Ojuhu hikuái pe Mesías

“Oime rojuhu pe Mesíaspe.” (JUAN 1:41)

1. Mbaʼépa omomýi Andréspe heʼi hag̃ua: “Oime rojuhu pe Mesíaspe”?

JUAN EL BAUTISTA oĩhína mokõi hemimboʼéndi, Andrés ha Juan. Peichaháguinte ohecha ouha Jesús, ha heʼi: ‘Péina, pépe ou Ñandejára Ovecharaʼy!’. Andrés ha Juan upepete voi oho Cristo rapykuéri ha opyta hendive kaʼaruete peve. Upe koʼẽme, Andrés oho oheka iñermáno Simón Pédrope, ha vyʼápe omomarandu chupe: “Oime rojuhu pe Mesíaspe”. Upéi ogueraha chupe hendápe (Juan 1:35-41).

2. Mbaʼérepa iporã ñahesaʼỹijo umi profesía oñeʼẽva pe Mesías rehe?

² Upe rire Andrés, Pedro ha ambue tapicha ohesaʼỹijove Ñandejára Kuatiañeʼẽ ha ogueroviavéntema Jesús Nazaretgua haʼeha pe Mesías oñeprometevaʼekue. Upéicha rupi ndokyhyjéi hikuái omombeʼu hag̃ua opárupi upe oikuaáva. Ñande avei jajeroviavéta la Bíbliare ha Jehová Rembiporavo rehe ñahesaʼỹijóramo umi profesía oñeʼẽva pe Mesías rehe.

“Nde Ruvicha Guasu ou”

3. Mbaʼe profesíapa oñekumpli Jesús rehe oikévo Jerusalénpe?

³ Oñemombaʼéta chupe oikévo Jerusalénpe. Peteĩ profesíape Zacarías heʼi “táva Sión” térã Jerusalénpe: “Evyʼaitereíke [...], epurahéi vyʼágui [...]. Nde Ruvicha Guasu ou, imarangatu ha omimbipa, ojejapoʼỹre vurroraʼy ári oguapy” (Zac. 9:9). Sálmope katu omombeʼu mbaʼéichapa ojeguerohorýta pe Mesíaspe og̃uahẽvo Jerusalénpe: ‘Toñemombaʼe pe oúva Jehová rérape’ (Sal. 118:26, NM). Ko profesía oñekumpli porã Jesús rehe, ha ndaikatúi jaʼe haʼe ombyatypa hague umi héntepe omombaʼe ha oguerohory hag̃ua chupe oikévo Jerusalénpe. Jaleekuévo ñapensami mbaʼeichaitépa umi hénte ovyʼa ha osapukaijoa (elee Mateo 21:4-9).

4. Mbaʼéichapa oñekumpli Salmo 118:22, 23?

⁴ Iñimportantetereíta Ñandejárape g̃uarã, péro heta tapicha ndogueroviamoʼãi haʼeha pe Mesías. Peteĩ profesía omombeʼu mbaʼépa ojapóta umi hénte ndojeroviáiva hese: ‘Omboyke [...], ha ndoapói chupe mbaʼevérõ’ (Isa. 53:3; Mar. 9:12). Upéicharõ jepe, Sálmope ojeʼe hese kóicha: ‘Pe ita guasu umi óga omopuʼãva omboykevaʼekue, péva hína pe ita guasu ojeporúva pe óga oñemopyenda hag̃ua. Koʼã mbaʼe oiko Jehová rupive’ (Sal. 118:22, 23, NM). Oñeʼẽrõ guare umi hese ndaijaʼéiva  ndive, Jesús ohechauka haʼe okumpliha ko profesía. Upéi Pedro avei ohechakuaa upéva oñekumpliha Crístore (Mar. 12:10, 11; Hech. 4:8-11). Añetehápe, Ñandejára Raʼy haʼehína pe “ita tenondeguáva”, térã pe omopyendáva kongregasión kristiána. Ko ita guasu yvyporakuéra omboykevaʼekue, “[Ñandejárape] g̃uarã ita iporavopyre ha hepýva” (1 Ped. 2:4-6).

Oñetraisiona ha ojeheja reíta chupe

5, 6. Mbaʼéichapa heʼi umi profesía oñetraisionataha pe Mesías, ha mbaʼéichapa oiko upéva?

⁵ Peteĩ iñamígo otraisionáta chupe. Jesús rehe oñekumpli ko profesía David ohaivaʼekue: “Upe chendive oikóva, chendive okarúva ha che jeroviaha, haʼe jepe oñemoĩ cherehe” (Sal. 41:9). Ymave ningo ojekuaa porã opavave okarúva oñondive oñoamigoha (Gén. 31:54). Upéicharõ ko profesíape David oñeʼẽ peteĩ amígo itraisionérovare. Jesús voi heʼivaʼekue mbaʼéichapa oñekumplíta ko profesía omombeʼúvo hemimboʼekuérape oĩtaha peteĩ otraisionáva chupe: “Che nañeʼẽihína penderehe, opavavére. Che aikuaa mávapepa aiporavovaʼekue. Ha ojehumantevaʼerã Ñandejára Ñeʼẽme heʼiháicha: ‘Pe chendive okarúva, ojere cherehe’” (Juan 13:18). Jaikuaaháicha, upérõ guare Jesús oñeʼẽkuri Judas Iscariote rehe, oikuaágui otraisionataha chupe.

⁶ Oñetraisionáta chupe 30 monéda de plátare, peteĩ tembiguái repykue. Ojeprofetisa haguéicha, Mateo omombeʼu pe otraisionavaʼekue Jesúspe okovra hague peteĩ tembiguái repýnte. Ha omombeʼu koʼã mbaʼe rehe oñeʼẽma hague “proféta Jeremías”. Mbaʼére piko haʼe imanduʼa Jeremías rehe ko profesía oĩramo Zacarías 11:12, 13-pe? Amalisia Mateo tiémpope, Jeremías kuatiañeʼẽ oĩ tenondete umi maranduhára kuatiañeʼẽme, upévare hesénte imanduʼa oĩramo jepe avei ipype Zacarías kuatiañeʼẽ (embojoja Lucas 24:44 rehe). Amo ipahápe Judas ndoiporúi pe pláta oñemeʼẽvaʼekue chupe otraisiona hag̃ua Jesúspe, síno omombo témplope ha oho ojejuguy (Mat. 26:14-16; 27:3-10, ÑÑB).

7. Mbaʼéichapa oñekumpli Zacarías 13:7?

⁷ Hemimboʼekuéra oheja reíta chupe. Oiko heʼi hagueichaite proféta Zacarías: “Eikutu [ovecharerekuápe] ijovechakuéra oñemosarambi hag̃ua” (Zac. 13:7, ÑÑB). Og̃uahẽvo 14 de nisán áño 33, Jesús heʼi hemimboʼekuérape: ‘Enterove peẽ chereja reíta ko pyharépe, péicha voi ningo ojehaivaʼekue Ñandejára Kuatiañeʼẽme: “Ajukáta pe ovecháre oñangarekóva, ha umi ovecha isarambipáta”’. Mateo omombeʼu upeichaite oiko hague: ‘Entéro umi hemimboʼe oheja chupe ha odiparapa’ (Mat. 26:31, 56, NM).

 Ojejahéi ha oñemboja reíta hese heta mbaʼe

8. Mbaʼéichapa oñekumpli Isaías 53:8 heʼíva?

⁸ Ojehusga chupe ha ojeʼe omanovaʼerãha (elee  Isaías 53:8). Catorce de nisán koʼẽme oñembyatypaite pe Sanedrín. Upéi haʼekuéra oipokua Jesúspe ha oguerahauka pe governadór rrománo Pilato rendápe. Haʼe heta ombaʼeporandu Jesúspe ha ndotopái mbaʼeve okulpa hag̃ua chupe. Pilato osẽ heʼi umi hudío ijatývape upépe opoiseha Jesúsgui, péro haʼekuéra osapukaipa ha heʼi: ‘Ejukauka katuna chupe!’. Haʼekuéra oipotave ojepoi peteĩ mbaʼe vai apohágui, hérava Barrabás. Upémarõ Pilato oñemoĩ porãségui umi héntendi opoi chugui, ha omanda oñembyepoti ha ojeklava hag̃ua Jesúspe peteĩ yvyráre (Mar. 15:1-15, NM).

9. Mbaʼéichapa oñekumpli Jesús rehe Salmo 35:11?

⁹ Oñeñeʼẽ reíta hese. David rehe oiko haguéicha, pe Mesías ikatu heʼi: “Oñeʼẽ rei ha ijapúva opuʼã cherehe. Mbaʼe aikuaaʼỹva rehe oporandu chéve hikuái” (Sal. 35:11). Upeichaite oiko, ‘umi saserdóte ruvichakuéra ha pe Sanedrín kompletoite oheka mávapa ikatu oñeʼẽ vai Jesúsre ojejuka hag̃ua chupe’ (Mat. 26:59, NM). ‘Oĩramo jepe heta oñeʼẽ reíva hese, ndaikatúi oñemoĩ hikuái peteĩ ñeʼẽme.’ (Mar. 14:56, NM.) Umi ndaijaʼéiva Cristo rehe ipochyeterei ha ni nahesapirĩri oñeʼẽ rei ha ojukauka hag̃ua chupe.

10. Mbaʼéichapa oñekumpli Isaías 53:7?

¹⁰ Noñedefendemoʼãi umi iñañávagui. Isaías oprofetisa: ‘Oñeñembosaraívo hese haʼe oñemomirĩnte, ha ndeʼíri mbaʼeve. Ojegueraha ovecháicha ojejuka hag̃uáme, ha okirirĩnte ku ovecha oñeñapĩvaicha’ (Isa. 53:7). Jesús okumplipaite ko profesía: ‘Umi saserdóte ruvicha ha karai guasukuéra oñeʼẽ vaívo hese, Jesús ndeʼíri mbaʼeve. Upévo Pilato osẽ heʼi: “Nerehendúi piko mbaʼépa heʼi hikuái nderehe?”. Haʼe katu ndeʼíri mbaʼevete asy ha pe governadór oponderaiterei upéva’ (Mat. 27:12-14, NM). Jesús nombohováiri umi ndaijaʼéivape hese (Rom. 12:17-21; 1 Ped. 2:23).

11. Mbaʼéichapa oñekumpli Isaías 50:6 ha Miqueas 5:1?

¹¹ Ojejahéita hese. Isaías kuatiañeʼẽme ojeʼevaʼekue pe Mesías heʼitaha: “Ameʼẽ che atukupe chenupãsévape ha che rova umi cherendyvaʼosévape; namokañýi che rova umi chejaʼosévagui térã umi cherehe ondyvusévagui” (Isa. 50:6, ÑÑB). Miqueas katu heʼi: “Yvyra poʼípe oinupãta hikuái Israel retã Ruvicha hova yképe” (Miq. 5:1, ÑÑB). Marcos kuatiañeʼẽ omombeʼu mbaʼéichapa oñekumpli ko profesía: ‘Ha oĩ oñepyrũva ondyvu hese, upéi ohesajokua ha ombyepoti, ha heʼi chupe: “Nde oimérõ añete peteĩ proféta, emombeʼúna oréve upéicharõ mávapa nenupã!”. Ha umi guárdia trivunalpegua ohug̃uaitĩ avei chupe tova jepetépe. [...] Avei oinupã hikuái Jesúspe iñakãrupi peteĩ takuárape, ondyvu hese, oñesũ henondépe ha omombaʼe guaʼu chupe’ (Mar. 14:65; 15:19, NM). Ha ñande jaikuaa porã Jesús nomereséi hague ojejapo hese koʼã mbaʼe.

Iñeʼẽrendu omano meve

12. Mbaʼéichapa oñekumpli Cristo rehe Salmo 22:16 ha Isaías 53:12?

¹² Ipy ha ipógui ojeklaváta yvyráre ojejapoháicha umi mbaʼe vai apoháre. Pe Mesías ohecha mbaʼéichapa oñekumpli hese David heʼivaʼekue: “[Iñañáva] atýra chemongora, che po ha che pýpe chekutu hikuái” (Sal. 22:16). Opavave oleéva la Biblia oikuaa porã upeichaite oiko hague. Marcos omombeʼu: ‘Pyhareve lás 9 rupi oñemosaingo chupe yvyráre’ (Mar. 15:25, NM). Ambue profesía katu heʼi oñemoĩtaha chupe mbaʼe vai apoha ndive: “Oñemeʼẽ haguére omano hag̃ua, oñemoĩ hembiapo vaíva apytépe” (Isa. 53:12). Ko téysto heʼiháicha, ‘Jesús ykére oñemosaingo avei yvyráre mokõi mondahápe, peteĩva oñemoĩ ijasu gotyo ha ambue katu ijakatúa gotyo’ (Mat. 27:38, NM).

13. Mbaʼéichapa oñekumpli Jesús rehe heʼíva Salmo 22:7, 8?

 ¹³ Ojeapoʼíta chupe (elee  Salmo 22:7, 8). David heʼi haguéicha, umi hénte oñembohory Cristo rehe oĩrõ guare pe yvyráre. Mateo omombeʼu: ‘Entéro ohasávante oñakãmbovava ha oñembohory hese, heʼívo: “Nde ndaje aipo reitypátavakuri ko témplo ha remopuʼã jeýta mbohapy árape. Ejesalvápy upéicharõ! Ndéramo Ñandejára raʼy, eguejýna pe yvyrágui. Umi saserdóte ruvicha, mboʼehára leipegua ha karai guasukuéra oñembohory avei Jesúsre ha heʼi: ‘Ambuekuérape osalva, ha ijupe katu ndaikatúi ojesalva. Haʼe ndajeko Israel ruvicha guasu. Toguejýpy upéicharõ rojerovia hag̃ua hese. Ojeroviaiténgo Ñandejárare. Tosalvána chupe upéicharõ, oimérõ oguerohory chupe. “Che Ñandejára Raʼy” heʼi ningo’”’ (Mat. 27:39-43, NM). Upéicharõ jepe, Jesús pyʼaguapýpe ombohovái koʼã mbaʼe vai ojejapóva hese. Ajépa peteĩ ehémplo neporãva ñandéve g̃uarã!

14, 15. Mbaʼéichapa oñekumpli pe profesía heʼíva ojesorteataha ijao ha ojeʼukasetaha chupe vinágre?

¹⁴ Osorteáta hikuái ijaokue. David heʼi: “Oñombojaʼopa hikuái che aokuérare, ha che ao [joʼa] rehe oity hikuái poʼa oiporavo hag̃ua ijararãme” (Sal. 22:18, ÑÑB). Mbaʼéichapa oñekumpli koʼã mbaʼe Cristo rehe? ‘Oñemosaingo rire chupe yvyráre umi soldádo oñombojaʼo ijao joʼaha rehe, ha upearã osortea mávapepa opytáta.’ (Mat. 27:35, NM; elee Juan 19:23, 24.)

¹⁵ Ojeʼukaséta chupe vinágre ha iél. Cristo rehe oñekumpli ko Salmo: ‘Ha omeʼẽ hikuái chéve iél che rembiʼúramo, ha cheʼuhéivo hoʼukase chéve hikuái vinágre’ (Sal. 69:21, S). Mateo kuatiañeʼẽ omombeʼu mbaʼépa oiko: ‘Umi soldádo omeʼẽ Jesúspe víno oñembojeheʼáva mbaʼe ro rehe, péro haʼe otantea rire ndoʼuséi. [...] Upévo peteĩva odipara ogueru peteĩ espónha ha omyakỹ rire víno háipe omoĩ peteĩ takuárare hoʼuka hag̃ua chupe’ (Mat. 27:34, 48, NM).

16. Mbaʼéichapa oñekumpli Salmo 22:1?

¹⁶ Haʼetéta Ñandejára oheja reíva chupe (elee  Salmo 22:1). Marcos ohechauka mbaʼéichapa oñekumpli ko profesía oĩva Sálmope: ‘Lás 3 rupi Jesús heʼi hatã: “Éli, Éli, láma sabajtháni?”, heʼiséva: “Ñandejára, Ñandejára, mbaʼére piko chereja rei?”’ (Mar. 15:34, NM). Ndahaʼéi ningo Jesús ndojeroviavéiva Itúvare. Mbaʼére piko upéicharõ heʼi Jehová oheja reiha chupe iñenemigokuéra pópe? Jehová oheja oiko upéva Cristo ohechauka  hag̃ua iñeʼẽrenduha ipahaite peve. Añetehápe umi mbaʼe heʼíva Jesús ohechauka oñekumpliha Salmo 22:1.

17. Mbaʼéichapa oñekumpli Zacarías 12:10 ha Salmo 34:20?

¹⁷ Ojekutúta lánsape ha noñemopẽmoʼãi ni peteĩ ikangue. Zacarías omomarandu: ‘Jerusalengua omaʼẽta upe oikutuvaʼekuére’ (Zac. 12:10). Salmo 34:20-pe jatopa David ohaivaʼekue: “[Jehová] oñangareko opa ikanguekuéra rehe, ani hag̃ua peteĩnte jepe opẽ” (ÑÑB). Juan ohechavaʼekue Jesús ojejukárõ guare ha omombeʼu oiko hague pe profesía heʼihaichaite: ‘Peteĩ soldádo katu oikutu chupe ijyképe lánsape, ha upégui osẽ tuguy ha y. Upe omombeʼúva koʼã mbaʼe ningo haʼe voi ohechavaʼekue ha añetegua heʼi. Koʼã mbaʼe ojehuvaʼekue oiko hag̃ua Ñandejára Kuatiañeʼẽme heʼíva: “Peteĩnte jepe ikangue noñemopẽi chugui”. Ha Ñandejára Kuatiañeʼẽ heʼi avei ambue hendápe: “Omañavaʼerã hikuái upe ojekutuvaʼekuére”’ (Juan 19: 33-37).

18. Mbaʼéicha rupípa Jesús oñeñoty umi iplátava apytépe?

¹⁸ Oñeñotỹta umi iplátava apytépe (elee  Isaías 53:5, 8, 9). Mateo kuatiañeʼẽ heʼi upe 14 de nisán ‘kaʼaruetépe ou hague peteĩ kuimbaʼe Arimateaygua, ipláta hetáva hérava José. [...] Haʼe oho ojerure Pilátope Jesús retekue. [...] Upémarõ haʼe ojagarra Jesús retekue, olia peteĩ savana de líno ipotĩ ha iporãvape, ha omoĩ peteĩ panteón pyahúpe, ojapoukavaʼekue itakuápe. Upéi omoĩka peteĩ ita guasu omboty hag̃ua pe sepultúra juru ha oho’ (Mat. 27:57-60, NM).

Ñamombaʼékena pe Mesías!

19. Mbaʼéichapa oñekumpli Salmo 16:10?

¹⁹ Oñemoingove jeýta. Pe Mesías ikatu heʼi David heʼi haguéicha Jehovápe: ‘Nderehejamoʼãi che ánga umi omanóva oĩháme’ (Sal. 16:10, ÑÑB). Umi kuña ohovaʼekue oñemoĩ haguépe Jesús retekue tuicha oñemondýi! Peteĩ ánhel heʼi chupekuéra: ‘Ani pekyhyje, peẽ ningo peheka Jesús Nazaretguápe, pe oñemosaingovaʼekue yvyráre. Péro haʼe ndaiporivéima koʼápe, chupe oñemopuʼã jeýma kuri. Pemañami pe lugár oñemoĩ hague’ (Mar. 16:6, NM). Upe rire, Pentecostés áño 33-pe heta hénte oñembyaty Jerusalénpe, upépe Pedro ojapo peteĩ diskúrso ha heʼi: ‘David [..] oikuaamavaʼekue voi Cristo oikove jeytaha, ndojehejamoʼãiha chupe isepultúrape ha hete noñembyaimoʼãiha’ (Hech. 2:29-31, NM). Ko profesía heʼiháicha, Jehová ndohejái Jesús rete oñembyai jepe. Upéva rangue ojapo peteĩ milágro, omoingove jey Itaʼýra ohayhuetévape peteĩ espírituicha (1 Ped. 3:18).

20. Mbaʼépa heʼi pe profesía Mesías goviérno rehe?

²⁰ Ñandejára heʼíta hese haʼeha Itaʼýra (elee  Salmo 2:7 ha Mateo 3:17). Avei hetaiterei tapicha oguerohory Jesúspe oikérõ guare Jerusalénpe. Ha ñande avei ñambotuichavaʼerã Cristo ha igoviérno ijojahaʼỹva (Mar. 11:7-10). Pe Mesías ‘ojajaipa henda ári oñorairõvo añetegua, tekomirĩ ha tekojoja rehehápe’, ha koʼẽrõite ohundipáta umi ijaʼeʼỹvape hese (Sal. 2:8, 9; 45:1-6, NM). Igoviérno rupive ko yvy ape ári ojeiko porãta ha oĩta pyʼaguapy (Sal. 72:1, 3, 12, 16; Isa. 9:6, 7). Ñande testígo de Jehová ñamoherakuãvaʼerã opárupi Ñandejára Raʼy oisãmbyhymaha yvágape ha ojapotaha heta mbaʼe neporãmba jepéva. Ajépa tuichaite mbaʼe ko tembiapo Jehová omeʼẽva ñandéve!

Mbaʼépa rembohováita?

• Mbaʼe profesíapa heʼi oñetraisiona ha ojeheja reitaha Jesúspe, ha mbaʼéichapa oñekumpli?

• Mbaʼe mbaʼépa heʼi umi profesía ojejapotaha Jesús rehe ojejuka mboyve?

• Mbaʼérepa nde reguerovia Jesús haʼeha pe Mesías oñeprometevaʼekue?

[Porandu ñahesaʼỹijóva]

[Nóta oĩva taʼanga ndive páhina 13]

Mbaʼe profesíapa oñekumpli Jesús oikérõ guare Jerusalénpe?

[Nóta oĩva taʼanga ndive páhina 15]

Pe Mesías omano ñanderehehápe, péro koʼág̃a oisãmbyhýma yvágape