Ñañehaʼãkena jaiko pyʼaguapýpe

“Jahekáke opa mbaʼe oguerúva pyʼaguapy.” (ROM. 14:19)

1, 2. Mbaʼéicha rupípa testígo de Jehová oiko porãmba oñondive?

KO MÚNDOPE umi hénte ndoikói pyʼaguapýpe. Umi oikóva peteĩ tetãme ha oñeʼẽva peteĩ idióma jepe pyʼỹinte oiko vai. Oĩ ndaijaʼéiva hapicháre osegi rupi ambue rrelihión, imboriahu térã iplátagui ha ojoavy hikuái polítika káusare. Ajépa idiferentete Jehová rembiguaikuéra! Haʼekuéra oiko oñondivepa pyʼaguapýpe peteĩ ñeʼẽme. Ijapytepekuéra oĩ tapicha “opa tetãygua, opaichagua ñemoñare, ha opaichagua ñeʼẽ” (Rev. 7:9, JMP).

² Mbaʼéicha rupípa testígo de Jehová oiko porãmba oñondive? Primero, oĩgui “pyʼaguapýpe [Ñandejára] ndive”. Haʼekuéra ohupyty upéva ojerovia rupi Jesús rehe ha isakrifísiore, ñanemosãsóva pekádogui (Rom. 5:1, JMP ; Efe. 1:7). Segundo, Ñandejára omeʼẽ chupekuéra espíritu sánto oservi haguére chupe ipyʼaite guive. Ha pe espíritugui ou heta mbaʼe porã, umíva apytépe pyʼaguapy  (Gál. 5:22). Tercero, ‘ndojeheʼái ko múndore’ (Juan 15:19, NM). Ndoikéi polítikape ha ndohói gerrahápe. ‘Ikyse pukúgui haʼekuéra ojapo arádo’ (Isa. 2:4).

3. Mbaʼépa jajapo jaiko rupi pyʼaguapýpe, ha mbaʼépa ñahesaʼỹijóta ko artíkulope?

³ Jaiko rupi pyʼaguapýpe oñondivepa, ndajajapói mbaʼeve ivaíva ñane ermanokuérare. Avei jahayhu chupekuéra ndahaʼéiramo jepe ñane retãygua térã ñande pire kolór (Juan 15:17). Ñandepyʼaguapýgui “jajapo iporãva opavavépe g̃uarã, tenondete umi ñanemoirũvape ñande jeroviápe” (Gál. 6:10). Añetehápe ñaimeñaína peteĩ vyʼa rendápe Ñandejára organisasiónpe, ñamombaʼevaʼerã upéva ha ñanerakateʼỹ hese. Ko artíkulope ñahesaʼỹijóta mbaʼéichapa ikatu jaheka pyʼaguapy ñaneprovléma jave peteĩ ermánondi.

Jajoavýramo peteĩ ermáno ndive

4. Mbaʼépa jajapovaʼerã ñambopochýramo peteĩ ermánope?

⁴ Santiago ohai: “Opavave ñande jajavy heta mbaʼépe. Oiméramo peteĩ ojavyʼỹva iñeʼẽ rupi, péva ningo peteĩ kuimbaʼe [perfékto]” (Sant. 3:2, ÑÑB). Sapyʼánte jajoavýtamante voi ñane ermanokuéra ndive (Fili. 4:2, 3). Péro ikatuhína ñasolusiona ñane provléma pyʼaguapýpe porã ñambyaiʼỹre kongregasión. La Biblia omombeʼu mbaʼe mbaʼépa jajapovaʼerã jahechakuaáramo ñambopochy hague peteĩ ermánope (elee Mateo 5:23, 24).

5. Mbaʼéichapa jahechauka jahekaha pyʼaguapy oĩ jave ñanembopochýva?

⁵ Mbaʼépa jajapóta peteĩ ermáno ñanembopochýramo? Ñahaʼarõtantepa haʼe raẽ ou ojediskulpa? Nahániri. Ñanemanduʼákena pe tapicha oporohayhu añetéva ‘ndaipyʼaroiha’ avavéndi (1 Cor. 13:5, NM). Oiméramo vyroreírente ñandepochýraʼe, iporãve ñaporoperdona ha ñanderesarái upe oikovaʼekuégui (elee Colosenses 3:13). Jajapóramo upéicha, ñande voi ñandepyʼaguapýta ha avei jaiko porãta opavavéndi. Ndareíri la Biblia heʼi ‘tuicha mbaʼeha umi oheja reíva ojeʼéva hese’ (Pro. 19:11).

6. Mbaʼépa jajapovaʼerã ndaikatúiramo jaheja rei upe oikovaʼekue?

⁶ Mbaʼépa jajapovaʼerã ndaikatúiramo jaheja rei upe oikovaʼekue? Iporãtapa ñamombeʼu jajuhúvape ñane provléma? Jajapórõ upéicha noĩmoʼãi pyʼaguapy kongregasiónpe. Mateo 18:15 ñanemboʼe mbaʼépa ikatu jajapo ñasolusiona hag̃ua pyʼaguapýpe ñane provléma: ‘Oiméramo ne ermáno ofalla nendive, eñeʼẽ chupe peneañoháme. Nerendúramo, reipytyvõ chupe oho jey hag̃ua tape porãre’ (NM). Jahechaháicha, versíkulo 15 guive 17 peve oñeʼẽhína umi pekádo ivaietereívare. Upéicharõ jepe, versíkulo 15-pe heʼíva, ohechauka ñañemongetavaʼerãha upe ñanembopochývandi, péro jajapovaʼerã pyʼaguapýpe porã ha ñasolusiona pe provléma michĩramo jepe. *

7. Mbaʼérepa ñasolusionavaʼerã ñane provléma pyaʼe porã?

⁷ Pablo ohaivaʼekue: “Pendepochýramo, ani peʼa tembiapo vaípe. Ani peheja kuarahy oike jepe pendepochy poi hag̃ua. Ani pemeʼẽ juruja Añáme” (Efe. 4:26, 27). Jesús heʼi avei: ‘Oimérõ reiko vai nde rapichándi, ha ndeguerahahína mburuvicha renondépe, eñehaʼãna eiko porã jey hendive’ (Mat. 5:25, NM). Koʼã mokõi téysto ohechauka jajapovaʼerãha pyaʼe tekotevẽva guive jaiko porã jey hag̃ua, ani jaheja tuicha jepe umi provléma. Ndaikatumoʼãi ñaime porã jey ñane ermanokuérandi ñañemombaʼeguasu, ñaneenvidióso térã ñandetaryrýiramo (Sant. 4:1-6).

Ojoavy jave heta ermáno

8, 9. a) Mbaʼérepa ojoavy umi kristiáno Romaygua? b) Mbaʼéichapa Pablo oñemoñeʼẽ chupekuéra?

⁸ Mbaʼépa jajapovaʼerã peteĩ provléma  ohupytýramo heta ermánope? Síglo primérope, upéva oikovaʼekue umi kristiáno Romayguáre, ijapytepekuéra hudío ha hudioʼỹva. Oĩ ermáno ikonsiénsia ‘kangyvéva’ ha oimeraẽ mbaʼe opokoiterei hesekuéra. Ha amalisia umi ermáno nopensáiva haʼekuéraicha oapoʼi chupekuéra, otaky umi mbaʼe odesidívare, ha upévare oiko vai hikuái. Mbaʼépa Pablo heʼi chupekuéra? (Rom. 14:1-6.)

⁹ Umi ogueroviávape natekotevẽiha oñekumplive pe Léi mosáika, heʼi ani hag̃ua oimoʼã haʼekuéra oĩ porãveha umi ótrogui, umi heʼíva oĩha tembiʼu ndovaléiva ojeʼu pe Léi oproivi rupi (Rom. 14:2, 10). Haʼekuéra omboykéramo koʼãichagua ermánope omokangýta chuguikuéra ijerovia, upévare Pablo heʼi: “Ani rembyai [Ñandejára] rembiapo [...] reʼúva rehehápe. [...] Upéva rangue iporã ndapeʼúiramo soʼo ni ndapeyʼúiramo víno, iporã ndapejapói mbaʼeve ikatúva omokangy pene ermáno jerovia” (Rom. 14:14, 15, 20, 21, ÑÑB). Avei umi ikonsiénsia kangývape heʼi ani hag̃ua otaky umi nopensáivare haʼekuéraicha (Rom. 14:13). Ha heʼi enterove ermánope: “Haʼe peẽme ani hag̃ua peje pendejehe hetave mbaʼe pejevaʼerãgui” (Rom. 12:3). Ha omohuʼã hag̃ua heʼi: “Jahekáke opa mbaʼe oguerúva pyʼaguapy ha akãrapuʼã joja” (Rom. 14:19).

10. Mbaʼépa jajapovaʼerã ñaneprovléma jave?

¹⁰ Mbaʼépa ojapo umi ermáno Romaygua Pablo oñemoñeʼẽ rire chupekuéra? Okambia hikuái tekotevẽhápe. Koʼág̃a rupi avei opavave kristiáno oñehaʼãmbaitevaʼerã ohaʼanga chupekuéra. Sapyʼánte oĩramo provléma, tekotevẽ ohecha mbaʼépa heʼi la Biblia, avei hekomirĩvaʼerã ha mborayhúpe osegi umi konsého oĩva ipype. Ikatu hag̃uáicha ‘ojeiko pyʼaguapýpe oñondive’, tekotevẽta enterovéva okambia opensa lája, ojapo haguéicha umi kristiáno Romaygua (Mar. 9:50, NM).

 Mbaʼéichapa ansianokuéra oporopytyvõvaʼerã

11. Mbaʼépa ojapovaʼerã umi ansiáno peteĩ ermáno omombeʼúramo chupekuéra iprovlemaha ambuéndi?

¹¹ Ñapensami peteĩ ermáno oñembojaha ansiáno rendápe ha omombeʼu chupe iprovlemaha ifamíliandi térã ótro ermáno ndive. Mbaʼépa ojapóta pe ansiáno? Ñepyrũrã ojapysaka porãta hese. Imanduʼavaʼerã ko téysto heʼívare: “Pe ombotýva ijapysa mboriahu sapukái asýgui, haʼe voi osapukái asy vaʼerã, ha noñehenduivaʼerã avei chupe” (Pro. 21:13, ÑÑB). Péro ndovaléi ogueroviapa chupe oikuaa porãʼỹre oikovaʼekue. Ambue téysto heʼi: “Oñeʼẽ raẽvante heʼívaicha añetegua, ou peve heʼíva ijapuha” (Pro. 18:17). Ohendupa rire oporanduvaʼerã chupe oñeʼẽmapa iñermánondi. Upe rire Ñandejára Ñeʼẽ rupive ohechaukavaʼerã chupe mbaʼépa tekotevẽ ojapo oiko porã jey hag̃ua hikuái.

12. Mbaʼe ehémplopa ohechauka ndovaleiha jadesidi mbaʼeve jaikuaa porãʼỹre pe oikóva?

¹² Ansianokuéra oikuaa porã vaʼerã upe oikovaʼekue, peichaʼỹrõ ikatu tuicha ojavy hikuái. Pór ehémplo, Potifar ogueroviavaʼekue hembirekópe heʼírõ guare José oviolase hague chupe. Haʼe ipochyeterei, ha reiete omoinge Josépe kárselpe (Gén. 39:19, 20). Rréi David katu oguerovia Zibá heʼírõ guare chupe ijára Mefibóset oipytyvõha iñenemigokuérape. Haʼe ndohecharaẽi añetépa heʼíva Zibá, heʼíntema: “Upéicharõ [...] opytáma nembaʼerã Mefibóset mbaʼekue” (2 Sam. 16:4; 19:25-27). Avei rréi Persiaygua Artajérjespe ojeʼe umi hudío omopuʼã jeyha pe murálla Jerusalénpe ha oñemoĩtaha hese hikuái. Haʼe ni ndoikuaái añetépa upéva, péro oguerovia ojeʼéva chupe ha ojokouka umi tembiapo. Upéicha rupi reiete ndojejapovéi Ñandejára témplo (Esd. 4:11-13, 23, 24). Mbaʼépa omboʼe ansianokuérape koʼã ehémplo? Odesidíta jave peteĩ mbaʼe, oikuaa porã vaʼerãha mbaʼépa oikóraʼe, ha ndoladeaivaʼerãha avavépe (elee 1 Timoteo 5:21).

13, 14. a) Mbaʼe rehépa imanduʼavaʼerã umi ansiáno mokõi ermáno iprovléma jave? b) Mbaʼépa oipytyvõta ansianokuérape oporohusga porã hag̃ua?

¹³ Ovalémapa ñahendúramo peteĩteĩmente omombeʼu jave pe oikovaʼekue? Nahániri, pyʼỹinte tekotevẽ ñahesaʼỹijove. La Biblia heʼi: “Oiméramo oimoʼãva oikuaamaha opa mbaʼe, neʼĩra gueteri oikuaa mbaʼeve oikuaavaʼerãháicha” (1 Cor. 8:2, BNP). Ikatu ndajaikuaái mbaʼéicha rupípa oñepyrũ pe provléma, térã mbaʼéichapa oĩhína umi ermáno. Ansianokuéra odesidíta jave peteĩ mbaʼe oñatendevaʼerã ani hag̃ua oĩ ombotavýva chupekuéra, ndojapysakaivaʼerã umi japúre ni umi ñeʼẽ oñemosarambívare upérupi. Imanduʼavaʼerã Jesucristo, pe Hués Ñandejára oiporavovaʼekue, ojapoha opa mbaʼe tekojojápe. Pe profesía heʼivaʼekue voi hese: “Nombojovakemoʼãi hesa ohechaháicha, térã ijapysa ohenduháicha” (Isa. 11:3, 4, ÑÑB). Jesús oheja Jehová espíritu oisãmbyhy chupe, ha péicha avei ojapovaʼerã ansianokuéra.

¹⁴ Upévare ansianokuéra ohusga mboyve, ojerurevaʼerã Jehovápe ijespíritu, ha osegi umi konsého oĩva la Bíbliape ha umi puvlikasión omboúva ‘tembiguái jeroviaha ha iñarandúva’ (Mat. 24:45, NM).

Mbaʼépa iñimportanteve pyʼaguapýgui

15. Mbaʼéicha javépa ñamombeʼuvaʼerã ansianokuérape peteĩ ermáno ojapoha ivaíva?

¹⁵ Opavave kristiáno ñañehaʼãmbaitevaʼerã akóinte jaiko porãmba hag̃ua oñondive. Péro upéicha avei la Biblia heʼi: “Pe arandu oúva [Ñandejáragui] katu ombohekopotĩ ha upéi omeʼẽ pyʼaguapy” (Sant. 3:17, ÑÑB). Jahechaháicha, Jehovápe g̃uarã iñimportanteve ñanderekopotĩ ha jaiko Iñeʼẽ heʼiháicha. Upéva ñamombaʼevevaʼerã pyʼaguapýgui. Upéicha rupi, jahechakuaáramo peteĩ ermáno ojapoha ivaíva, ñamokyreʼỹvaʼerã  chupe oho hag̃ua omombeʼu ansianokuérape (1 Cor. 6:9, 10; Sant. 5:14-16). Péro haʼe ndojapóiramo, ñandete jahavaʼerã ñamombeʼu. Tuicha jajavýta ñaimoʼãramo iporãveha ñakirirĩnte ani hag̃ua pe ermáno ipochy ñanendive. Hiʼarive ñakirirĩramo jahechaukáta ñamoirũha chupe hembiapo vaípe (Lev. 5:1; elee Proverbios 29:24).

16. Mbaʼépa ñanemboʼe Jehú ojapovaʼekue rréi Jehoram rehe?

¹⁶ Jehú ojapovaʼekue ohechauka iñimportanteveha ñañemoĩ Ñandejára ykére jaiko rangue ñañemoĩ porãsénte peteĩ tapicha hembiapo vaíva ndive. Jehová omondo Jehúpe okastiga hag̃ua Acab familiarépe. Upérõ osẽ ohug̃uaitĩ chupe pe rréi ñañaite, Jezabel memby hérava Jehoram, ha heʼi chupe: ‘Rejúpa pyʼaguapýpe Jehú?’ Haʼe ombohovái: ‘Mbaʼe pyʼaguapy piko oĩta, nde sy oikóramo tekovaieta ha paje apópe?’ (2 Rey. 9:22, ÑÑB). Upepete Jehú ojapi chupe fléchape ha upe flécha osẽ ikorasõitépe. Mbaʼépa omboʼe upéva ansianokuérape? Haʼekuéra ndaikatúi oheja rei umi hembiapo vaívape oimoʼãgui iporãveha oiko pyʼaguapýpe hendivekuéra. Umi ndohechaukáiva oñembyasyha oñemosẽvaʼerã kongregasióngui ikatu hag̃uáicha ojeiko pyʼaguapýpe Ñandejára ndive (1 Cor. 5:1, 2, 11-13).

17. Mbaʼépa jajapovaʼerã ñane kongregasióngui oiko hag̃ua peteĩ vyʼa renda oĩhápe pyʼaguapy?

¹⁷ Haʼetépe ningo umi provléma oĩva jepi ermanokuéra apytépe ndahaʼéi ivaietereíva ha heta vése natekotevẽi ojejapo komite hudisiál oñesolusiona hag̃ua. Upéicha jave iporãve ñaperdona ñane ermánope ha ñañehaʼã ñanderesarái upe oikovaʼekuégui. La Biblia heʼi: ‘Ombohasa reíva ojejapóva hese, ojehayhu, ha mbaʼeve ndohejareiséiva katu omomombyry hapichakuérape’ (Pro. 17:9). Ñañehaʼãmbaitéramo ñambohasa reínte ñane ermanokuéra ojavy jave, kongregasióngui oikóta peteĩ vyʼa renda oĩhápe pyʼaguapy, ha akóinte ñaime porãta Jehová ndive (Mat. 6:14, 15).

Mbaʼépa jahupyty jaheka rupi pyʼaguapy?

18, 19. Mbaʼépa jahupytýta ñañehaʼãramo jaiko pyʼaguapýpe koʼág̃ama voi?

¹⁸ Opavave kristiáno ‘ohekáva umi mbaʼe oguerúva pyʼaguapy’ ohupytýta heta mbaʼe porã. Ñepyrũrã, ohaʼanga rupi Jehovápe, oikóta iñamígoramo ha oipytyvõta ojeiko hag̃ua oñondivepa peteĩ ñeʼẽme ha pyʼaguapýpe Ñandejára organisasiónpe. Avei oñehaʼãvo oiko porã opavavéndi kongregasiónpe, oñembosakoʼi ikatu hag̃uáicha ‘osẽ omoherakuã ñeʼẽ oguerúva pyʼaguapy’ (Efe. 6:15). Péicha ‘oiko porãta opavave ndive’ ha ‘ndaipochyreimoʼãi’ oĩ jave ojahéiva hese (2 Tim. 2:24).

¹⁹ Hiʼarive ohecháta mbaʼéichapa oñekumpli ko promésa: ‘Ñandejára omoingove jeýta umi hekojojáva ha hekojojaʼỹva’ (Hech. 24:15, NM). Upéva oiko vove hetaiterei tapicha oparupigua ha opaichagua oikove jeýta ko yvy ape ári. Umi ‘oikovaʼekue ko múndo oñepyrũ guive’ jepe opuʼã jeýta (Luc. 11:50, 51, NM). Upépe ñande ikatúta ñamboʼe umi tapichápe oiko hag̃ua pyʼaguapýpe. Upévare tekotevẽ koʼág̃ama voi jaiko porãmba oñondive.

[Nóta]

Ikatúpa remyesakã?

• Mbaʼépa jajapovaʼerã oiméramo ñambopochy peteĩ ermánope?

• Mbaʼéichapa jahechauka jahekaha pyʼaguapy peteĩ ermáno ñanembopochýramo?

• Oĩ jave provléma, mbaʼérepa naiporãi jaguerovia peteĩvapente?

• Mbaʼépa iñimportanteve pyʼaguapýgui?

[Porandu ñahesaʼỹijóva]

[Nóta oĩva taʼanga ndive páhina 29]

Jehová ohayhu umi operdonakuaa ha ombohasa reívape hapicha ojavy jave