Alee rupi la Biblia agueropuʼaka opa mbaʼe

Omombeʼu Marceau Leroy

CHE kotýpe, ñemihapemi, añepyrũvaʼekue alee la Biblia: ‘Iñepyrũmbýpe, Ñandejára ojapo yvága ha yvy’. Mbaʼérepa alee ñemihápe? Che túva ningo ndogueroviaivaʼekue Ñandejára oĩha, upévare aikuaa porã mbaʼépa heʼíta chéve ohecháramo arekoha peteĩ Biblia.

Upérõ ningo primera vés alee la Biblia, ha aleévo Génesis 1:1 hesakã chéve heta mbaʼe. Chemanduʼa apensa hague: “Koʼág̃a antendéma mbaʼérepa ombaʼapo hendaitépe opa mbaʼe ko univérsope!”. Igustoiterei chéve upe aleéva, ha aharei hese pyhare las ocho guive koʼẽmbota las cuatro peve. Upe guive koʼag̃aite peve alee Ñandejára Ñeʼẽ, ha upéicha rupi agueropuʼaka opa mbaʼe. Tamombeʼumína peẽme mbaʼérepa haʼe upéva.

“Ára ha árama releevaʼerã”

Anasevaʼekue áño 1926-pe, peteĩ táva héravape Vermelles, oĩva Francia nórte gotyo. Upépe ningo oñembaʼapo mínape, ha pe karvón iñimportanteterei vaʼekue upe tetãme g̃uarã segunda gérra mundiál aja. Upévare, ore rombaʼapóva mínape natekotevẽivaʼekue roho gerrahápe. Ha aiko porãsevégui, añepyrũ astudia elektrisida ha amyatyrõkuaa hag̃ua rrádio. Upéva chepytyvõ ahechakuaa hag̃ua mbaʼéichapa ombaʼapo hendapete opa mbaʼe oĩva ko univérsope. Arekórõ guare 21 áño, peteĩ che kompañéro omeʼẽ chéve che Bibliarã ha heʼi: “Kóina, kóva ou porãta ndéve”. Aleepávo, ahechakuaa añetehápe ko lívro orekoha Ñandejára marandu yvyporakuérape g̃uarã.

Apensa che vesinokuérape ogustaitereitaha avei, upévare akonsegive ocho Biblia. Péro ni naimoʼãi oñembohory ha oñeʼẽ vaitaha cherehe hikuái aguerahárõ guare chupekuéra. Avei umi che hénte ogueroviáva aguería heʼi chéve: “Péva reñepyrũramo relee, ára ha árama releevaʼerã”. Ha upeichaite ningo añete ajapo! Koʼag̃aite peve alee káda día ha nambyasýi ojapo haguére upéicha.

Che vesinokuéra ohechakuaa cherehe amombaʼetereiha Ñandejára Ñeʼẽ, upévare omeʼẽ chéve hikuái umi puvlikasión ohejáva chupekuéra testigos de Jehová. Umíva apytépe pe folléto Un solo mundo, un solo gobierno (francéspe), * omyesakãva Ñandejára Rréino añoite osolusionataha yvyporakuéra provléma (Mat. 6:10). Upéva chemokyreʼỹeterei amombeʼu hag̃ua che rapichakuérape umi mbaʼe aikuaavéva ahávo.

Noël raẽvete ojagarravaʼekue chehegui peteĩ  Biblia, ore ningo oñoamígo oremitã guive. Haʼe ikatolikoiterei, ha peteĩ jey heʼi chéve roho hag̃ua roñemongeta peteĩ karai ostudiávandi paʼirã. Ñepyrũrã akyhyjékuri aha hag̃ua, péro chepyʼaguasu aleévo Salmo 115:4-8 ha Mateo 23:9,10, omombeʼúva Ñandejárape ndogustaiha ojeporu taʼanga ni umi título oñemoĩva rrelihionkuéra omoakãvape. Upéva chemombarete adefende hag̃ua umi mbaʼe agueroviáva. Ajapo rupi upéicha, Noël oñepyrũ ojerovia Jehováre ha koʼag̃aite peve oservi chupe.

Peteĩ jey aha avisita che ermánape, ha aikuaa iména orekoha heta lívro espiritísta, upévare umi demónio omboapura chupe. Ñepyrũrã apensa ndaikatumoʼãiha aipytyvõ che rovajápe, péro aleévo Hebreos 1:14 ahechakuaa Jehová anhelkuéra oĩha che ykére. Upémarõ ahechauka chupe la Biblia heʼíva, ha haʼe ojapo upépe heʼiháicha. Ohundi opa mbaʼe oiporúva espiritísmope ha umi demónio oheja chupe. Ha iporãveha katu, che ermána ha che rovaja upe guive oservi Jehovápe ipyʼaite guive.

Áño 1947-pe ou cherendápe peteĩ testígo norteamericano hérava Arthur Emiot. Avyʼaiterei ningo! Aporandu chupe moõpa oñembyaty testigokuéra, ha heʼi chéve oĩha peteĩ grúpo Liévinpe, opytáva 10 kilometrohápe. Upe tiémpope ijetuʼu ñakonsegi hag̃ua peteĩ visikléta jepe, upéicha rupi are ahavaʼekue yvýrupi rreunionhápe. Upérõ ojapóma ocho áño ojeproivi hague predikasión Fránciape ha oĩ 2.380 testígonte, umíva apytépe heta oĩ ouvaʼekue Polóniagui. Péro, 1 de septiembre de 1947-pe oñepermiti jey oréve ropredika upe tetãme ha ojeavri peteĩ sukursál pyahu Villa Guibert Paríspe. Ha ndaipóri rupi ni peteĩ prekursór upe tetãme, diciembre de 1947-pe oñeinvita opavave ermánope Informador rupive (koʼág̃a Ñane Marandu Porã) ojapo hag̃ua iprekursorádo. Upe tiémpope peteĩ prekursór ojapovaʼerã ciento cincuenta óra káda més, péro 1949-pe oñemboguejýma ciénpe. Che ningo ajevautisa 1948-pe ahechakuaa rupi siertoha heʼíva Juan 17:17-pe, Jesús heʼírõ guare Jehovápe: ‘Ne ñeʼẽ ningo pe añetegua’. Ha diciembre 1949-pe amoñepyrũ che prekursorádo.

Asẽ kárselgui ha aha Dunkérquepe

Ñepyrũrã añemondo Agénpe, Francia súr gotyo, péro ndapytaʼaréi upépe. Nambaʼapovéi rupi mínape añehenói aha hag̃ua gerrahápe, ha ndahaséigui chemoinge hikuái kárselpe. Ojeproivíramo jepe ojeguereko upépe la Biblia, akonsegi mbovymi Salmo. Alee rupi umíva chembarete ha chepyʼaguasuve. Opoírõ guare chehegui hikuái ndaikuaaporãi mbaʼépa ajapóta: asegítapa che prekursorádo térãpa “cheakãguapýtama”. Ha jepiveguáicha, la Biblia chepytyvõ aikuaa hag̃ua mbaʼépa adesidíta. Chemopensa Pablo heʼivaʼekue Filipenses 4:11-13-pe: ‘Ndaipóri chéve g̃uarã ikatuʼỹva ajapo, Ñandejára chemombarete rupi’. Ipahápe adesidi asegitaha ajapo che prekursorádo. Ha áño 1950-pe ojeʼe chéve aha hag̃ua Dunkérquepe, peteĩ táva apredikáma haguépe voi.

Ag̃uahẽ ningo upépe chepo cheakã ári ha chepiru séko asẽ ramo rupi kárselgui. Ha pe segunda gérra mundiál ojapógui sarambi upe távape, ijetuʼu chéve atopa hag̃ua peteĩ lugár apyta hag̃ua. Upéi chemanduʼa sapyʼa avisitámi hague peteĩ família oikóvape upépe, ha aha hendapekuéra. Pe kuñakarai cherechávo ovyʼaiterei voi, ha heʼi: “Karai Leroy, resẽma piko raʼe la kárselgui! Che ména ningo heʼi voi ko múndope oĩvérire heta kuimbaʼe ndeichagua, ndoikoivaʼerãmoʼã pe gérra”. Haʼekuéra ningo oguereko peteĩ óga mbohupápe g̃uarã, ha heʼi chéve ikatuha apyta upépe ou peve umi turísta. Avei upe díape Arthur ermáno, hérava Evans Emiot ha ombaʼapóva puértope, oporandu chéve nambaʼaposéipa de seréno peteĩ várkope. * Upéi chegueraha peteĩ ofisiál varkopegua rendápe roñeʼẽ hag̃ua hendive ha omombeʼu chupe mbaʼérepa chepiruete. Ha upe ofisiál heʼíma chéve ikatuha aha haʼuséva pe  eladéragui. Péicha, un díapente atopáma che rogarã, che traváho ha che rembiʼurãmi! Koʼã mbaʼe ahasa rire, ajeroviavéntema Jesús heʼivaʼekuére Mateo 6:25-33-pe.

Oñepyrũrõ guare ou umi turísta, che kompañéro Simon Apolinarski ha che rohekámante ótro lugár ropyta hag̃ua. Péro ni mbaʼevéicharõ ndorohejaséi ore asignasión. Upe riremínte ojeʼe oréve ndoropytaséipa peteĩ galpónpe kavaju oke haguépe, ha rojapo umi kapiʼígui ore kochõrã. Upéi ropredika pe galpón járape ha oñepyrũ ostudia la Biblia, ojapo haguéicha avei heta hénte upe tavapegua. Hetaiterei óra ningo ropredikámi káda día, upévare peteĩ diário upepegua oporoavisa: “Umi testígo de Jehová ojagarrapáma ohóvo ñande táva”. Péro Simon, che ha mbovymi maranduhárante ningo la ropredikáva upépe! Rogueropuʼakapa opa mbaʼe, rojepyʼamongeta rupi umi mbaʼe porã rohupytýtavare amo gotyove ha ropensa mbaʼeichaitépa Jehová oñangareko orerehe. Áño 1952-pe, añemondórõ guare ambue hendápe apredika hag̃ua, Dunkérquepe oĩma treinta maranduhára rupi.

Añembosakoʼi ambaʼapove hag̃ua Jehová servísiope

Apytaʼimi rire Amiénspe, aha aservi hag̃uáicha prekursór espesiálramo peteĩ táva héravape Boulogne-Billancourt, oĩva París ypýpe. Upépe arekovaʼekue heta estudiánte, ha umíva apytégui heta oĩ oservíva upe rire prekursór térã misionéroramo. Ha peteĩ hérava Guy Mabilat oservi superintendénte de sirkuítoramo ha upéi de distrítoramo. Ha tiémpo rire oñemoĩ avei chupe omoakã hag̃ua pe tembiapo ojejapótarõ guare pe imprénta Betel de Louviérspe, opytáva París ypýpe. Che ningo avyʼaitereivaʼekue voi añeʼẽ jave umi héntendi la Biblia heʼívare. Ha ndahaʼéi chemoñeñandu porãguinte, síno chepytyvõ rupi chemanduʼave hag̃ua Ñandejára Ñeʼẽ heʼívare ha avei chembokatupyry aporomboʼe porãve hag̃ua.

Áño 1953-pe ahaʼarõʼỹve jave, añenombra superintendénte de sirkuíto Alsacia-Lorénape, peteĩ lugár Alemania ojagarravaʼekue dos vése áño 1871 ha 1945 rupi. Upépe avei oñeñeʼẽ alemánpe ha che añeʼẽʼimíramo jepe upe idióma, añensajamantevaʼerã chemanduʼa jey hag̃ua. Upérõ saʼi gueteri oĩ oguerekóva áuto, téle, mákina de eskrivír térã rrádio. Ha komputadóra katu ni ndajaʼeséi. Ha ndarekóiramo jepe umi mbaʼe, avyʼa ha ndahaʼéi ku aiko asýva, che tiempove katu aservi hag̃ua Jehovápe. Avei akóinte añehaʼãvaʼekue ‘ajesareko peteĩ mbaʼére añónte’ (Mat. 6:19-22, NM).

Áño 1955-pe aha peteĩ aty guasuhápe ojejapóva Paríspe, hérava “Reino Triunfante”. Upe aty guasu neporãvape ajuhuvaʼekue che rembirekorã, peteĩ prekursóra hérava Irène Kolanski. Haʼe ojapo ñepyrũ vaʼekue iprekursorádo áño 1948 guive, un áño che añepyrũ  mboyve. Ituvakuéra ningo polaco ha ymaiterei guivéma oservi Jehovápe. Oĩ riréma hikuái Fránciape oho ovisita chupekuéra Adolf Weber; haʼe ombaʼapovaʼekue ermáno Rússell hardinéroramo ha upéi ova Európape opredika hag̃ua. Áño 1956-pe Irène ha che romenda, ha upe guive haʼe chemoirũ rovisita hag̃ua kongregasionkuéra. Aagradesete ningo chupe kyreʼỹme chepytyvõ haguére hetaite áñorema!

Dos áño romenda haguépe, ahaʼarõʼỹve jave chenombra hikuái superintendénte de distríto. Péro ndaiporiguasúi rupi ermáno ikatupyrýva, asegi añatende avei sirkuítore un tiémpo. Avei káda més apredikavaʼerã cien óra, káda semána ajapovaʼerã heta diskúrso, avisitavaʼerã mbohapy estúdio de lívro, ahechavaʼerã umi archívo káda kongregasionpegua ha ajapovaʼerã che infórme sukursálpe g̃uarã. Upéicha rupi saʼi che tiémpo ha ndaikuaái mbaʼe órapa aleéta Ñandejára Ñeʼẽ. Upémarõ aipeʼa jepi peteĩ Biblia tujágui hiʼóha ha agueraha alee hag̃ua aporohaʼarõ aja. Ha péicha, alee mbykymíramo jepe, tuicha chemokyreʼỹ ha chemombarete ambaʼapo meme hag̃ua Jehová servísiope.

Áño 1967-pe roñeinvita rombaʼapo hag̃ua Betélpe, oĩva upérõ Boulogne-Billancóurtpe. Chéve chemondo hikuái ambaʼapo hag̃ua Departamento de Servíciope, ha 40 áño rasáma aime hague upépe. Avyʼaiterei ningo ambohovái jave umi ombaʼeporandúvape Ñandejára Ñeʼẽre. Ha astudiaseterei voi umi mbaʼe ipypukuvéva oĩva la Bíbliape ‘adefende hag̃ua pe marandu porã’ (Fili. 1:7). Avei igústo chéve amyesakã jave Ñandejára Ñeʼẽ amoakãvo Betélpe adorasión matutína. Ha ipahápe 1976 guive aime Comité de Sucursal Franciapeguápe.

Pe mbaʼe iporãvéva ikatúva jajapo

Heta mbaʼe ijetuʼúvama ningo rohasa, péro koʼág̃a rohechakuaa ndaikatuveimaha rojapo heta mbaʼe Jehová servísiope yma guaréicha, ha upéva ijetuʼuetereive oréve opa mbaʼégui. Upéicharamo jepe akóinte ore jerovia imbarete rolee ha rostudia rupi oñondive Ñandejára Ñeʼẽ. Avei roho jepi kolectívope rosẽ hag̃ua predikasiónpe ore territóriope, ha upe tembiapo orembovyʼaiterei. Oñondive ningo ojapóma ciento veinte áño rasa roiporupaite hague ore tiémpo Jehová servísiope, ha romokyreʼỹ opavavépe ojapo hag̃ua avei ko tembiapo porãite asy. Ha ikatu haʼe David heʼi haguéicha: “Chemitãvaʼekue, koʼág̃a katu chetujáma, ha ndahecháiva hekopotĩva oikotevẽramo” (Sal. 37:25).

Jehová Ñeʼẽ ningo akóinte chemombarete ha chepytyvõ agueropuʼaka hag̃ua opa mbaʼe. Ha ojapóma sesenta áño che hentekuéra heʼi hague: “Péva reñepyrũramo relee, ára ha árama releevaʼerã”, ha ndojavýi hikuái. Upe guive koʼag̃aite peve alee káda día la Biblia ha arakaʼeve nambyasyichéne ajapo haguére upéva.

[Nóta]

[Nóta oĩva taʼanga ndive páhina 5]

Simon ha che

[Nóta oĩva taʼanga ndive páhina 5]

Aservírõ guare superintendénte de distrítoramo

[Nóta oĩva taʼanga ndive páhina 5]

Pe Biblia alee ypy vaʼekue

[Nóta oĩva taʼanga ndive páhina 6]

Romendárõ guare

[Nóta oĩva taʼanga ndive páhina 6]

Irène ha che rolee ha rohesaʼỹijo oñondive Ñandejára Ñeʼẽ