Mbaʼéichapa ikatu jastudia ñane famíliandi ha ñaneañoháme

ENERO 2009 guive, umi testígo de Jehová oĩva ko yvy tuichakuére ñañepyrũ jajapo peteĩ árapentema umi rreunión yma jajapovaʼekue dos díape. Upévare pe Cuerpo Gobernante ñanemokyreʼỹ jaiporu hag̃ua peteĩ ára káda semána jastudia hag̃ua ñande rogayguándi térã ñaneañoháme. Jaiporu porãpa upe ára?

Heta ermáno oñeporandu mbaʼe informasiónpa ikatu ohesaʼỹijo upe árape. Natekotevẽi káda semána opavave jasegi peteĩ prográmante, káda uno ohechavaʼerã mbaʼépa ou porãvéta chupe térã ifamíliape.

Mbaʼépa ikatu jastudia upe árape? Oĩ ojepreparáva umi rreunionrã, péro ndahaʼéi upéva añónte ikatúva jajapo. Jaleekuaa Ñandejára Ñeʼẽ térã ñañemongeta umi mbaʼe jaleévare umi puvlikasionkuérape. Ikatu voi jajapo peteĩ “dráma”, koʼýte oimérõ jareko mitã michĩva. Natekotevẽi jajapo ñaimeramoguáicha Salón del Reino-pe, jalee umi párrafo ha ñambohovái umi porandu. Iporãvéta ningo ojejapóramo pyʼaguapýpe porã, upéicha enterove heʼíta mbaʼépa oñandu ha opensa. Péicha jajapóramo, pe Aty Jastudia Hag̃ua Ñande Rogayguándi igustoitereíta.

Peteĩ ermáno mbohapy ifamíliava heʼi: “Rolee jepi la Bíbliape umi kapítulo oñehesaʼỹijóva káda semána. Ñepyrũrã, voimi reheve káda uno rolee umi kapítulo, ha umi mitã oheka umi mbaʼe oikuaasevéva. Upéi roñembyaty rostudia hag̃ua ha upépe omyesakã hikuái umi mbaʼe oaprendevaʼekue. Michael [orekóva 7 áño] sapyʼánte opinta peteĩ divúho térã ohai umi mbaʼe oaprendéva. David ha Kaitlyn [orekóva 13 ha 15 áño] ohai jepi umi istória oĩva la Bíbliape ohecharamoguáicha. Pór ehémplo, roleéramo guare Génesis kapítulo 40, oñeʼẽva pe faraón panadéro ha kopéro osoñavaʼekuére, Kaitlyn ohai oĩramoguáicha José ndive pe kárselpe”.

Koʼã mbaʼe jahecháva ningo peteĩ ehémplonte. Káda família idiferénte, upévare káda uno ikatu ohecha mbaʼépa ou porãvéta chupekuéra. Pe ótra páhinape retopáta hetave mbaʼe ohechaukáva mbaʼe mbaʼépa ikatu jastudia ñane família ndive térã ñaneañoháme. Repensápa ambue mbaʼe ikatúvare nepytyvõ avei?

 [Taʼanga ha rrekuádro oĩva páhina 7-pe]

Umi família oĩháme mitãrusu ha mitãkuña:

• Pelee ha peñemongeta umi kapítulo oĩvare Los jóvenes preguntan-pe.

• Pelee umi istória ha pepensa peikoramoguáicha upe tiémpope (pehecha La Atalaya 15 de mayo de 1996, páh. 14, párr. 17 ha 18).

• Peñeʼẽ umi mbaʼe pehupytysévare.

• Pehecha ha peñemongeta umi vidéo jarekóvare.

• Pehesaʼỹijo pe artíkulo “Imitãvape g̃uarã” osẽva Ñemañahápe.

Umi omendáva ha naifamíliaiva:

• Pehesaʼỹijo pe lívro Mbaʼépa ñanepytyvõta javyʼa hag̃ua ñane família ndive kapítulo 1, 3, 11-16.

• Pehesaʼỹijo ha peñemongeta umi mbaʼe peleevaʼekuére la Bíbliape peneañoháme.

• Pejeprepara porã Ñandejára Ñeʼẽ Ñehesaʼỹijo térã Ñemañaha Ñehesaʼỹijorã.

• Pehecha mbaʼépa ikatu pejapove oñondive predikasiónpe.

Solterokuéra térã umi hogaygua ndahaʼéiva testígo:

• Pehesaʼỹijo umi puvlikasión pyahu oñepresentáva asambleahápe.

• Pelee pe Anuario ko añopegua térã umi itujavéva.

• Pehecha mbaʼéichapa pembohováita umi porandu ojejapóva jepi predikasiónpe.

• Peñensaja mbaʼéichapa ikatu peñemongeta ñepyrũ predikasiónpe.

Umi família oĩháme mitã michĩva

• Pejapo dráma umi istória oĩvagui la Bíbliape.

• Peprepara huégo, oĩháicha ¡Despertad! páhina 30 ha 31-pe.

• Pejapo umi mbaʼe omopensátava pene famíliape (pehecha pe artíkulo “Ñañehaʼãramo katuete javyʼáta”, osẽvaʼekue Ñemañahápe 15 de febrero 2011, páh. 11).

• Pehesaʼỹijo pe artíkulo “Tuvakuéra omboʼe hag̃ua ifamíliape” osẽva Ñemañahápe.