Ohaʼarõjoa hikuái og̃uahẽ pe Mesías

‘Upérõ umi hénte ohaʼarõjoa og̃uahẽ pe Cristo ha upévare enterovénte oñepyrũ oñeporandu: “Ndahaʼeichénepa Juan hína pe Cristo?”.’ (LUC. 3:15, NM)

1. Mbaʼépa omomarandu pe ánhel umi ovecharerekuápe?

PYHARÉMA ha umi ovecharerekua katu oĩ gueteri pe ñúre oñangarekojoa hymbakuérare. Upeichaháguinte ohecha hikuái omimbipa ijerére ha tuicha oñemondýi. Jehová ánhel ojechauka chupekuéra ha omeʼẽ ko marandu iporãitéva: ‘Ani pekyhyje, che ningo agueru peẽme marandu porã ombovyʼaitereítava opavavépe. Ko árape onase Cristo, ñande Ruvicha oúva oporosalva hag̃ua’. Upeichaite, pe mitã onasévagui oikóta Mesías ha oĩhína peteĩ mymbakehápe namombyrýi upégui, oñemoñeno chupe umi animál okaruhápe. La Biblia omombeʼu: ‘Peichahágui ouve hetaiterei ánhel ha omombaʼeguasu Ñandejárape heʼívo: “Toñembotuicha Ñandejárape amo yvágape ha ko yvy ape ári toiko pyʼaguapýpe kuimbaʼekuéra ipyʼaporãva”’ (Luc. 2:8-14, NM).

2. Mbaʼépa heʼisehína “Mesías”, ha mbaʼéichapa ojekuaa porãta mávapepa ojeporavo upearã?

² Umi ovecharerekua oiméne oikuaaséraʼe mávatapa pe Mesías. Haʼekuéra ningo hudío, upéicha rupi oikuaa porã “Mesías” heʼiseha Ñandejára oiporavovaʼekue ojapo hag̃ua peteĩ mbaʼe iñimportantetereíva (Éxo. 29:5-7). Péro, mbaʼéichapa ikatu ogueroviauka hikuái ambue hapichápe upe mitãgui oikotaha Mesías, heʼi haguéicha pe ánhel? Haʼekuéra ohechavaʼerã oñekumplípa ohóvo hese umi profesía oĩva Escrituras Hebréaspe oñeʼẽva Mesías rehe.

Mbaʼérepa oñehaʼarõiterakaʼe?

3, 4. Mbaʼéichapa ñantendevaʼerã Daniel 9:24, 25?

³ Tiémpo rire Juan el Bautista oñepyrũ opredika. Umi hénte  ohechávo opa mbaʼe ojapóva ha ohendu rupi chupe, oikuaasejoa noiméipa haʼehína pe Mesías (elee Lucas 3:15). Mbaʼérepa oĩ upérõ ohaʼarõmava ou Cristo? Ikatu ontende porãgui pe profesía oñeʼẽva umi “setenta semána” rehe heʼihápe: ‘Ohasáta setenta semána ne retãme [...]. Eikuaa porãke kóva: ojeʼe ypy guive oñembopyahu ha oñemopuʼã jeytaha Jerusalén, og̃uahẽ meve Mesías, ohasáta sesenta y dos semána’ (Dan. 9:24, 25). Heta lívro omyesakã koʼã semána heʼiseha siete áño káda uno. Pór ehémplo, Ñande Ruete Ñeʼẽ Biblia heʼi: ‘Setenta semána térã cuatrocientos noventa áño’.

⁴ Koʼág̃a, ñande jaservíva Jehovápe jaikuaa porã pe 69 semána oñeñeʼẽha Daniel 9:25-pe, oñepyrũ hague áño 455-pe, Jesús ou mboyve. Upérõ pe mburuvicha Persiaygua, Artajerjes omeʼẽ permíso Nehemíaspe omopuʼã jey hag̃ua Jerusalén (Neh. 2:1-8). Upe guive jaipapáramo 69 semána, térã 483 áño, ñandegueraha áño 29-pe Jesús ojevautisárõ guare. Upe árape ojeporavo Jesúspe espíritu sánto rupive ha oiko chugui Mesías (Mat. 3:13-17). *

5. Mbaʼe profesíapa ñahesaʼỹijóta?

⁵ Ñahesaʼỹijomína koʼág̃a ambue profesía omombeʼúva moõpa onaséta pe Mesías, umi mbaʼe oikótava imitã aja ha mbaʼéichapa opredikáta. Jahechávo mbaʼéichapa oñekumpli koʼã profesía, jajeroviavéta la Bíbliare ha hesakãvéta ñandéve Jesús haʼe hague pe Mesías.

Umi profesía oñeʼẽva inasimiéntore

6. Mbaʼéichapa oñekumpli Génesis 49:10?

⁶ Oúta Judá ñemoñarégui. Omano potaitérõ guare Jacob ovendesi itaʼyrakuérape ha oprofetisa. Peteĩvare heʼi: ‘Pe sétro ndojeimoʼãi Judágui, ni pe vastón de mándo ipoguýgui ou peve Siló; chupe iñeʼẽrenduvaʼerã opa tetãnguéra’ (Gén. 49:10, NM). Mávarepa oñeʼẽ ko téysto? Mesías rehe, ha heta hudío iñarandúva ohechakuaa upéva. Mbaʼépa orrepresenta pe sétro ha vastón de mándo? Heʼise pe autorida orekóva peteĩ rréi ha pe puʼaka oisãmbyhy hag̃ua. Pe profesía heʼivaʼekue umi mburuvicha osẽtaha Judá ñemoñarégui. Ha upéva oñekumpli David ogoverna ypy guive. Mbaʼépa heʼise pe téra Siló? Heʼise “Ijára” térã “Imbaʼe tee”. Siló outahína rréi Judaygua familiarégui ha oisãmbyhýta opa árare. Mbaʼéichapa ojekuaa upéva? Ñandejára opromete Sedequíaspe, pe último rréi oisãmbyhyvaʼekue Jerusalén, outaha ifamíliagui peteĩ orekóva derécho ogoverna hag̃ua, ha upévape oñemeʼẽta puʼaka (Eze. 21:26, 27). Sedequías rire, Jesúspe añoite, David ñemoñare apytégui, ojeporavo okumpli hag̃ua upe promésa oisãmbyhy hag̃ua. Upévare onase mboyve, ánhel Gabriel heʼi Maríape: ‘Jehová omoĩta chupe rréiramo itúva David rendaguépe. Haʼe oisãmbyhýta Jacob rogayguápe opa ára g̃uarã, ha igoviérno ndopamoʼãi arakaʼeve’ (Luc. 1:32, 33, NM). Péicha jahecha porã Jesús haʼeha Siló, haʼe rupi hudío ha ou David familiarégui (Mat. 1:1-3, 6; Luc. 3:23, 31-34).

7. Moõitépa onaserakaʼe pe Mesías?

⁷ Onaséta Belénpe. Miqueas ohai: “Belén Efrata [...], nde ningo pe táva michĩvéva Judá tavakuéra apytépe, ndehegui katu osẽta Israel retã ruvicha guasurã, oikomavaʼekue ymaite guive” (Miq. 5:2, ÑÑB). Upéicharõ pe Mesías onasevaʼerã Belénpe. Amalisia ko táva ymave heravaʼekue Efrata. María ha José ndoikoivaʼekue upépe, síno Nazarétpe. Péro upéi umi Romaygua ojerure ojejapo hag̃ua peteĩ sénso, upévare José ha María ohómante Belénpe oñeanota hag̃ua. Upépe onase Jesús áño 2-pe (Mat. 2:1, 5, 6). Ajépa oñekumpli porãite umi profesía!

8, 9. Heʼi haguéicha pe profesía, mávaguipa onasevaʼerã pe Mesías, ha mbaʼépa oikóta haʼe onase rire?

 ⁸ Onaséta peteĩ vírhengui. Isaías oprofetisa: “Pe kuñataĩ [...] hyeguasúta” (elee Isaías 7:14). Ko versíkulope ojeporu pe ñeʼẽ “kuñataĩ” (ʽalmáh); upéva ndeʼiséi ndoikoiha gueteri kuimbaʼe ndive. Péro ikatu avei ojeporu oñeñeʼẽ jave peteĩ ‘vírhenre’ (bethuláh). Pór ehémplo, la Bíbliape oiporu pe ñeʼẽ “kuñataĩ” oñeʼẽ jave Rebécare omenda mboyve (Gén. 24:16, 43). Mateo omyesakãrõ guare Isaías 7:14 oñekumpli hague Jesús onasérõ guare, oiporu pe ñeʼẽ griégo (parthénos) heʼiséva “vírhen”. Mateo ha Lucas kuatiañeʼẽme ohechauka porã María hyeguasu hague oikoʼỹre kuimbaʼéndi, espíritu sánto rupivénte (Mat. 1:18-25; Luc. 1:26-35).

⁹ Onase rire ojejukáta mitãnguéra. Yma umi evréo oikórõ guare Egíptope, faraón omombokapaite chuguikuéra rrío Nílope umi mitãkuimbaʼe michĩva (Éxo. 1:22). Heta tiémpo rire Jeremías 31:15, 16 omombeʼu avei ojejukataha heta mitã. Pe profesía heʼi ‘Raquel ojaheʼoha imembykuérare’ ojeguerahágui chupekuéra umi ‘hese ijaʼeỹva retãme’. Ha omombeʼu ojaheʼo hatãiterei hague ha oñehenduha chupe Ramá peve, Benjamín yvy opytáva norte gotyo Jerusaléngui. Mateo heʼi upe profesía oñekumpli hague Herodes ojukaukárõ guare umi mitãkuimbaʼeʼípe Belénpe ha umi táva oĩvape ijerére (elee Mateo 2:16-18). Oiméne umi mitã hentekuéra ombyasyete anga upe oikóva!

10. Mbaʼéichapa oñekumpli Jesús rehe Oseas 11:1?

¹⁰ Ñandejára oguenohẽta chupe Egíptogui ojapo haguéicha umi isrraelíta rehe (Ose. 11:1). Herodes heʼi mboyve ojejuka hag̃ua umi mitãme, peteĩ ánhel oavisa Josépe osẽ hag̃ua oho Egíptope María ha Jesús ndive. Ha ‘opyta hikuái Herodes omano meve, oñekumpli hag̃ua Jehová heʼivaʼekue iproféta [Oseas] rupive: “Egíptogui ahenói che raʼýpe”’ (Mat. 2:13-15, NM). Ndaikatúi ojeʼe Jesús ombohapepa hague koʼã mbaʼe okumpli hag̃ua umi profesía; haʼe ningo michĩ gueteri upérõ.

Oñepyrũ opredika

11. Mbaʼéichapa ojeprepara pe tape ou mboyve pe Mesías?

¹¹ Ojehóta henonderã ojeprepara hag̃ua chupe tape. Malaquías heʼi “proféta Elías” ojapotaha upe tembiapo opreparávo umi hénte pyʼapy Mesías ou mboyve (elee Malaquías 4:5, 6). Jesús omyesakãvaʼekue Juan el Bautista orrepresenta hague “Elíaspe” (Mat. 11:12-14). Avei Marcos ohechauka Juan okumpli hague peteĩ profesía oĩva Isaíaspe (Isa. 40:3; Mar. 1:1-4). Jesús ndojeruréi Juánpe oprepara hag̃ua upe tape. Jehová voi omeʼẽ chupe upe tembiapo ikatu hag̃uáicha umi hudío oikuaa mávapa pe Mesías.

12. Mbaʼe tembiapópa ohechauka Jesús haʼeha pe Mesías?

¹² Ojekuaáta mávapa haʼe ojapo rupi pe tembiapo Jehová omeʼẽva chupe. Peteĩ jey Jesús oho sinagógape oĩva Nazarétpe, upe táva haʼe okakuaa haguépe. Upépe ojagarra Isaías kuatiañeʼẽ ha olee heʼihápe: ‘Jehová espíritu oĩ chendive, haʼe cheporavo amombeʼu hag̃ua marandu porã imboriahúvape, amomarandu hag̃ua isãsotaha umi oikóva iñapytĩmby, ohechaʼỹva ohecha jeytaha, ha umi ojepyʼapýva ipyʼaguapytaha. Avei amoherakuã hag̃ua pe ára Jehová ñandeporiahuverekotaha’. Hesakã porãiterei ningo haʼeha pe Mesías, upévare heʼi: ‘Ko árape oñekumpli ko aleéva angete’ (Luc. 4:16-21, NM).

13. Mbaʼépa Isaías heʼi Mesías ojapotaha Galiléape?

¹³ Opredikáta Galiléare. Oñeʼẽvo ‘Galilea’ rehe, opytáva ‘Zabulón ha Neftalí yvýpe’, Isaías heʼi: ‘Pe tetã oikovaʼekue pytũmbýpe ohecha peteĩ mbaʼerendy tuicháva. Umi pytũmbýpe oikóva ári ohesape upe mbaʼerendy’ (Isa. 9:1, 2, NM). Ha moõpa Jesús oñepyrũ opredika? Galiléape. Haʼe oikovaʼekue  upépe peteĩ távape, hérava Capernaum. Upéicha rupi, umi oikóva Zabulón ha Neftalí yvýpe ohendu umi mbaʼe porã omboʼéva Ñandejára Kuatiañeʼẽgui (Mat. 4:12-16). Avei Galiléape Cristo ojapo pe Sermón del Mónte, iprimér milágro ha oiporavo umi doce apóstol. Ikatu voi upépe raʼe Jesús ojechauka umi quinientos rasa hemimboʼépe oikove jey rire (Mat. 5:1–7:27; 28:16-20; Mar. 3:13, 14; Juan 2:8-11; 1 Cor. 15:6). Jahechaháicha Jesús opredika umi hénte oikóvape ‘Zabulón ha Neftalí yvýpe’, ha upéicha okumpli Isaías heʼivaʼekue. Péro omombeʼu avei pe marandu porã Israel tuichakue.

Umi profesía heʼi ojapovetaha ambue mbaʼe

14. Mbaʼéichapa Jesús okumpli Salmo 78:2 heʼíva?

¹⁴ Oiporúta heta ehémplo oporomboʼe jave. Pe salmísta Asaf opurahéi: ‘Aiporúta ehémplo añeʼẽ hag̃ua’ (Sal. 78:2; NM). Mbaʼérepa ikatu jaʼe ko téysto oñeʼẽha Jesús rehe? Mateo heʼi mbaʼéichapa Jesús oporomboʼevaʼekue. Omombeʼu ombojoja hague Ñandejára Rréino peteĩ mostása raʼỹi ha levadúra rehe. Upéi ohai: ‘Haʼe ningo katuete oiporu umi ehémplo oñeʼẽ jave. Péicha oñekumpli pe profesía heʼíva: “Aiporúta ehémplo amboʼe hag̃ua chupekuéra, aikuaaukáta umi mbaʼe ymaite guive oĩva kañyháme”’ (Mat. 13:31-35, NM). Añetehápe, Jesús oiporu porãiterei vaʼekue umi ehémplo oporomboʼe hag̃ua.

15. Mbaʼéichapa oñekumpli Isaías 53:4?

¹⁵ Omongueráta umi héntepe. Isaías oprofetisa: “Añetehápe haʼe ogueraha ñane mbaʼasykuéra, ha ohasa avei ñane rembiasa asy” (Isa. 53:4, ÑÑB). Mateo omombeʼu Jesús omonguera rire Pedro suégrape, omonguera hague avei ambue tapichakuérape: ‘Péicha oñekumpli proféta Isaías heʼivaʼekue: “Haʼe ogueraha ijapére ñane mbaʼasy ha oipeʼapa umi mbaʼe ñanembohasa asýva”’ (Mat. 8:14-17, NM). Añetehápe Jesús omonguera hetaitereive tapichápe.

16. Mbaʼéichapa apóstol Juan ohechauka Isaías 53:1 oñekumpliha Jesús rehe?

¹⁶ Ojapóramo jepe umi mbaʼe tuicháva, heta hénte ndojeroviamoʼãi hese (elee  Isaías 53:1). Apóstol Juan ohechauka mbaʼéichapa oñekumpli Jesús rehe ko profesía: “Ojapóramo jepe heta milágro opavave renondépe, ndojeroviái hikuái hese. Oiko hag̃ua pe ñeʼẽ proféta Isaías heʼivaʼekue: ‘Ore Jára, máva piko oguerovia ore ñeʼẽ, ha mávape g̃uarã piko ojehechauka [Ñandejára] puʼaka?’” (Juan 12:37, 38, ÑÑB). Pablo tiémpope oñekumpli gueteri ko profesía. Haʼe opredikárõ guare oĩ heta ndojeroviáiva Crístore (Rom. 10:16, 17).

17. Mbaʼéichapa heʼi Juan oñekumpliha Salmo 69:4?

¹⁷ Umi hénte reiete ndaijaʼemoʼãi hese (Sal. 69:4). Juan omombeʼu mbaʼépa heʼi Jesús: ‘Ndajapói rire hudiokuéra apytépe umi mbaʼe avave ojapoʼỹva, ndoʼaivaʼerãmoʼã hembiapo vaikue hiʼarikuéra. Haʼekuéra katu, ohecháramo jepe umi mbaʼe, ndaijaʼéi cherehe ha ndaijaʼéi che Rúre. Koʼã mbaʼe ningo ojehu oiko hag̃ua Ileikuérape heʼíva: “Reiete ndaijaʼéi cherehe hikuái”’ (Juan 15:24, 25). Ko profesía oĩ Sálmope, mbaʼérepa upéicharõ Jesús heʼi oĩha “Léipe”? Umi hudío pyʼỹinte ohenói “Léi” Escrituras Hebréaspe (Juan 10:34; 12:34). Mateo, Marcos, Lucas ha Juan kuatiañeʼẽme oñemombeʼu oĩ hague heta ndaijaʼéiva Jesús rehe, koʼýte umi omoakãva hudiokuéra rrelihión. Haʼe voi heʼi umi ohendúvape chupe: “Yvyporakuéra niko ndoguerekói mbaʼérepa ndaijaʼéivo penderehe. Cherehe katu ndaijaʼéi, ahechaukágui chupekuéra hembiapo vaikue” (Juan 7:7).

18. Mbaʼépa ñanepytyvõta jagueroviave hag̃ua Jesús haʼeha Jehová Rembiporavo?

¹⁸ Umi kristiáno síglo primérope guare oikuaa porã Jesús Nazaretgua haʼe hague  Mesías. Haʼekuéra ohechakuaa umi profesía oĩva Escrituras Hebréaspe oñekumpliha Cristo rehe (Mat. 16:16). Ko artíkulope jahecha umi profesía oñekumplíva onase riremi ha ambue katu opredikaha tiémpope. Pe ótro oúvape ñahesaʼỹijovéta umi profesía oñeʼẽva hese. Jajepyʼamongetákena koʼã mbaʼére, upéicha jagueroviavéta Jesús haʼeha Jehová Rembiporavo.

[Nóta]

Mbaʼépa ñambohováita?

• Mbaʼe profesíapa oñekumpli Jesús onasérõ guare?

• Mávapa oprepara pe tape Mesías ou mboyve?

• Mbaʼéichapa oñekumpli Cristo rehe Isaías kapítulo 53?

[Porandu ñahesaʼỹijóva]