Nemanduʼápa koʼã mbaʼére?

Katuete revyʼáneraʼe releévo umi rrevísta Ñemañaha ramoite osẽvaʼekue. Ehechamína ikatúpa nemanduʼa koʼã mbaʼére:

• Mbaʼe mbaʼépa ñanepytyvõta akóinte ñaneonrrádo hag̃ua?

1) Jakyhyje hekópe Jehovágui (1 Ped. 3:12); 2) ñahekomboʼe ñane konsiénsia Ñandejára Ñeʼẽ rupive ha 3) javyʼa jarekomívare (15/4, páhina 6 ha 7).

• Mbaʼérepa ikatu jaʼe ‘jaservi Jehovápe hekópe’ ndeʼiseiha ñandearhél térã ndajavyʼakuaaiha?

Jesús omoĩ ñandéve ehémplo neporãva. Haʼe ohomivaʼekue okaru ha ohasa porã iñamigokuéra ndive, mitã jepe ovyʼavaʼekue hendive. Ijarhél térã iserioitereírire ndaiporivaʼerãmoʼã oñemoag̃uiséva hese (15/4, páhina 10).

• Mbaʼépa ojapovaʼerã sy ha túva ohechakuaáramo oñemomombyryha ojuehegui ifamília rire?

Tekotevẽ ohechauka ojupe ojoayhuha. Ména omombaʼevaʼerã hembirekópe ha ohechauka chupe ndaiporiha haʼeichagua. Avei iñimportánte oñemongeta hikuái oñandúva ha oikotevẽvare (1/7, páhina 20 ha 21).

• Mbaʼépa heʼise pe olívo máta oñeñeʼẽha Romanos kapítulo 11-pe?

Pe olívo rapo orrepresenta Jehovápe ha imatakue katu Jesúspe. Hakãnguéra oñembojoja umi kristiáno ohótavare yvágape. Umi hudío omboykévo Jesúspe “oñekytĩ” térã ojepeʼa Abrahán ñemoñarégui, upévare ojeporavo umi kristiáno ndahaʼéiva hudío oñeinherta hag̃ua pe olívo mátare ha ‘ohupyty’ 144.000. Upéicha oiko avei chuguikuéra Abrahán ñemoñare (15/5, páhina 22 guive 25 peve).

• Mbaʼe marandu porãpa oĩ umi imboriahúvape g̃uarã?

Ñandejára omoĩma Itaʼýrape Mburuvicháramo. Jesús ningo pe mburuvicha ikatupyryvéva heta mbaʼére: ojeporavo oisãmbyhy hag̃ua ko yvy tuichakue, oiporiahuvereko imboriahúvape, ha oipytyvõkuaa yvypórape okambia hag̃ua ha pono opensa ijehénte (1/7, páhina 7).

• Mbaʼeichaguápepa yma umi rrománo okastiga Jesúspe ojejuka haguéicha?

Yma ningo ojekastiga umi vandído, rrevélde ha umi opuʼãvape goviérnore. Oñemosaingo chupekuéra peteĩ yvyráre ohasa asy hag̃ua omano meve. Péva haʼe pe kastígo ivaivéva ojejapovaʼekue (1/7, páhina 18).

• Jesús ifamíliarire, ikatúnepa haʼekuéra opagáraʼe Adán ñemoñarekuérare?

Nahániri. Añetehápe Jesús perfékto rupi ikatúkuri heta ifamília ha osẽvaʼerãmoʼã perfékto hikuái. Péro Jesús rekove perfékto añoite ikatu oñembojoja Adán rekovére (1 Tim. 2:6) (15/6, páhina 13).

• Mbaʼéichapa jahechauka jajehekyiha umi mboʼehára japúgui, heʼiháicha Hechos 20:29, 30?

Nañañeʼẽi ni nañamog̃uahẽi chupekuéra ñande rógape (Rom. 16:17; 2 Juan 9-11). Ndajaikói jalee térã ñahendu umi mbaʼe heʼíva hikuái téle, rrevísta, lívro térã Internétpe (15/7, páhina 15 ha 16).

• Mbaʼépa ojapovaʼekue umi Israelgua hiʼy hag̃ua séka tiémpope?

Ojapo hikuái válo umi sérrore ikatu hag̃uáicha pe y osyrýva oky jave onoʼõ peteĩ alhívepe. Avei ombokaidaʼimi hóga técho, ikatu hag̃uáicha hoʼa pe y oñembyatyhápe (1/1, páhina 19).