‘Ñañani kaneʼõʼỹre pe karréra’

‘Ñañani kaneʼõʼỹre pe karréra oñemoĩva ñane renonderãme.’ (HEB. 12:1, ÑÑB)

1, 2. Mbaʼe rehépa Pablo ombojoja kristianokuéra rekove?

KÁDA áño, heta tetãme ojejapo jepi umi karréra ipuku pukúva. Umi iñakuãvéva oñani ogana hag̃uáicha, ambuekuéra katu oikuaa voi noganamoʼãiha. Péro koʼãichagua tapicha ohaʼã omombeʼu hag̃ua omohuʼã hague pe karréra.

² La Bíbliape oñembojoja jepi kristianokuéra rekove koʼãichagua karrérare. Pór ehémplo, Pablo ohai ypýrõ guare ikuatiañeʼẽ umi Corintoyguápe heʼi: “Peikuaa niko peẽ pe karréra oñaníva, opavave oñaníramo jepe, peteĩnte ohupytyha pe prémio. Peñaníkena pehupyty hag̃uáicha pe prémio” (1 Cor. 9:24, BNP).

3. Mbaʼérepa Pablo heʼivaʼekue peteĩnte ohupytytaha pe prémio?

³ Apóstol Pablo ndeʼiséikuri umi kristiáno apytégui peteĩnte ohupytytaha jeikove opaʼỹva. Upéicharire umi ótro ermáno reiete oñehaʼãvaʼerãmoʼã. Mbaʼépa heʼiséraʼe upéicharõ? Tekotevẽha enterovéva oñehaʼã umi oñanívaicha. Koʼã tapicha heta ojeprepara ha oñani ogana hag̃uáicha. Pablo oipotavaʼekue umi ermáno peichaite avei oñehaʼã ohupyty hag̃ua pe jeikove opaʼỹva. Péro ko karrérape oganahína opavave og̃uahẽva huʼãme.

4. Mbaʼeichagua karrérapa ñañani?

⁴ Ñande ñañanivañaína jahupyty hag̃ua pe jeikove opaʼỹva, ñanekyreʼỹve jaikuaávo mbaʼépa Pablo heʼisevaʼekue ha avei ñanepytyvõ jajepyʼamongeta hag̃ua. Ko prémio ikatúva jahupyty ndaijojahái, tahaʼe jaikótaramo yvágape térã ko yvy ape ári, ha nahiʼãiete jaheja rei. Jaikuaa ningo ko karréra ipuku ha ijetuʼuha, ha oĩ heta mbaʼe ikatúva ñandejoko, ñanderesarea ha ipeligrósova (Mat. 7:13, 14). Ñambyasýramo jepe, heta oĩ opytáva tape kuʼáre, ỹrõ ikangy térã oheja voi pe karréra. Mbaʼe mbaʼépa ikatu ñandereity térã ñandejoko? Mbaʼépa jajapovaʼerã ani hag̃ua umi mbaʼe ñaneguenohẽ tapégui? Ha mbaʼépa tekotevẽ jajapo ñamohuʼã hag̃ua ha jahupyty pe prémio?

Tekotevẽ ñaaguanta ñagana hag̃ua

5. Mbaʼe rehépa Pablo oñeʼẽ jey Hebreos 12:1-pe?

⁵ Pablo ohaírõ guare kristianokuéra oikóvape Jerusalén ha Judea tuichakuére, oiporu jey ehémploramo umi kompeténsia (elee Hebreos 12:1). Ohechauka chupekuéra mbaʼérepa ndohejaivaʼerã ko karréra ha avei mbaʼépa ojapovaʼerã ogana hag̃ua. Péro ñahesaʼỹijo mboyve umi konsého Pablo omeʼẽvaʼekue ha avei mbaʼéichapa ikatu ñanepytyvõ, jahecháta mbaʼérepa omondo pe kuatiañeʼẽ ha mbaʼépa omokyreʼỹ chupekuéra ojapo hag̃ua.

6. Mbaʼéichapa otrata kristianokuérape umi omoakãva rrelihión?

⁶ Ermanokuéra síglo primérope guare heta ohasa asy, ha koʼýte umi oikóva Jerusalén ha Judea tuichakuére. Umi omoakãva hudiokuéra rrelihión oreko ipoguýpe heta héntepe, ha pyʼỹinte omboliga chupekuéra otrata vai hag̃ua umi kristiánope. Pór ehémplo, haʼekuéra ombojavaʼekue Jesús rehe opuʼã hague goviérnore ha ojukauka chupe haʼeramoguáicha peteĩ hembiapo vaietereíva. Ha upeichaite jey otrata Jesús remimboʼekuérape. Héchospe oñemombeʼu ojejapo hague hetaiterei mbaʼe vai ermanokuérare oiko rire pe milágro Pentecostés áño 33-pe. Upe tiémpope ijetuʼueterei chupekuéra! (Hech. 4:1-3; 5:17, 18; 6:8-12; 7:59; 8:1, 3.)

7. Mbaʼe tiémpopepa oikovaʼekue umi kristiáno?

 ⁷ Upe tiémpope hiʼag̃uimbaitéma pe ára oñehunditaha umi hudío naiñeʼẽrendúiva. Jesús heʼivaʼekue hemimboʼekuérape mbaʼépa oikóta oñehundi mboyve Jerusalén ha mbaʼépa ojapovaʼerã hikuái ojesalva hag̃ua (elee Lucas 21:20-22). Upévare ohenduvaʼerã hikuái Jesús heʼivaʼekue: ‘Peñatendékena pendejehe ani hag̃ua pendepyʼahatã ha peiko pekaru rasa, térã pemokõ rasa. Ha ani avei peiko pejepyʼapyeterei pene remikotevẽre. Cháke peimoʼãʼỹve jave oúne pende ári upe ára’ (Luc. 21:34, NM).

8. Mbaʼérepa oiméne heta kristiáno ikangy ha ikaneʼõ omohuʼã mboyve pe karréra?

⁸ Pablo ohaírõ guare umi kristiáno evréope, ojapómakuri 30 áño Jesús heʼi hague oñehunditaha Judea. Mbaʼépa ojapo hikuái upe tiémpo peve? Oĩ ojepyʼapýva iprovléma ha hemikotevẽrente, upéicha rupi oñemomombyry Jehovágui ha ndojeroviavéi hese (Heb. 5:11-14). Ambue katu opensa enterove hudío ndohejaiteiha Jehovápe ha okumpli mimiha pe Léi, upévare oimoʼã ndaivairiha oikóramo haʼekuéra oikoháicha. Oĩ avei kristiáno heʼíva oñekumplivaʼerãha gueteri léi mosáika ha umi mbaʼe ojejapovaʼekue yma, ha heta ermáno oguerovia koʼãvape. Mbaʼéichapa Pablo oipytyvõta chupekuéra ojesareko porã jey hag̃ua Jehová rembipotáre ha oaguanta hag̃ua ohupyty peve jeikove opaʼỹva?

9, 10. a) Mbaʼéichapa Pablo oporomokyreʼỹ omohuʼãvo Hebreos kapítulo 10? b) Maʼerãpa Pablo imanduʼa umi ‘tapicha ojeroviaitevaʼekuére’?

⁹ Jahechamína mbaʼépa Pablo ohai espíritu sánto rupive, omombarete hag̃ua umi kristiáno evréope. Hebreos kapítulo 10 ohechauka pe Léi haʼe hague “umi mbaʼe porã ouvaʼerã joguahánte”. Avei omombeʼu Cristo sakrifísio tuichaiterei mbaʼeha. Ha omohuʼãnguévo ko kapítulo heʼi: ‘Peẽ peikotevẽ penembarete jehasa asýpe pejapo hag̃ua Ñandejára rembipota, ha upéi oñemeʼẽta peẽme pe haʼe heʼivaʼekue omeʼẽtaha. Ñandejára Ñeʼẽ niko heʼi: “Pyaʼe oúta pe ouvaʼerã, ndahiʼaremoʼãvéima”’ (Heb. 10:1, 36, 37).

¹⁰ Hebreos kapítulo 11-pe Pablo omyesakã porãiterei mbaʼépa heʼise jajerovia añete Ñandejárare, ha omoĩ ehémploramo umi kuimbaʼe ha kuña yma guare ijerovia mbaretévape. Péro mbaʼérepa haʼe osẽ oñeʼẽ jeroviáre? Omomanduʼa hag̃ua iñermanokuérape tekotevẽha ipyʼaguasu ha oaguantakuaa ohechauka hag̃ua ojeroviaha. Pablo oikuaa porã mbaʼeichaitépa koʼã ehémplo ikatu omokyreʼỹ ha omombarete chupekuéra ombohovái hag̃ua umi mbaʼe ipohýiva. Omombeʼu rire mbaʼéichapa Ñandejára siervokuéra yma guare ohechauka ojeroviaha, heʼi jey umi kristiánope oaguantakuaavaʼerãha: ‘Jaguereko ñande jerére ku araícha heta tapicha ojeroviaitevaʼekue, upévare jaipeʼa ñandejehegui opa mbaʼe ipohýiva, ha avei pe pekádo ñanemoñuhãséva, ha ñañani kaneʼõʼỹre pe karréra oñemoĩva ñane renonderãme’ (Heb. 12:1, ÑÑB).

‘Heta tapicha ojeroviavaʼekue’

11. Mbaʼéichapa ñanepytyvõta jajepyʼamongetáramo umi ‘tapicha ojeroviaitéva’ rembiasakuére?

¹¹ Pablo heʼi ‘jarekoha ñande jerére umi tapicha ojeroviaitevaʼekue’. Koʼãva hína Ñandejára rembiguái oikovaʼekue Jesús ou mboyve. Haʼekuéra iñeʼẽrendu Jehovápe omano meve, upéva ohechauka umi kristiánope ikatuha avei oservi porã Jehovápe, ohasa asýramo jepe. Umi ‘tapicha ojeroviaitevaʼekuére’ ikatu jaʼe omohuʼãma hague pe karréra, ha upéva omokyreʼỹ enterovévape oaguanta hag̃ua. Ñande mbaʼe ñaiméramo peteĩ karréra teépe ha jaikuaárõ heta tapicha oñanikuaáva ñanemokyreʼỹha, koʼýte ñañehaʼãmbaitéta ñamohuʼã hag̃ua. Upéicha avei umi kristiáno evréo síglo primérope guare tekotevẽ vaʼekue ojepyʼamongeta Ñandejára rembiguaikuéra rembiasakuére ikatu  hag̃uáicha ‘oñani kaneʼõʼỹre pe karréra’. Péicha avei ñandéve katuete ñanepytyvõta koʼã ehémplo.

12. Mbaʼérepa iporã ñahesaʼỹijo umi ehémplo omoĩvaʼekue Pablo?

¹² Ñande ikatu ñaaprende heta mbaʼe Ñandejára rembiguaikuéra yma guarégui. Umi mbaʼe jahasáva koʼág̃a rupi ojoguaiterei avei heta mbaʼe haʼekuéra ohasavaʼekuépe. Pór ehémplo Noé; haʼe oikovaʼekue pe tiémpo Jehová ohundítarõ guare umi iñañávape peteĩ ama guasu rupive. Ñande avei jaiko peteĩ tiémpo oñehundi potaitemahápe ko múndo aña. Abrahán ha Sárape katu Ñandejára omanda oheja hag̃ua hetã. Haʼekuéra oho omombaʼeguasu chupe ambue hendápe ohaʼarõ aja oñekumpli umi mbaʼe haʼe oprometevaʼekue chupekuéra. Ñandéve avei ojejerure ñamboyke hag̃ua umi mbaʼe ñandegustáva ha ñañehaʼãmbaite jajapo Ñandejára rembipota, ñahaʼarõ aja heta mbaʼe porã oguerútava Irréino. Avei Moisés heta tiémpore oiko pe desiérto ipeligrosoitévare ohecha mboyve pe Yvy Oñeprometevaʼekue. Koʼág̃a rupi avei ñambohovaivaʼerã opa mbaʼe ijetuʼúva ko múndo vaietépe jaike mboyve pe múndo pyahúpe. Iporãiterei ningo ñahesaʼỹijo umi kuimbaʼe ha kuña iñeʼẽrenduetéva rembiasakue. Koʼã ehémplogui ñaaprendéta mbaʼérepa ohupyty hikuái heta mbaʼe porã, avei mbaʼépepa ikangy ha osẽ vai (Rom. 15:4; 1 Cor. 10:11).

Mbaʼépa oipytyvõ chupekuéra ogana hag̃ua

13. Mbaʼépa ombohovaivaʼekue Noé, ha mbaʼépa oipytyvõ chupe iñeʼẽrendu hag̃ua?

¹³ Mbaʼépa oipytyvõ Jehová rembiguaikuéra yma guarépe oaguanta ha omohuʼã hag̃ua pe karréra? Jahechamína mbaʼépa ojapovaʼekue Noé (elee Hebreos 11:7). Jehová heʼi chupe: “Ajahoʼipáta ýpe yvy ape, ahundi hag̃ua opa tekove” (Gén. 6:17). Imanduʼávo upe tiémpore, mbaʼérepa Pablo heʼi “oikovaʼerãha gueteri heta mbaʼe ojehechaʼỹva”? Noé tiémpope neʼĩrava gueteri oky, upéicharõ jepe, haʼe nopensái ndoikeichéne hag̃ua Jehová heʼivaʼekue, síno ojeroviaiterei hese ha ndeʼíri hasyetereiha oñemandáva chupe. Upévare Noé ojapo opa mbaʼe Ñandejára “heʼi hagueichaite chupe” (Gén. 6:22, ÑÑB). Hiʼarive ndahaʼéi vyrorei upe tembiapo. Ojapovaʼerã pe árka, okarga pype hiʼupy ha forráhe, ombyaty mymbakuéra, omomarandu umi héntepe outaha pe ama guasu ha avei oipytyvõvaʼerã hogayguakuérape akóinte ojerovia hag̃ua Jehováre. Noé ojerovia mbarete ha oaguanta rupi, ojesalva haʼe ha ifamiliakuéra, avei ohupyty hikuái heta mbaʼe porã Ñandejáragui.

14. Mbaʼépa ohasavaʼekue Abrahán ha Sara, ha mbaʼépa ñaaprende chuguikuéra?

¹⁴ Abrahán ha Sara oĩ avei ‘umi tapicha ojeroviaitéva’ apytépe. Haʼekuéra oiko porã vaʼekue táva Úrpe, upéi Jehová ojerure chupekuéra ova hag̃ua ambue hendápe. Abrahán ha Sara ni ndoikuaái oho porãtapa chupekuéra upépe, péro omoĩ ehémplo porã ojerovia ha iñeʼẽrendúvo Jehovápe ijetuʼúramo jepe. Ñapensáramo opa mbaʼe Abrahán ohasavaʼekuére ojapo hag̃ua Ñandejára rembipota, jahechakuaa ndareíri oñehenói hague chupe “umi ojeroviáva ru” (Rom. 4:11, BNP). Umi kristiáno evréo oikuaa porã Abrahán ha Sara rembiasakue. Upévare Pablo mbykymínte oñeʼẽ hesekuéra, péro oiporu iñehémplo omboʼe hag̃ua peteĩ mbaʼe iñimportantetereíva: “Koʼãva omanomba ohupytyʼỹre opaite mbaʼe [Ñandejára] oprometevaʼekue, opáichavo ijerovia rupi ohechavaʼekue mombyry guive umi mbaʼe, ha jeroviapópe oñemomirĩ ha oiko mbohupa ha tetã ambueguáramo ko yvy apére” (Heb. 11:13, ÑÑB). Jahechakuaa upéicharõ haʼekuéra ojerovia mbarete ha oñemoag̃ui rupi Jehováre oñani hague kaneʼõʼỹre pe karréra.

15. Mbaʼérepa Moisés oiporavo ohasa asy Ñandejára retãyguakuéra ndive?

 ¹⁵ Moisés avei ehémplo porã ‘umi ojeroviaitevaʼekue’ apytépe. Haʼe oiko porã ha orekókuri heta mbaʼerepy, péro ‘oiporavo ohasa asy Ñandejára retãyguakuéra ndive’. Mbaʼérepa ojapo upéva? Apóstol Pablo omombeʼu Moisés ‘oikuaa porã hague Ñandejára omyengoviapataha chupe’ opa mbaʼe porã ojapóva ha oiko ‘ohecharamoguáicha Ñandejára ojehechaʼỹvape’ (elee Hebreos 11:24-27). Haʼe ojesareko meme Jehová rembipotáre ‘oiko rangue sapyʼami vyʼapópe pekádo poguýpe’. Chupe g̃uarã tuichaiterei mbaʼe Ñandejára ha ipromesakuéra. Upéicha rupi ipyʼaguasu ha oaguantakuaa opa mbaʼe. Heta ombaʼapo oguenohẽ hag̃ua umi isrraelítape Egipto poguýgui ha ogueraha hag̃ua chupekuéra pe Yvy Oñeprometevaʼekuépe.

16. Mbaʼérepa Moisés noñembyasýi Jehová ndohejái haguére chupe oike pe Yvy Oñeprometevaʼekuépe?

¹⁶ Abrahán rehe oiko haguéicha, Moisés ndohechajepéi mbaʼéichapa Jehová okumpli ipromésa. Umi isrraelíta oike potaitérõ guare pe Yvy Oñeprometevaʼekuépe, Jehová heʼi chupe: “Mombyrýguinte rehecháta ha ndereikemoʼãi pe yvýpe ameʼẽtava Israelguápe”. Mbaʼére piko okastiga peichaite Moisés ha Aarónpe? Peteĩ jey umi isrraelíta ojeplagea jeýma chupekuéra, ha pochy reheve haʼekuéra ojapo peteĩ mbaʼe ohechaukáva ndorrespetaiha Jehovápe. Upévare haʼe heʼi chupekuéra: ‘Meribápe [...] peẽ ndapehechaukái che rekomarangatu Israelguápe’ (Deu. 32:51, 52). Oúpa ikangy ha oñeamarga Moisés upe haguére? Nahániri. Oguerohory katu umi isrraelítape ha ovendesívo chupekuéra heʼi: “Evyʼa nde Israel,  mávapa ndeichagua, nde ningo peteĩ tetã [Ñandejára] osalvavaʼekue, haʼe nemoʼãha, haʼe nde kyse puku ombopuʼakapáva” (Deu. 33:29, ÑÑB).

Mbaʼépa ñanemboʼe koʼã ehémplo

17, 18. a) Mbaʼépa ñaaprende ‘umi tapicha ojeroviaitéva’ rembiasakuégui? b) Mbaʼépa jahecháta pe artíkulo oúvape?

¹⁷ Ñahesaʼỹijo rire ‘umi tapicha ojeroviaitéva’ rembiasakue ñaaprende peteĩ mbaʼe iñimportantetereíva: ñamohuʼã hag̃ua pe karréra tekotevẽ jajerovia ñande pyʼaite guive Ñandejára ha ipromesakuérare (Heb. 11:6). Opa mbaʼe ári, ñamotenondevaʼerã ñande jerovia. Umi hénte oikóva ko múndope ojesareko umi mbaʼerepy ijerére oĩvarente, ñande katu jahecha mombyryetereive chuguikuéra. Jaiko ‘jahecharamoguáicha Ñandejára ojehechaʼỹvape’ ha upéva ñanemokyreʼỹ ñañani hag̃ua kaneʼõʼỹre (2 Cor. 5:7).

¹⁸ Jahecha haguéicha ñande ñaime peteĩ karréra ijetuʼuetereívape. Upéicharamo jepe, enterove ikatu ñagana. Pe artíkulo oúvape jahechamievéta mbaʼépa ñanepytyvõta jahupyty hag̃ua pe prémio.

Ikatúpa remyesakã?

• Mbaʼérepa Pablo oñeʼẽte ‘umi tapicha ojeroviaitévare’?

• Mbaʼéichapa ñanepytyvõta jajepyʼamongetáramo ‘umi tapicha ojeroviaitévare’?

• Mbaʼépa ñanemboʼe Noé, Abrahán, Sara ha Moisés rembiasakue?

[Porandu ñahesaʼỹijóva]

[Nóta oĩva taʼanga ndive páhina 19]

Abrahán ha Sara oheja heta mbaʼe táva Úrpe