Mbaʼéichapa Finehás ombohovái umi mbaʼe ijetuʼúva?

TUICHAITE mbaʼe ningo umi ansiáno ojapóva ñanderehehápe. La Biblia heʼi haʼekuéra ohasaha heta mbaʼe kongregasión rehehápe. Pór ehémplo, oĩ jave hembiapo vaíva oporohusgavaʼerã hikuái ‘Jehová rérape’ (2 Cró. 19:6). Oĩ ansiáno heta vése opensáva ndaikatupyryiha ojapo hag̃ua peteĩ mbaʼe oñehaʼarõva chugui. Péicha oñeñanduvaʼekue Moisés Ñandejára omandárõ guare chupe ojapo hag̃ua peteĩ tembiapo. Haʼe heʼi: “Máva piko che aha hag̃ua Faraón rendápe?” (Éxo. 3:11, ÑÑB).

La Biblia ojehaivaʼekue espíritu sánto rupive, avei upe espíritu rupive Jehová oiporavo umi omoakãtava kongregasión. Ñandejára Ñeʼẽme oñemombeʼu mbaʼéichapa heta ansiáno ombohovái porã umi mbaʼe ijetuʼúva. Pór ehémplo Finehás. Haʼe ningo Eleazar raʼy ha Aarón niéto, upéicha rupi oiko chugui upéi saserdóte guasu. Oikove aja ombohovái mbohapy mbaʼe ohechaukáva ipyʼaguasu, iñarandu ha ojeroviaha Jehováre. Iñehémplo tuicha oipytyvõ umi ansiáno koʼag̃aguápe.

‘Osẽ umi hénte atýgui’

Jahechamína mbaʼépa oikovaʼekue Finehás ipyahu tiémpope gueteri. Upérõ umi isrraelíta oĩkuri Moab ñúre. La Biblia omombeʼu: “Israel [...] oñepyrũ oiko Moab rajykuéra ndive” ha umi kuña ogueraha chupekuéra “omombaʼeguasu hag̃ua ijára Baal Peórpe ha hoʼu hag̃ua avei ikuaveʼẽmby roʼógui” (Núm. 25:1, 2, ÑÑB). Upe haguére Jehová oñepyrũ ojuka umi hembiapo vaívape. Oiméne Finehás oñeñandu vaiete pe oikóvare.

Ñandejára Ñeʼẽ heʼi: ‘Peteĩ kuimbaʼe Israelgua ogueru peteĩ kuña Madiangua iñermanokuéra apytépe, Moisés rovake ha mayma Israel ñemoñare rovake, haʼekuéra ojaheʼo jave pe lugár ijatyhápe hikuái Jehová renondépe’ (Núm. 25:6, ÑÑB). Mbaʼépa ojapo Finehás? Ijetuʼueterei chupe. Haʼe ipyahu gueteri, ha pe hembiapo vaíva katu omoakã jepi umi isrraelítape omombaʼeguasu hag̃ua Jehovápe (Núm. 25:14).

Péro Finehás ndokyhyjéi yvypóragui, haʼe okyhyje Jehovágui. Upévare ohechávo umi hekovaíva oikeha peteĩ kotýpe, oho oike hapykuerikuéra ha upépe oikutu mokõivévape lánsape. Mbaʼépa opensa Jehová upe ojapovaʼekuére? Ovendesi chupe ipyʼaguasu ha ndokyhyjéi haguére okastiga hag̃ua umi hekokyʼávape. Hiʼarive opromete haʼe ha ifamiliare oservitaha ‘saserdóteramo opa ararã’. Avei upepete Ñandejára ipochyjera ha ndokastigavéi umi isrraelítape (Núm. 25:7-13).

Añetehápe umi ansiáno koʼag̃agua natekotevẽi oporokastiga ojapo haguéicha Finehás, péro tekotevẽ ipyʼaguasu haʼéicha osolusiona hag̃ua umi provléma oĩva jepi kongregasiónpe. Péicha ojapo Guilherme; haʼe ningo ramónte ansiáno hague, ha ojejeruréma chupe oĩ hag̃ua peteĩ komite hudisiálpe ojejapóva peteĩ ansiáno hembiapo vaívape. Hiʼarive upe ansiáno  heta oipytyvõvaʼekue chupe imitãvépe. Guilherme omombeʼu: “Ndaikatúi jepi ni ake apenságui mbaʼépa ajapóta. Ahayhueterei upe ermánope, péro aikuaa ajapovaʼerãha opa mbaʼe Jehová heʼihaichaite. Upévare heta añemboʼe ha ahesaʼỹijo porã umi puvlikasión”. Upe rire Guilherme ipyʼaguasúma ombohovái hag̃ua pe situasión ijetuʼuetéva ha upéicha oipytyvõ pe ermánope (1 Tim. 4:11, 12).

Oiko jave koʼã mbaʼe umi ansiáno ipyʼaguasuvaʼerã ha ojapo la Biblia heʼihaichaite, péicha ohechaukáta ojeroviaha Jehováre ha ndohejaiha oñemongyʼa héra. Péro ndahaʼéi ansiánonte ipyʼaguasuvaʼerã; opavave kristiáno ndokyhyjeivaʼerã omombeʼu hag̃ua oĩramo hembiapo vaíva. Upéicha avei entéro ohechaukavaʼerã ohayhuveha Jehovápe ndojeheʼáivo umi oñemosẽva ndive kongregasióngui, haʼéramo jepe iñamigoite térã ihénte (1 Cor. 5:11-13).

Iñarandu rupi heta tapicha ndojejukareíri

Finehás ndojapói mbaʼeve iñakãrakúgui reínte, ojapoháicha umi imitãva. Jahechamína mbaʼéichapa ohechauka ipyʼaguasu ha iñaranduha. Peteĩ jey heta Manasés trivuygua oñomoirũ Rubén ha Gad trívu ndive ha omopuʼã peteĩ altár rrío Jordán ypýpe. Umi ótro isrraelíta oimoʼã opuʼãseha hikuái Ñandejárare, upémarõ ojeprepara ijehérsito reheve oñorairõ hag̃ua hendivekuéra (Jos. 22:11, 12).

Mbaʼépa ojapo Finehás? Oñembyaty umi omoakãva ndive, ha pyʼaguapýpe oporandu chupekuéra maʼerãpa ojapo pe altár. Haʼekuéra omombeʼu omopuʼã hague ‘oñemboja hag̃ua Ñandejára rendápe’ térã ohechauka hag̃ua akóinte oservitaha chupe. Finehás iñarandu ha ohecha raẽ mbaʼépa oiko, péicha rupi ndopái peteĩ jejuka guasúpe (Jos. 22:13-34).

Koʼág̃a rupi avei ñahendúramo oñeñeʼẽ vaiha peteĩ ermánore, jasegivaʼerã Finehás ehémplo ha jahecha raẽ mbaʼépa oiko. Upéicharõmante nañandepochymoʼãi ni nañañeʼẽvaimoʼãi avavére (Pro. 19:11).

Mbaʼéichapa ansianokuéra ikatu ohaʼanga Fineháspe? Peteĩ ermáno hérava Jaime, ha ojapómava diez áño rasa oservi hague ansiánoramo, heʼi: “Peteĩ ermáno omombeʼúramo chéve iprovlemaha ótro ndive, ajerure Jehovápe tachepytyvõ ani hag̃ua aladea avavépe, avei ikatu hag̃uáicha la Biblia rupive ameʼẽ konsého ou porãtava chupe. Pór ehémplo, peteĩ puvlikadóra ou omombeʼu chéve peteĩ ansiáno ambue kongregasiongua otrata vai hague chupe. Upe ermáno ningo che amígo, péro añeʼẽ rangue hendive voi, amomanduʼa pe ermánape mbaʼépa heʼi la Biblia jajapovaʼerãha péicha jave, ha haʼe chupe tekotevẽha oñemongeta hendive (Mat. 5:23, 24). Ko ermána osegi upe konsého, péro noñesolusionái pe provléma. Upémarõ amokyreʼỹ chupe ojepyʼamongeta jey hag̃ua ambue téystore.  Haʼe heʼi oñemboʼe jeytaha Jehovápe upe provlémare ha oñehaʼãtaha ombohasa reínte”.

Mbaʼéichapa opa ko provléma? Jaime omombeʼu: “Mése rire, pe puvlikadóra omombeʼu chéve pe ermáno ojediskulpa hague umi mbaʼe heʼivaʼekuére, upéi oinvita chupe osẽ hag̃ua opredika hendive, ha heʼi avei oguerohoryha chupe. Upéicha oiko porã jey hikuái. Ko provléma ningo ndopaporãmoʼãikuri añentremetérire ha adefendeve peteĩvape”. Ndareíri la Biblia heʼi: “Aníke pyaʼe reike ñeʼẽjoavýpe (pléito)” (Pro. 25:8, ÑÑB). Ansianokuéra iñarandu ha imbaʼerechakuaáva omokyreʼỹ umi ermáno ojoavývape ojapo hag̃ua la Biblia heʼíva ikatu hag̃uáicha oiko jey pyʼaguapýpe.

Ohecha raẽ mbaʼépa heʼi Jehová

Tiémpo rire Finehásgui oiko saserdóte guasu Israélpe. Haʼe ningo ipyahu guive ipyʼaguasu ha iñarandu, upéicha rupi ombohovaikuaa heta mbaʼe ijetuʼúva. Péro ojeroviágui Jehováre ipyʼaite guive osẽ porã chupe opa mbaʼe.

Peteĩ jey, táva Guibeáhpe, umi kuimbaʼe Benjamín trivuygua oviola ha ojuka peteĩ levíta rembirekópe. Upémarõ umi ótro isrraelíta osẽ oñorairõ hag̃ua Benjamín trívu ndive (Jue. 20:1-11). Oñemboʼéramo jepe oñorairõ mboyve, tuicha operde hikuái dos vése voi (Jue. 20:14-25). Opensáparaʼe hikuái oñemboʼe reiha ha Jehová oipotanteha ojeheja rei upe oikovaʼekue?

Finehás jepiveguáicha ojerovia Jehováre ha oporandu chupe: “Rosẽta piko roñorairõ jey hag̃ua ore ryvykuéra Benjamingua ndive, térãpa nahániri?”. Jehová ombohovái upe ñemboʼe ha oipytyvõ chupekuéra ogana hag̃ua pe gérra, upéi ohapy ha ohundi hikuái pe táva Guibeah (Jue. 20:27-48).

Mbaʼépa omboʼe ko ehémplo umi ansiáno ombohováivape provléma ijetuʼúva kongregasiónpe? Ndovaleiha ojedesespera ohechakuaáramo noñesolusionaiha umi provléma oñehaʼãramo jepe ha heta oñemboʼe Jehovápe. Upéva rangue, iporã imanduʼa hikuái Jesús heʼivaʼekuére: ‘Pejerure jey jeýkena, ha oñemeʼẽta peẽme; peheka meme, ha petopáta; pesegi pembota pe okẽ, ha ojeavríta peẽme’ (Luc. 11:9, NM). Ikatu oimoʼã Jehová noipytyvõpyaʼeiha chupekuéra, péro ndahesarairivaʼerã hikuái itiempoitépe oñembohovaitaha iñemboʼe.

Jahechamína mbaʼépa oikovaʼekue peteĩ kongregasión Irlandayguápe. Umi ermáno oikotevẽterei peteĩ Salón del Reino, péro noñemeʼẽi chupekuéra permíso omopuʼã hag̃ua. Káda ohónte hikuái, pe funsionário ombaʼapóva Urbanísmope upe távape ojoko chuguikuéra. Upémarõ umi ermáno oñemboʼe Jehovápe ha upéi oho Oficina Central de Urbanísmope. Ohendúparaʼe chupekuéra Jehová, ohendu haguéicha Fineháspe?

Peteĩ ansiáno upepegua omombeʼu: “Heta roñemboʼe rire roho pe Oficina Central de Urbanísmope. Upépe ojeʼe chéve rohaʼarõvaʼerãha heta semána roñeʼẽ hag̃ua pe omoakãva ndive, péro amo ipahápe upe árape voi roñemongeta hendive cinco minúto. Ko karai ohecha rire pe pláno, pyaʼe omeʼẽ oréve permíso romopuʼã hag̃ua pe Salón. Upe guive pe ótro karai ojokovaʼekue oikóvo orehegui pe konstruksión, tuicha okambia orendive. Ko situasión orepytyvõ rohechakuaa hag̃ua iñimportantetereiha ñañemboʼe”. Añetehápe, umi ansiáno ojerure meméva Jehovápe oipytyvõ hag̃ua chupekuéra, ojeroviakuaa haʼe katuete ombohovaitaha iñemboʼe.

Yma, Finehás oñangarekovaʼekue Jehová rembiguaikuérare. Upe rresponsavilida ipohýi, péro haʼe okumpli porã pe tembiapo ipyʼaguasu, iñarandu ha ojerovia rupi Jehováre. Ha Jehová oguerohory chupe upévare. Mil áño rire Esdras heʼi hese: ‘Finehás, Eleazar raʼy, oikovaʼekue Israel ruvicháramo; ha Ñandejára oĩ hendive’ (1 Cró. 9:20, ÑÑB). Tojeʼékena avei upéicha umi ansiáno koʼag̃aguáre ha opavave kristiáno iñeʼẽrendúvare Ñandejárape!