Oñeporandúva jepi

Jaikuaa porãpa mboy profesía oĩva Escrituras Hebreas-pe oñekumpli Jesucristo rehe?

Ñahesaʼỹijo porãvo Escrituras Hebreas jatopa hetaiterei profesía oñekumplivaʼekue Jesucristo rehe. Umíva apytépe, moõguipa ouvaʼerã, mbaʼe tiémpopepa ojekuaaukáta, umi mbaʼe ojapótava, mbaʼéichapa ojetratavaʼerã ha mbaʼépa ojapóta oñekumpli hag̃ua Jehová rembipota. Koʼã profesía ñanepytyvõ jahechakuaa hag̃ua Jesús haʼeha pe Mesías. Péro ñañatende porã vaʼerã jaʼe mboyve mboy profesíapa oĩ la Bíbliape oñeʼẽva pe Mesías rehe.

Ñepyrũrã naentéroi oikuaa mbaʼe profesíapa oñeʼẽ pe Mesías rehe ha mbaʼe profesíapa nahániri. Pór ehémplo, pe Comentario bíblico histórico ojapóva Alfred Edersheim omombeʼu umi hudío mboʼeharakuéra ohai hague Escrituras Hebreas-pe oĩha 456 téysto oñeʼẽva pe Mesías rehe, oĩramo jepe umíva apytépe noñeʼẽiva katuete pe Mesías rehe. Ha ñahesaʼỹijo porãvo koʼã 456 téysto, jahechakuaa umíva apytégui oĩha ndojekuaaporãiva añetehápepa oñeʼẽ Jesucristo rehe. Pór ehémplo Edersheim omombeʼu umi hudío apytépe oĩha heʼíva Génesis 8:11 oñeʼẽha pe Mesías rehe. Haʼekuéra heʼi pe “pykasu ogueru hague [árkape] pe yvyra rogue Mesías kaʼaguýgui”. Ko karai omombeʼu avei oñentende vai hague Éxodo 12:42, haʼekuéra heʼi: “Moisés osẽ haguéicha pe desiértogui, upéicha avei pe Mesías osẽta Rómagui”. Añetehápe umi karai arandu, upéicha avei heta umi oleéva la Biblia, ohechakuaa koʼã téysto noñeʼẽiha katuete Jesucristo rehe.

Ñapensátaramo umi profesía añetehápe Jesucristo okumplivaʼekuére, hasýta jaikuaapa hag̃ua mboýpa oĩ. Pór ehémplo, Isaías kapítulo 53 versíkulo 2 guive 7 peve ohechauka mbaʼe mbaʼépa ohasavaʼerã pe Mesías: “Ndoguerekói mbaʼeve ñamaʼẽse hag̃ua hese” [...]. ‘Ojeapoʼi ha oñemboyke chupe’ [...]. “Haʼe katu ogueraha ijapére ñane mbaʼasy” [...]. ‘Ojekutu chupe ñane rembiapo vaikuére’ [...]. “Ojereraha ovecharaʼýicha ojejuka hag̃uáme”. Upéicharõ, jaʼétapa ko kapítulope oĩha peteĩ profesíante, térãpa oĩha heta profesía?

Jahechamína avei Isaías 11:1-pe heʼíva: ‘Osẽvaʼerã peteĩ yvyra rakã Jesé yvyrágui, hapógui osẽta peteĩ hoky pyahu hiʼavaʼerã’. Pe versíkulo 10-pe oĩ avei ko profesía ha oiporu umi ñeʼẽ ojoguáva versíkulo 1-pe heʼívape. Upéicharõ, jaʼekuaápa koʼã mokõi versíkulo haʼeha mokõi profesía, térãpa peteĩnte ha ojerrepetiha? Upéicharõ ñantende lájare Isaías kapítulo 53 ha kapítulo 11 odependéta jaikuaa hag̃ua mboy profesíapa oñekumpli pe Mesías rehe.

Upéicha rupi, natekotevẽi jaʼe mboy profesíapa oĩva Escrituras Hebreas-pe oñekumpli pe Mesías rehe. Jehová organisasión ningo oguenohẽma hetaiterei puvlikasiónpe umi profesía ha omyesakã mbaʼéichapa oñekumpli. * Koʼã profesía ikatu ideprovécho ñandéve jastudíavo la Biblia ñaneañohápe térã ñande rogayguándi ha predikasiónpe. Umi profesía omombarete ñande jerovia ohechauka porãgui Jesús haʼeha pe Mesías, ndajaikuaaporãiramo jepe mboýpa oñekumpli hese.

[Nóta]