojapóvare ojekuaa upeichaha. Jahechamína mbaʼépa heʼirakaʼe chupekuéra Pablo oñeʼẽ reírõ guare hikuái hapicháre, ñanepytyvõtava avei ñandéve ani hag̃ua jaha Satanás rapykuéri ñaimoʼãʼỹre.

15. Mbaʼépa Satanás ndoipotái jajapo, ha mbaʼe mbohapy ñuhãpa oiporu ñandereity hag̃ua?

¹⁵ Satanás ndoipotaieterei ñamombeʼu pe marandu porã (Rev. 12:17). Upévare omoĩ ñane renonderãme heta mbaʼe ikatúva hoʼupa ñane tiémpo ha ñanemoingovai oñondive, ojapo haguéicha umi viúda síglo primeropegua rehe. Pablo heʼivaʼekuére jahechakuaa hoʼáma hague hikuái Satanás ñuhãme. Primero, koʼã kristiána ‘hekorei ha okorre óga ahéno rupi’. Koʼág̃a rupi oikokuaa avei ñanderehe upéicha, jaiporuetereíramo Internet térã selulár ñamondo hag̃ua mensáhe ikatúva hoʼupa ñandehegui ñane tiémpo ha ñande rapichágui avei. Ha ikatu voi koʼã mensáhepe ñañeʼẽ vyrorei rehe térã ñamondóntema jaikuaa porãʼỹre siértopa. Segundo, koʼã viúda ikuentéra. Ñande avei jaikónterõ ñamombeʼu umi mbaʼe vai ojapovaʼekue ñande rapicha, mbeguekatúpe ñañeʼẽ vaítama hese ha upéi jaikovaítama oñondivepa upevakuére (Pro. 26:20). Umi oñeʼẽ vaíva hapicháre, oimoʼãʼỹre ohomahína Satanás el Diablo rapykuéri. * Tercero, koʼã viúda ‘oñentremete opa mbaʼépe’. Avave ningo ndoikoivaʼerã heʼi hapichápe mbaʼépa odesidi térã ojapovaʼerã. Upévare, jajapóramo koʼã mbohapy mbaʼe vai japerdéta ñane tiémpo ha ñaporomoingovaíta. Avei nañamombeʼusevéitama pe marandu porã ha péicha mbeguekatúpe jahamañaína Satanás rapykuéri. Péro káda uno jajedesidivaʼerã máva ykérepa ñañemoĩta, ndaikatúi japyta mbytépe (Mat. 12:30).

16. Mbaʼépa ñanepytyvõta ani hag̃ua ‘jaha Satanás rapykuéri’?

¹⁶ Mbaʼépa ñanepytyvõta pono ‘jaha Satanás rapykuéri’? Jajapovaʼerã umi mbaʼe heʼíva la Biblia. Jahechamína mbaʼépa heʼivaʼekue Pablo umi kristiáno yma guarépe. Primero: “Pembaʼapove Ñandejárape g̃uarã” (1 Cor. 15:58). Ñambaʼapo kyreʼỹramo Ñandejára servísiope nañaneateʼỹmoʼãi ni ndajaperdereimoʼãi ñane tiémpo (Mat. 6:33). Segundo: “Peiporu [umi] ñeʼẽ iporãva ha oporopytyvõva” (Efe. 4:29). Ñande nañahendúi ni nañamosarambirivaʼerã mbaʼeveichagua ñeʼẽ rei. * Síno jajerovia ha ñamombaʼevaʼerã ñane ermanokuérape. Tekotevẽ  avei jaʼe umi mbaʼe omokyreʼỹtava chupekuéra ha omombaretétava ijerovia, ha ani jaʼe mbaʼeve oporomokangýtava. Tercero: ‘Peñatende pene rembiapórente’ (1 Tes. 4:11). Oĩ porãramo jepe jajepyʼapy ñande rapicháre, ndovaléi ñañentremete hogapýpe ni ñañeʼẽ rei hese. Ha ndovaléi jaʼe chupe mbaʼépa ojapovaʼerã, umi mbaʼe haʼe voi odesidivaʼerãme (Gál. 6:5).

17. a) Mbaʼérepa Jehová hetaite konséhoma omeʼẽ ñandéve? b) Mbaʼépa akóinte jajapovaʼerã?

¹⁷ Ajépa javyʼaite Jehová heʼi haguére ñandéve umi mbaʼe ñamboykevaʼerã! Ko artíkulo ha pe ohasavaʼekuépe jahecháma heta konsého ñanepytyvõtava. Ñanemanduʼavaʼerã Jehová heʼiha ñandéve koʼã mbaʼe ñanderayhuetereígui ha ndoipotái rupi jahasa asy raẽ japilla hag̃ua umi “señál” omoĩva Satanás ñandegueraha vaitaha. Ikatu ningo añete ijetuʼu jaha Jehová rapére, péro ñanemanduʼavaʼerã upéva añoite ñandeguerahataha pe jeikove opaveʼỹvape (Mat. 7:14). Upévare akóintekena ñahendu Jehovápe heʼívo ñandéve: “Kóva hína pe tape, tapeho koʼárupi” (Isa. 30:21).

[Nóta]

Mbaʼépa rembohováita?

Mbaʼéichapa ikatu rejapo koʼã téysto heʼíva?

• 2 Pedro 2:1-3

• 1 Timoteo 1:3, 4

• 1 Timoteo 5:11-15

[Porandu ñahesaʼỹijóva]

[Taʼanga ha rrekuádro oĩva páhina 19-pe]

Emosarambi yvytúre gánso rague

Peteĩ kuénto judío ohechauka mbaʼépa oiko ñaneñeʼẽ reíramo. Ha heʼi péicha:

Peteĩ távape oĩvaʼekue peteĩ kuimbaʼe oñeʼẽ reíva pe karai iñaranduvévare oikóva upépe. Tiémpo rire pe kuimbaʼe ñeʼẽ rei ohechakuaa ojapo vai hague. Upémarõ oho oporandu pe karaípe mbaʼépa ikatu ojapo operdonami hag̃ua chupe. Pe karai arandu heʼi ojagarra hag̃ua peteĩ aramboha, oikytĩ ha omosarambi hag̃ua yvytúre umi gánso rague oĩva pype. Pe kuimbaʼe ñeʼẽ rei ojapo upéicha nontendéiramo jepe mbaʼérepa ojerure upéva. Upéi oho jey pe karai rendápe ha oporandu chupe:

—Cheperdonáma piko?

—Primero rembyatypa raẽ vaʼerã umi gánso rague remosarambivaʼekue —heʼi chupe pe karai arandu.

—Péro upévango hasyeterei ajapo hag̃ua! Pe yvytu ningo omosarambipámane —ombohovái pe kuimbaʼe ñeʼẽ rei.

—Upéichante avei umi mbaʼe erevaʼekue, ndaikatumoʼãi opyta tesaráipe isarambipáma rupi opárupi —heʼi chupe pe karai arandu omohuʼãvo.

Mbaʼépa ñaaprendekuaa ko kuéntogui? Jaʼéramo peteĩ mbaʼe ndaikatuvéima jajoko ni jajapo mbaʼeve. Upévare ñañeʼẽ mboyve ñande rapicháre ñanemanduʼavaʼerã ñamosarambi potaiteha “gánso rague yvytúre”.

[Nóta oĩva taʼanga ndive páhina 16]

Mbaʼéichapa ikatu oike ñande rógape umi apóstata?